ಸಾಮಾಜಿಕ ಜಾಲತಾಣಗಳು ಮತ್ತು ಮೆಸೇಜಿಂಗ್ ಆ್ಯಪ್‌ಗಳಲ್ಲಿ ತುಳು ಲಿಪಿಯ ಬಳಕೆಯನ್ನು ಸುಲಭಗೊಳಿಸುವ ಮೂಲಕ ‘ಕುರಲ್ ತುಳು ಟಚ್’ ತುಳು ಭಾಷೆಯ ಡಿಜಿಟಲ್ ಅಸ್ತಿತ್ವವನ್ನು ಮತ್ತಷ್ಟು ಬಲಪಡಿಸುವ ನಿರೀಕ್ಷೆಯಿದೆ.
ತುಳು ಲಿಪಿಗೆ ಡಿಜಿಟಲ್ ಸ್ಪರ್ಶ: ಆಂಡ್ರಾಯ್ಡ್‌ಗೆ ‘ಕುರಲ್ ತುಳು ಟಚ್’ ಕೀಬೋರ್ಡ್
‘ಕುರಲ್ ತುಳು ಟಚ್’ ಕೀಬೋರ್ಡ್ ಪ್ರಸ್ತುತ ‘ಬಾರವು ಸಾರವು’ ಆ್ಯಪ್ ಮೂಲಕ ಆಂಡ್ರಾಯ್ಡ್ ಫೋನ್‌ಗಳಲ್ಲಿ ಲಭ್ಯವಿದೆ. ಬಳಕೆದಾರರು ಕೀಬೋರ್ಡ್ ಸಕ್ರಿಯಗೊಳಿಸಿ ವಿವಿಧ ಅಪ್ಲಿಕೇಶನ್‌ಗಳಲ್ಲಿ ತುಳು ಲಿಪಿಯಲ್ಲಿ ಬರೆಯಬಹುದು.
ತುಳು ಭಾಷೆಯ ಡಿಜಿಟಲ್ ಬಳಕೆಗೆ ಮತ್ತೊಂದು ಮಹತ್ವದ ಹೆಜ್ಜೆ ಇಡಲಾಗಿದೆ. ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್ ಬಳಕೆದಾರರು ತುಳು ಲಿಪಿಯಲ್ಲೇ ನೇರವಾಗಿ ಟೈಪ್ ಮಾಡಲು ಸಾಧ್ಯವಾಗುವ ‘ಕುರಲ್ ತುಳು ಟಚ್’ ಎಂಬ ಹೊಸ ಕೀಬೋರ್ಡ್‌ನ್ನು ಅಭಿವೃದ್ಧಿಪಡಿಸಲಾಗಿದೆ. ಈ ಕೀಬೋರ್ಡ್ ಮೂಲಕ ವಾಟ್ಸಾಪ್ ಸೇರಿದಂತೆ ವಿವಿಧ ಡಿಜಿಟಲ್ ವೇದಿಕೆಗಳಲ್ಲಿ ತುಳು ಲಿಪಿಯಲ್ಲಿ ಸಂದೇಶಗಳನ್ನು ಕಳುಹಿಸಬಹುದು.
‘ಕುರಲ್ ತುಳು ಟಚ್’ ಕೀಬೋರ್ಡ್ ಪ್ರಸ್ತುತ ʼಬಾರವು ಸಾರವು’ ಆ್ಯಪ್ ಮೂಲಕ ಆಂಡ್ರಾಯ್ಡ್ ಫೋನ್‌ಗಳಲ್ಲಿ ಲಭ್ಯವಿದೆ. ಬಳಕೆದಾರರು ಕೀಬೋರ್ಡ್ ಸಕ್ರಿಯಗೊಳಿಸಿ ವಿವಿಧ ಅಪ್ಲಿಕೇಶನ್‌ಗಳಲ್ಲಿ ತುಳು ಲಿಪಿಯಲ್ಲಿ ಬರೆಯಬಹುದು. ಟೈಪ್ ಮಾಡಿದ ಬರಹವನ್ನು ಸ್ಟಿಕ್ಕರ್‌ಗಳಾಗಿ ಪರಿವರ್ತಿಸಿ ಚಾಟ್‌ಗಳಲ್ಲಿ ಹಂಚಿಕೊಳ್ಳುವ ಸೌಲಭ್ಯವೂ ಇದೆ.
ಎರಡು ವಾರಗಳಲ್ಲಿ ಕೀಬೋರ್ಡ್ ಅಭಿವೃದ್ಧಿ
ಸಾಫ್ಟ್‌ವೇರ್ ಡೆವಲಪರ್‌ಗಳಾದ ಹರ್ಷಿತ್ ದೇವಾಡಿಗ ಮತ್ತು ಚೈತ್ರಾ ಪೂಜಾರಿ ಈ ಕೀಬೋರ್ಡ್ ಅಭಿವೃದ್ಧಿಪಡಿಸಿದ್ದಾರೆ. ಸುಮಾರು ಎರಡು ವಾರಗಳಲ್ಲಿ ಕೀಬೋರ್ಡ್ ಸಿದ್ಧಪಡಿಸಲಾಗಿದ್ದು, ಸುಮಾರು ಮೂರು ವರ್ಷಗಳ ಹಿಂದೆ ಅವರು ರೂಪಿಸಿದ್ದ ತುಳು ಭಾಷೆ ಮತ್ತು ಲಿಪಿ ಕಲಿಕಾ ಆ್ಯಪ್‌ನ ಅನುಭವವೂ ಇದಕ್ಕೆ ನೆರವಾಗಿದೆ. ಫಾಂಟ್ ಮ್ಯಾಪಿಂಗ್‌ ಮಾಡುವುದು ಅಭಿವೃದ್ಧಿಯ ಪ್ರಮುಖ ಸವಾಲುಗಳಲ್ಲಿ ಒಂದಾಗಿತ್ತು. ತುಳು-ತಿಗಳಾರಿ ಲಿಪಿ ಯೂನಿಕೋಡ್ ಮಾನದಂಡದಲ್ಲಿ ಸೇರ್ಪಡೆಯಾಗಿರುವುದು ಇಂತಹ ಡಿಜಿಟಲ್ ಉಪಕರಣಗಳ ಅಭಿವೃದ್ಧಿಗೆ ತಾಂತ್ರಿಕ ಆಧಾರ ಒದಗಿಸಿದೆ. ಯೂನಿಕೋಡ್‌ನ ಪ್ರಸ್ತುತ ಮಾನದಂಡದಲ್ಲಿ ತುಳು-ತಿಗಳಾರಿ ಲಿಪಿಗೆ ಪ್ರತ್ಯೇಕ ಬ್ಲಾಕ್‌ ಕೂಡ ಇದೆ.
ಡಿಜಿಟಲ್ ಯುಗದಲ್ಲಿ ತುಳು ಲಿಪಿಯ ಬಳಕೆ ವಿಸ್ತರಣೆ
ಸಾಮಾಜಿಕ ಜಾಲತಾಣಗಳು ಮತ್ತು ಮೆಸೇಜಿಂಗ್ ಆ್ಯಪ್‌ಗಳಲ್ಲಿ ತುಳು ಲಿಪಿಯ ಬಳಕೆಯನ್ನು ಸುಲಭಗೊಳಿಸುವ ಮೂಲಕ ‘ಕುರಲ್ ತುಳು ಟಚ್’ ತುಳು ಭಾಷೆಯ ಡಿಜಿಟಲ್ ಅಸ್ತಿತ್ವವನ್ನು ಮತ್ತಷ್ಟು ಬಲಪಡಿಸುವ ನಿರೀಕ್ಷೆಯಿದೆ. ಮೊಬೈಲ್ ಮೂಲಕವೇ ಮಾತೃಭಾಷೆಯ ಲಿಪಿಯಲ್ಲಿ ಸಂವಹನ ನಡೆಸಲು ಇದು ಬಳಕೆದಾರರಿಗೆ ಹೊಸ ಅವಕಾಶ ಕಲ್ಪಿಸುತ್ತದೆ.
