ಗೋಲಿನ ಬಳಿಕ ಕಣ್ಣೀರಿಟ್ಟ ನೇಮರ್; ಅಂತಾರಾಷ್ಟ್ರೀಯ ಫುಟ್‌ಬಾಲ್‌ಗೆ ಬ್ರೆಜಿಲ್ ಸೂಪರ್‌ಸ್ಟಾರ್‌ನ ವಿದಾಯ

ವಿಶ್ವ ಫುಟ್‌ಬಾಲ್ ಜಗತ್ತಿನ ಸಾರ್ವಕಾಲಿಕ ಶ್ರೇಷ್ಠ ಆಟಗಾರರಲ್ಲೊಬ್ಬರಾದ ಬ್ರೆಝಿಲ್‌ನ ಸೂಪರ್‌ಸ್ಟಾರ್ ನೇಮರ್ ಜೂನಿಯರ್ ಅಂತರರಾಷ್ಟ್ರೀಯ ಫುಟ್‌ಬಾಲ್‌ಗೆ ದಿಢೀರ್ ನಿವೃತ್ತಿ ಘೋಷಿಸಿದ್ದಾರೆ. 2026ರ ಫಿಫಾ ವಿಶ್ವಕಪ್‌ನ (FIFA World Cup 2026) ಪ್ರೀ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ನಾರ್ವೆ ವಿರುದ್ಧ ಬ್ರೆಝಿಲ್ ತಂಡ ಆಘಾತಕಾರಿ ಸೋಲು ಅನುಭವಿಸಿದ ಬೆನ್ನಲ್ಲೇ ನೇಮರ್ ಈ ಕಠಿಣ ನಿರ್ಧಾರ ಕೈಗೊಂಡಿದ್ದಾರೆ. ಈ ಮೂಲಕ ಬ್ರೆಝಿಲ್ ಫುಟ್‌ಬಾಲ್ ಇತಿಹಾಸದ ಸುವರ್ಣ ಯುಗವೊಂದು ಅಂತ್ಯಗೊಂಡಂತಾಗಿದೆ.

ನಿನ್ನೆ ನಡೆದ ಪಂದ್ಯದಲ್ಲಿ ನೇಮರ್‌ ಸ್ಪಾಟ್ ಕಿಕ್ ಪಡೆಯಲು ನಿಂತಾಗ ಇಡೀ ಕ್ರೀಡಾಂಗಣವೇ ಸ್ತಬ್ಧವಾಗಿತ್ತು. ಅತ್ಯಂತ ಶಾಂತವಾಗಿ ಪೆನಾಲ್ಟಿಯನ್ನು ಗೋಲಾಗಿ ಪರಿವರ್ತಿಸಿದ ಆತ ಗೋಲ್‌ಕೀಪರ್ ಕಡೆಗೆ ತಿರುಗಿ, "ನಾನು ನೇಮರ್, ಅದನ್ನು ನೆನಪಿಡಿ" ಎಂದು ಗರ್ವದಿಂದ ಹೇಳುವಂತೆ ಭಾಸವಾಯಿತು.

ಅದು ಎಂದಿನಂತೆ ಆತ್ಮವಿಶ್ವಾಸ ಮತ್ತು ಹೆಮ್ಮೆಯಿಂದ ಬೀಗುವ ಕ್ಲಾಸಿಕ್ ನೇಮರ್‌ನಂತೆ ಕಂಡಿತು. ಆದರೆ, ಮರುಕ್ಷಣದಲ್ಲೇ ಕ್ಯಾಮೆರಾಗಳು ಸೆರೆಹಿಡಿದ ದೃಶ್ಯ ಇಡೀ ಕ್ರೀಡಾ ಜಗತ್ತಿನ ಕಣ್ಣಾಲಿಗಳು ಒದ್ದೆಯಾಗುವಂತೆ ಮಾಡಿತು! ಗೋಲು ಗಳಿಸಿದ ಬೆನ್ನಲ್ಲೇ ನೇಮರ್ ಕಣ್ಣುಗಳು ಕಣ್ಣೀರಿನಿಂದ ತುಂಬಿಹೋದವು. ಮೈದಾನದಲ್ಲೇ ಅವರು ಭಾವುಕರಾಗಿದ್ದರು. ಅದು ಕೇವಲ ಮತ್ತೊಂದು ಗೋಲಿನ ಸಂಭ್ರಮಾಚರಣೆಯಾಗಿರಲಿಲ್ಲ. ಆ ಕ್ಷಣದಲ್ಲಿ ಜಗತ್ತು ಒಬ್ಬ ಜಾಗತಿಕ ಸೂಪರ್‌ಸ್ಟಾರ್‌ನನ್ನು ನೋಡಲಿಲ್ಲ, ಬದಲಿಗೆ ಕಳೆದ ಒಂದು ದಶಕದಿಂದ ತನ್ನದೇ ದೇಹದ ಗಾಯಗಳೊಂದಿಗೆ ನಿರಂತರ ಹೋರಾಟ ನಡೆಸಿದ ಒಬ್ಬ ಅಸಹಾಯಕ ಫುಟ್‌ಬಾಲ್ ಆಟಗಾರನನ್ನು ಕಂಡಿತು.

ಒಲಂಪಿಕ್‌ ಚಿನ್ನದ ಪದಕ ವಿಜೇತ ನೇಮರ್‌

"ನಾನು ಪ್ರಯತ್ನಿಸಿದೆ, ತುಂಬಾ ಪ್ರಯತ್ನಿಸಿದೆ. ಈಗ ಎಲ್ಲವೂ ಮುಗಿದಿದೆ. ನಾನು ಎಲ್ಲಿಂದ ಪ್ರಾರಂಭಿಸಿದ್ದನೋ, ಅಲ್ಲೇ ಕೊನೆಗೊಳಿಸಿದ್ದೇನೆ," ಎಂದು 2010 ರಲ್ಲಿ ತಮಗೆ ಅಂತರರಾಷ್ಟ್ರೀಯ ಪಾದಾರ್ಪಣೆ ನೀಡಿದ ಅದೇ ಕ್ರೀಡಾಂಗಣದಲ್ಲಿ ನೇಮರ್ ಘೋಷಿಸಿದ್ದಾರೆ. ಬ್ರೆಜಿಲ್‌ನ ಹಳದಿ ಜೆರ್ಸಿಯಲ್ಲಿ 129 ಪಂದ್ಯಗಳನ್ನಾಡಿ 80 ಗೋಲುಗಳನ್ನು ಗಳಿಸಿ, ಒಲಿಂಪಿಕ್ ಚಿನ್ನದ ಪದಕದೊಂದಿಗೆ ನೇಮರ್ ತಮ್ಮ ಸುದೀರ್ಘ ಅಂತರರಾಷ್ಟ್ರೀಯ ವೃತ್ತಿಜೀವನಕ್ಕೆ ತೆರೆ ಎಳೆದಿದ್ದಾರೆ.

ಮೆಸ್ಸಿಯ ನೆರಳಿನಿಂದ ಹೊರಬಂದ ದುಬಾರಿ ಆಟಗಾರ

ಸ್ಯಾಂಟೋಸ್ ಕ್ಲಬ್ ಮೂಲಕ ಫುಟ್‌ಬಾಲ್ ಜಗತ್ತಿಗೆ ಕಾಲಿಟ್ಟಾಗ ನೇಮರ್‌ನನ್ನು ಬ್ರೆಜಿಲ್ ಪೀಲೆ, ಜೊನಾಲ್ಡಿನೊ, ಗ್ಯಾರಿಂಚಾ ಅವರ ಉತ್ತರಾಧಿಕಾರಿಯನ್ನು ಕಂಡುಕೊಂಡಿತ್ತು. ಬಾರ್ಸಿಲೋನಾ ಕ್ಲಬ್‌ನಲ್ಲಿ ಲಿಯೋನೆಲ್ ಮೆಸ್ಸಿ ಮತ್ತು ಲೂಯಿಸ್ ಸುವಾರೆಜ್ ಜೊತೆಗೂಡಿ 'ಎಂಎಸ್‌ಎನ್‌' ಮೈತ್ರಿಕೂಟ ರಚಿಸಿದ್ದ ನೇಮರ್, ಮೆಸ್ಸಿ-ರೊನಾಲ್ಡೊ ನಂತರದ ಯುಗದ ಶ್ರೇಷ್ಠ ಆಟಗಾರನಾಗುವ ಎಲ್ಲಾ ಲಕ್ಷಣಗಳನ್ನು ಹೊಂದಿದ್ದರು.

ಆದರೆ 2017 ರಲ್ಲಿ ಮೆಸ್ಸಿಯ ನೆರಳಿನಿಂದ ಹೊರಬರಲು ಪ್ಯಾರಿಸ್ ಸೇಂಟ್-ಜರ್ಮೈನ್ (ಪಿಎಸ್‌ಜಿ) ಕ್ಲಬ್‌ಗೆ ಅತ್ಯಂತ ದುಬಾರಿ ಮೊತ್ತಕ್ಕೆ ವರ್ಗಾವಣೆಯಾದದ್ದು ಅವರ ವೃತ್ತಿಜೀವನದ ಹಾದಿಯನ್ನೇ ಬದಲಿಸಿತು.

ಗಾಯಗಳಿಂದ ಹಿನ್ನಡೆ, ಕೈಕೊಟ್ಟ ಅದೃಷ್ಟ!

ನೇಮರ್ ಅವರ ಇಡೀ ವೃತ್ತಿಜೀವನವನ್ನು ಕಾಡಿದ್ದು ಅವರ ದುರದೃಷ್ಟ ಮತ್ತು ಗಾಯಗಳು. ಅವರು ಫುಟ್‌ಬಾಲ್ ಜಗತ್ತನ್ನು ಆಳಲು ಸಿದ್ಧರಾದಾಗಲೆಲ್ಲಾ ಗಾಯಗಳು ಬೆಂಬಿಡದೆ ಕಾಡಿದವು. 2014 ರ ವಿಶ್ವಕಪ್‌ನಲ್ಲಿ ಇಡೀ ದೇಶವೇ ಅವರ ಮೇಲೆ ಭರವಸೆ ಇಟ್ಟಿದ್ದಾಗ, ಕ್ವಾರ್ಟರ್ ಫೈನಲ್‌ನಲ್ಲಿ ಕೊಲಂಬಿಯಾ ವಿರುದ್ಧ ಗಾಯಗೊಂಡು ಪಂದ್ಯಾವಳಿಯಿಂದ ಹೊರಬಿದ್ದರು. ತದನಂತರ ಬ್ರೆಜಿಲ್ ತಂಡ ಜರ್ಮನಿ ವಿರುದ್ಧ 7-1 ರ ಸೋಲನ್ನು ಅನುಭವಿಸಬೇಕಾಯಿತು. ಕೊನೆಗೆ ತಮಗೆ ಜನ್ಮ ನೀಡಿದ ಸ್ಯಾಂಟೋಸ್ ಕ್ಲಬ್‌ಗೆ ಮರಳಿ, ಕೋಚ್ ಕಾರ್ಲೊ ಅನ್ಸೆಲೋಟಿ ಅವರ ಕರೆಯ ಮೇರೆಗೆ ರಾಷ್ಟ್ರೀಯ ತಂಡಕ್ಕೆ ಮರಳಿದಾಗಲೂ ಗಾಯ ಅಡ್ಡಿಯಾಯಿತು.

ರಾಜ ಪ್ರತಿಯೊಬ್ಬರಿಗೂ ಇಷ್ಟ, ಆದರೆ ಕಿರೀಟ ಸಿಗಲಿಲ್ಲ!

ನೇಮರ್‌ಗೆ ಪ್ರತಿಭೆಯ ಕೊರತೆಯಿರಲಿಲ್ಲ. ಅವರ ಅದ್ಭುತ ಕಲ್ಪನೆ, ವಿಶಿಷ್ಟ ಡ್ರಿಬ್ಲಿಂಗ್ ಶೈಲಿ ಮತ್ತು ಏಕಾಂಗಿಯಾಗಿ ಪಂದ್ಯದ ದಿಕ್ಕು ಬದಲಿಸುವ ಸಾಮರ್ಥ್ಯ ಅಪ್ರತಿಮವಾಗಿತ್ತು. ಫುಟ್‌ಬಾಲ್ ಇತಿಹಾಸದಲ್ಲಿ ನೇಮರ್ ಜೂನಿಯರ್ ಅವರನ್ನು ಅಂತಿಮವಾಗಿ "ಎಂದಿಗೂ ಕಿರೀಟ ಧರಿಸದ ರಾಜಕುಮಾರ" ಎಂದೇ ನೆನಪಿಸಿಕೊಳ್ಳಬಹುದು. ಅವರು ಶ್ರೇಷ್ಠ ಆಟಗಾರನಲ್ಲ ಎಂಬ ಕಾರಣಕ್ಕಲ್ಲ, ಬದಲಿಗೆ ಫುಟ್‌ಬಾಲ್ ಜಗತ್ತು ನಿರೀಕ್ಷಿಸಿದ ಶೈಲಿಯಲ್ಲಿ ಅವರ ಕಥೆ ಸುಖಾಂತ್ಯ ಕಾಣಲು ಅದೃಷ್ಟ ಎಂದಿಗೂ ಅವಕಾಶ ನೀಡಲೇ ಇಲ್ಲ ಎಂಬ ಕಾರಣಕ್ಕಾಗಿ.