ಹುಡುಗರು ಬೈದರೆ ತಪ್ಪಿಲ್ಲ, ಹುಡುಗಿಯರು ಬೈದರೆ ಸಂಸ್ಕೃತಿಗೆ ಆಘಾತವೇ?: ಪ್ರಧಾನಿ ವಿರುದ್ಧ ರಾಹುಲ್ ಗಾಂಧಿ ವಾಗ್ದಾಳಿ

ನವದೆಹಲಿಯಲ್ಲಿ ನಡೆದ 'ಛಾತ್ರೋಂ ಕೀ ಗೂಂಜ್' (ವಿದ್ಯಾರ್ಥಿಗಳ ಪ್ರತಿಧ್ವನಿ) ಕಾರ್ಯಕ್ರಮದಲ್ಲಿ ವಿದ್ಯಾರ್ಥಿನಿಯರೊಂದಿಗೆ ಸಂವಾದ ನಡೆಸಿದ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ, ಪ್ರಧಾನಿ ನರೇಂದ್ರ ಮೋದಿ ಅವರ ಇತ್ತೀಚಿನ ಹೇಳಿಕೆಯೊಂದನ್ನು ತೀವ್ರವಾಗಿ ಖಂಡಿಸಿದ್ದಾರೆ.

ಜಂತರ್ ಮಂತರ್‌ನಲ್ಲಿ ನಡೆದ ಪ್ರತಿಭಟನೆಯ ವೇಳೆ ಹುಡುಗಿಯರು ಅವಾಚ್ಯ ಶಬ್ದಗಳನ್ನು ಬಳಸಿದ್ದನ್ನು ನೋಡಿ ತಮಗೆ 'ಸಾಂಸ್ಕೃತಿಕ ಆಘಾತ'ವಾಯಿತು ಎಂಬ ಪ್ರಧಾನಿ ಹೇಳಿಕೆಯ ವಿಡಿಯೋವನ್ನು ಪ್ರದರ್ಶಿಸಿದ ಅವರು, ಸಮಾಜದ ಪುರುಷಪ್ರಧಾನ ಮನಸ್ಥಿತಿಯನ್ನು ಕಟುವಾಗಿ ಟೀಕಿಸಿದರು. ಪರೀಕ್ಷಾ ಪತ್ರಿಕೆ ಸೋರಿಕೆ ವಿರುದ್ಧದ ಪ್ರತಿಭಟನೆಯಲ್ಲಿ ಹುಡುಗರು ಮತ್ತು ಹುಡುಗಿಯರು ಇಬ್ಬರೂ ನಿಂದನಾತ್ಮಕ ಪದಗಳನ್ನು ಬಳಸಿದ್ದರು. ಆದರೆ, ಹುಡುಗರು ನಿಂದಿಸಿದರೆ ಅದು ಸಹಜ ಎನ್ನುವ ಸಮಾಜ, ಅದೇ ಕೆಲಸವನ್ನು ಹುಡುಗಿಯರು ಮಾಡಿದರೆ ಸಂಸ್ಕೃತಿಗೆ ಧಕ್ಕೆಯಾಯಿತು ಎಂದು ಬೊಟ್ಟು ಮಾಡುವುದು ತಾರತಮ್ಯದ ಪರಮಾವಧಿ ಎಂದು ಅವರು ನೇರವಾಗಿ ವಾಗ್ದಾಳಿ ನಡೆಸಿದರು. ಹೆಣ್ಣುಮಕ್ಕಳನ್ನು ಪಂಜರದಲ್ಲಿ ಬಂಧಿಸಿ, ನಿಯಂತ್ರಣದಲ್ಲಿಡಬೇಕು ಎನ್ನುವ ಮನಸ್ಥಿತಿಯನ್ನು ನಾವೆಲ್ಲರೂ ವಿರೋಧಿಸಬೇಕಿದೆ ಎಂದು ಅವರು ಕರೆ ನೀಡಿದರು.

ಸಮಾನತೆಯ ಪ್ರತಿಪಾದನೆ

ಮಹಿಳೆಯರನ್ನು ಕೇವಲ ತಂದೆ, ಗಂಡ ಅಥವಾ ಮಗನ ಅಧೀನದಲ್ಲಿರುವವರಂತೆ ನೋಡುವ 'ಮನುಸ್ಮೃತಿ'ಯ ಶ್ಲೋಕವೊಂದನ್ನು ಉಲ್ಲೇಖಿಸಿದ ರಾಹುಲ್ ಗಾಂಧಿ, ಇಂತಹ ವಿಚಾರಧಾರೆಗಳು ಆಧುನಿಕ ಸಮಾಜಕ್ಕೆ ನಾಚಿಕೆಗೇಡು ಎಂದರು. ಮಹಿಳೆಯರು ಯಾರಿಗೂ ಸೇರಿದವರಲ್ಲ, ಅವರು ತಮಗೆ ತಾವೇ ಸೇರಿದವರು ಎಂದು ಸ್ಪಷ್ಟಪಡಿಸಿದರು. ಹೆಣ್ಣುಮಕ್ಕಳು ಕೇವಲ ಮಗಳು, ಹೆಂಡತಿ ಅಥವಾ ತಾಯಿಯ ಪಾತ್ರಗಳಿಗೆ ಮಾತ್ರವೇ ಸೀಮಿತವಾಗಬಾರದು, ಬದಲಾಗಿ ತಮ್ಮದೇ ಆದ ಪ್ರತ್ಯೇಕ ಅಸ್ತಿತ್ವವನ್ನು ಕಟ್ಟಿಕೊಳ್ಳಬೇಕು ಎಂದು ವಿದ್ಯಾರ್ಥಿನಿಯರನ್ನು ಹುರಿದುಂಬಿಸಿದರು.

ದೇಶದ 70 ಕೋಟಿ ಮಹಿಳೆಯರ ಕನಸುಗಳು, ಕಲ್ಪನೆಗಳು ಮತ್ತು ಅವರ ವಿಶಿಷ್ಟ ಪಯಣವೇ ಭಾರತದ ಅತಿದೊಡ್ಡ ಶಕ್ತಿ ಎಂದು ಅವರು ಬಣ್ಣಿಸಿದರು.

ಪುರುಷಪ್ರಾಬಲ್ಯವನ್ನು ಅಳಿಸಿಹಾಕುವಂತೆ ಕರೆ

ಮಹಿಳೆಯರು ಸ್ವಾಭಾವಿಕವಾಗಿ ಪುರುಷರಿಗಿಂತ ಹೆಚ್ಚು ಸೂಕ್ಷ್ಮ, ಸೌಮ್ಯ ಹಾಗೂ ಮುಂದಾಲೋಚನೆ ಉಳ್ಳವರು ಎಂದು ಅಭಿಪ್ರಾಯಪಟ್ಟ ರಾಹುಲ್ ಗಾಂಧಿ, ಪುರುಷಪ್ರಧಾನ ವ್ಯವಸ್ಥೆಯು ಮಹಿಳೆಯರನ್ನು ಹೆದರಿಸಿ, ನಿಯಂತ್ರಿಸಲು ಪ್ರಯತ್ನಿಸುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿದರು. ಈ ವ್ಯವಸ್ಥೆಯನ್ನು ಒಡೆದು ಹಾಕುವಂತೆ ವಿದ್ಯಾರ್ಥಿನಿಯರಿಗೆ ಕರೆ ನೀಡಿದ ಅವರು, ಸಮಾಜದಲ್ಲಿ ತಮ್ಮ ಸ್ಥಾನಕ್ಕಾಗಿ ಹೆಮ್ಮೆಯಿಂದ ಹಾಗೂ ಧೈರ್ಯದಿಂದ ಹೋರಾಡುವಂತೆ ಪ್ರೇರೇಪಿಸಿದರು.

ಇದೇ ವೇಳೆ, ಅತ್ಯಾಚಾರಗಳು 'ಇಂಡಿಯಾ'ದಲ್ಲಿ ಆಗುತ್ತವೆಯೇ ಹೊರತು 'ಭಾರತ'ದಲ್ಲಿ ಅಲ್ಲ ಎಂಬ ಆರೆಸ್ಸೆಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರ ಹಳೆಯ ಹೇಳಿಕೆ ಹಾಗೂ ಶೇಕಡಾ 80ರಷ್ಟು ಅತ್ಯಾಚಾರಗಳಿಗೆ ಮಹಿಳೆಯರೇ ಕಾರಣ ಎಂಬ ಹರಿಯಾಣದ ಮಾಜಿ ಮುಖ್ಯಮಂತ್ರಿ ಎಂ.ಎಲ್. ಖಟ್ಟರ್ ಅವರ ವಿವಾದಾತ್ಮಕ ಹೇಳಿಕೆಗಳನ್ನು ಉಲ್ಲೇಖಿಸಿದರು. ಭ್ರೂಣಹತ್ಯೆ, ಕೌಟುಂಬಿಕ ದೌರ್ಜನ್ಯ, ಮತ್ತು ಆರ್ಥಿಕ ಹಿಂಸೆಯಂತಹ ಅಂಕಿ-ಅಂಶಗಳನ್ನು ಮುಂದಿಟ್ಟ ಅವರು, ಇಂತಹ ತಾರತಮ್ಯದ ಮನಸ್ಥಿತಿಯ ವಿರುದ್ಧ ನಿರಂತರ ಹೋರಾಟದ ಅಗತ್ಯವಿದೆ ಎಂದು ಪ್ರತಿಪಾದಿಸಿದರು.