ನಕ್ಸಲರಿಗೆ ಶರಣಾಗತಿ ಪ್ಯಾಕೇಜ್‌; ಸರ್ಕಾರ ಕೊಟ್ಟ ಭರವಸೆ ಈಡೇರಿತೇ? ಈಗ ಹೊಸ ಪ್ರಶ್ನೆ

ಕರ್ನಾಟಕದಲ್ಲಿ ನಕ್ಸಲ್ ಚಟುವಟಿಕೆಗೆ ಅಂತ್ಯ ಹಾಡುವ ಉದ್ದೇಶದಿಂದ ಕಾಂಗ್ರೆಸ್ ಸರ್ಕಾರ ಜಾರಿಗೊಳಿಸಿದ ಶರಣಾಗತಿ ಮತ್ತು ಪುನರ್ವಸತಿ ನೀತಿ ಇದೀಗ ಹೊಸ ಚರ್ಚೆಗೆ ಕಾರಣವಾಗಿದೆ. ಶರಣಾಗುವಂತೆ ಮಾಡುವ ಸಂದರ್ಭದಲ್ಲಿ ನೀಡಲಾಗಿದ್ದ ಭರವಸೆಗಳು ಸಂಪೂರ್ಣವಾಗಿ ಈಡೇರಿವೆಯೇ ಎಂಬ ಪ್ರಶ್ನೆ ಮುನ್ನೆಲೆಗೆ ಬಂದಿದೆ. ಪ್ರಕರಣಗಳನ್ನು ತ್ವರಿತವಾಗಿ ಇತ್ಯರ್ಥಪಡಿಸುವ ಭರವಸೆ ನೀಡಲಾಗಿತ್ತೇ, ಘೋಷಿಸಲಾದ ಪುನರ್ವಸತಿ ಪ್ಯಾಕೇಜ್‌ನ ಸಂಪೂರ್ಣ ಹಣ ಶರಣಾದವರಿಗೆ ತಲುಪಿದೆಯೇ ಎಂಬ ವಿಚಾರಗಳು ಚರ್ಚಗೆ ಬಂದಿವೆ.

2025ರ ಜನವರಿ 8ರಂದು ಆರು ಮಂದಿ ಪ್ರಮುಖ ನಕ್ಸಲರು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಸಮ್ಮುಖದಲ್ಲಿ ಶರಣಾದರು. ಬಂದೂಕಿನ ಹಾದಿ ತೊರೆದು ಪ್ರಜಾಸತ್ತಾತ್ಮಕ ವ್ಯವಸ್ಥೆಯ ಮುಖ್ಯವಾಹಿನಿಗೆ ಬರುವವರಿಗೆ ಸರ್ಕಾರ ಪುನರ್ವಸತಿ ಕಲ್ಪಿಸಲಿದೆ ಎಂಬ ಸಂದೇಶವನ್ನು ಈ ಸಂದರ್ಭದಲ್ಲಿ ನೀಡಲಾಗಿತ್ತು. ಬಳಿಕ ಉಡುಪಿಯಲ್ಲಿ ಲಕ್ಷ್ಮಿ ಶರಣಾದ ನಂತರ ಕರ್ನಾಟಕವನ್ನು ನಕ್ಸಲ್ ಮುಕ್ತ ರಾಜ್ಯ ಎಂದು ಸರ್ಕಾರ ಘೋಷಿಸಿತು.

ಆದರೆ ಶರಣಾಗತಿಯ ನಂತರ ಅವರ ವಿರುದ್ಧದ ಪ್ರಕರಣಗಳ ಕಾನೂನು ಪ್ರಕ್ರಿಯೆ ಮುಂದುವರಿದಿರುವುದು ಮತ್ತು ಕೆಲವರು ಜೈಲಿನಲ್ಲೇ ಉಳಿದಿರುವುದು ಚರ್ಚೆಗೆ ಕಾರಣವಾಗಿದೆ. ಶರಣಾಗುವ ಮುನ್ನ ನೀಡಿದ್ದ ಭರವಸೆಗಳ ಸ್ವರೂಪವೇನು, ಅವುಗಳಲ್ಲಿ ಎಷ್ಟು ಜಾರಿಯಾಗಿವೆ ಎಂಬುದರ ಕುರಿತು ಪ್ರಶ್ನೆಗಳು ಎದ್ದಿವೆ.

7.5 ಲಕ್ಷ ರೂಪಾಯಿವರೆಗೆ ಪ್ಯಾಕೇಜ್

ಸರ್ಕಾರದ ಶರಣಾಗತಿ ಮತ್ತು ಪುನರ್ವಸತಿ ನೀತಿಯಡಿ ನಕ್ಸಲರ ವರ್ಗೀಕರಣಕ್ಕೆ ಅನುಗುಣವಾಗಿ ಸುಮಾರು 2 ಲಕ್ಷದಿಂದ ಗರಿಷ್ಠ 7.5 ಲಕ್ಷ ರೂಪಾಯಿವರೆಗೆ ಆರ್ಥಿಕ ನೆರವು ನೀಡುವ ವ್ಯವಸ್ಥೆ ಇದೆ. ಈ ಮೊತ್ತವನ್ನು ಒಂದೇ ಬಾರಿಗೆ ನೀಡದೆ ಹಂತ ಹಂತವಾಗಿ ಬಿಡುಗಡೆ ಮಾಡುವ ವ್ಯವಸ್ಥೆ ಮಾಡಲಾಗಿದೆ.

ಆದರೆ ಘೋಷಿಸಲಾದ ಸಂಪೂರ್ಣ ಮೊತ್ತ ಶರಣಾದವರಿಗೆ ದೊರೆತಿದೆಯೇ ಅಥವಾ ಮೊದಲ ಹಂತದ ಹಣ ಮಾತ್ರ ಬಿಡುಗಡೆಯಾಗಿದೆಯೇ ಎಂಬುದಕ್ಕೆ ಸ್ಪಷ್ಟತೆ ಅಗತ್ಯವಾಗಿದೆ. ಈ ಕುರಿತು ಸರ್ಕಾರದ ದಾಖಲೆಗಳು ಮತ್ತು ವಾಸ್ತವವಾಗಿ ಬಿಡುಗಡೆಯಾದ ಹಣದ ವಿವರಗಳು ಬಹಿರಂಗವಾಗಬೇಕು ಎಂಬ ಪ್ರಶ್ನೆ ಕೇಳಿಬಂದಿದೆ.

ಶರಣಾಗತಿ ಎಂದರೆ ಪ್ರಕರಣಗಳಿಂದ ಮುಕ್ತಿಯೇ?

ನಕ್ಸಲ್ ಶರಣಾಗತಿ ಎಂದ ಮಾತ್ರಕ್ಕೆ ಅವರ ವಿರುದ್ಧದ ಅಪರಾಧ ಪ್ರಕರಣಗಳು ಸ್ವಯಂಚಾಲಿತವಾಗಿ ರದ್ದಾಗುವುದಿಲ್ಲ. ಗಂಭೀರ ಅಪರಾಧ ಪ್ರಕರಣಗಳಿದ್ದರೆ ಕಾನೂನು ಪ್ರಕ್ರಿಯೆ ಮುಂದುವರಿಯುವುದು ಸಹಜ. ಆದರೆ ಪ್ರಕರಣಗಳನ್ನು ತ್ವರಿತವಾಗಿ ಇತ್ಯರ್ಥಪಡಿಸುವ ಬಗ್ಗೆ ನಿರ್ದಿಷ್ಟ ಭರವಸೆ ನೀಡಲಾಗಿದ್ದರೆ, ಅದರ ಅನುಷ್ಠಾನದ ಸ್ಥಿತಿಯನ್ನು ಸರ್ಕಾರ ಸ್ಪಷ್ಟಪಡಿಸಬೇಕಿದೆ.

ನಕ್ಸಲ್ ಮುಕ್ತ ಕರ್ನಾಟಕದ ನಿಜವಾದ ಪರೀಕ್ಷೆ

ಕರ್ನಾಟಕವನ್ನು ನಕ್ಸಲ್ ಮುಕ್ತ ರಾಜ್ಯ ಎಂದು ಘೋಷಿಸಿರುವುದು ಸರ್ಕಾರದ ದೃಷ್ಟಿಯಲ್ಲಿ ಮಹತ್ವದ ಸಾಧನೆ. ಆದರೆ ಶರಣಾಗತಿ ನೀತಿಯ ನಿಜವಾದ ಯಶಸ್ಸು ಎಷ್ಟು ಮಂದಿ ಬಂದೂಕು ಕೆಳಗಿಟ್ಟರು ಎನ್ನುವುದರಲ್ಲಿ ಮಾತ್ರವಲ್ಲ, ಅವರು ಮತ್ತೆ ಹಿಂಸೆಯ ದಾರಿಗೆ ಮರಳದಂತೆ ಗೌರವಯುತ ಜೀವನ ನಡೆಸಲು ಅಗತ್ಯವಾದ ಪುನರ್ವಸತಿ ದೊರೆತಿದೆಯೇ ಎಂಬುದರಲ್ಲಿದೆ.

ಹೀಗಾಗಿ ಈಗ ಚರ್ಚೆಯಾಗಬೇಕಿರುವುದು ಸರ್ಕಾರ ನಕ್ಸಲರಿಗೆ ‘ಕೈಕೊಟ್ಟಿತೇ’ ಎಂಬ ರಾಜಕೀಯ ಆರೋಪ ಮಾತ್ರವಲ್ಲ. ಶರಣಾಗುವಂತೆ ಮಾಡುವ ಸಂದರ್ಭದಲ್ಲಿ ನೀಡಿದ ಭರವಸೆಗಳನ್ನು ಸರ್ಕಾರ ಸಂಪೂರ್ಣವಾಗಿ ಉಳಿಸಿಕೊಂಡಿದೆಯೇ? ಎಂಬ ಪ್ರಶ್ನೆಗೆ ದಾಖಲೆಗಳ ಆಧಾರದ ಮೇಲೆ ಉತ್ತರ ಸಿಗಬೇಕಾಗಿದೆ.