ಬೆಂಗಳೂರಿನ ಇಬ್ಬರು ಇಂಜಿನಿಯರ್ಗಳು RISC-V ಆಧಾರಿತ KEO AI PC ಅಭಿವೃದ್ಧಿಪಡಿಸಿದ್ದಾರೆ.
ಗ್ರಾಮೀಣ ಮಕ್ಕಳಿಗೂ AI ತಂತ್ರಜ್ಞಾನ: ಬೆಂಗಳೂರಿನಲ್ಲಿ ಅಭಿವೃದ್ಧಿಯಾದ ‘ಕಿಯೋ’ AI PC
ಬೆಂಗಳೂರಿನ ಇಬ್ಬರು ಇಂಜಿನಿಯರ್ಗಳು RISC-V ಆಧಾರಿತ KEO AI PC ಅಭಿವೃದ್ಧಿಪಡಿಸಿದ್ದು, 18,999ರೂ.ಕ್ಕಿಂತ ಕಡಿಮೆ ವೆಚ್ಚದಲ್ಲಿ ವಿದ್ಯಾರ್ಥಿಗಳಿಗೆ ಕೈಗೆಟುಕುವ ಕಂಪ್ಯೂಟಿಂಗ್ ಒದಗಿಸುವ ಗುರಿ ಹೊಂದಿದೆ.
ಕೃತಕ ಬುದ್ಧಿಮತ್ತೆ (AI) ಮತ್ತು ಕಂಪ್ಯೂಟಿಂಗ್ ತಂತ್ರಜ್ಞಾನವನ್ನು ಸಾಮಾನ್ಯ ಜನರು, ವಿದ್ಯಾರ್ಥಿಗಳು ಹಾಗೂ ಗ್ರಾಮೀಣ ಪ್ರದೇಶದ ಮಕ್ಕಳಿಗೂ ಕೈಗೆಟಕುವಂತೆ ಮಾಡುವ ಉದ್ದೇಶದಿಂದ ಬೆಂಗಳೂರಿನ ಇಬ್ಬರು ಸೆಮಿಕಂಡಕ್ಟರ್ ಎಂಜಿನಿಯರ್ಗಳು ‘ಕಿಯೋ’ (KEO) ಎಂಬ ಕೈಗೆಟಕುವ AI-ಸಿದ್ಧ ಪರ್ಸನಲ್ ಕಂಪ್ಯೂಟರ್ ಅಭಿವೃದ್ಧಿಪಡಿಸಿದ್ದಾರೆ.
ಮೇಡ್ ಇನ್ ಕರ್ನಾಟಕ ಸಾಧನವಾಗಿರುವ ಕಿಯೋವನ್ನು, ಪರ್ಸನಲ್ ಕಂಪ್ಯೂಟರ್ಗಳು ಹಾಗೂ ಇತರ ಕಂಪ್ಯೂಟಿಂಗ್ ಸಾಧನಗಳಲ್ಲಿ ವ್ಯಾಪಕವಾಗಿ ಬಳಸಲಾಗುತ್ತಿರುವ ARM ಮತ್ತು x86 ಆರ್ಕಿಟೆಕ್ಚರ್ಗಳಿಗೆ ಪರ್ಯಾಯವಾಗಿ ಅಭಿವೃದ್ಧಿಪಡಿಸಲಾಗಿದೆ.
ಈ ಇಬ್ಬರು ಎಂಜಿನಿಯರ್ಗಳ ಪ್ರಮುಖ ಉದ್ದೇಶ, ಪ್ರಸ್ತುತ ಪ್ರಮುಖ ಚಿಪ್ ಆರ್ಕಿಟೆಕ್ಚರ್ಗಳಿಗೆ ಸಂಬಂಧಿಸಿದ ಲೈಸೆನ್ಸಿಂಗ್ ಮತ್ತು ರಾಯಲ್ಟಿ ವ್ಯವಸ್ಥೆಯನ್ನು ಅವಲಂಬಿಸದೆ, ಕಡಿಮೆ ವೆಚ್ಚದಲ್ಲಿ ಪ್ರೊಸೆಸರ್ ಆಧಾರಿತ ಕಂಪ್ಯೂಟಿಂಗ್ ವ್ಯವಸ್ಥೆಯನ್ನು ನಿರ್ಮಿಸುವುದಾಗಿತ್ತು.
ಓಪನ್ಸೋರ್ಸ್ RISC-V ತಂತ್ರಜ್ಞಾನ ಬಳಕೆ
ಎಡ್ಜ್ AI ಪ್ರೊಸೆಸಿಂಗ್ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು, ಕಿಯೋದಲ್ಲಿ RISC-V ಎಂಬ ಓಪನ್-ಸ್ಟ್ಯಾಂಡರ್ಡ್ ಇನ್ಸ್ಟ್ರಕ್ಷನ್ ಸೆಟ್ ಆರ್ಕಿಟೆಕ್ಚರ್ ಬಳಸಲಾಗಿದೆ. ಈ ತಂತ್ರಜ್ಞಾನವು ಖಾಸಗಿ ಆರ್ಕಿಟೆಕ್ಚರ್ಗಳಿಗೆ ಇರುವ ಲೈಸೆನ್ಸ್ ವ್ಯವಸ್ಥೆಯಿಲ್ಲದೆ ಡೆವಲಪರ್ಗಳಿಗೆ ಪ್ರೊಸೆಸರ್ಗಳನ್ನು ವಿನ್ಯಾಸಗೊಳಿಸುವ ಅವಕಾಶ ನೀಡುತ್ತದೆ.
ಕಿಯೋ ಕಂಪ್ಯೂಟಿಂಗ್ ವ್ಯವಸ್ಥೆಯ ಸಂಪೂರ್ಣ ಪರಿಸರವನ್ನು ಬಹುತೇಕ ಓಪನ್ಸೋರ್ಸ್ ವೇದಿಕೆಗಳ ಆಧಾರದಲ್ಲಿ ನಿರ್ಮಿಸಲಾಗಿದೆ. ಇದರಲ್ಲಿ RISC-V ಆಧಾರಿತ ಪ್ರೊಸೆಸರ್, Linux Ubuntu ಆಪರೇಟಿಂಗ್ ಸಿಸ್ಟಮ್ ಹಾಗೂ LibreOffice ಪ್ರೊಡಕ್ಟಿವಿಟಿ ಸೂಟ್ ಬಳಸಲಾಗಿದೆ.
ಯೋಜನೆಯ ಅಭಿವೃದ್ಧಿಯ ವೇಳೆ ಕರ್ನಾಟಕದ ಐಟಿ ಮತ್ತು ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಅವರ ಗಮನಕ್ಕೂ ಈ ಸಾಧನ ಬಂದಿದ್ದು, ಅದರ ವಿನ್ಯಾಸ ಮತ್ತು ರೂಪುರೇಷೆಗಳನ್ನು ಮತ್ತಷ್ಟು ಉತ್ತಮಗೊಳಿಸುವ ಪ್ರಕ್ರಿಯೆಯಲ್ಲಿ ಅವರು ಆಸಕ್ತಿ ತೋರಿದ್ದರು ಎಂದು ಡೆವಲಪರ್ಗಳು ತಿಳಿಸಿದ್ದಾರೆ.
IISc ಮತ್ತು IIITನಲ್ಲಿ ಯಶಸ್ವಿ ಪರೀಕ್ಷೆ
ಕಿಯೋ ಸಾಧನವನ್ನು ಭಾರತೀಯ ವಿಜ್ಞಾನ ಸಂಸ್ಥೆ (IISc) ಮತ್ತು ಭಾರತೀಯ ಮಾಹಿತಿ ತಂತ್ರಜ್ಞಾನ ಸಂಸ್ಥೆ (IIIT) ವಿಜ್ಞಾನಿಗಳು ಪರೀಕ್ಷೆ ನಡೆಸಿದ್ದು, ಅಗತ್ಯವಿರುವ ಪರೀಕ್ಷೆಗಳನ್ನು ಸಾಧನ ಯಶಸ್ವಿಯಾಗಿ ಪೂರ್ಣಗೊಳಿಸಿದೆ ಎಂದು ಡೆವಲಪರ್ಗಳು ಹೇಳಿದ್ದಾರೆ.
ಗ್ರಾಮೀಣ ಮತ್ತು ಆರ್ಥಿಕವಾಗಿ ಹಿಂದುಳಿದ ಮಕ್ಕಳಿಗೆ ಅನುಕೂಲ
ಕಿಯೋ AI PCಯನ್ನು ವಿಶೇಷವಾಗಿ ಕಡಿಮೆ ವೆಚ್ಚದಲ್ಲಿ ಕಂಪ್ಯೂಟಿಂಗ್ ಮತ್ತು AI ತಂತ್ರಜ್ಞಾನ ಲಭ್ಯವಾಗುವಂತೆ ವಿನ್ಯಾಸಗೊಳಿಸಲಾಗಿದೆ. ಗ್ರಾಮೀಣ ಪ್ರದೇಶದ ವಿದ್ಯಾರ್ಥಿಗಳು, ಮಕ್ಕಳು ಹಾಗೂ ಆರ್ಥಿಕವಾಗಿ ಹಿಂದುಳಿದ ಸಮುದಾಯಗಳಿಗೆ ಈ ತಂತ್ರಜ್ಞಾನವನ್ನು ತಲುಪಿಸುವುದು ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಜಾಗತಿಕ ಮಾರುಕಟ್ಟೆಯಲ್ಲಿ RAM ಬೆಲೆ ಏರಿಕೆಯಾಗಿದ್ದರೂ, ಈ ಸಾಧನದ ಉತ್ಪಾದನಾ ವೆಚ್ಚವನ್ನು 18,999 ರೂ. ಕ್ಕಿಂತ ಕಡಿಮೆ ಮಟ್ಟದಲ್ಲಿ ಉಳಿಸಲಾಗಿದೆ ಎಂದು ಡೆವಲಪರ್ಗಳು ತಿಳಿಸಿದ್ದಾರೆ.
ಸರ್ಕಾರಿ ಶಾಲೆಗಳಿಗೆ 2,000ಕ್ಕೂ ಹೆಚ್ಚು ಸಾಧನ
ಕಿಯೋ ಯೋಜನೆಗೆ ಸರ್ಕಾರಿ ಶಾಲೆಗಳಲ್ಲಿ ಅಳವಡಿಕೆಗಾಗಿ ಸಹಕಾರವೂ ದೊರೆತಿದೆ. ಡೆವಲಪರ್ಗಳ ಪ್ರಕಾರ, ಕಳೆದ ಒಂದು ವರ್ಷದ ಅವಧಿಯಲ್ಲಿ ಕರ್ನಾಟಕದ ವಿವಿಧ ಸರ್ಕಾರಿ ಶಾಲೆಗಳಿಗೆ ವಿತರಿಸಲು ಒಂದು ಎನ್ಜಿಒ 2,000ಕ್ಕೂ ಹೆಚ್ಚು ಕಿಯೋ ಸಾಧನಗಳನ್ನು ಖರೀದಿಸಿದೆ.
ಓಪನ್ಸೋರ್ಸ್ ಹಾರ್ಡ್ವೇರ್ ಮತ್ತು ಸಾಫ್ಟ್ವೇರ್ಗಳನ್ನು ಬಳಸಿಕೊಂಡು ಕಂಪ್ಯೂಟಿಂಗ್ ಸಾಧನಗಳ ವೆಚ್ಚವನ್ನು ಹೇಗೆ ಕಡಿಮೆ ಮಾಡಬಹುದು ಮತ್ತು AI-ಸಿದ್ಧ ತಂತ್ರಜ್ಞಾನವನ್ನು ಹೆಚ್ಚಿನ ಜನರಿಗೆ ಹೇಗೆ ತಲುಪಿಸಬಹುದು ಎಂಬುದನ್ನು ತೋರಿಸುವ ಪ್ರಯತ್ನವೇ ಈ ಯೋಜನೆಯಾಗಿದೆ. ಸ್ವದೇಶಿ ಮತ್ತು ಕೈಗೆಟಕುವ ಕಂಪ್ಯೂಟಿಂಗ್ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವ ಜತೆಗೆ, ಖಾಸಗಿ ಹಾರ್ಡ್ವೇರ್ ಮತ್ತು ಸಾಫ್ಟ್ವೇರ್ ವೇದಿಕೆಗಳ ಮೇಲಿನ ಅವಲಂಬನೆಯನ್ನು ಕಡಿಮೆ ಮಾಡುವುದು ‘ಕಿಯೋ’ ಯೋಜನೆಯ ಮತ್ತೊಂದು ಪ್ರಮುಖ ಗುರಿಯಾಗಿದೆ.
