ʼರಾಜೀನಾಮೆ ಕೊಡಲು ಬನ್ನಿ, ಕ್ಷಣದಲ್ಲಿ ಅಂಗೀಕರಿಸುವೆʼ - ಸಿಎಂ ಡಿಕೆಶಿ ಎಚ್ಚರಿಕೆ

ರಾಜ್ಯ ರಾಜಕೀಯದಲ್ಲಿ ಸಂಪುಟ ವಿಸ್ತರಣೆ ಮತ್ತು ನಿಗಮ ಮಂಡಳಿಗಳ ನೇಮಕಾತಿಯ ಬೆನ್ನಲ್ಲೇ ಭುಗಿಲೆದ್ದಿರುವ ಅಸಮಾಧಾನದ ಕಿಚ್ಚು ತಾರಕಕ್ಕೇರಿದೆ. ಮಂತ್ರಿಗಿರಿ ಸಿಗದ ಶಾಸಕರ ಬಂಡಾಯದ ಎಚ್ಚರಿಕೆಯ ಹಿನ್ನೆಲೆಯಲ್ಲಿ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಅತೃಪ್ತ ಶಾಸಕರಿಗೆ ಖಡಕ್ ಎಚ್ಚರಿಕೆ ನೀಡಿದ್ದು, ರಾಜೀನಾಮೆ ನೀಡಲು ಯಾರಾದರೂ ಬಂದರೆ ಕ್ಷಣ ಮಾತ್ರದಲ್ಲೂ ತಡಮಾಡದೆ ಅಂಗೀಕರಿಸುತ್ತೇನೆ ಎಂದು ತಿಳಿಸಿದ್ದಾರೆ.

ಅಸಮಾಧಾನಿತರ ಪಟ್ಟುಗಳನ್ನು ಬಹಳ ಗಂಭೀರವಾಗಿ ತೆಗೆದುಕೊಂಡಿದ್ದಾರೆ. ರಾಜಕೀಯದಲ್ಲಿ ಆಕಾಂಕ್ಷಿಗಳು ಇರುವುದು ಸಹಜ, ಆದರೆ ಪಕ್ಷದ ಶಿಸ್ತನ್ನು ಮೀರಲು ಯಾರಿಗೂ ಅವಕಾಶವಿಲ್ಲ. ಹೈಕಮಾಂಡ್ ಸೂಚನೆ ಮತ್ತು ಪಕ್ಷದ ಹಿತದೃಷ್ಟಿಯಿಂದ ಅಸಮಾಧಾನಿತರು ತಾಳ್ಮೆ ವಹಿಸಬೇಕು. ವೀರೇಂದ್ರ ಪಾಟೀಲ್, ಎಸ್. ಬಂಗಾರಪ್ಪ, ಮಲ್ಲಿಕಾರ್ಜುನ ಖರ್ಗೆ ಮತ್ತು ಧರಂ ಸಿಂಗ್ ಅವರಂತಹ ದಿಗ್ಗಜರ ಕಾಲದಲ್ಲೂ ಎಲ್ಲರಿಗೂ ಮಂತ್ರಿ ಸ್ಥಾನ ಸಿಕ್ಕಿರಲಿಲ್ಲ. ಸ್ವತಃ ನನಗೂ ಮತ್ತು ಡಾ. ಜಿ. ಪರಮೇಶ್ವರ್ ಅವರಿಗೂ ಹಲವು ಬಾರಿ ಮಂತ್ರಿ ಸ್ಥಾನ ಕೈತಪ್ಪಿದೆ. ಆಗ ನಾವು ಪಕ್ಷದ ವಿರುದ್ಧ ಬಂಡಾಯವೆದ್ದಿರಲಿಲ್ಲವಲ್ಲ? ಪಕ್ಷದ ತೀರ್ಮಾನಕ್ಕೆ ಬದ್ಧರಾಗಿ ಕೆಲಸ ಮಾಡಿದ್ದೆವು. ಅದೇ ಶಿಸ್ತನ್ನು ಇಂದಿನ ಶಾಸಕರೂ ಪಾಲಿಸಬೇಕು ಎಂದು ಹೇಳಿದ್ದಾರೆ.

ರಾಜೀನಾಮೆ ಬೆದರಿಕೆಗೆ ಜಗ್ಗದ ಸರ್ಕಾರ

ಮಂತ್ರಿ ಸ್ಥಾನ ಸಿಗಲಿಲ್ಲ ಎಂದು ರಾಜೀನಾಮೆ ನೀಡಲು ಮುಂದಾಗಿರುವ ಶಾಸಕರ ಕ್ರಮವನ್ನು ತೀವ್ರವಾಗಿ ಖಂಡಿಸಿದ್ದಾರೆ. ರಾಜೀನಾಮೆ ಕೊಡುವ ಬೆದರಿಕೆಗೆ ನಾನು ಅಂಜುವುದಿಲ್ಲ. ಯಾರಿಗಾದರೂ ರಾಜೀನಾಮೆ ನೀಡುವ ಇರಾದೆ ಇದ್ದರೆ, ಅವರು ನನ್ನ ಕಚೇರಿಗೆ ಬನ್ನಿ, ಕ್ಷಣ ಮಾತ್ರದಲ್ಲೇ ಅದನ್ನು ಅಂಗೀಕರಿಸುತ್ತೇನೆ. ಪಕ್ಷದ ಶಿಸ್ತನ್ನು ಹಾಳು ಮಾಡಲು ಯಾರಿಗೂ ಬಿಡುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇದು ಅತೃಪ್ತ ಶಾಸಕರಿಗೆ ಅವರು ನೀಡಿರುವ ನೇರ ಮತ್ತು ಕಠಿಣ ಎಚ್ಚರಿಕೆಯಾಗಿದೆ.

ನಿಗಮ ಮಂಡಳಿಗಳ ನೇಮಕಾತಿ ಗೊಂದಲ

ಕೇವಲ ಸಂಪುಟ ಅಸಮಾಧಾನ ಮಾತ್ರವಲ್ಲದೆ, ನಿಗಮ ಮಂಡಳಿಗಳ ನೇಮಕಾತಿಯಲ್ಲೂ ಅಸಮಾಧಾನದ ಹೊಗೆಯಾಡುತ್ತಿದೆ. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಸಿಎಂ, "ನಿಗಮ ಮಂಡಳಿ ಅಧ್ಯಕ್ಷ ಸ್ಥಾನಗಳಿಗೆ ಮೊದಲೇ ಷರತ್ತು ವಿಧಿಸಲಾಗಿತ್ತು. ನೇಮಕವಾದವರಿಗೆ 2.5 ವರ್ಷ ಅಧಿಕಾರಾವಧಿ ಇರುತ್ತದೆ ಎಂದು ಮೊದಲೇ ಹೇಳಲಾಗಿತ್ತು. ಈಗ ಅವಧಿ ಪೂರ್ಣಗೊಂಡಿರುವುದರಿಂದ ರಾಜೀನಾಮೆ ನೀಡಲು ಸೂಚಿಸಿದ್ದೇನೆ. ಇದರಲ್ಲಿ ಹೊಸದೇನೂ ಇಲ್ಲ, ಇದು ಪಕ್ಷದ ಸಾಮಾನ್ಯ ಪ್ರಕ್ರಿಯೆ ಎಂದಿದ್ದಾರೆ.