ಚುನಾವಣಾ ಆಯೋಗದ ಕಠಿಣ ಕ್ರಮ: ಮತದಾರರ ಪಟ್ಟಿಯಿಂದ 84.31 ಲಕ್ಷ ಮಂದಿ ಹೆಸರು ಡಿಲೀಟ್

ಕರ್ನಾಟಕ ರಾಜ್ಯದ ಪ್ರಜಾಪ್ರಭುತ್ವದ ಅಡಿಪಾಯವನ್ನು ಮತ್ತಷ್ಟು ಗಟ್ಟಿಗೊಳಿಸುವ ನಿಟ್ಟಿನಲ್ಲಿ ಎಸ್‌ಐಆರ್‌ ಭಾಗವಾಗಿ, ರಾಜ್ಯದ ಮತದಾರರ ಪಟ್ಟಿಯಿಂದ ಬರೋಬ್ಬರಿ 84,31,612 ಮತದಾರರನ್ನು ಕೈಬಿಡಲು ಚುನಾವಣಾ ಆಯೋಗ ನಿರ್ಧರಿಸಿದೆ. ಎಎಸ್‌ಡಿಡಿಒ ಅಡಿಯಲ್ಲಿ (ಪತ್ತೆಯಾಗದ, ಸ್ಥಳಾಂತರಗೊಂಡ, ಮೃತಪಟ್ಟವರು ಇತ್ಯಾದಿ) ಗುರುತಿಸಲಾಗಿದೆ. ಇದು ದೇಶದ ಅತಿದೊಡ್ಡ ಮತದಾರರ ಪಟ್ಟಿ ಶುದ್ಧೀಕರಣ ಪ್ರಕ್ರಿಯೆಗಳಲ್ಲಿ ಒಂದಾಗಿದೆ.

ರಾಜ್ಯ ಮುಖ್ಯ ಚುನಾವಣಾಧಿಕಾರಿ ಅನ್ಬುಕುಮಾರ್ ಅವರು ಪತ್ರಿಕಾಗೋಷ್ಠಿಯಲ್ಲಿ ಪ್ರಕಟಿಸಿರುವ ಅಂಕಿ-ಅಂಶಗಳು ರಾಜ್ಯದ ರಾಜಕೀಯ ಮತ್ತು ಆಡಳಿತಾತ್ಮಕ ವಲಯದಲ್ಲಿ ದೊಡ್ಡ ಸಂಚಲನ ಮೂಡಿಸಿವೆ. ಈ ಬಾರಿಯ ಪರಿಷ್ಕರಣೆಯನ್ನು ಅತ್ಯಂತ ವೈಜ್ಞಾನಿಕವಾಗಿ ನಡೆಸಲಾಗಿದೆ. ಕೇವಲ ಕಚೇರಿಯಲ್ಲೇ ಕುಳಿತು ದತ್ತಾಂಶ ಪರಿಷ್ಕರಿಸದೆ, ಬೂತ್ ಮಟ್ಟದ ಅಧಿಕಾರಿಗಳನ್ನು ಮನೆ ಮನೆಗೆ ಕಳುಹಿಸಿ, ಪ್ರತಿಯೊಬ್ಬ ಮತದಾರರ ಸ್ಥಳ ಮಹಜರು ಮಾಡಲಾಗಿದೆ. ಮೃತಪಟ್ಟವರ ಕುಟುಂಬಗಳಿಂದ ‘ಡೆತ್ ಸರ್ಟಿಫಿಕೇಟ್’ ಸಂಗ್ರಹಿಸುವುದು ಮತ್ತು ಸ್ಥಳಾಂತರಗೊಂಡವರ ಬಗ್ಗೆ ನಿಖರ ಮಾಹಿತಿ ಪಡೆಯುವುದು ಈ ಪ್ರಕ್ರಿಯೆಯ ಪ್ರಮುಖ ಹಂತವಾಗಿದೆ ಎಂದು ಹೇಳಿದರು.

ಪಟ್ಟಿಯಿಂದ ಕೈಬಿಡಲು ಗುರುತಿಸಲಾದ 84.31 ಲಕ್ಷ ಮಂದಿಯ ಪೈಕಿ 51,74,968 ಶಾಶ್ವತವಾಗಿ ಸ್ಥಳಾಂತರಗೊಂಡವರಾಗಿದ್ದಾರೆ. ಇವರು ಅತಿ ದೊಡ್ಡ ಸಂಖ್ಯೆಯಾಗಿದ್ದು, ರಾಜ್ಯದ ಮತದಾರರ ಪಟ್ಟಿಯ ಗೊಂದಲಕ್ಕೆ ಮುಖ್ಯ ಕಾರಣರಾಗಿದ್ದಾರೆ. ಮೃತಪಟ್ಟವರ ಸಂಖ್ಯೆ 14,99,799 ಆಗಿದ್ದು, ದೀರ್ಘಕಾಲದಿಂದ ಪಟ್ಟಿಯಲ್ಲಿ ಉಳಿದುಕೊಂಡಿದ್ದ ಮೃತರ ಹೆಸರುಗಳನ್ನು ಈ ಬಾರಿ ಅಧಿಕೃತವಾಗಿ ತೆಗೆಯಲಾಗಿದೆ. 11,61,231 ಮಂದಿ ನಾಪತ್ತೆಯಾಗಿದ್ದು, ಮನೆ ಮನೆ ಭೇಟಿಯ ಸಂದರ್ಭದಲ್ಲಿ ಸಿಗದವರಾಗಿದ್ದಾರೆ. ಒಂದಕ್ಕಿಂತ ಹೆಚ್ಚು ಕಡೆ ಮತ ಹೊಂದಿರುವವರು 5,62,572 ಮಂದಿ ಇದ್ದಾರೆ. 33,042 ಮಂದಿ ಮಾಹಿತಿ ನೀಡಲು ಅಥವಾ ಸಹಿ ಹಾಕಲು ನಿರಾಕರಿಸಿದವರಾಗಿದ್ದಾರೆ ಎಂದು ಮಾಹಿತಿ ನೀಡಿದರು.

ಬೆಂಗಳೂರಿನ ಸವಾಲು: ಶೇ.40ರಷ್ಟು ಮತದಾರರ ಸುಳಿವೇ ಇಲ್ಲ..!

ರಾಜ್ಯದ ರಾಜಧಾನಿ ಬೆಂಗಳೂರು ನಗರ ಪರಿಷ್ಕರಣೆಯಲ್ಲಿ ಅತಿದೊಡ್ಡ ಸವಾಲಾಗಿ ಪರಿಣಮಿಸಿದೆ. ಇಲ್ಲಿನ 1.3 ಕೋಟಿ ಮತದಾರರಲ್ಲಿ ಇದುವರೆಗೆ ಕೇವಲ 47.97 ಲಕ್ಷ ಜನ ಮಾತ್ರ ಅರ್ಜಿಗಳನ್ನು ವಾಪಸ್ ನೀಡಿದ್ದಾರೆ. ಸುಮಾರು 39.38 ಲಕ್ಷ ಅಂದರೆ, ಶೇ. 40 ಮಂದಿಯ ಸುಳಿವು ಮುಖ್ಯ ಚುನಾವಣಾಧಿಕಾರಿ ಕಚೇರಿಗೆ ಸಿಕ್ಕಿಲ್ಲ. ಇದು ತೀವ್ರ ಕಳವಳಕಾರಿ ವಿಷಯವಾಗಿದ್ದು, ವಲಸೆ ಕಾರ್ಮಿಕರು, ಬಾಡಿಗೆದಾರರು ಮತ್ತು ಕೆಲಸದ ನಿಮಿತ್ತ ಅಲೆದಾಡುವ ಜನಸಂಖ್ಯೆ ಹೆಚ್ಚಿರುವುದನ್ನು ಇದು ತೋರಿಸುತ್ತದೆ. ಈ 16.57 ಲಕ್ಷ ಮಂದಿ ಇನ್ನೂ ಅರ್ಜಿ ಸಲ್ಲಿಸಬೇಕಿದೆ. ಇದುವರೆಗೆ ಮಾಹಿತಿ ನೀಡದ 43,24,841 ಮಂದಿ ಮತ್ತು ಅರ್ಜಿ ಸಲ್ಲಿಸದವರು ಆಗಸ್ಟ್ 8ರ ಒಳಗಾಗಿ ತಮ್ಮ ಬಿಎಲ್‌ಒಗಳನ್ನು ಸಂಪರ್ಕಿಸಿ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕು ಎಂದು ತಿಳಿಸಿದರು.

ಶಾಶ್ವತವಾಗಿ ಸ್ಥಳಾಂತರಗೊಂಡಿದ್ದೇವೆ ಎಂದು ಗುರುತಿಸಲ್ಪಟ್ಟಿದ್ದರೂ, ಒಂದು ವೇಳೆ ಆ ವ್ಯಕ್ತಿ ಕರ್ನಾಟಕದ ಯಾವುದೇ ಕ್ಷೇತ್ರದಲ್ಲಿ ಈಗಲೂ ವಾಸವಿದ್ದು, ದೇಶದ ಬೇರೆ ಎಲ್ಲೂ ಮತ ಹೊಂದಿಲ್ಲದಿದ್ದರೆ, ಅವರು 'ಫಾರ್ಮ್-6' ಭರ್ತಿ ಮಾಡಿ ಸೂಕ್ತ ದಾಖಲೆ ಸಲ್ಲಿಸಬೇಕು. ಈ ದಾಖಲೆಗಳನ್ನು ಪರಿಶೀಲಿಸಿ, ಅವರು ಇಲ್ಲಿನ ನಿವಾಸಿಗಳೆಂದು ಸಾಬೀತಾದರೆ ಮಾತ್ರ ಅಂತಿಮ ಪಟ್ಟಿಯಲ್ಲಿ ಅವರ ಹೆಸರು ಉಳಿಯುತ್ತದೆ. ಇಲ್ಲವಾದಲ್ಲಿ, ಅವರನ್ನು ಅಂತಿಮ ಪಟ್ಟಿಯಿಂದಲೂ ಶಾಶ್ವತವಾಗಿ ಹೊರಗಿಡಲಾಗುತ್ತದೆ ಎಂದರು.

ದತ್ತಾಂಶ ವಿಶ್ಲೇಷಣೆ

5.54 ಕೋಟಿ ಅರ್ಜಿಗಳನ್ನು ವಿತರಿಸಲಾಗಿದ್ದು, 4.26 ಕೋಟಿ ಅರ್ಜಿಗಳು (ಶೇ.76.99) ಡಿಜಿಟಲೀಕರಣ ಪೂರ್ಣಗೊಂಡಿವೆ. ಸಾರ್ವಜನಿಕರ ಪಾಲ್ಗೊಳ್ಳುವಿಕೆಯಲ್ಲಿ 7.73 ಲಕ್ಷ ಮಂದಿ ಫಾರ್ಮ್-7 (ಹೆಸರು ತೆಗೆಯಲು/ತಿದ್ದುಪಡಿಗೆ) ಬಳಸಿದ್ದಾರೆ. ಸುಮಾರು 3.22 ಲಕ್ಷ ಮಂದಿ ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಿದ್ದು, ಡಿಜಿಟಲ್ ಸಾಕ್ಷರತೆಯ ಹೆಚ್ಚಳಕ್ಕೆ ಸಾಕ್ಷಿಯಾಗಿದೆ. ಹಿಂದಿನ ದಿನಗಳಲ್ಲಿ ನಕಲಿ ಮತದಾನ ಅಥವಾ ಮೃತಪಟ್ಟವರ ಹೆಸರಿನಲ್ಲಿ ಮತ ಚಲಾಯಿಸುವ ಆರೋಪಗಳು ಕೇಳಿಬರುತ್ತಿದ್ದವು. ಈ ಬಾರಿಯ ಪರಿಷ್ಕರಣೆಯು ಆ ಎಲ್ಲ ದಾರಿಗಳನ್ನು ಬಂದ್ ಮಾಡಿದೆ.

ಪ್ರತಿ ಮತದಾರರೂ ತಮ್ಮ ಹೆಸರು ಪಟ್ಟಿಯಲ್ಲಿದೆಯೇ ಎಂದು ಪರಿಶೀಲಿಸಿಕೊಳ್ಳುವುದು ಕಡ್ಡಾಯವಾಗಿದೆ. ಆಗಸ್ಟ್ 8ರ ಗಡುವಿನೊಳಗೆ ತಮ್ಮ ಬಿಎಲ್‌ಒಗಳನ್ನು ಸಂಪರ್ಕಿಸುವುದು, ಅಗತ್ಯ ದಾಖಲೆಗಳನ್ನು (ವಿಳಾಸ ಪುರಾವೆ, ಗುರುತಿನ ಚೀಟಿ) ಒದಗಿಸುವುದು ಪ್ರತಿಯೊಬ್ಬ ಪ್ರಜ್ಞಾವಂತ ನಾಗರಿಕನ ಕರ್ತವ್ಯವಾಗಿದೆ. ಕರ್ನಾಟಕದ ಈ ಮತದಾರರ ಪಟ್ಟಿ ಪರಿಷ್ಕರಣೆ, ಮುಂಬರುವ ಚುನಾವಣೆಗಳಲ್ಲಿ ಮತದಾನದ ಪ್ರಮಾಣವನ್ನು ಹೆಚ್ಚಿಸಲು ಮತ್ತು ಪಾರದರ್ಶಕತೆಯನ್ನು ಕಾಪಾಡಲು ಸಹಕಾರಿಯಾಗಲಿದೆ ಎಂದರು.