ವಿಕಲ್ಪ ಒಟಿಟಿ ಬಿಡುಗಡೆ ದಿನಾಂಕ ಫಿಕ್ಸ್: ಎಲ್ಲಿ, ಯಾವಾಗ ವೀಕ್ಷಿಸಬೇಕು?

ಕನ್ನಡ ಚಿತ್ರರಂಗದಲ್ಲಿ ವಿಭಿನ್ನ ಕಥಾಹಂದರದಿಂದ ಗಮನ ಸೆಳೆದಿದ್ದ 'ವಿಕಲ್ಪ' ಸಿನಿಮಾ ಜೂನ್ 12ರಿಂದ ಪ್ರಮುಖ ಒಟಿಟಿ ಸಂಸ್ಥೆಯಾದ ಜೀ5 (ZEE5) ನಲ್ಲಿ ಪ್ರಸಾರವಾಗಲಿದೆ. ಈ ಕುರಿತು ಜೀ5 ಸಂಸ್ಥೆಯು ತನ್ನ ಸೋಷಿಯಲ್ ಮೀಡಿಯಾ ಖಾತೆಯಲ್ಲಿ ಅಧಿಕೃತವಾಗಿ ಮಾಹಿತಿ ಹಂಚಿಕೊಂಡಿದ್ದು, "ಸತ್ಯ ಮತ್ತು ಭ್ರಮೆಯ ನಡುವೆ ಸಿಲುಕಿದ ಜೀವ. ಒಂದು ರೋಚಕ ಸೈಕಲಾಜಿಕಲ್ ಥ್ರಿಲ್ಲರ್ - 'ವಿಕಲ್ಪ' ಜೂನ್ 12ರಿಂದ ನಿಮ್ಮ ಕನ್ನಡ ZEE5ನಲ್ಲಿ" ಎಂದು ಬರೆದುಕೊಂಡಿದೆ.

ಈ ಚಿತ್ರದ ಮುಖ್ಯ ಭೂಮಿಕೆಯಲ್ಲಿ ನಾಗಶ್ರೀ ಹೆಬ್ಬಾರ್, ಹರಿಣಿ ಶ್ರೀಕಾಂತ್, ಸಂಧ್ಯಾ ವಿನಾಯಕ್, ವಡ್ಡಿನಗದ್ದೆ ಗಣಪತಿ ಹೆಗಡೆ, ಸ್ವರೂಪ್ ಬುಚ್ಚ ಮತ್ತು ಪೂಜಾ ಬುಚ್ಚ ಸೇರಿದಂತೆ ಹಲವು ಕಲಾವಿದರು ನಟಿಸಿದ್ದಾರೆ. ಯಶಸ್ವಿ ಉದ್ಯಮಿಯೊಬ್ಬನ ಜೀವನದ ಸುತ್ತ ಈ ಚಿತ್ರದ ಕಥೆ ಸಾಗುತ್ತದೆ. ಮೇಲ್ನೋಟಕ್ಕೆ ಎಲ್ಲವೂ ಸುಲಲಿತವಾಗಿ ಕಾಣುವ ಆತನ ಬದುಕಿನಲ್ಲಿ, ಬಾಲ್ಯದಿಂದಲೂ ಕಾಡುತ್ತಿರುವ ಕೆಲವು ವಿಚಿತ್ರ ಮತ್ತು ವಿವರಿಸಲಾಗದ ಭಯಗಳು ಹೇಗೆ ಆತನ ನೆಮ್ಮದಿ ಕೆಡಿಸುತ್ತವೆ ಹಾಗೂ ಆತನ ಹಳೆಯ ನೆನಪುಗಳು ಮರುಕಳಿಸಿದಾಗ ಎದುರಾಗುವ ಟ್ವಿಸ್ಟ್‌ ಏನು ಎಂಬುದೇ ಚಿತ್ರದ ಮುಖ್ಯ ಕಥಾವಸ್ತು.

ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾದಾಗ ಚಿತ್ರದ ಕಥೆ ಮತ್ತು ನಿರೂಪಣೆಯಲ್ಲಿ ಕೆಲವು ಏರಿಳಿತಗಳಿದ್ದರೂ, ಚಿತ್ರದ ಹಿನ್ನೆಲೆ ಸಂಗೀತ, ಛಾಯಾಗ್ರಹಣ ಮತ್ತು ಯಕ್ಷಗಾನ ಶೈಲಿಯ ಹಾಡುಗಳು ಪ್ರೇಕ್ಷಕರಿಂದ ಉತ್ತಮ ಪ್ರಶಂಸೆ ಪಡೆದುಕೊಂಡಿದ್ದವು. ವಿಶೇಷವಾಗಿ 'ಅಮ್ಮ ನೀನೇ ಎಲ್ಲಾ' ಹಾಡು ಚಿತ್ರದ ಪ್ರಮುಖ ಆಕರ್ಷಣೆಯಾಗಿತ್ತು. ಸೈಕಲಾಜಿಕಲ್ ಥ್ರಿಲ್ಲರ್ ಮತ್ತು ವಿಭಿನ್ನ ಕಥೆಗಳನ್ನು ಇಷ್ಟಪಡುವ ಚಿತ್ರಪ್ರೇಮಿಗಳಿಗೆ ಈ ಸಿನಿಮಾ ಒಟಿಟಿಯಲ್ಲಿ ಉತ್ತಮ ಮನರಂಜನೆ ನೀಡಲಿದ್ದು, ಡಿಜಿಟಲ್ ವೇದಿಕೆಯಲ್ಲಿ ಚಿತ್ರಕ್ಕೆ ಮತ್ತಷ್ಟು ಉತ್ತಮ ಪ್ರತಿಕ್ರಿಯೆ ಸಿಗುವ ನಿರೀಕ್ಷೆಯಿದೆ.