ಗಣ್ಯರ ಮತದಾರರ ಪಟ್ಟಿಯಲ್ಲೂ ಲೋಪ- ಶಿವರಾಜ್‌ಕುಮಾರ್, ನಂದನ್‌ ನಿಲೇಕಣಿ ಹೆಸರಿನಲ್ಲೂ ಸಮಸ್ಯೆ

ರಾಜ್ಯದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್‌ಐಆರ್‌) ಪ್ರಕ್ರಿಯೆ ವೇಳೆ ಹಲವು ಗಣ್ಯರ ಮತದಾರರ ದಾಖಲೆಗಳಲ್ಲಿ ವ್ಯತ್ಯಾಸಗಳು ಕಂಡುಬಂದಿವೆ. ಭಾರತ ರತ್ನ ಪುರಸ್ಕೃತ ವಿಜ್ಞಾನಿ ಪ್ರೊ. ಸಿ.ಎನ್.ಆರ್. ರಾವ್, ಇನ್ಫೋಸಿಸ್‌ ಸಹ-ಸಂಸ್ಥಾಪಕ ನಂದನ್‌ ನಿಲೇಕಣಿ, ನಟ ಶಿವರಾಜ್‌ಕುಮಾರ್, ಝೆರೋಧಾ ಸಹ-ಸಂಸ್ಥಾಪಕ ನಿಖಿಲ್‌ ಕಾಮತ್‌ ಸೇರಿದಂತೆ ಪ್ರಮುಖರ ಹೆಸರುಗಳು ಈ ಪಟ್ಟಿಯಲ್ಲಿ ಕಾಣಿಸಿಕೊಂಡಿವೆ.

ಚುನಾವಣಾ ಆಯೋಗವು ಪ್ರಸ್ತುತ ಮತದಾರರ ಪಟ್ಟಿಯನ್ನು 2002ರ ಹಳೆಯ ದಾಖಲೆಗಳೊಂದಿಗೆ ತಾಳೆಹಾಕುವ ಸಂದರ್ಭದಲ್ಲಿ ಹಲವು ತಾಂತ್ರಿಕ ನ್ಯೂನತೆಗಳು ಮತ್ತು ದಾಖಲೆಗಳಲ್ಲಿನ ಹೊಂದಾಣಿಕೆಯಾಗದ ಅಂಶಗಳು ಪತ್ತೆಯಾಗಿವೆ. ಇದರ ಭಾಗವಾಗಿ ಗಣ್ಯರ ಮತದಾರರ ದಾಖಲೆಗಳಲ್ಲೂ ಕೆಲವು ವ್ಯತ್ಯಾಸಗಳು ಬೆಳಕಿಗೆ ಬಂದಿವೆ.

ನಟ ಶಿವರಾಜ್‌ಕುಮಾರ್‌ ಮತ್ತು ನಂದನ್‌ ನಿಲೇಕಣಿ ಅವರ ಮತದಾರರ ದಾಖಲೆಗಳನ್ನು ‘ಹಿಂದಿನ ಎಸ್‌ಐಆರ್‌ನೊಂದಿಗೆ ಹೊಂದಾಣಿಕೆಯಾಗಿಲ್ಲ’ ಎಂದು ಗುರುತಿಸಲಾಗಿದೆ. ಶಿವರಾಜ್‌ಕುಮಾರ್‌ ಅವರ ಹೆಸರನ್ನು ಮತದಾರರ ದಾಖಲೆಯಲ್ಲಿ ‘ಶಿವರಾಜ್‌ ಕುಮಾರ್‌ ಎಂ.ಎಸ್.’ ಎಂದು ನಮೂದಿಸಲಾಗಿದೆ. ಅಲ್ಲದೆ, ತಂದೆಯ ಹೆಸರಿನ ಕಾಲಂನಲ್ಲಿ ‘ಲೇಟ್‌ ಮುತ್ತುರಾಜ್‌’ ಎಂದು ದಾಖಲಾಗಿರುವುದು ಹಳೆಯ ದಾಖಲೆಗಳೊಂದಿಗೆ ಹೊಂದಾಣಿಕೆಯಾಗದಿರಲು ಕಾರಣವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಮುತ್ತುರಾಜ್‌ ಎಂಬುದು ನಟ ಡಾ. ರಾಜ್‌ಕುಮಾರ್‌ ಅವರ ಮೂಲ ಹೆಸರು.

ಇದೇ ರೀತಿ, ಝೆರೋಧಾ ಸಂಸ್ಥೆಯ ಸಹ-ಸಂಸ್ಥಾಪಕರಾದ ನಿಖಿಲ್‌ ಕಾಮತ್‌ ಮತ್ತು ನಿತಿನ್‌ ಕಾಮತ್‌ ಅವರ ಮತದಾರರ ದಾಖಲೆಗಳಲ್ಲೂ ನ್ಯೂನತೆ ಪತ್ತೆಯಾಗಿದೆ. ಇವರ ದಾಖಲೆಗಳಲ್ಲಿ ಪೋಷಕರ ಹೆಸರಿನ ಹೊಂದಾಣಿಕೆಯಾಗಿಲ್ಲ ಎಂಬ ಕಾರಣವನ್ನು ಅಧಿಕಾರಿಗಳು ಗುರುತಿಸಿದ್ದಾರೆ.

ಎಸ್‌ಐಆರ್‌ ಪ್ರಕ್ರಿಯೆಯಲ್ಲಿ ಹಳೆಯ ಮತ್ತು ಪ್ರಸ್ತುತ ಮತದಾರರ ದಾಖಲೆಗಳನ್ನು ಪರಿಶೀಲಿಸಿ ಹೊಂದಾಣಿಕೆ ಮಾಡಲಾಗುತ್ತಿದೆ. ಈ ವೇಳೆ ಹೆಸರು, ತಂದೆ ಅಥವಾ ಪೋಷಕರ ಹೆಸರು ಸೇರಿದಂತೆ ದಾಖಲೆಗಳಲ್ಲಿನ ಸಣ್ಣ ವ್ಯತ್ಯಾಸಗಳೂ ಪರಿಶೀಲನೆಗೆ ಒಳಪಡುತ್ತಿವೆ. ಹೀಗಾಗಿ ಗಣ್ಯರು ಸೇರಿದಂತೆ ಹಲವು ಮತದಾರರ ದಾಖಲೆಗಳಲ್ಲಿ ಇಂತಹ ವ್ಯತ್ಯಾಸಗಳು ಪತ್ತೆಯಾಗುತ್ತಿವೆ.

ಸಿಎನ್‌ಆರ್‌ ರಾವ್‌ಗೆ ನೋಟಿಸ್ ನೀಡಿಲ್ಲ: ಚುನಾವಣಾ ಆಯೋಗ

ಭಾರತ ರತ್ನ ಪುರಸ್ಕೃತ ಪ್ರೊ. ಸಿ.ಎನ್.ಆರ್. ರಾವ್ ಅವರಿಗೆ ಎಸ್‌ಐಆರ್‌ಗೆ ಸಂಬಂಧಿಸಿದಂತೆ ಯಾವುದೇ ನೋಟಿಸ್ ನೀಡಿಲ್ಲ ಎಂದು ಚುನಾವಣಾ ಆಯೋಗ ಸ್ಪಷ್ಟಪಡಿಸಿದೆ. ಮಲ್ಲೇಶ್ವರಂ ವಿಧಾನಸಭಾ ಕ್ಷೇತ್ರದ ಜಿಲ್ಲಾ ಚುನಾವಣಾಧಿಕಾರಿ ಹಾಗೂ ಜಿಬಿಎ ಮುಖ್ಯ ಆಯುಕ್ತ ಮಹೇಶ್ವರ್ ರಾವ್, ಪ್ರೊ. ರಾವ್ ಅವರಿಗೆ ನೋಟಿಸ್ ನೀಡಲಾಗಿದೆ ಎಂಬ ವರದಿಗಳು ತಪ್ಪು ಎಂದು ತಿಳಿಸಿದ್ದಾರೆ.

ಎಸ್‌ಐಆರ್ ಪ್ರಕ್ರಿಯೆಯ ಭಾಗವಾಗಿ ಹಿರಿಯ ಚುನಾವಣಾ ಅಧಿಕಾರಿಗಳು ಪ್ರೊ. ರಾವ್ ಹಾಗೂ ಅವರ ಕುಟುಂಬದ ಸದಸ್ಯರಿಗೆ ಅವರ ನಿವಾಸದಲ್ಲೇ ಎನ್ಯೂಮರೇಷನ್ ಫಾರ್ಮ್‌ಗಳನ್ನು ತಲುಪಿಸಿದ್ದರು. ಅಗತ್ಯ ಮಾಹಿತಿಯನ್ನೂ ಅಲ್ಲಿಯೇ ಭರ್ತಿ ಮಾಡಲಾಗಿತ್ತು. ಪ್ರೊ. ರಾವ್ ಅವರ ಕಚೇರಿಯೂ ಯಾವುದೇ ನೋಟಿಸ್ ಸ್ವೀಕರಿಸಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಹೆಸರಿನ ವ್ಯತ್ಯಾಸ ಕಂಡುಬಂದರೂ ನೋಟಿಸ್ ಇಲ್ಲ

ಚುನಾವಣಾ ದಾಖಲೆಗಳ ಪರಿಶೀಲನೆ ವೇಳೆ ಪ್ರೊ. ರಾವ್ ಅವರ ಹೆಸರಿನಲ್ಲಿ ವ್ಯತ್ಯಾಸ ಕಂಡುಬಂದಿತ್ತು. 2002ರ ಮತದಾರರ ಪಟ್ಟಿಯಲ್ಲಿ ಅವರ ಹೆಸರು ‘ರಾಮ’ ಎಂದು ದಾಖಲಾಗಿದ್ದರೆ, ಪ್ರಸ್ತುತ ಚುನಾವಣಾ ದಾಖಲೆಯಲ್ಲಿ ‘ಪ್ರೊ. ಸಿಎನ್. ರಾವ್ ಎಂ.’ ಎಂದು ನೋಂದಣಿಯಾಗಿದೆ. ಅವರ ಹೆಸರು ಕರಡು ಮತದಾರರ ಪಟ್ಟಿಯಲ್ಲೂ ಸೇರಿದೆ ಎಂದು ಮಹೇಶ್ವರ್ ರಾವ್ ತಿಳಿಸಿದ್ದಾರೆ.

ಹೆಸರಿನ ವ್ಯತ್ಯಾಸವನ್ನು ಅಧಿಕಾರಿಗಳು ಸರಿಪಡಿಸಲಿದ್ದಾರೆ. ಪ್ರೊ. ರಾವ್ ಅವರು ಯಾವುದೇ ಕಚೇರಿಗೆ ಹಾಜರಾಗುವ ಅಥವಾ ನೋಟಿಸ್‌ಗೆ ಪ್ರತಿಕ್ರಿಯಿಸುವ ಅಗತ್ಯವಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕರ್ನಾಟಕದಲ್ಲಿ 43.8 ಲಕ್ಷ ಮತದಾರರು ಗುರುತು

ಕರ್ನಾಟಕದಲ್ಲಿ ನಡೆಯುತ್ತಿರುವ ಎಸ್‌ಐಆರ್ ಪ್ರಕ್ರಿಯೆಯಲ್ಲಿ ಸುಮಾರು 43.8 ಲಕ್ಷ ಮತದಾರರನ್ನು ವಿವಿಧ ರೀತಿಯ ವ್ಯತ್ಯಾಸಗಳಿಗಾಗಿ ಗುರುತಿಸಲಾಗಿದೆ. ಹೆಸರುಗಳಲ್ಲಿನ ಕಾಗುಣಿತ ವ್ಯತ್ಯಾಸ, ಕುಟುಂಬ ಸದಸ್ಯರ ನಡುವಿನ ವಯಸ್ಸಿನ ಅಂತರ ಸೇರಿದಂತೆ ತಾರ್ಕಿಕ ವ್ಯತ್ಯಾಸಗಳು ಹಾಗೂ 2002ರ ಮತದಾರರ ಪಟ್ಟಿಯೊಂದಿಗೆ ಮ್ಯಾಪಿಂಗ್ ಆಗದಿರುವುದು ಇದರಲ್ಲಿ ಸೇರಿದೆ.

ಚುನಾವಣಾ ಆಯೋಗದ ಸಾಫ್ಟ್‌ವೇರ್ ವ್ಯವಸ್ಥೆಯಲ್ಲಿ ಲಭ್ಯವಿರುವ ದತ್ತಾಂಶದ ಆಧಾರದ ಮೇಲೆ ನೋಟಿಸ್‌ಗಳು ಸ್ವಯಂಚಾಲಿತವಾಗಿ ಸೃಷ್ಟಿಯಾಗುತ್ತವೆ. ಈ ವ್ಯವಸ್ಥೆ ಗಣ್ಯರು ಮತ್ತು ಸಾಮಾನ್ಯ ಮತದಾರರ ನಡುವೆ ಯಾವುದೇ ವ್ಯತ್ಯಾಸ ಮಾಡುವುದಿಲ್ಲ.

ಆದರೆ ನೋಟಿಸ್ ಗಣ್ಯ ವ್ಯಕ್ತಿಯ ಹೆಸರಿನಲ್ಲಿ ಸೃಷ್ಟಿಯಾಗಿರುವುದು ಬೂತ್ ಮಟ್ಟದ ಅಧಿಕಾರಿಯ ಗಮನಕ್ಕೆ ಬಂದರೆ, ಅದನ್ನು ನೇರವಾಗಿ ಜಾರಿಗೊಳಿಸದೆ ಅವರ ನಿವಾಸದಲ್ಲೇ ಪರಿಶೀಲನೆ ನಡೆಸಬಹುದಾಗಿದೆ. ಅಗತ್ಯ ದಾಖಲೆಗಳೊಂದಿಗೆ ವಿಚಾರಣೆಗೆ ಹಾಜರಾಗುವ ಬದಲು, ಬೂತ್ ಮಟ್ಟದ ಅಧಿಕಾರಿ ಮನೆಗೆ ಭೇಟಿ ನೀಡಿ ಪರಿಶೀಲನಾ ಪ್ರಕ್ರಿಯೆ ಪೂರ್ಣಗೊಳಿಸುವ ವ್ಯವಸ್ಥೆಯಿದೆ.