RSSಗೆ ಪ್ರಶ್ನೆ ಕೇಳಲು ಪ್ರಿಯಾಂಕ್ ಖರ್ಗೆಗೆ ಅಧಿಕಾರ ಇಲ್ಲ!

ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್‌) ನೋಂದಣಿ ಮತ್ತು ಅದರ ಆರ್ಥಿಕ ಮೂಲಗಳ ಕುರಿತು ಮಾಹಿತಿ ಕೋರಿ ಸಚಿವ ಪ್ರಿಯಾಂಕ್ ಖರ್ಗೆ ಅವರು ಬರೆದಿರುವ ಪತ್ರವು ರಾಜ್ಯ ರಾಜಕೀಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಈ ವಿಷಯಕ್ಕೆ ಸಂಬಂಧಿಸಿದಂತೆ ಕಾನೂನಾತ್ಮಕ ಅಂಶಗಳ ಕುರಿತು ಕರ್ನಾಟಕದ ಮಾಜಿ ಅಡ್ವೊಕೇಟ್ ಜನರಲ್ ಹಾಗೂ ಹಿರಿಯ ವಕೀಲರಾದ ಬಿ.ವಿ. ಆಚಾರ್ಯ ಅವರು 'ದ ಫೆಡರಲ್ ಕರ್ನಾಟಕ'ಕ್ಕೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಪ್ರಿಯಾಂಕ್ ಖರ್ಗೆ ಅವರ ಅಧಿಕಾರವನ್ನೇ ಪ್ರಶ್ನಿಸಿದ್ದಾರೆ.

ಸಂದರ್ಶನದಲ್ಲಿ ಮಾತನಾಡಿದ ಬಿ.ವಿ. ಆಚಾರ್ಯ ಅವರು, "ಗೃಹ ಸಚಿವರಾಗಿ ಪ್ರಿಯಾಂಕ್ ಖರ್ಗೆ ಅವರಿಗೆ ಇಂತಹ ಪತ್ರ ಬರೆಯುವ ಅಥವಾ ವಿವರಗಳನ್ನು ಕೇಳುವ ಯಾವುದೇ ಕಾನೂನಾತ್ಮಕ ಅಧಿಕಾರವಿಲ್ಲ. ಆರ್‌ಎಸ್‌ಎಸ್ ಒಂದು ಅಖಿಲ ಭಾರತ ಮಟ್ಟದ ಸಂಘಟನೆಯಾಗಿದ್ದು, ಅದರ ಕೇಂದ್ರ ಕಚೇರಿ ನಾಗಪುರದಲ್ಲಿದೆ. ಕರ್ನಾಟಕದ ಗೃಹ ಸಚಿವರ ಅಧಿಕಾರ ವ್ಯಾಪ್ತಿ ಕೇವಲ ರಾಜ್ಯದ ಗಡಿಯೊಳಗೆ ಮಾತ್ರ ಸೀಮಿತವಾಗಿರುತ್ತದೆ. ಬೇರೆ ರಾಜ್ಯದಲ್ಲಿ ಕೇಂದ್ರ ಕಚೇರಿ ಹೊಂದಿರುವ ಸಂಸ್ಥೆಯ ವಿವರ ಕೇಳಲು ಇವರಿಗೆ ಹಕ್ಕಿಲ್ಲ," ಎಂದು ಪ್ರತಿಪಾದಿಸಿದರು.

ಕಾನೂನುಬದ್ಧ ಬಾಧ್ಯತೆ ಇಲ್ಲ

ಯಾವುದೇ ಸಚಿವರು ಅಥವಾ ಸರ್ಕಾರಿ ಅಧಿಕಾರಿಗಳು ನೋಟಿಸ್ ನೀಡುವಾಗ, ಅದು ಸಂವಿಧಾನದ ಯಾವ ಕಾಯ್ದೆ ಅಥವಾ ಸೆಕ್ಷನ್ ಅಡಿಯಲ್ಲಿ ಬರುತ್ತದೆ ಎಂಬುದನ್ನು ಉಲ್ಲೇಖಿಸಬೇಕು. ಆದರೆ ಪ್ರಿಯಾಂಕ್ ಖರ್ಗೆ ಅವರ ಪತ್ರದಲ್ಲಿ ಅಂತಹ ಯಾವುದೇ ಕಾನೂನು ಆಧಾರಗಳಿಲ್ಲ. "ಇದು ಕೇವಲ ವೈಯಕ್ತಿಕ ಪತ್ರದಂತೆ ಕಾಣುತ್ತದೆಯೇ ಹೊರತು ಕಾನೂನುಬದ್ಧ ನೋಟಿಸ್ ಅಲ್ಲ. ಆದ್ದರಿಂದ ಆರ್‌ಎಸ್‌ಎಸ್ ಈ ಪತ್ರಕ್ಕೆ ಉತ್ತರಿಸಲೇಬೇಕು ಎಂಬ ಯಾವುದೇ ಕಾನೂನು ಬಾಧ್ಯತೆ ಹೊಂದಿಲ್ಲ. ಅವರು ಆ ಪತ್ರವನ್ನು ನಿರ್ಲಕ್ಷಿಸಬಹುದು," ಎಂದು ಬಿ.ವಿ. ಆಚಾರ್ಯ ತಿಳಿಸಿದರು.

ರಾಜ್ಯ ಮತ್ತು ಕೇಂದ್ರದ ಅಧಿಕಾರ ವ್ಯಾಪ್ತಿ

ಸಂವಿಧಾನದ ಏಳನೇ ಅನುಸೂಚಿಯ ಪ್ರಕಾರ, ಅಖಿಲ ಭಾರತ ಮಟ್ಟದ ಸಂಘಟನೆಗಳ ಮೇಲೆ ಕೇಂದ್ರ ಸರ್ಕಾರಕ್ಕೆ ಅಧಿಕಾರವಿರುತ್ತದೆ. ರಾಜ್ಯ ಸಚಿವರು ತಮ್ಮ ಮಿತಿಯನ್ನು ಮೀರಿ ಪತ್ರ ಬರೆದಿರುವುದು ಕಾನೂನಿನ ದೃಷ್ಟಿಯಲ್ಲಿ ಸರಿಯಲ್ಲ ಎಂದು ಆಚಾರ್ಯ ಅವರು ಅಭಿಪ್ರಾಯಪಟ್ಟಿದ್ದಾರೆ. ಇದು ಕೇವಲ ಅಭಿವ್ಯಕ್ತಿ ಸ್ವಾತಂತ್ರ್ಯದ ಅಡಿಯಲ್ಲಿ ಕೇಳಲಾದ ಪ್ರಶ್ನೆಯಾಗಿದ್ದರೆ, ಅದನ್ನು ಉತ್ತರಿಸುವುದು ಅಥವಾ ಬಿಡುವುದು ಸಂಬಂಧಪಟ್ಟವರ ಇಚ್ಛೆಗೆ ಬಿಟ್ಟಿದ್ದು ಎಂದೂ ಅವರು ಸ್ಪಷ್ಟಪಡಿಸಿದರು.