ಬಾಕ್ಸ್ ಆಫೀಸ್‌ನಲ್ಲಿ 'ಧಮಾಲ್ 4' ಧೂಳಿಪಟ: ಕೇವಲ 4 ದಿನಗಳಲ್ಲಿ 100 ಕೋಟಿ ರೂ. ಕ್ಲಬ್ ಸೇರಿದ ಅಜಯ್ ದೇವಗನ್ ಚಿತ್ರ

ಬಾಲಿವುಡ್‌ನ ಖ್ಯಾತ ಹಾಸ್ಯ ಪ್ರಧಾನ ಚಿತ್ರಗಳ ಸರಣಿಯಾದ ‘ಧಮಾಲ್’ ಫ್ರಾಂಚೈಸಿಯ ನಾಲ್ಕನೇ ಕಂತು ‘ಧಮಾಲ್ 4’ ಬಾಕ್ಸ್ ಆಫೀಸ್‌ನಲ್ಲಿ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಜುಲೈ 10 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದ್ದ ಈ ಚಿತ್ರವು ವಿಮರ್ಶಕರಿಂದ ಮಿಶ್ರ ಪ್ರತಿಕ್ರಿಯೆ ಪಡೆದಿದ್ದರೂ, ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಯಶಸ್ವಿಯಾಗಿದೆ. ಅತ್ಯಂತ ನಿರ್ಣಾಯಕ ಎನಿಸಿದ್ದ ಸೋಮವಾರದ (ನಾಲ್ಕನೇ ದಿನ) ಪರೀಕ್ಷೆಯಲ್ಲೂ ಉತ್ತಮ ಕಲೆಕ್ಷನ್ ಮಾಡುವ ಮೂಲಕ ಸಿನಿಮಾ ಜಾಗತಿಕವಾಗಿ ಕೇವಲ ನಾಲ್ಕೇ ದಿನಗಳಲ್ಲಿ 100 ಕೋಟಿ ರೂ. ಗಳಿಕೆಯ ಮಹತ್ವದ ಮೈಲಿಗಲ್ಲನ್ನು ದಾಟಿದೆ.

ಮೊದಲ ವಾರಾಂತ್ಯದ ಭರ್ಜರಿ ಗಳಿಕೆ

ಸ್ಟಾರ್ ನಟರಾದ ಅಜಯ್ ದೇವಗನ್, ರಿತೇಶ್ ದೇಶ್ಮುಖ್, ಅರ್ಷದ್ ವಾರ್ಸಿ ಮತ್ತು ಜಾವೇದ್ ಜಾಫರಿ ಮುಖ್ಯ ಭೂಮಿಕೆಯಲ್ಲಿರುವ ಈ ಚಿತ್ರವು ಭರ್ಜರಿ ಓಪನಿಂಗ್ ಪಡೆದುಕೊಂಡಿತ್ತು. ಮೊದಲ ದಿನ ಭಾರತದಲ್ಲಿ 14 ಕೋಟಿ ರೂಪಾಯಿ ನಿವ್ವಳ ಗಳಿಕೆ ಕಂಡಿದ್ದ ಈ ಸಿನಿಮಾ, ವಾರಾಂತ್ಯದಲ್ಲಿ ಭಾರಿ ಬೆಳವಣಿಗೆ ಪ್ರದರ್ಶಿಸಿತು. ಶನಿವಾರ (ಎರಡನೇ ದಿನ) 22.50 ಕೋಟಿ ರೂ. ಹಾಗೂ ಭಾನುವಾರ 28.50 ಕೋಟಿ ರೂಪಾಯಿ ಬಾಚಿಕೊಳ್ಳುವ ಮೂಲಕ ಮೊದಲ ವಾರಾಂತ್ಯದಲ್ಲೇ ಭಾರತದಲ್ಲಿ ಬರೋಬ್ಬರಿ 65 ಕೋಟಿ ರೂಪಾಯಿ ಗಳಿಕೆ ದಾಖಲಿಸಿತ್ತು.

ಸೋಮವಾರದ ಕಲೆಕ್ಷನ್ ವಿವರ

ಚಿತ್ರದ ಗಳಿಕೆಯ ವೇಗ ನಾಲ್ಕನೇ ದಿನವಾದ ಸೋಮವಾರ ಸ್ವಲ್ಪ ಕುಸಿತ ಕಂಡಿದೆಯಾದರೂ ತೃಪ್ತಿದಾಯಕ ಕಲೆಕ್ಷನ್ ಮಾಡಿದೆ. ಟ್ರೇಡ್ ಟ್ರ್ಯಾಕರ್ ‘ಸ್ಯಾಕ್ನಿಲ್ಕ್’ ನೀಡಿರುವ ಮಾಹಿತಿ ಪ್ರಕಾರ, ಸೋಮವಾರ ದೇಶದಾದ್ಯಂತ ಒಟ್ಟು 10,598 ಪ್ರದರ್ಶನಗಳಿಂದ ಚಿತ್ರವು ಅಂದಾಜು 8.35 ಕೋಟಿ ರೂಪಾಯಿ ಗಳಿಕೆ ಮಾಡಿದೆ. ಇದರೊಂದಿಗೆ ಭಾರತದಲ್ಲಿ ಚಿತ್ರದ ಒಟ್ಟು ಗಳಿಕೆ 73.35 ಕೋಟಿ ರೂಪಾಯಿ ತಲುಪಿದ್ದು, ಭಾರತದ ಒಟ್ಟು ಕಲೆಕ್ಷನ್ 87.85 ಕೋಟಿ ರೂಪಾಯಿ .

ಜಾಗತಿಕವಾಗಿ 102 ಕೋಟಿ ರೂಪಾಯಿ ದಾಟಿದ ಸಾಧನೆ

ಭಾರತದ ಮಾರುಕಟ್ಟೆಯ ಹೊರತಾಗಿಯೂ ವಿದೇಶಗಳಲ್ಲೂ ಚಿತ್ರಕ್ಕೆ ಉತ್ತಮ ಬೆಂಬಲ ಸಿಕ್ಕಿದೆ. ಸೋಮವಾರ ವಿದೇಶಿ ಮಾರುಕಟ್ಟೆಯಿಂದ 1.50 ಕೋಟಿ ರೂಪಾಯಿ ಗಳಿಸಿರುವ ‘ಧಮಾಲ್ 4’, ಇದುವರೆಗೆ ಒಟ್ಟು 14.50 ಕೋಟಿ ರೂಪಾಯಿ ವಿದೇಶಿ ಗಳಿಕೆ ಕಂಡಿದೆ. ಇದರೊಂದಿಗೆ ಚಿತ್ರದ ವಿಶ್ವಾದ್ಯಂತ ಒಟ್ಟು ಗಳಿಕೆ ನಾಲ್ಕನೇ ದಿನದ ಅಂತ್ಯಕ್ಕೆ 102.35 ಕೋಟಿ ರೂಪಾಯಿ ತಲುಪುವ ಮೂಲಕ ಕೇವಲ ನಾಲ್ಕು ದಿನಗಳಲ್ಲೇ ನೂರು ಕೋಟಿಯ ಗಡಿ ದಾಟಿದೆ.

ಹಳೆಯ ರೆಕಾರ್ಡ್ ಬ್ರೇಕ್ ಮಾಡಿದ 'ಧಮಾಲ್ 4'

ಈ ಕಲೆಕ್ಷನ್‌ನೊಂದಿಗೆ ‘ಧಮಾಲ್ 4’ ಚಿತ್ರವು ತನ್ನದೇ ಫ್ರಾಂಚೈಸಿಯ ಹಿಂದಿನ ಚಿತ್ರಗಳ ದಾಖಲೆಯನ್ನು ಮೀರಿಸಿದೆ. 2019 ರಲ್ಲಿ ಬಿಡುಗಡೆಯಾಗಿದ್ದ ‘ಟೋಟಲ್ ಧಮಾಲ್’ ತನ್ನ ಮೊದಲ ಭಾನುವಾರ 25.5 ಕೋಟಿ ರೂಪಾಯಿ ಗಳಿಸಿತ್ತು ಹಾಗೂ ಆರಂಭಿಕ ವಾರಾಂತ್ಯದಲ್ಲಿ ಭಾರತದಲ್ಲಿ 62.4 ಕೋಟಿ ರೂಪಾಯಿ ನಿವ್ವಳ ಕಲೆಕ್ಷನ್ ಮಾಡಿತ್ತು. ಆದರೆ ಈ ಬಾರಿ ‘ಧಮಾಲ್ 4’ ವಾರಾಂತ್ಯದಲ್ಲೇ 65 ಕೋಟಿ ರೂಪಾಯಿ ಗಳಿಸಿ ಹೊಸ ಮೈಲಿಗಲ್ಲು ನೆಟ್ಟಿದೆ. ಅಷ್ಟೇ ಅಲ್ಲದೆ, ಇತ್ತೀಚೆಗೆ ಬಿಡುಗಡೆಯಾಗಿದ್ದ ಮತ್ತೊಂದು ಬಹುನಿರೀಕ್ಷಿತ ಚಿತ್ರ ‘ವೆಲ್ಕಮ್ ಟು ದಿ ಜಂಗಲ್’ (ಮೂರನೇ ದಿನ 24.75 ಕೋಟಿ ರೂಪಾಯಿ ನಿವ್ವಳ ಗಳಿಸಿ, 3 ದಿನಗಳ ಒಟ್ಟು ಕಲೆಕ್ಷನ್ 63.75 ಕೋಟಿ ರೂಪಾಯಿ ಹೊಂದಿತ್ತು) ಚಿತ್ರದ ಗಳಿಕೆಯನ್ನೂ ಇದು ಹಿಂದಿಕ್ಕಿದೆ.

ಇಂದ್ರ ಕುಮಾರ್ ನಿರ್ದೇಶಿಸಿರುವ ಈ ಮಲ್ಟಿಸ್ಟಾರರ್ ಸಿನಿಮಾವನ್ನು ಟಿ-ಸೀರೀಸ್ ಫಿಲ್ಮ್ಸ್, ಪನೋರಮಾ ಸ್ಟುಡಿಯೋಸ್, ದೇವಗನ್ ಫಿಲ್ಮ್ಸ್, ಮಾರುತಿ ಇಂಟರ್ನ್ಯಾಷನಲ್ ಮತ್ತು ಆನಂದ್ ಪಂಡಿತ್ ಮೋಷನ್ ಪಿಕ್ಚರ್ಸ್ ಜಂಟಿಯಾಗಿ ನಿರ್ಮಿಸಿವೆ. ಚಿತ್ರದಲ್ಲಿ ರವಿ ಕಿಶನ್, ಸಂಜಯ್ ಮಿಶ್ರಾ, ಉಪೇಂದ್ರ ಲಿಮಾಯೆ, ಅಂಜಲಿ ಆನಂದ್, ಸಂಜೀದಾ ಶೇಖ್, ಇಶಾ ಗುಪ್ತಾ ಸೇರಿದಂತೆ ದೊಡ್ಡ ತಾರಾಬಳಗವೇ ನಟಿಸಿದೆ.