ಪ್ರವಾಸಿ ತಾಣಗಳಲ್ಲೇ ಸಿಗಲಿದೆ 'ಮಯೂರ' ರುಚಿ: ಕೆಎಸ್‌ಟಿಡಿಸಿಯಿಂದ ಹೊಸ ಆವಿಷ್ಕಾರ

ರಾಜ್ಯದ ಪ್ರಮುಖ ಪ್ರವಾಸಿ ತಾಣಗಳಿಗೆ ಭೇಟಿ ನೀಡುವ ಪ್ರವಾಸಿಗರಿಗೆ ಹೋಟೆಲ್‌ಗಳನ್ನು ಹುಡುಕುವ ತಾಪತ್ರಯದಿಂದ ಮುಕ್ತಿ ನೀಡಲು ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ಅಭಿವೃದ್ಧಿ ನಿಗಮ ವಿನೂತನ ಯೋಜನೆಯೊಂದನ್ನು ಪರಿಚಯಿಸಿದೆ. ಪ್ರವಾಸೋದ್ಯಮ ಸಚಿವ ಕೆ.ಜೆ. ಜಾರ್ಜ್ ಅವರು ಘೋಷಿಸಿರುವಂತೆ, "ಮಯೂರ ರುಚಿ ಆನ್ ವೀಲ್ಸ್" ಸೇವೆಯು ಶೀಘ್ರವೇ ರಾಜ್ಯದ ಪ್ರವಾಸೋದ್ಯಮ ಭೂಪಟದಲ್ಲಿ ಹೊಸ ಸಂಚಲನ ಮೂಡಿಸಲಿದೆ.

ಕೆಎಸ್‌ಟಿಡಿಸಿ ರಾಜ್ಯಾದ್ಯಂತ 24ಕ್ಕೂ ಹೆಚ್ಚು 'ಮಯೂರ' ಹೋಟೆಲ್‌ಗಳನ್ನು ನಿರ್ವಹಿಸುತ್ತಿದೆ. ಆದರೆ, ಇವುಗಳಲ್ಲಿ ಹಲವು ಹೋಟೆಲ್‌ಗಳು ಪ್ರವಾಸಿ ತಾಣಗಳಿಂದ ಕೊಂಚ ದೂರದಲ್ಲಿವೆ. ಪ್ರವಾಸಿಗರು ತಾಣಗಳನ್ನು ವೀಕ್ಷಿಸುವ ಭರಾಟೆಯಲ್ಲಿ ಗುಣಮಟ್ಟದ ಆಹಾರದಿಂದ ವಂಚಿತರಾಗುತ್ತಿರುವುದನ್ನು ಗಮನಿಸಿದ ಇಲಾಖೆಯು, ಹೋಟೆಲ್‌ಗಳ ಆವರಣಕ್ಕೆ ಮಾತ್ರ ಸೀಮಿತವಾಗಿದ್ದ ಸೇವೆಯನ್ನು ಪ್ರವಾಸಿಗರ ಬಳಿಗೆ ಕೊಂಡೊಯ್ಯಲು ನಿರ್ಧರಿಸಿದೆ. ಮಯೂರ ಹೋಟೆಲ್‌ನ ಗುಣಮಟ್ಟದ ಆಹಾರ, ಸ್ವಚ್ಛತೆ ಮತ್ತು ನಂಬಿಕೆಯನ್ನು ಈಗ ಮೊಬೈಲ್ ವ್ಯಾನ್‌ಗಳ ಮೂಲಕ ಪ್ರವಾಸಿ ತಾಣಗಳಲ್ಲಿಯೇ ಲಭ್ಯವಾಗುವಂತೆ ಮಾಡುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.

ಹಂತ ಹಂತವಾಗಿ ಜಾರಿ

ಈ ಯೋಜನೆಯು ಹಂತ ಹಂತವಾಗಿ ರಾಜ್ಯದ ಜನಪ್ರಿಯ ಪ್ರವಾಸಿ ತಾಣಗಳಲ್ಲಿ ಜಾರಿಯಾಗಲಿದೆ. ಆರಂಭಿಕ ಹಂತದಲ್ಲಿ ಕೆಲವು ತಾಣಗಳಿಗೆ ಆದ್ಯತೆ ನೀಡಲಾಗುವುದು. ಐತಿಹಾಸಿಕ ತಾಣವಾಗಿರುವ ಹಂಪಿ ಸುತ್ತಮುತ್ತ, ಕೊಡಗಿನ ಪ್ರಕೃತಿ ಸೌಂದರ್ಯದ ತಾಣಗಳಲ್ಲಿ, ಜೋಗ್ ಫಾಲ್ಸ್ ಜಲಪಾತ ವೀಕ್ಷಣೆಗೆ ಬರುವ ಪ್ರವಾಸಿಗರಿಗೆ, ಮೈಸೂರು ಅರಮನೆ ನಗರಿ ಹಾಗೂ ಸುತ್ತಮುತ್ತಲಿನ ಆಕರ್ಷಣೆಗಳು, ನಂದಿ ಹಿಲ್ಸ್ ಬೆಂಗಳೂರಿಗೆ ಹತ್ತಿರವಿರುವ ಜನಪ್ರಿಯ ಗಿರಿಧಾಮದಲ್ಲಿ ಮತ್ತು ಬೆಂಗಳೂರು ನಗರದ ಪ್ರಮುಖ ಪ್ರವಾಸಿ ಕೇಂದ್ರಗಳಲ್ಲಿ ಜಾರಿಗೊಳಿಸಲಾಗುವುದು. 'ಮಯೂರ ರುಚಿ ಆನ್ ವೀಲ್ಸ್' ಕೇವಲ ಊಟೋಪಚಾರಕ್ಕೆ ಮಾತ್ರ ಸೀಮಿತವಲ್ಲ. ಇದು ಕರ್ನಾಟಕದ ಆಹಾರ ಸಂಸ್ಕೃತಿಯ ರಾಯಭಾರಿಯಾಗಿಯೂ ಕೆಲಸ ಮಾಡಲಿದೆ. ಉತ್ತರ ಕರ್ನಾಟಕದ ಜೋಳದ ರೊಟ್ಟಿ ಊಟದಿಂದ ಹಿಡಿದು, ದಕ್ಷಿಣದ ಮಸಾಲೆ ದೋಸೆ, ಇಡ್ಲಿ, ವಡೆ ಹಾಗೂ ಆಯಾ ಪ್ರದೇಶದ ಪ್ರಾದೇಶಿಕ ಖಾದ್ಯಗಳು ಇಲ್ಲಿ ದೊರೆಯಲಿವೆ. ಪ್ರವಾಸಿಗರಿಗೆ ಒಂದು ತಾಣದಿಂದ ಇನ್ನೊಂದು ತಾಣಕ್ಕೆ ಹೋದಾಗ ಆ ಭಾಗದ ವಿಶೇಷ ಆಹಾರದ ಪರಿಚಯ ಮಾಡಿಸುವುದು ಮತ್ತು ರಾಜ್ಯದ ಆಹಾರ ವೈವಿಧ್ಯವನ್ನು ಜಗತ್ತಿಗೆ ಸಾರುವುದು ಈ ಯೋಜನೆಯ ಗುರಿಯಾಗಿದೆ.

ದೃಶ್ಯಗಳ ವೀಕ್ಷಣೆಯಲ್ಲ, ಅದು ಒಂದು ಪರಿಪೂರ್ಣ ಅನುಭವ - ಕೆ.ಜೆ.ಜಾರ್ಜ್‌

ಸಚಿವ ಕೆ.ಜೆ. ಜಾರ್ಜ್ ಮಾತನಾಡಿ, "ಪ್ರವಾಸೋದ್ಯಮವು ಕೇವಲ ದೃಶ್ಯಗಳ ವೀಕ್ಷಣೆಯಲ್ಲ, ಅದು ಒಂದು ಪರಿಪೂರ್ಣ ಅನುಭವ. ಉತ್ತಮ ತಾಣದ ಜೊತೆಗೆ ಉತ್ತಮ ಆಹಾರ ಸಿಕ್ಕಾಗ ಪ್ರವಾಸದ ಖುಷಿ ದುಪ್ಪಟ್ಟಾಗುತ್ತದೆ. ಈ ಯೋಜನೆಯು ಉದ್ಯೋಗಾವಕಾಶಗಳನ್ನು ಸೃಷ್ಟಿಸುವುದಲ್ಲದೆ, ಕೆಎಸ್‌ಟಿಡಿಸಿಯ ಆದಾಯವನ್ನೂ ಹೆಚ್ಚಿಸಲಿದೆ" ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಕೆಎಸ್‌ಟಿಡಿಸಿ ಅಧ್ಯಕ್ಷ ಎಂ. ಶ್ರೀನಿವಾಸ್ ಅವರು, "ಸ್ಥಳೀಯರಿಗೆ ವ್ಯಾಪಾರ ಅವಕಾಶಗಳು ಮತ್ತು ಉದ್ಯೋಗಗಳನ್ನು ಕಲ್ಪಿಸುವ ಮೂಲಕ ಸ್ಥಳೀಯ ಆರ್ಥಿಕತೆಗೂ ಈ ಯೋಜನೆ ಶಕ್ತಿ ತುಂಬಲಿದೆ" ಎಂದು ತಿಳಿಸಿದರು. ಪ್ರವಾಸೋದ್ಯಮ ಇಲಾಖೆಯ ಕಾರ್ಯದರ್ಶಿ ಡಾ. ರಾಮ್ ಪ್ರಸಾತ್ ಮನೋಹರ್ ಅವರು, "ಆಹಾರವು ಪ್ರವಾಸಿ ಅನುಭವದ ಅವಿಭಾಜ್ಯ ಅಂಗ. ಆತಿಥ್ಯ ಸೇವೆಯನ್ನು ಹೋಟೆಲ್ ಗೋಡೆಗಳ ಹೊರಗೆ ವಿಸ್ತರಿಸುತ್ತಿರುವುದು ಈ ಯೋಜನೆಯ ಕ್ರಾಂತಿಕಾರಿ ಬದಲಾವಣೆ" ಎಂದು ಬಣ್ಣಿಸಿದರು.

ಆರ್ಥಿಕ - ಸಾಮಾಜಿಕ ಲಾಭಗಳು

ಪ್ರತಿ ಫುಡ್ ವ್ಯಾನ್ ನಿರ್ವಹಣೆಗೆ ಸ್ಥಳೀಯ ಯುವಕರಿಗೆ ತರಬೇತಿ ಮತ್ತು ಉದ್ಯೋಗಾವಕಾಶ ನೀಡಲಾಗುತ್ತದೆ. ಪ್ರಾದೇಶಿಕ ಖಾದ್ಯಗಳಿಗೆ ಆದ್ಯತೆ ನೀಡುವುದರಿಂದ ಸ್ಥಳೀಯ ಬಾಣಸಿಗರು ಮತ್ತು ರೈತರಿಗೆ ನೇರ ಲಾಭ ಸಿಗಲಿದೆ. ಪ್ರವಾಸೋದ್ಯಮ ಇಲಾಖೆಯು ತನ್ನ ಆರ್ಥಿಕ ಮೂಲಗಳನ್ನು ಬಲಪಡಿಸಲು ಇದೊಂದು ಸೃಜನಾತ್ಮಕ ಮಾರ್ಗವಾಗಿದೆ. ಕೆಎಸ್‌ಟಿಡಿಸಿ ಬ್ರ್ಯಾಂಡ್‌ನ ಅಡಿಯಲ್ಲಿ ಆಹಾರ ದೊರೆಯುವುದರಿಂದ ಪ್ರವಾಸಿಗರಿಗೆ ನೈರ್ಮಲ್ಯದ ಬಗ್ಗೆ ಹೆಚ್ಚಿನ ಭರವಸೆ ಇರುತ್ತದೆ. ಕರ್ನಾಟಕದ ಪ್ರವಾಸೋದ್ಯಮ ಇಲಾಖೆಯು ಇತ್ತೀಚಿನ ದಿನಗಳಲ್ಲಿ ಡಿಜಿಟಲೀಕರಣ ಮತ್ತು ಆತಿಥ್ಯದ ಆಧುನೀಕರಣದಲ್ಲಿ ಮಹತ್ವದ ಹೆಜ್ಜೆಗಳನ್ನು ಇಡುತ್ತಿದೆ. ಪ್ರವಾಸಿಗರಿಗೆ ಹೋಟೆಲ್ ಹುಡುಕುವ ಸಮಯ ಉಳಿಯುವುದರಿಂದ, ಅವರು ಹೆಚ್ಚಿನ ಸಮಯವನ್ನು ಪ್ರವಾಸಿ ತಾಣಗಳಲ್ಲಿಯೇ ಕಳೆಯಲು ಸಾಧ್ಯವಾಗುತ್ತದೆ. ಇದು ರಾಜ್ಯದ ಪ್ರವಾಸೋದ್ಯಮದ ಬೆಳವಣಿಗೆಗೆ ಸಹಕಾರಿಯಾಗಲಿದೆ.