ಮೈಸೂರಿನ ಜುವೆಲ್ಲರಿ ಮೇಲೆ ಬಿಐಎಸ್ ದಾಳಿ: ಹಾಲಮಾರ್ಕ್ ಇಲ್ಲದ 430 ಗ್ರಾಂ ಚಿನ್ನ ವಶ

ಮೈಸೂರು ನಗರದ ಲಷ್ಕರ್ ಮೊಹಲ್ಲಾದಲ್ಲಿರುವ ಪ್ರತಿಷ್ಠಿತ ಆಭರಣ ಮಳಿಗೆಯೊಂದರ ಮೇಲೆ ಭಾರತೀಯ ಗುಣಮಟ್ಟಗಳ ಬ್ಯೂರೋ (ಬಿಐಎಸ್‌) ಅಧಿಕಾರಿಗಳು ದಿಢೀರ್ ದಾಳಿ ನಡೆಸಿ, ಹಾಲಮಾರ್ಕ್ ಇಲ್ಲದ ಲಕ್ಷಾಂತರ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ವಶಪಡಿಸಿಕೊಂಡಿದ್ದಾರೆ. ಈ ಘಟನೆಯು ಮೈಸೂರಿನ ಆಭರಣ ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿಸಿದೆ.

ಬಿಐಎಸ್ ಬೆಂಗಳೂರು ಶಾಖೆಯ ಅಧಿಕಾರಿಗಳ ತಂಡವು ಮೈಸೂರಿನ ಲಷ್ಕರ್ ಮೊಹಲ್ಲಾದ 8ನೇ ಕ್ರಾಸ್‌ನಲ್ಲಿರುವ ಪ್ರತಿಭಾ ಜುವೆಲ್ಸ್ ಮಳಿಗೆಯ ಮೇಲೆ ದಾಳಿ ನಡೆಸಿತು. ಬಿಐಎಸ್ ಆಕ್ಟ್ 2016ರ ಅನ್ವಯ, ಚಿನ್ನಾಭರಣಗಳ ಮಾರಾಟದಲ್ಲಿ ಕಡ್ಡಾಯವಾಗಿ ಹಾಲಮಾರ್ಕಿಂಗ್ ನಿಯಮಗಳನ್ನು ಪಾಲಿಸಬೇಕು. ಆದರೆ, ಈ ನಿಯಮಗಳನ್ನು ಗಾಳಿಗೆ ತೂರಿ ಗ್ರಾಹಕರಿಗೆ ನಕಲಿ ಅಥವಾ ಗುಣಮಟ್ಟವಿಲ್ಲದ ಚಿನ್ನಾಭರಣಗಳನ್ನು ಮಾರಾಟ ಮಾಡುತ್ತಿರುವ ಬಗ್ಗೆ ದೊರೆತ ಖಚಿತ ಮಾಹಿತಿಯ ಮೇರೆಗೆ ಈ ಕಾರ್ಯಾಚರಣೆ ಕೈಗೊಳ್ಳಲಾಯಿತು. ಬಿಐಎಸ್ ಬೆಂಗಳೂರು ಕಚೇರಿಯ ನಿರ್ದೇಶಕ ಪಿ. ಜಯಚಂದ್ರ ಬಾಬು ನೇತೃತ್ವದಲ್ಲಿ ಈ ದಾಳಿ ನಡೆಯಿತು. ತಂಡದಲ್ಲಿ ವಿಜ್ಞಾನಿ-ಸಿ ಮತ್ತು ಉಪ ನಿರ್ದೇಶಕ ಮನೀಶ್ ರಾಜ್, ವಿಜ್ಞಾನಿ-ಬಿ ಹಾಗೂ ಸಹಾಯಕ ನಿರ್ದೇಶಕ ಪಿಯೂಷ್ ಕುಮಾರ್ ಗುಪ್ತಾ ಸೇರಿದಂತೆ ಬಿಐಎಸ್‌ನ ಹಿರಿಯ ಅಧಿಕಾರಿಗಳ ತಂಡ ಪಾಲ್ಗೊಂಡಿತ್ತು.

ದಾಳಿ ವೇಳೆ ಮಳಿಗೆಯಲ್ಲಿದ್ದ ಸುಮಾರು 430 ಗ್ರಾಂ ಚಿನ್ನಾಭರಣಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಈ ಆಭರಣಗಳಲ್ಲಿ ಕಡ್ಡಾಯವಾಗಿ ಇರಬೇಕಾದ 'ಹಾಲಮಾರ್ಕ್ ಯುನಿಕ್ ಐಡೆಂಟಿಫಿಕೇಶನ್' ಗುರುತುಗಳು ಇರಲಿಲ್ಲ ಎಂಬುದು ಪ್ರಾಥಮಿಕ ತನಿಖೆಯಲ್ಲಿ ಸಾಬೀತಾಗಿದೆ. ಇದು ಗ್ರಾಹಕರ ಹಿತಾಸಕ್ತಿಗೆ ವಿರುದ್ಧವಾದ ಕೃತ್ಯವಾಗಿದ್ದು, ಭಾರತೀಯ ಗುಣಮಟ್ಟಗಳ ಬ್ಯೂರೋ ಕಾಯ್ದೆಯ ಸ್ಪಷ್ಟ ಉಲ್ಲಂಘನೆಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಯಾಕೆ ಈ ದಾಳಿ ?

ಹಾಲಮಾರ್ಕಿಂಗ್ ಎಂದರೆ ಚಿನ್ನದ ಶುದ್ಧತೆಯ ಪ್ರಮಾಣಪತ್ರ. ಗ್ರಾಹಕರು ಖರೀದಿಸುವ ಚಿನ್ನಾಭರಣಗಳು ಎಷ್ಟು ಕ್ಯಾರೆಟ್ (ಉದಾಹರಣೆಗೆ 22K ಅಥವಾ 18K) ಇವೆ ಎಂಬುದನ್ನು ಖಚಿತಪಡಿಸಲು ಎಚ್‌ಯುಐಡಿ ಗುರುತು ಅತ್ಯಗತ್ಯ. ಆದರೆ, ಕೆಲವು ಮಳಿಗೆಗಳು ಗ್ರಾಹಕರನ್ನು ನಂಬಿಸಿ, ಕಡಿಮೆ ಶುದ್ಧತೆಯ ಚಿನ್ನವನ್ನು ಹೆಚ್ಚಿನ ದರಕ್ಕೆ ಮಾರಾಟ ಮಾಡುವ ವಂಚನೆಗೆ ಇಳಿಯುತ್ತಿವೆ. ಇಂತಹ ಮೋಸದ ವ್ಯಾಪಾರಗಳನ್ನು ತಡೆಗಟ್ಟಲು ಮತ್ತು ಗ್ರಾಹಕರಿಗೆ ನ್ಯಾಯಯುತ ಬೆಲೆಗೆ ಶುದ್ಧ ಚಿನ್ನ ಸಿಗುವಂತೆ ಮಾಡಲು ಬಿಐಎಸ್ ನಿರಂತರವಾಗಿ ಇಂತಹ ದಾಳಿಗಳನ್ನು ನಡೆಸುತ್ತಿದೆ. ವಶಪಡಿಸಿಕೊಳ್ಳಲಾದ ಚಿನ್ನಾಭರಣಗಳ ವಿಷಯದಲ್ಲಿ ಬಿಐಎಸ್ ಆಕ್ಟ್ 2016ರ ಅನ್ವಯ ಕಾನೂನು ಕ್ರಮಕ್ಕೆ ಅಧಿಕಾರಿಗಳು ಮುಂದಾಗಿದ್ದಾರೆ. ಮಳಿಗೆ ಮಾಲೀಕರಿಗೆ ನೋಟಿಸ್ ಜಾರಿ ಮಾಡಲಾಗಿದ್ದು, ಮುಂದಿನ ದಿನಗಳಲ್ಲಿ ದಂಡ ವಿಧಿಸುವುದು ಅಥವಾ ಪರವಾನಗಿ ರದ್ದುಗೊಳಿಸುವಂತಹ ಕಠಿಣ ಕ್ರಮಗಳನ್ನು ಕೈಗೊಳ್ಳಲಾಗುವುದು ಎಂದು ಮೂಲಗಳು ತಿಳಿಸಿವೆ. ಮಳಿಗೆ ಮಾಲೀಕರ ವಿರುದ್ಧ ಸೂಕ್ತ ನ್ಯಾಯಾಲಯದಲ್ಲಿ ದೂರು ದಾಖಲಿಸಲು ಸಿದ್ಧತೆ ನಡೆದಿದೆ.

ಗ್ರಾಹಕರಿಗೆ ಬಿಐಎಸ್ ಸಲಹೆ

ಈ ಘಟನೆಯ ಹಿನ್ನೆಲೆಯಲ್ಲಿ ಸಾರ್ವಜನಿಕರಿಗೆ ಬಿಐಎಸ್ ಮುಖ್ಯ ಎಚ್ಚರಿಕೆಯನ್ನು ನೀಡಿದೆ. ಖರೀದಿಸುವ ಮುನ್ನ ಯಾವುದೇ ಚಿನ್ನಾಭರಣವನ್ನು ಖರೀದಿಸುವಾಗ ಅದರ ಮೇಲೆ 'ಬಿಐಎಸ್‌ ಹಾಲ್‌ಮಾರ್ಕ್‌' ಮತ್ತು 6 ಅಂಕಿಯ 'ಎಚ್‌ಯುಐಡಿ' ಕೋಡ್ ಇದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು. ಮೊಬೈಲ್‌ನಲ್ಲಿ 'ಬಿಐಎಸ್‌ ಕೇರ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡು, ಅದರ ಮೂಲಕ ಆಭರಣದ ಮೇಲೆ ಇರುವ ಎಚ್‌ಯುಐಡಿ ನಂಬರ್ ಅನ್ನು ನಮೂದಿಸಿದರೆ, ಆ ಚಿನ್ನದ ಶುದ್ಧತೆ ಮತ್ತು ಮಳಿಗೆಯ ಅಧಿಕೃತ ಮಾಹಿತಿ ಲಭ್ಯವಾಗುತ್ತದೆ. ಒಂದು ವೇಳೆ ಮಾರಾಟಗಾರರು ನಕಲಿ ಹಾಲಮಾರ್ಕ್ ಇಲ್ಲದ ಆಭರಣಗಳನ್ನು ಮಾರುತ್ತಿದ್ದರೆ, ತಕ್ಷಣ ಬಿಐಎಸ್ ವೆಬ್‌ಸೈಟ್ (www.bis.gov.in) ಮೂಲಕ ದೂರು ಸಲ್ಲಿಸಬಹುದು.

ಮೈಸೂರಿನಲ್ಲಿ ನಡೆದ ಈ ದಾಳಿಯು ಕೇವಲ ಒಂದು ಮಳಿಗೆಗೆ ಸೀಮಿತವಲ್ಲ; ಇದು ಇಡೀ ವ್ಯಾಪಾರಿ ವರ್ಗಕ್ಕೆ ಒಂದು ಎಚ್ಚರಿಕೆಯಾಗಿದೆ. ನಕಲಿ ಆಭರಣಗಳ ಚಲಾವಣೆಯನ್ನು ತಡೆಯಲು ಮತ್ತು ದೇಶಾದ್ಯಂತ ಗುಣಮಟ್ಟದ ಮಾನದಂಡಗಳನ್ನು ಕಾಯ್ದುಕೊಳ್ಳಲು ಬಿಐಎಸ್ ಬದ್ಧವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಗ್ರಾಹಕರು ಸಹ ಜಾಗೃತರಾಗಿ, ಕೇವಲ ನಂಬಿಕೆಯ ಮೇಲೆ ಖರೀದಿಸದೆ, ಅಧಿಕೃತ ಹಾಲಮಾರ್ಕ್ ಗುರುತನ್ನು ನೋಡಿ ಖರೀದಿಸುವುದು ಅತ್ಯಗತ್ಯ. ಈ ಕಾರ್ಯಾಚರಣೆಯು ಗ್ರಾಹಕರಿಗೆ ವಂಚನೆ ಮಾಡುವ ವ್ಯಾಪಾರಿಗಳಿಗೆ ಬಿಸಿ ಮುಟ್ಟಿಸಿದೆ. ಮುಂದೆ ಇದೇ ರೀತಿಯ ಕಠಿಣ ಕ್ರಮಗಳನ್ನು ರಾಜ್ಯದ ಇತರೆ ಜಿಲ್ಲೆಗಳಲ್ಲಿಯೂ ಮುಂದುವರಿಸಲಾಗುವುದು ಎಂದು ಬಿಐಎಸ್ ತಿಳಿಸಿದೆ.