ವೈನ್ ಶಾಪ್ ನೆಪದಲ್ಲಿ ಅಕ್ರಮ ಹಣ ಸಕ್ರಮ: ನಿವೃತ್ತ ಅಬಕಾರಿ ಅಧಿಕಾರಿಗೆ 5 ವರ್ಷ ಜೈಲು
ಅಪರಾಧಿಗಳಾದ ರಾಮಚಂದ್ರಗೆ 5 ವರ್ಷ ಜೈಲು ಶಿಕ್ಷೆ, 5 ಲಕ್ಷ ರೂ. ದಂಡ, ಅವರ ಪುತ್ರಿ ಯೂರೆಖಾಗೆ 3 ವರ್ಷ ಶಿಕ್ಷೆ ಮತ್ತು 3 ಲಕ್ಷ ರೂ. ದಂಡ ವಿಧಿಸಿ ವಿಶೇಷ ನ್ಯಾಯಾಲಯ ತೀರ್ಪು ನೀಡಿದೆ.
ಭ್ರಷ್ಟಾಚಾರ ಮತ್ತು ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ, ಬೆಂಗಳೂರಿನ ವಿಶೇಷ ನ್ಯಾಯಾಲಯವು ನಿವೃತ್ತ ಅಬಕಾರಿ ಅಧಿಕಾರಿಯೊಬ್ಬರಿಗೆ ಮತ್ತು ಅವರ ಮಗಳಿಗೆ ಕಠಿಣ ಶಿಕ್ಷೆಯನ್ನು ವಿಧಿಸಿದೆ. ಅಕ್ರಮ ಸಂಪಾದನೆಯನ್ನು ಕಾನೂನುಬದ್ಧಗೊಳಿಸಲು ಪ್ರಯತ್ನಿಸಿದ್ದ ಇಬ್ಬರಿಗೂ ಜೈಲು ಶಿಕ್ಷೆ ಮತ್ತು ದಂಡ ವಿಧಿಸಲಾಗಿದ್ದು, ಅವರ ಐದು ಆಸ್ತಿಗಳನ್ನು ಸರ್ಕಾರಕ್ಕೆ ಮುಟ್ಟುಗೋಲು ಹಾಕಿಕೊಳ್ಳುವಂತೆ ಆದೇಶಿಸಿದೆ.
ಪ್ರಕರಣದ ಪ್ರಮುಖ ಆರೋಪಿ ಎಂ. ರಾಮಚಂದ್ರ, ನಿವೃತ್ತ ಅಬಕಾರಿ ಗಾರ್ಡ್ ಮತ್ತು ಇನ್‌ಚಾರ್ಜ್ ಸಬ್-ಇನ್‌ಸ್ಪೆಕ್ಟರ್. ಇವರು ತಮ್ಮ ಅಧಿಕಾರ ದುರುಪಯೋಗಪಡಿಸಿಕೊಂಡು, ಆದಾಯಕ್ಕಿಂತ ಹೆಚ್ಚಿನ ಆಸ್ತಿಯನ್ನು ಗಳಿಸಿದ್ದರು. 2009ರಲ್ಲಿ ಲೋಕಾಯುಕ್ತ ಪೊಲೀಸರು ದಾಖಲಿಸಿದ ಎಫ್‌ಐಆರ್ ನಂತರ ಜಾರಿ ನಿರ್ದೇಶನಾಲಯ ತನಿಖೆಯನ್ನು ಕೈಗೆತ್ತಿಕೊಂಡಿತ್ತು. 1977ರಿಂದ 2009ರ ಅವಧಿಯಲ್ಲಿ ರಾಮಚಂದ್ರ ಅವರು ತಮ್ಮ ಆದಾಯಕ್ಕಿಂತ ಸುಮಾರು ಶೇ.97.75 ಹೆಚ್ಚಿನ ಅಂದರೆ 42.48 ಲಕ್ಷ ರೂಪಾಯಿಗೂ ಹೆಚ್ಚು ಅಕ್ರಮ ಆಸ್ತಿಯನ್ನು ಗಳಿಸಿರುವುದು ತನಿಖೆಯಲ್ಲಿ ಸಾಬೀತಾಗಿತ್ತು.
ಅಕ್ರಮದ ವೈನ್ ಶಾಪ್ ಮಾರ್ಗ
ಪ್ರಕರಣದ ಅತ್ಯಂತ ಕುತೂಹಲಕಾರಿ ಅಂಶವೆಂದರೆ, ರಾಮಚಂದ್ರ ಅವರು ಅಕ್ರಮ ಹಣವನ್ನು ಸಕ್ರಮಗೊಳಿಸಲು ಬಳಸಿದ ಮಾರ್ಗ. ಅವರು ತಮ್ಮ ಅಬಕಾರಿ ಅಧಿಕಾರದ ಪ್ರಭಾವ ಬಳಸಿ, ಮಗಳ ಹೆಸರಿನಲ್ಲಿ 'ಕ್ವಾಲಿಟಿ ವೈನ್ ಸೆಂಟರ್' ಎಂಬ ವೈನ್ ಶಾಪ್ ತೆರೆದಿದ್ದರು. ಕಾಲೇಜಿನಲ್ಲಿ ಓದುತ್ತಿದ್ದ ಮಗಳ ಹೆಸರಿನಲ್ಲಿ ಈ ಪರವಾನಗಿ ಪಡೆದು, ಬಳಿಕ ಭ್ರಷ್ಟಾಚಾರದ ಮೂಲಕ ಗಳಿಸಿದ ಹಣವನ್ನು ವೈನ್ ಶಾಪ್‌ನ ಆದಾಯ ಎಂದು ಬಿಂಬಿಸಿ, ಅದನ್ನು ಬ್ಯಾಂಕ್ ಖಾತೆಗಳಿಗೆ ಜಮಾ ಮಾಡಲಾಗುತ್ತಿತ್ತು. ನಂತರ ಆ ಹಣವನ್ನು ಬಳಸಿಕೊಂಡು ಹಲವು ಸ್ಥಿರಾಸ್ತಿಗಳನ್ನು ಖರೀದಿಸಲಾಗಿತ್ತು.
ನ್ಯಾಯಾಲಯದ ಮಹತ್ವದ ತೀರ್ಪು
ಪ್ರಕರಣ ಕುರಿತು ವಿಚಾರಣೆ ನಡೆಸಿದ ವಿಶೇಷ ನ್ಯಾಯಾಲಯವು ಇಬ್ಬರು ಆರೋಪಿಗಳನ್ನು ಅಪರಾಧಿಗಳೆಂದು ಘೋಷಿಸಿದೆ. ಎಂ. ರಾಮಚಂದ್ರಗೆ 5 ವರ್ಷಗಳ ಕಠಿಣ ಜೈಲು ಶಿಕ್ಷೆ ಮತ್ತು 5 ಲಕ್ಷ ರೂ. ದಂಡ ವಿಧಿಸಲಾಗಿದ್ದು, ಅವರ ಪುತ್ರಿ ಆರ್. ಯೂರೆಖಾಗೆ 3 ವರ್ಷಗಳ ಕಠಿಣ ಜೈಲು ಶಿಕ್ಷೆ ಮತ್ತು 3 ಲಕ್ಷ ರೂ. ದಂಡ ವಿಧಿಸಲಾಗಿದೆ.
ದಂಡ ಪಾವತಿಸಲು ವಿಫಲವಾದರೆ ಹೆಚ್ಚುವರಿ ಜೈಲು ಶಿಕ್ಷೆಯನ್ನು ಅನುಭವಿಸಬೇಕಾಗುತ್ತದೆ. ನ್ಯಾಯಾಲಯವು ಅಕ್ರಮ ಹಣದಿಂದ ಖರೀದಿಸಿದ ಐದು ಆಸ್ತಿಗಳನ್ನು ಕೇಂದ್ರ ಸರ್ಕಾರಕ್ಕೆ ಮುಟ್ಟುಗೋಲು ಹಾಕಿಕೊಳ್ಳಲು ಆದೇಶಿಸಿದೆ. ಈ ಪ್ರಕರಣದಲ್ಲಿ ಸಾಕ್ಷಿಯೊಬ್ಬರು ನ್ಯಾಯಾಲಯದ ದಾರಿತಪ್ಪಿಸಲು ಸುಳ್ಳು ಹೇಳಿಕೆ ನೀಡಿದ್ದರು. ಎಂ. ಜಯರಾಮ್ ಎಂಬುವವರು, ತಾವು ರಾಮಚಂದ್ರ ಅವರನ್ನು ಬಲ್ಲೆವು ಎಂದು ಹೇಳಿದ್ದರೂ, ನಂತರದ ವಿಚಾರಣೆಯಲ್ಲಿ ಸುಳ್ಳು ಹೇಳಿರುವುದು ಸಾಬೀತಾಯಿತು. ಇದನ್ನು ಗಂಭೀರವಾಗಿ ಪರಿಗಣಿಸಿದ ನ್ಯಾಯಾಲಯ, ಸಾಕ್ಷಿಯ ವಿರುದ್ಧ ಸೆಕ್ಷನ್ 340 ಸಿಆರ್‌ಪಿಸಿ ಅಡಿಯಲ್ಲಿ ಸುಳ್ಳು ಸಾಕ್ಷ್ಯ ಪ್ರಕರಣ ದಾಖಲಿಸಲು ರಿಜಿಸ್ಟ್ರಾರ್‌ಗೆ ನಿರ್ದೇಶನ ನೀಡಿದೆ.
ಈ ತೀರ್ಪಿನ ಮಹತ್ವವೇನು?
2005ಕ್ಕೂ ಮುನ್ನ ಅಥವಾ ಪಿಎಂಎಲ್‌ಎ ಕಾನೂನು ಬರುವುದಕ್ಕೂ ಮುನ್ನ ಮಾಡಿರುವ ಭ್ರಷ್ಟಾಚಾರದ ಹಣವನ್ನು ಈಗಲೂ ಇಟ್ಟುಕೊಂಡಿದ್ದರೆ ಅಥವಾ ಅದನ್ನು ಬೇರೆ ಆಸ್ತಿಯಾಗಿ ಪರಿವರ್ತಿಸಿದ್ದರೆ, ಅದನ್ನು ಅಕ್ರಮ ಹಣ ವರ್ಗಾವಣೆ ಎಂದು ಪರಿಗಣಿಸಲಾಗುತ್ತದೆ. ಭ್ರಷ್ಟಾಚಾರದಲ್ಲಿ ಭಾಗಿಯಾಗದಿದ್ದರೂ, ಭ್ರಷ್ಟಾಚಾರದ ಹಣದಿಂದ ಖರೀದಿಸಿದ ಆಸ್ತಿಯನ್ನು ತಮ್ಮ ಹೆಸರಿನಲ್ಲಿ ಹೊಂದಿದ್ದರೆ ಅಥವಾ ಅದಕ್ಕೆ ಸಹಕರಿಸಿದ್ದರೆ ಕುಟುಂಬದವರೂ ಶಿಕ್ಷೆಗೆ ಗುರಿಯಾಗುತ್ತಾರೆ. ಭ್ರಷ್ಟಾಚಾರದ ಹಣವನ್ನು ವೈನ್ ಶಾಪ್ ಅಥವಾ ಇತರೆ ವ್ಯವಹಾರಗಳ ಆದಾಯ ಎಂದು ಸುಳ್ಳು ಲೆಕ್ಕ ತೋರಿಸಿದರೆ, ಅದನ್ನು ಪತ್ತೆ ಹಚ್ಚುವ ತಂತ್ರಜ್ಞಾನ ಇಂದು ಜಾರಿ ನಿರ್ದೇಶನಾಲಯದ ಬಳಿ ಇದೆ. ನ್ಯಾಯಾಲಯದಲ್ಲಿ ಬಂದು ಸುಳ್ಳು ಹೇಳಿದರೆ ಅಥವಾ ದಾರಿ ತಪ್ಪಿಸಿದರೆ ಜೈಲು ಸೇರಬೇಕಾಗುತ್ತದೆ ಎಂಬ ಎಚ್ಚರಿಕೆಯನ್ನು ಈ ತೀರ್ಪು ನೀಡಿದೆ.
