'ಕಾಂತಾರ' ಭೂತಾರಾಧನೆಯನ್ನು ಜಗತ್ತಿಗೆ ಪರಿಚಯಿಸಿತು; ಮಾರುಕಟ್ಟೆಯ ವಸ್ತುವಾಗಿಸಿತು: ಬಿಳಿಮಲೆ

'ಕಾಂತಾರ' ಸಿನಿಮಾ ಭೂತಾರಾಧನೆಯನ್ನು ಜಾಗತಿಕ ಮಟ್ಟಕ್ಕೆ ಪರಿಚಯಿಸಿದ ಮಹತ್ವದ ಚಿತ್ರ ಎಂಬುದರಲ್ಲಿ ಯಾವುದೇ ಅನುಮಾನವಿಲ್ಲ. ಆದರೆ ಅದೇ ವೇಳೆ ಭೂತಾರಾಧನೆ ಕೇವಲ ಮಾರುಕಟ್ಟೆಯ ಉತ್ಪನ್ನವಾಗಬಾರದು ಹಾಗೂ ಅದರ ಮೂಲ ಸಾಂಸ್ಕೃತಿಕ ಸ್ವರೂಪ ಉಳಿಯಬೇಕು ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಪುರುಷೋತ್ತಮ ಬಿಳಿಮಲೆ ಹೇಳಿದ್ದಾರೆ.

ಸಂದರ್ಶನದ ಪೂರ್ಣ ಪಾಠವನ್ನು ಯೂಟ್ಯೂಬ್​ನಲ್ಲಿ ನೋಡಿ

ದೈವಾರಾಧನೆ ರಿಷಬ್ ಶೆಟ್ಟಿ ಸ್ವತ್ತು ಎಂಬ ತಮ್ಮ ಇತ್ತೀಚಿನ ಹೇಳಿಕೆ ಕುರಿತು ಉಂಟಾದ ಚರ್ಚೆಗೆ ದ ಫೆಡರಲ್ ಕರ್ನಾಟಕಕ್ಕೆ ಸಂದರ್ಶನ ನೀಡಿ ಸ್ಪಷ್ಟನೆ ನೀಡಿದ ಅವರು, ಭೂತಾರಾಧನೆ ರಿಷಬ್ ಶೆಟ್ಟಿ ಅಥವಾ ಮತ್ತಾರೊಬ್ಬರ ಸ್ವತ್ತು ಎಂದು ತಾವು ಹೇಳಿಲ್ಲ. ಬದಲಾಗಿ ಬಂಡವಾಳಶಾಹಿ ಮತ್ತು ಮಾರುಕಟ್ಟೆಯ ಪ್ರಭಾವದಿಂದ ಜನಪದ ಕಲೆಗಳು ಹಾಗೂ ಆರಾಧನಾ ಪದ್ಧತಿಗಳು ಹೇಗೆ ರೂಪಾಂತರಗೊಳ್ಳುತ್ತಿವೆ ಎಂಬುದನ್ನು ಉದಾಹರಣೆಯಾಗಿ ವಿವರಿಸಿದ್ದೇನೆ ಎಂದು ಹೇಳಿದರು.

'ಕಾಂತಾರ'ದ ಸಾಧನೆಯನ್ನು ಒಪ್ಪಿಕೊಂಡ ಬಿಳಿಮಲೆ

ಭೂತಾರಾಧನೆ ಕುರಿತಾಗಿ ನೂರಾರು ಪುಸ್ತಕಗಳು ಪ್ರಕಟವಾದರೂ ಅದನ್ನು ತುಳುನಾಡಿನ ಆಚೆಗಿನ ಜನರಿಗೆ ತಲುಪಿಸಲು ಸಾಧ್ಯವಾಗಿರಲಿಲ್ಲ. ಆದರೆ 'ಕಾಂತಾರ' ಚಿತ್ರದ ಮೂಲಕ ರಿಷಬ್ ಶೆಟ್ಟಿ ಭೂತಾರಾಧನೆಯನ್ನು ವಿಶ್ವದಾದ್ಯಂತ ಪರಿಚಯಿಸಿರುವುದು ಸತ್ಯ. ಆ ಸಾಧನೆಯನ್ನು ನಾನು ಸಂಪೂರ್ಣವಾಗಿ ಒಪ್ಪಿಕೊಳ್ಳುತ್ತೇನೆ ಎಂದು ಬಿಳಿಮಲೆ ಹೇಳಿದರು.

ವಾಣಿಜ್ಯೀಕರಣದ ಬಗ್ಗೆ ಎಚ್ಚರಿಕೆ

ಭೂತಾರಾಧನೆ ಕೇವಲ ಒಂದು ಪ್ರದರ್ಶನ ಕಲೆ ಅಲ್ಲ. ಅದು ಸ್ಥಳೀಯ ಸಮುದಾಯದ ನಂಬಿಕೆ, ಸಂಪ್ರದಾಯ ಮತ್ತು ಆರಾಧನೆಯ ಭಾಗವಾಗಿದೆ. ಇಂತಹ ಸಾಂಸ್ಕೃತಿಕ ಪರಂಪರೆ ಮಾರುಕಟ್ಟೆಯ ಬೇಡಿಕೆಗೆ ಅನುಗುಣವಾಗಿ ಬದಲಾಗತೊಡಗಿದರೆ ಅದರ ಮೂಲ ಸ್ವರೂಪಕ್ಕೆ ಧಕ್ಕೆಯಾಗುವ ಸಾಧ್ಯತೆ ಇದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದರು.

1992ರ ನಂತರ ದೇಶದಲ್ಲಿ ಬಂಡವಾಳಶಾಹಿಯ ಪ್ರಭಾವ ಹೆಚ್ಚಾದಂತೆ ಅನೇಕ ಜನಪದ ಕಲೆಗಳು ವಾಣಿಜ್ಯೀಕರಣದ ಹಾದಿ ಹಿಡಿದಿವೆ. ಯಕ್ಷಗಾನ, ಭೂತಾರಾಧನೆ ಸೇರಿದಂತೆ ಹಲವು ಸಾಂಸ್ಕೃತಿಕ ಆಚರಣೆಗಳಲ್ಲಿಯೂ ಈ ಬದಲಾವಣೆ ಗೋಚರಿಸುತ್ತಿದೆ ಎಂದು ಅವರು ಹೇಳಿದರು.

ಸ್ಥಳೀಯ ಸಮುದಾಯಕ್ಕೂ ಲಾಭ ಸಿಗಬೇಕು

ಪ್ರವಾಸೋದ್ಯಮ ಅಭಿವೃದ್ಧಿಗಾಗಿ ಸಿನಿಮಾ ನಟರನ್ನು ಬ್ರ್ಯಾಂಡ್ ಅಂಬಾಸಿಡರ್‌ಗಳನ್ನಾಗಿ ಮಾಡುವುದು ಸಾಮಾನ್ಯ ಪ್ರಕ್ರಿಯೆ. ಆದರೆ ಅದರ ಲಾಭ ಕೇವಲ ಕೆಲವರಿಗೆ ಸೀಮಿತವಾಗದೆ, ಭೂತಾರಾಧನೆ ನಡೆಸುವ ಕಲಾವಿದರು, ಸ್ಥಳೀಯ ಸಮುದಾಯ ಹಾಗೂ ಆ ಸಂಸ್ಕೃತಿಯನ್ನು ಉಳಿಸಿಕೊಂಡಿರುವ ಜನರಿಗೂ ತಲುಪಬೇಕು ಎಂದು ಬಿಳಿಮಲೆ ಅಭಿಪ್ರಾಯಪಟ್ಟರು.

ತಮ್ಮ ಹೇಳಿಕೆಯನ್ನು ಕೆಲವರು ತಪ್ಪಾಗಿ ಅರ್ಥೈಸಿದ್ದಾರೆ. ತಾವು ಭೂತಾರಾಧನೆ ಅಥವಾ 'ಕಾಂತಾರ' ಚಿತ್ರದ ವಿರುದ್ಧ ಮಾತನಾಡಿಲ್ಲ. ಭೂತಾರಾಧನೆಯ ಸಾಂಸ್ಕೃತಿಕ ಮೌಲ್ಯ, ಪಾವಿತ್ರ್ಯ ಮತ್ತು ಮೂಲ ಸ್ವರೂಪವನ್ನು ಕಾಪಾಡುವ ಉದ್ದೇಶದಿಂದಲೇ ಈ ಅಭಿಪ್ರಾಯ ವ್ಯಕ್ತಪಡಿಸಿದ್ದೇನೆ ಎಂದು ಅವರು ಸ್ಪಷ್ಟಪಡಿಸಿದರು.