ಅಡ್ಡ ಮತದಾನ ಆರೋಪಕ್ಕೆ ಆಣೆ-ಪ್ರಮಾಣದ ಉತ್ತರ: ಶಾಸಕ ಎಚ್.ಕೆ. ಸುರೇಶ್ ಭಾವುಕ ನುಡಿ

ಇತ್ತೀಚೆಗೆ ನಡೆದ ವಿಧಾನ ಪರಿಷತ್ ಚುನಾವಣೆಯ ಫಲಿತಾಂಶದ ಬಳಿಕ ಕೇಳಿಬಂದಿರುವ ಅಡ್ಡ ಮತದಾನದ ಆರೋಪಗಳು ರಾಜ್ಯ ರಾಜಕೀಯದಲ್ಲಿ ಭಾರೀ ಸಂಚಲನ ಮೂಡಿಸಿದೆ. ಅಡ್ಡ ಮತದಾನ ಬಳಿಕ ಅಣೆ ಪ್ರಮಾಣದ ಮಾತುಗಳು ಕೇಳಿಬಂದ ಹಿನ್ನೆಲೆಯಲ್ಲಿ ಇದೇ ಸುಳಿಯಲ್ಲಿ ಸಿಲುಕಿರುವ ಬೇಲೂರು ವಿಧಾನಸಭಾ ಕ್ಷೇತ್ರದ ಬಿಜೆಪಿ ಶಾಸಕ ಎಚ್.ಕೆ. ಸುರೇಶ್, ತಾವೇನೂ ತಪ್ಪು ಮಾಡಿಲ್ಲ ಎಂದು ಸಾಬೀತುಪಡಿಸಲು ದೈವಿಕ ಮೊರೆ ಹೋಗಿದ್ದಾರೆ. ತಮ್ಮ ಮೇಲೆ ಕೇಳಿಬಂದಿರುವ ಅಡ್ಡ ಮತದಾನದ ಗಂಭೀರ ಆರೋಪವನ್ನು ಸಂಪೂರ್ಣವಾಗಿ ನಿರಾಕರಿಸಿರುವ ಎಚ್.ಕೆ. ಸುರೇಶ್, ಮಂಗಳವಾರ ಮುಂಜಾನೆ ಬೆಂಬಲಿಗರೊಂದಿಗೆ ಬೇಲೂರಿನ ಐತಿಹಾಸಿಕ ಚನ್ನಕೇಶವಸ್ವಾಮಿ ದೇವಾಲಯಕ್ಕೆ ತೆರಳಿದರು. ದೇವಾಲಯದ ಆವರಣದಲ್ಲಿ ಮೊದಲು ವಿಶೇಷ ಪೂಜೆ ಸಲ್ಲಿಸಿದ ಅವರು, ದೇವರ ಸನ್ನಿಧಿಯಲ್ಲಿ ತಮ್ಮ ನಿಷ್ಠೆಯನ್ನು ದೇವರಿಗೆ ಅರ್ಪಿಸಿದರು.

ದೇವಸ್ಥಾನದ ಎದುರಿನ ಪವಿತ್ರ ಬಲಿಕಲ್ಲು (ಕರಿಕಲ್ಲು) ಮುಟ್ಟಿ ಪ್ರಮಾಣ ಮಾಡಿದ ಶಾಸಕರು, ಈ ಕರಿಕಲ್ಲೇ ಸಾಕ್ಷಿ, ನಾನು ವಿಧಾನ ಪರಿಷತ್ ಚುನಾವಣೆಯಲ್ಲಿ ಯಾವುದೇ ಅಡ್ಡ ಮತದಾನ ಮಾಡಿಲ್ಲ. ನನ್ನ ಜೀವವಿರುವವರೆಗೂ ನಾನು ಬಿಜೆಪಿಗೆ ಎಂದಿಗೂ ದ್ರೋಹ ಮಾಡಿಲ್ಲ ಎಂದು ಮೂರು ಬಾರಿ ಗಟ್ಟಿಯಾಗಿ ಉಚ್ಚರಿಸಿ, ಭಕ್ತಿಪೂರ್ವಕವಾಗಿ ಆಣೆ ಮಾಡಿದರು.

ನರೇಂದ್ರ ಮೋದಿಯವರ ಹೆಸರಿನಲ್ಲಿ ಭಾವುಕ ನುಡಿ

ಆಣೆ ಪ್ರಮಾಣದ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಶಾಸಕ ಸುರೇಶ್, ಸಾಕಷ್ಟು ಭಾವುಕರಾಗಿ ಕಂಡುಬಂದರು. ನನ್ನ ಕ್ಷೇತ್ರದ ಬೆಳವಣಿಗೆಗಾಗಿ ಮತ್ತು ನನ್ನ ಗೆಲುವಿಗಾಗಿ ಸಾಕ್ಷಾತ್ ಪ್ರಧಾನಿ ನರೇಂದ್ರ ಮೋದಿಯವರು ಬಂದು ಪ್ರಚಾರ ನಡೆಸಿದ್ದರು. ಅಂತಹ ಉನ್ನತ ನಾಯಕರಿಗೆ ಮತ್ತು ನಾನು ನಂಬಿರುವ ಪಕ್ಷಕ್ಕೆ ದ್ರೋಹ ಬಗೆಯುವಷ್ಟು ನೀಚ ಕೆಲಸವನ್ನು ನಾನು ಎಂದಿಗೂ ಮಾಡುವುದಿಲ್ಲ. ಒಂದು ವೇಳೆ ನಾನು ಪಕ್ಷಕ್ಕೆ ಅನ್ಯಾಯ ಮಾಡಿದ್ದರೆ, ಭಗವಂತ ನನ್ನನ್ನು ಎಂದಿಗೂ ಕ್ಷಮಿಸುವುದಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ತಮ್ಮ ವಿರುದ್ಧ ಕೇಳಿಬರುತ್ತಿರುವ ಆರೋಪಗಳ ಹಿಂದಿರುವ ಕೈವಾಡವನ್ನು ಶಾಸಕರು ಬಯಲು ಮಾಡಿದರು. ನನ್ನ ರಾಜಕೀಯ ಬೆಳವಣಿಗೆಯನ್ನು ಸಹಿಸದ ಕೆಲವು ವ್ಯಕ್ತಿಗಳು ನನ್ನ ವರ್ಚಸ್ಸನ್ನು ಹಾಳು ಮಾಡಲು ಈ ಷಡ್ಯಂತ್ರ ರೂಪಿಸಿದ್ದಾರೆ. ಈ ಅಡ್ಡ ಮತದಾನದ ಅಪಪ್ರಚಾರವು ಕೇವಲ ನನ್ನ ಮೇಲಿನ ದಾಳಿಯಲ್ಲ, ಇದು ಈ ಕ್ಷೇತ್ರದ ಜನರ ಮೇಲಿನ ಅವಮಾನವಾಗಿದೆ. ಹಣದ ಆಮಿಷವೊಡ್ಡಿ ನನ್ನನ್ನು ಕೊಳ್ಳಲು ಯಾರಿಂದಲೂ ಸಾಧ್ಯವಿಲ್ಲ. ನನ್ನನ್ನು ಕೊಳ್ಳುವ ಶಕ್ತಿ ಇರುವುದು ಕೇವಲ ಕ್ಷೇತ್ರದ ಜನರ ಪ್ರೀತಿಗೆ ಮಾತ್ರ ಎಂದು ಹೇಳಿದರು.

ಧರ್ಮಸ್ಥಳದತ್ತ ಪಯಣ

ಬೇಲೂರಿನಲ್ಲಿ ಆಣೆ ಪ್ರಮಾಣ ಮಾಡಿದರೂ ಶಾಸಕ ಸುರೇಶ್ ಅವರ ಸಿಟ್ಟು ತಣ್ಣಗಾಗಲಿಲ್ಲ. ಅಲ್ಲಿಂದ ನೇರವಾಗಿ ಅವರು ಸುಪ್ರಸಿದ್ಧ ಧಾರ್ಮಿಕ ಕ್ಷೇತ್ರ ಧರ್ಮಸ್ಥಳಕ್ಕೆ ಪ್ರಯಾಣ ತೆರಳಿದರು. ಶ್ರೀ ಮಂಜುನಾಥ ಸ್ವಾಮಿಯ ಸನ್ನಿಧಿಯಲ್ಲಿ ಮತ್ತೊಮ್ಮೆ ಪ್ರಮಾಣ ಮಾಡುವುದಾಗಿ ಅವರು ಘೋಷಿಸಿದ್ದಾರೆ. ನೂರಾರು ಬಿಜೆಪಿ ಕಾರ್ಯಕರ್ತರು ಮತ್ತು ಬೆಂಬಲಿಗರು ಅವರೊಂದಿಗೆ ಪ್ರಯಾಣ ಬೆಳೆಸಿರುವುದು, ಅವರ ಮೇಲಿರುವ ವಿಶ್ವಾಸವನ್ನು ತೋರಿಸಿಕೊಟ್ಟಿದೆ. ಈ ಮೊದಲು ರಾಜಕೀಯ ಭಿನ್ನಾಭಿಪ್ರಾಯಗಳನ್ನು ಚರ್ಚೆಗಳ ಮೂಲಕ ಅಥವಾ ಪಕ್ಷದ ವೇದಿಕೆಯಲ್ಲಿ ಬಗೆಹರಿಸಿಕೊಳ್ಳಲಾಗುತ್ತಿತ್ತು. ಆದರೆ, ಇತ್ತೀಚಿನ ದಿನಗಳಲ್ಲಿ ಇಂತಹ ಆಣೆ-ಪ್ರಮಾಣಗಳು ರಾಜಕೀಯದ ಭಾಗವೇ ಆಗುತ್ತಿರುವುದು ಪ್ರಜಾಪ್ರಭುತ್ವದ ಮೇಲಿನ ವಿಶ್ವಾಸಾರ್ಹತೆಯನ್ನು ಪ್ರಶ್ನಿಸುವಂತೆ ಮಾಡುತ್ತಿದೆ. ಶಾಸಕ ಎಚ್.ಕೆ. ಸುರೇಶ್ ಅವರು ದೇವಸ್ಥಾನಗಳಿಗೆ ತೆರಳಿ ಸತ್ಯ ಸಾಬೀತುಪಡಿಸಲು ಮುಂದಾಗಿರುವುದು, ಪಕ್ಷದ ಒಳಗಿನ ಮುಸುಕಿನ ಗುದ್ದಾಟ ಎಷ್ಟು ತೀವ್ರವಾಗಿದೆ ಎಂಬುದನ್ನು ಸೂಚಿಸುತ್ತದೆ.