ನಮ್ಮ ಮೆಟ್ರೋ ನೀಲಿ ಲೈನ್‌ಗೆ ಮೊದಲ ರೈಲು ಆಗಮನ

ಸಿಲಿಕಾನ್ ಸಿಟಿಯ ತಂತ್ರಜ್ಞಾನ ಹಬ್‌ಗೆ ಸಂಪರ್ಕ ಕಲ್ಪಿಸುವ ನಮ್ಮ ಮೆಟ್ರೋದ ಹೊರ ವರ್ತುಲ ರಸ್ತೆ (ORR) ಕಾರಿಡಾರ್ ಅಥವಾ ನೀಲಿ ಲೈನ್ (Blue Line) ಯೋಜನೆಗೆ ಭಾರತ್ ಅರ್ಥ್ ಮೂವರ್ಸ್ ಲಿಮಿಟೆಡ್ (ಬಿಇಎಂಎಲ್) ಗುರುವಾರ ಚಾಲಕ ರಹಿತ ತಂತ್ರಜ್ಞಾನದ ಮೊದಲ ಆರು ಬೋಗಿಗಳ ಮೆಟ್ರೋ ರೈಲು ಸೆಟ್ ಅನ್ನು ಬಿಎಂಆರ್‌ಸಿಎಲ್‌ಗೆ ಯಶಸ್ವಿಯಾಗಿ ಹಸ್ತಾಂತರಿಸಿದೆ.

ಸಿ.ವಿ. ರಾಮನ್ ನಗರದಲ್ಲಿರುವ ಬಿಇಎಂಎಲ್ ಉತ್ಪಾದನಾ ಘಟಕದಿಂದ ಈ ರೈಲನ್ನು ವಿಶೇಷ ಟ್ರೇಲರ್‌ಗಳ ಮೂಲಕ ಬೈಯಪ್ಪನಹಳ್ಳಿ ಡಿಪೋಗೆ ಸಾಗಿಸಲಾಗಿದೆ. ಸದ್ಯಕ್ಕೆ ನೀಲಿ ಲೈನ್‌ಗಾಗಿ ನಿರ್ಮಿಸಲಾಗುತ್ತಿರುವ ಹೊಸ ಡಿಪೋ ಕಾಮಗಾರಿ ಇನ್ನೂ ಪೂರ್ಣಗೊಳ್ಳದ ಹಿನ್ನೆಲೆಯಲ್ಲಿ, ಈ ರೈಲನ್ನು ಇನ್ಸ್‌ಪೆಕ್ಷನ್ ಬೇ ಲೈನ್‌ನಲ್ಲಿ ಇರಿಸಿ ಡಿಪೋ ಪರೀಕ್ಷೆಗಳನ್ನು ಆರಂಭಿಸಲು ಅಧಿಕಾರಿಗಳು ಸಜ್ಜಾಗಿದ್ದಾರೆ. ಕಾರಿಡಾರ್ ಪೂರ್ಣಗೊಂಡ ತಕ್ಷಣ ಇದನ್ನು ಮುಖ್ಯ ಮಾರ್ಗಕ್ಕೆ ಸ್ಥಳಾಂತರಿಸಲಾಗುವುದು ಎಂದು ಬಿಎಂಆರ್‌ಸಿಎಲ್ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಈ ಮೆಟ್ರೋ ರೈಲುಗಳನ್ನು ಪ್ರಯಾಣಿಕರ ಸೇವೆಗೆ ಮುಕ್ತಗೊಳಿಸುವ ಮುನ್ನ ಕನಿಷ್ಠ ಐದು ತಿಂಗಳ ಕಾಲ ಕಠಿಣ ಸುರಕ್ಷತಾ ಮತ್ತು ತಾಂತ್ರಿಕ ಪರೀಕ್ಷೆಗಳಿಗೆ ಒಳಪಡಿಸಲಾಗುತ್ತದೆ. ಸೆಂಟ್ರಲ್ ಸಿಲ್ಕ್ ಬೋರ್ಡ್‌ನಿಂದ ಕೆ.ಆರ್. ಪುರಂವರೆಗಿನ 18 ಕಿಲೋಮೀಟರ್ ಉದ್ದದ ಈ ಮೇಲ್ಸೇತುವೆ ಮಾರ್ಗದ ಕಾಮಗಾರಿಯನ್ನು 2026ರ ಡಿಸೆಂಬರ್ ವೇಳೆಗೆ ಪೂರ್ಣಗೊಳಿಸುವ ಗುರಿ ಹೊಂದಲಾಗಿದೆಯಾದರೂ, ನಿಲ್ದಾಣಗಳ ನಿರ್ಮಾಣ ಕಾರ್ಯ ಇನ್ನೂ ಬಾಕಿ ಇರುವುದರಿಂದ ಗಡುವಿನೊಳಗೆ ಮುಗಿಯುವುದೇ ಎಂಬ ಪ್ರಶ್ನೆ ಮೂಡಿದೆ. ಇನ್ನು ಕೆ.ಆರ್. ಪುರಂನಿಂದ ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದವರೆಗಿನ 37 ಕಿಲೋಮೀಟರ್ ಮಾರ್ಗವು 2027ರ ಡಿಸೆಂಬರ್ ವೇಳೆಗೆ ಸಿದ್ಧವಾಗುವ ನಿರೀಕ್ಷೆಯಿದೆ. ಬಿಇಎಂಎಲ್ ಸಂಸ್ಥೆಯು ಬಿಎಂಆರ್‌ಸಿಎಲ್‌ಗೆ ಒಟ್ಟು 318 ಮೆಟ್ರೋ ಬೋಗಿಗಳನ್ನು ಪೂರೈಸಲು 3,177 ಕೋಟಿ ರೂಪಾಯಿಗಳ ಒಪ್ಪಂದವನ್ನು ಮಾಡಿಕೊಂಡಿದೆ.

ವಿಶೇಷವೆಂದರೆ, ನೀಲಿ ಲೈನ್‌ನ ಈ ರೈಲುಗಳಲ್ಲಿ ಪ್ರಯಾಣಿಕರ ಅನುಕೂಲಕ್ಕಾಗಿ ಲಗೇಜ್ ರ್ಯಾಕ್‌ಗಳನ್ನು ಅಳವಡಿಸಲು ಯೋಜಿಸಲಾಗಿದ್ದು, ಇದಕ್ಕಾಗಿ ಬೋಗಿಗಳಲ್ಲಿನ ತಲಾ ಎರಡು ಆಸನಗಳನ್ನು ಕಡಿತಗೊಳಿಸಲಾಗುತ್ತಿದೆ. ಆದರೆ ಮೊದಲ ರೈಲು ಸೆಟ್‌ನಲ್ಲಿ ಈ ಸೌಲಭ್ಯ ಇನ್ನೂ ಅಳವಡಿಕೆಯಾಗಿಲ್ಲದ ಕಾರಣ, ಬಿಎಂಆರ್‌ಸಿಎಲ್ ಇದರ ವಿನ್ಯಾಸವನ್ನು ಮತ್ತಷ್ಟು ಸುಧಾರಿಸುವಂತೆ ಬಿಇಎಂಎಲ್‌ಗೆ ಸೂಚಿಸಿದೆ. ಇದರೊಂದಿಗೆ ಈ ರೈಲುಗಳು ಎಲ್‌ಸಿಡಿ ಆಧಾರಿತ ಡೈನಾಮಿಕ್ ರೂಟ್ ಮ್ಯಾಪ್ ಡಿಸ್‌ಪ್ಲೇ ಮತ್ತು ಅತ್ಯಾಧುನಿಕ ಸುರಕ್ಷತಾ ವ್ಯವಸ್ಥೆಗಳನ್ನು ಹೊಂದಿರಲಿವೆ. ಇದೇ ವೇಳೆ ಬಿಇಎಂಎಲ್ ಸಂಸ್ಥೆಯು ನಮ್ಮ ಮೆಟ್ರೋದ ಪಿಂಕ್ ಲೈನ್‌ಗೆ (ಕಾಳೇನ ಅಗ್ರಹಾರದಿಂದ ನಾಗವಾರ) ಅಗತ್ಯವಿರುವ 16 ರೈಲುಗಳ ಪೈಕಿ ಈಗಾಗಲೇ 6 ರೈಲು ಸೆಟ್‌ಗಳನ್ನು ಯಶಸ್ವಿಯಾಗಿ ಪೂರೈಸಿದೆ. ಈ ಪಿಂಕ್ ಲೈನ್‌ನ ಮೇಲ್ಸೇತುವೆ ಮಾರ್ಗದಲ್ಲಿ ಮುಂಬರುವ ಆಗಸ್ಟ್ 15 ರೊಳಗೆ ವಾಣಿಜ್ಯ ಸಂಚಾರ ಆರಂಭಿಸಲು ಬಿಎಂಆರ್‌ಸಿಎಲ್ ಯೋಜಿಸುತ್ತಿದೆ.

ಹಳದಿ ಲೈನ್‌ನಂತೆಯೇ ಪಿಂಕ್ ಮತ್ತು ಬ್ಲೂ ಲೈನ್‌ಗಳು ಸಹ ಅತ್ಯಾಧುನಿಕ ಕಮ್ಯುನಿಕೇಷನ್ ಬೇಸ್ಡ್ ಟ್ರೈನ್ ಕಂಟ್ರೋಲ್ (CBTC) ಸಿಗ್ನಲಿಂಗ್ ವ್ಯವಸ್ಥೆಯಡಿ ಕಾರ್ಯನಿರ್ವಹಿಸಲಿವೆ. ಇವುಗಳನ್ನು ಸಂಪೂರ್ಣ ಸ್ವಯಂಚಾಲಿತ ಹಾಗೂ ಚಾಲಕ ರಹಿತ ಕಾರ್ಯಾಚರಣೆಗೆ (GoA-4) ತಕ್ಕಂತೆ ವಿನ್ಯಾಸಗೊಳಿಸಲಾಗಿದ್ದರೂ, ಆರಂಭಿಕ ಹಂತದಲ್ಲಿ ಪ್ರಯಾಣಿಕರ ವಿಶ್ವಾಸ ಮತ್ತು ಸುರಕ್ಷತೆಯ ದೃಷ್ಟಿಯಿಂದ ರೈಲು ಚಾಲಕರು ಬೋಗಿಗಳಲ್ಲಿ ಇರಲಿದ್ದಾರೆ. ವ್ಯವಸ್ಥೆಯು ಸಂಪೂರ್ಣವಾಗಿ ವಿಶ್ವಾಸಾರ್ಹವೆಂದು ಸಾಬೀತಾದ ನಂತರವಷ್ಟೇ ಸಂಪೂರ್ಣ ಚಾಲಕ ರಹಿತ ಸೇವೆಯನ್ನು ಜಾರಿಗೆ ತರಲಾಗುವುದು ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.