Noida Violence| ವಾಟ್ಸಾಪ್ ಗ್ರೂಪ್, ಕ್ಯೂಆರ್ ಕೋಡ್‌ಗಳೇ ಅಸ್ತ್ರ- ನೋಯ್ಡಾ ಹಿಂಸಾಚಾರದ ಹಿಂದಿನ ಅಸಲಿ ಗುಟ್ಟು ಬಯಲು!

ಉತ್ತರ ಪ್ರದೇಶದ ಕೈಗಾರಿಕಾ ಹಬ್ ಆಗಿರುವ ನೋಯ್ಡಾದಲ್ಲಿ ಕಳೆದ ಕೆಲವು ದಿನಗಳಿಂದ ಗಾರ್ಮೆಂಟ್ ಕಾರ್ಮಿಕರು ನಡೆಸುತ್ತಿರುವ ಪ್ರತಿಭಟನೆ ಈಗ ರಾಷ್ಟ್ರಮಟ್ಟದ ಗಮನ ಸೆಳೆದಿದೆ. ಕೇವಲ ವೇತನ ಹೆಚ್ಚಳದ ಬೇಡಿಕೆಯಾಗಿ ಆರಂಭವಾದ ಈ ಹೋರಾಟ, ಈಗ ಹಿಂಸಾಚಾರ ಮತ್ತು ವ್ಯವಸ್ಥಿತ ಸಂಚಿನ ಸ್ವರೂಪ ಪಡೆದುಕೊಂಡಿದೆ. ಈ ಘಟನೆಯ ಹಿಂದಿರುವ ಅಸಲಿ ಕಾರಣಗಳೇನು? ಪೊಲೀಸರು ಏನೆನ್ನುತ್ತಾರೆ? ಎಂಬ ಮಾಹಿತಿ ಇಲ್ಲಿದೆ.

ಪ್ರತಿಭಟನೆಗೆ ಮುಖ್ಯ ಕಾರಣವೇನು?

ಈ ಪ್ರತಿಭಟನೆಯ ಹಿಂದೆ ಪ್ರಮುಖವಾಗಿ 'ವೇತನ ತಾರತಮ್ಯ' ಅಡಗಿದೆ. ನೋಯ್ಡಾ ಪಕ್ಕದ ಹರಿಯಾಣದಲ್ಲಿ ಇತ್ತೀಚೆಗೆ ಕಾರ್ಮಿಕರ ಕನಿಷ್ಠ ವೇತನವನ್ನು ಸುಮಾರು 19,000 ರಿಂದ 20,000 ರೂ.ಗಳಿಗೆ ಏರಿಸಲಾಗಿದೆ. ಆದರೆ ನೋಯ್ಡಾದಲ್ಲಿ ಇದೇ ಕೆಲಸ ಮಾಡುವ ಕಾರ್ಮಿಕರಿಗೆ ಕೇವಲ 11,000 ದಿಂದ 13,000 ರೂ. ಸಂಬಳ ನೀಡಲಾಗುತ್ತಿದೆ. ಏರುತ್ತಿರುವ ಜೀವನ ವೆಚ್ಚ ಮತ್ತು ಹಣದುಬ್ಬರಕ್ಕೆ ಅನುಗುಣವಾಗಿ ನಮಗೂ ಕನಿಷ್ಠ 20,000 ರೂ. ವೇತನ ನೀಡಬೇಕು ಎಂಬುದು ಕಾರ್ಮಿಕರ ಆಗ್ರಹ.

ಪ್ರತಿಭಟನೆ ಹಿಂಸಾರೂಪಕ್ಕೆ ತಿರುಗಿದ್ದು ಹೇಗೆ?

ಆರಂಭದಲ್ಲಿ ಶಾಂತಿಯುತವಾಗಿದ್ದ ಮುಷ್ಕರವು ಸೋಮವಾರದ ವೇಳೆಗೆ ಹಿಂಸೆಗೆ ತಿರುಗಿತು. ಫೇಸ್-2 ಮತ್ತು ಸೆಕ್ಟರ್ 60 ರಂತಹ ಪ್ರದೇಶಗಳಲ್ಲಿ ಪ್ರತಿಭಟನಾಕಾರರು ಪೊಲೀಸರ ಮೇಲೆ ಕಲ್ಲು ತೂರಾಟ ನಡೆಸಿದರು, ಪೊಲೀಸ್ ವ್ಯಾನ್‌ಗಳಿಗೆ ಬೆಂಕಿ ಹಚ್ಚಿದರು ಮತ್ತು ಫ್ಯಾಕ್ಟರಿಗಳ ಆಸ್ತಿಪಾಸ್ತಿಗಳಿಗೆ ಹಾನಿ ಮಾಡಿದರು. ಇದರಿಂದಾಗಿ ದೆಹಲಿ-ನೋಯ್ಡಾ ಗಡಿಭಾಗಗಳಲ್ಲಿ ಕಿಲೋಮೀಟರ್‌ಗಟ್ಟಲೆ ಟ್ರಾಫಿಕ್ ಜಾಮ್ ಉಂಟಾಗಿ ಸಾರ್ವಜನಿಕರು ಪರದಾಡುವಂತಾಯಿತು.

'ಕ್ಯೂಆರ್ ಕೋಡ್' ಮತ್ತು 'ವಾಟ್ಸಾಪ್' ಸಂಚು!

ಗೌತಮ್ ಬುದ್ಧ ನಗರದ ಪೊಲೀಸ್ ಕಮಿಷನರ್ ಲಕ್ಷ್ಮಿ ಸಿಂಗ್ ಅವರ ಪ್ರಕಾರ, ಈ ಪ್ರತಿಭಟನೆಯು ಅಂದುಕೊಂಡಷ್ಟು ಸರಳವಾಗಿಲ್ಲ.ಕಳೆದ ಎರಡು ದಿನಗಳಲ್ಲಿ ಕೇವಲ QR Code ಸ್ಕ್ಯಾನ್ ಮಾಡುವ ಮೂಲಕ ನೂರಾರು ಕಾರ್ಮಿಕರನ್ನು ವಿವಿಧ ವಾಟ್ಸಾಪ್ ಗ್ರೂಪ್‌ಗಳಿಗೆ (ಉದಾಹರಣೆಗೆ: 'ಮಜ್ದೂರ್ ಆಂದೋಲನ್') ಸೇರಿಸಲಾಗಿದೆ.

ಈ ಗುಂಪುಗಳ ಮೂಲಕ ಪ್ರಚೋದನಾಕಾರಿ ಸಂದೇಶಗಳನ್ನು ರವಾನಿಸಿ, ಕಾರ್ಮಿಕರನ್ನು ಹಿಂಸೆಗೆ ಪ್ರೇರೇಪಿಸಲಾಗಿದೆ ಎಂಬುದು ಪೊಲೀಸರ ಶಂಕೆ. ಇದು ಒಬ್ಬಿಬ್ಬರು ಮಾಡಿರುವ ಕೆಲಸವಲ್ಲ, ಇದರ ಹಿಂದೆ ದೊಡ್ಡ 'ಸಿಂಡಿಕೇಟ್' ಕೆಲಸ ಮಾಡುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪೊಲೀಸರ ಕ್ರಮವೇನು?

ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಪೊಲೀಸರು ಈವರೆಗೆ ಕಠಿಣ ಕ್ರಮಗಳನ್ನು ಕೈಗೊಂಡಿದ್ದು, 300ಕ್ಕೂ ಹೆಚ್ಚು ಪ್ರತಿಭಟನಾಕಾರರನ್ನು ವಶಕ್ಕೆ ಪಡೆಯಲಾಗಿದೆ. ಘಟನೆಗೆ ಸಂಬಂಧಿಸಿದಂತೆ ಒಟ್ಟು 7 ಎಫ್‌ಐಆರ್ ದಾಖಲಿಸಲಾಗಿದೆ. ಈ ಗುಂಪುಗಳಿಗೆ ವಿದೇಶದಿಂದ ಅಥವಾ ರಾಜ್ಯದ ಹೊರಗಿನಿಂದ ಆರ್ಥಿಕ ಸಹಾಯ ಬರುತ್ತಿದೆಯೇ ಎಂಬ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ.

ಸರ್ಕಾರದ 'ಮಧ್ಯಂತರ' ಪರಿಹಾರ

ಕಾರ್ಮಿಕರ ತೀವ್ರ ಪ್ರತಿಭಟನೆಯ ಹಿನ್ನೆಲೆಯಲ್ಲಿ ಉತ್ತರ ಪ್ರದೇಶ ಸರ್ಕಾರವು ಕನಿಷ್ಠ ವೇತನದಲ್ಲಿ ಸುಮಾರು ಶೇ. 21 ರಷ್ಟು ಮಧ್ಯಂತರ ಹೆಚ್ಚಳವನ್ನು ಘೋಷಿಸಿದ್ದು, ಏಪ್ರಿಲ್ 1 ರಿಂದ ಜಾರಿಗೆ ಬರುವಂತೆ ಪರಿಷ್ಕೃತ ದರಗಳನ್ನು ನಿಗದಿಪಡಿಸಿದೆ. ಈ ಹೊಸ ಆದೇಶದನ್ವಯ ಗೌತಮ್ ಬುದ್ಧ ನಗರ ಮತ್ತು ಗಾಜಿಯಾಬಾದ್ ಜಿಲ್ಲೆಗಳಲ್ಲಿ ಕುಶಲವಲ್ಲದ ಕಾರ್ಮಿಕರಿಗೆ ಮಾಸಿಕ 13,690 ರೂ., ಅರೆ-ಕುಶಲ ಕಾರ್ಮಿಕರಿಗೆ 15,059 ರೂ. ಮತ್ತು ಕುಶಲ ಕಾರ್ಮಿಕರಿಗೆ 16,868 ರೂ. ಕನಿಷ್ಠ ವೇತನ ಸಿಗಲಿದೆ. ಆದರೆ, ಕನಿಷ್ಠ ವೇತನವನ್ನು 20,000 ರೂ.ಗಳಿಗೆ ಏರಿಸಲಾಗಿದೆ ಎಂಬ ವದಂತಿಗಳನ್ನು ಸರ್ಕಾರ ಸ್ಪಷ್ಟವಾಗಿ ನಿರಾಕರಿಸಿದ್ದು, ರಾಷ್ಟ್ರಮಟ್ಟದಲ್ಲಿ ವೇತನ ಪರಿಷ್ಕರಣೆಯ ಪ್ರಕ್ರಿಯೆ ನಡೆಯುತ್ತಿರುವುದರಿಂದ ಸದ್ಯಕ್ಕೆ ಈ ಮಧ್ಯಂತರ ಏರಿಕೆ ಮಾಡಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ತಾರಕಕ್ಕೇರಿದ ರಾಜಕೀಯ ಕೆಸರೆರಚಾಟ

ನೋಯ್ಡಾ ಕಾರ್ಮಿಕರ ಪ್ರತಿಭಟನೆಯನ್ನು ಮುಂದಿಟ್ಟುಕೊಂಡು ಸಮಾಜವಾದಿ ಪಕ್ಷ ಮತ್ತು ಕಾಂಗ್ರೆಸ್ ಸರ್ಕಾರವನ್ನು ಜಂಟಿಯಾಗಿ ತರಾಟೆಗೆ ತೆಗೆದುಕೊಂಡಿವೆ. "ಸರ್ಕಾರದ ವೈಫಲ್ಯವೇ ಈ ಅಶಾಂತಿಗೆ ಕಾರಣ, ಒಂದು ವೇಳೆ ಇದು ಸಂಚಾಗಿದ್ದಲ್ಲಿ ಅದಕ್ಕೆ ಮುಖ್ಯಮಂತ್ರಿ ಮತ್ತು ಬಿಜೆಪಿಯೇ ಹೊಣೆ" ಎಂದು ಅಖಿಲೇಶ್ ಯಾದವ್ ಟೀಕಿಸಿದ್ದರೆ, ರಾಹುಲ್ ಗಾಂಧಿ ಅವರು ಇದನ್ನು "ದೇಶದ ಕಾರ್ಮಿಕರ ಕೊನೆಯ ಕೂಗು" ಎಂದು ಕರೆದಿದ್ದಾರೆ. ಅಲ್ಲದೆ 12,000 ರೂ. ಸಂಬಳದಲ್ಲಿ ಏರುತ್ತಿರುವ ಬಾಡಿಗೆ ಮತ್ತು ಹಣದುಬ್ಬರವನ್ನು ನಿಭಾಯಿಸಲು ಸಾಧ್ಯವಿಲ್ಲ, ಇದು 'ವಿಕಸಿತ ಭಾರತ' ಘೋಷಣೆಯ ಹಿಂದಿನ ಕಹಿ ಸತ್ಯ ಎಂದು ರಾಹುಲ್ ಕಿಡಿಕಾರಿದ್ದಾರೆ. ಇತ್ತ ಕಾಂಗ್ರೆಸ್ ನಾಯಕ ಅಜಯ್ ರೈ ಇದನ್ನು "ವಿಫಲ ಸರ್ಕಾರ" ಎಂದು ಟೀಕಿಸಿ ಬಂಧಿತರ ಬಿಡುಗಡೆಗೆ ಆಗ್ರಹಿಸಿದ್ದಾರೆ.

ಇದಕ್ಕೆ ಪ್ರತಿಯಾಗಿ ಬಿಜೆಪಿ ಸರ್ಕಾರವು ಈ ಹಿಂಸಾಚಾರದ ಹಿಂದೆ "ಪಾಕಿಸ್ತಾನದ ಹ್ಯಾಂಡ್ಲರ್‌ಗಳ" ಸಂಪರ್ಕವಿರುವ ಆಳವಾದ ಸಂಚಿದೆ ಎಂದು ಆರೋಪಿಸಿದೆ. ಇದೇ ವೇಳೆ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಕೈಗಾರಿಕಾ ಶಾಂತಿಯನ್ನು ಕದಡುವ ಶಕ್ತಿಗಳ ವಿರುದ್ಧ ಎಚ್ಚರಿಕೆ ನೀಡಿದ್ದು, ಉದ್ಯಮಿಗಳು ಕಾರ್ಮಿಕರೊಂದಿಗೆ ನೇರ ಸಂವಾದ ನಡೆಸುವಂತೆ ಮನವಿ ಮಾಡಿದ್ದಾರೆ.

ಮುಂದಿನ ಸ್ಥಿತಿ ಏನು?

ಪ್ರಸ್ತುತ ನೋಯ್ಡಾದಲ್ಲಿ ಬಿಗುವಿನ ವಾತಾವರಣ ಮುಂದುವರಿದಿದ್ದು, ಪೊಲೀಸರು ನಿರಂತರ ರೂಟ್ ಮಾರ್ಚ್ ನಡೆಸುತ್ತಿದ್ದಾರೆ. "ಕಾರ್ಮಿಕರ ಸಮಸ್ಯೆಗಳಿಗೆ ಸರ್ಕಾರ ಸ್ಪಂದಿಸುತ್ತದೆ, ಆದರೆ ಕಾನೂನು ಕೈಗೆತ್ತಿಕೊಳ್ಳುವವರನ್ನು ಮತ್ತು ವದಂತಿ ಹರಡುವವರನ್ನು ಸುಮ್ಮನೆ ಬಿಡುವುದಿಲ್ಲ" ಎಂದು ಪೊಲೀಸ್ ಇಲಾಖೆ ಎಚ್ಚರಿಸಿದೆ.