ಗೋಲುಗಳಿಸಿದ ನಂತರ ಫ್ರಾನ್ಸ್ ಆಟಗಾರರು ಸಂಭ್ರಮಿಸಿದರು.
FIFA | ಕ್ವಾರ್ಟರ್ ಫೈನಲ್ಗೆ ಫ್ರಾನ್ಸ್: ಪರಾಗ್ವೆ ವಿರುದ್ಧ ಎಂಬಪ್ಪೆ ಪೆನಾಲ್ಟಿ ಮ್ಯಾಜಿಕ್
ರಕ್ಷಣಾತ್ಮಕ ಆಟಕ್ಕೆ ಹೆಸರಾಗಿದ್ದ ಪರಾಗ್ವೆ ತಂಡವನ್ನು ಭೇದಿಸಲು ಫ್ರಾನ್ಸ್ ಸಾಕಷ್ಟು ಬೆವರು ಹರಿಸಬೇಕಾಯಿತು. ಪಂದ್ಯದ 70ನೇ ನಿಮಿಷದಲ್ಲಿ ವಿಡಿಯೋ ವಿಮರ್ಶೆಯ ಬಳಿಕ ಫ್ರಾನ್ಸ್ಗೆ ಪೆನಾಲ್ಟಿ ಅವಕಾಶ ಲಭಿಸಿತು.
ತೀವ್ರ ಪೈಪೋಟಿ ಹಾಗೂ ಆಟಗಾರರ ನಡುವಿನ ಮಾತಿನ ಚಕಮಕಿಗೆ ಸಾಕ್ಷಿಯಾಗಿದ್ದ ಜಿದ್ದಾಜಿದ್ದಿನ ಪಂದ್ಯದಲ್ಲಿ ಪರಾಗ್ವೆ ತಂಡವನ್ನು 1-0 ಗೋಲುಗಳ ಅಂತರದಿಂದ ಮಣಿಸಿದ ಫ್ರಾನ್ಸ್, ಸತತ ನಾಲ್ಕನೇ ಬಾರಿಗೆ ವಿಶ್ವಕಪ್ ಕ್ವಾರ್ಟರ್ ಫೈನಲ್ಗೆ ಪ್ರವೇಶಿಸಿದೆ. ಫ್ರಾನ್ಸ್ ಪರ ಸ್ಟಾರ್ ಆಟಗಾರ ಕೈಲಿಯನ್ ಎಂಬಪ್ಪೆ ಪೆನಾಲ್ಟಿ ಮೂಲಕ ವಿಜಯಿ ಗೋಲು ಬಾರಿಸಿ ತಂಡದ ಗೆಲುವಿನ ರೂವಾರಿಯಾದರು.
ಅಮೆರಿಕದ ಫಿಲಡೆಲ್ಫಿಯಾದ ಲಿಂಕನ್ ಫೈನಾನ್ಷಿಯಲ್ ಫೀಲ್ಡ್ ಮೈದಾನದಲ್ಲಿ ನಡೆದ ಈ ಪಂದ್ಯವು ತೀವ್ರ ಹವಾಮಾನ ವೈಪರೀತ್ಯ ಮತ್ತು ಆಟಗಾರರ ಆಕ್ರಮಣಕಾರಿ ನಡವಳಿಕೆಯಿಂದಾಗಿ ಇತಿಹಾಸದ ಅತ್ಯಂತ ಉಲ್ಲಾಸಕರ ಹಾಗೂ ಕಠಿಣ ಪಂದ್ಯಗಳಲ್ಲಿ ಒಂದಾಗಿ ದಾಖಲಾಯಿತು.
ಶಾಂತಚಿತ್ತರಾಗಿದ್ದ ಎಂಬಪ್ಪೆ
ಸುಮಾರು 38 ಡಿಗ್ರಿ ಸೆಲ್ಸಿಯಸ್ನ ಉಸಿರುಕಟ್ಟುವ ಉಷ್ಣಾಂಶದ ನಡುವೆ ನಡೆದ ಪಂದ್ಯದಲ್ಲಿ ಉಭಯ ತಂಡಗಳ ಆಟಗಾರರ ನಡುವೆ ತೀವ್ರ ಘರ್ಷಣೆಗಳು ನಡೆದವು. ಪರಾಗ್ವೆ ಆಟಗಾರರು ಫೌಲ್ಗಳನ್ನು ಮಾಡಲು ಫ್ರೆಂಚ್ ಆಟಗಾರರನ್ನು ಪ್ರಚೋದಿಸಿದರಾದರೂ, ಎಂಬಪ್ಪೆ ಅತ್ಯಂತ ಶಾಂತಚಿತ್ತರಾಗಿ ಆಟದ ಕಡೆಗೆ ಗಮನ ಹರಿಸಿದರು. ಪಂದ್ಯದ ಮೊದಲಾರ್ಧದಲ್ಲಿ ಆಂಡ್ರೆಸ್ ಕ್ಯೂಬಾಸ್ ಅವರು ಎಂಬಪ್ಪೆಯನ್ನು ಕೆಳಗೆ ಬೀಳಿಸಿದಾಗ ಉಭಯ ತಂಡಗಳ ನಡುವೆ ತಳ್ಳಾಟ ನಡೆಯಿತು. ಮತ್ತೊಂದೆಡೆ, ಮಟಿಯಾಸ್ ಗಲಾರ್ಜಾ ಅವರು ಎಂಬಪ್ಪೆಗೆ ಮೊಣಕೈಯಿಂದ ಡಿಕ್ಕಿ ಹೊಡೆದ ಘಟನೆಯೂ ನಡೆಯಿತು.
ಪಂದ್ಯದ ನಂತರವೂ ಮುಂದುವರಿದ ಜಗಳ
ಪಂದ್ಯ ಮುಕ್ತಾಯದ ನಂತರವೂ ಆಟಗಾರರ ನಡುವಿನ ಕಹಿ ವಾತಾವರಣ ಮುಂದುವರಿಯಿತು. ಪಂದ್ಯ ಮುಗಿದ ಬಳಿಕ ಎಂಬಪ್ಪೆ ಮೈದಾನದಲ್ಲಿ ನಡೆಯುತ್ತಿದ್ದಾಗ, ಕ್ರೀಡಾ ಮನೋಭಾವ ಪ್ರದರ್ಶಿಸಲು ಮುಂದಾದ ಪರಾಗ್ವೆಯ ಗೋಲ್ಕೀಪರ್ ಒರ್ಲ್ಯಾಂಡೊ ಗಿಲ್ ಅವರ ಹಸ್ತಲಾಘವಕ್ಕೆ ಎಂಬಪ್ಪೆ ಸ್ಪಂದಿಸದೆ ಹಾಗೇ ಮುಂದೆ ಸಾಗಿದರು. ಇದರಿಂದ ಕೆರಳಿದ ಕೀಪರ್ ಗಿಲ್, ಚೆಂಡನ್ನು ಎಂಬಪ್ಪೆ ಅವರ 10ನೇ ನಂಬರ್ ಜೆರ್ಸಿಯ ಕಡೆಗೆ ಎಸೆದು ತಮ್ಮ ಆಕ್ರೋಶ ಹೊರಹಾಕಿದರು.
70ನೇ ನಿಮಿಷದಲ್ಲಿ ಪೆನಾಲ್ಟಿ ಮ್ಯಾಜಿಕ್
ರಕ್ಷಣಾತ್ಮಕ ಆಟಕ್ಕೆ ಹೆಸರಾಗಿದ್ದ ಪರಾಗ್ವೆ ತಂಡವನ್ನು ಭೇದಿಸಲು ಫ್ರಾನ್ಸ್ ಸಾಕಷ್ಟು ಬೆವರು ಹರಿಸಬೇಕಾಯಿತು. ಪಂದ್ಯದ 70ನೇ ನಿಮಿಷದಲ್ಲಿ ವಿಡಿಯೋ ವಿಮರ್ಶೆಯ ಬಳಿಕ ಫ್ರಾನ್ಸ್ಗೆ ಪೆನಾಲ್ಟಿ ಅವಕಾಶ ಲಭಿಸಿತು. ಇದನ್ನು ಸರಿಯಾಗಿ ಬಳಸಿಕೊಂಡ ಎಂಬಪ್ಪೆ, ಪರಾಗ್ವೆಯ ಗೋಲ್ಕೀಪರ್ ಗಿಲ್ ಅವರನ್ನು ವಂಚಿಸಿ ಚೆಂಡನ್ನು ನೆಟ್ಗೆ ತಳ್ಳುವಲ್ಲಿ ಯಶಸ್ವಿಯಾದರು. ಈ ಏಕೈಕ ಗೋಲು ಫ್ರಾನ್ಸ್ ತಂಡದ ವಿಜಯವನ್ನು ನಿರ್ಧರಿಸಿತು.
"ಇದು ಯಾವ ರೀತಿಯ ಪಂದ್ಯವಾಗಲಿದೆ ಎಂದು ನಮಗೆ ಮೊದಲೇ ತಿಳಿದಿತ್ತು. ಮೈದಾನದಲ್ಲಿ ಕಠಿಣ ಪಂದ್ಯವನ್ನು ಆಡಬೇಕಾಗಿ ಬಂದರೂ ನಾವು ಅದಕ್ಕೆ ಸಿದ್ಧರಾಗಿದ್ದೆವು. ನಾವು ಕೇವಲ ಸೂಟ್-ಟಕ್ಸೆಡೊ ಧರಿಸಿ ಮಿಂಚಲು ಬಂದಿದ್ದೇವೆ ಎಂದು ಅವರು ಭಾವಿಸಿದ್ದರು, ಆದರೆ ನಾವು ಹೋರಾಟಕ್ಕೆ ಸಜ್ಜಾಗಿದ್ದೆವು." ಎಂದು ಕೈಲಿಯನ್ ಎಂಬಪ್ಪೆ ತಿಳಿಸಿದರು.
ಮೆಸ್ಸಿ ದಾಖಲೆಗೆ ಹತ್ತಿರವಾದ ಎಂಬಪ್ಪೆ
ಈ ಗೋಲಿನೊಂದಿಗೆ ಎಂಬಪ್ಪೆ ತಮ್ಮ ವೃತ್ತಿಜೀವನದ 19ನೇ ವಿಶ್ವಕಪ್ ಗೋಲು ದಾಖಲಿಸಿದರು. ಈ ಮೂಲಕ ಅರ್ಜೆಂಟೀನಾದ ದಿಗ್ಗಜ ಲಿಯೋನೆಲ್ ಮೆಸ್ಸಿ (20 ಗೋಲು) ಅವರ ದಾಖಲೆಗಿಂತ ಕೇವಲ ಒಂದು ಗೋಲು ಹಿಂದಿದ್ದಾರೆ. ಪ್ರಸ್ತುತ ಪ್ರಸಕ್ತ ವಿಶ್ವಕಪ್ ಟೂರ್ನಮೆಂಟ್ನಲ್ಲಿ ಮೆಸ್ಸಿ ಮತ್ತು ಎಂಬಪ್ಪೆ ತಲಾ 7 ಗೋಲುಗಳೊಂದಿಗೆ ಜಂಟಿ ಅಗ್ರಸ್ಥಾನದಲ್ಲಿದ್ದು, 'ಗೋಲ್ಡನ್ ಬೂಟ್' ಪ್ರಶಸ್ತಿಗಾಗಿ ಇಬ್ಬರ ನಡುವೆ ತೀವ್ರ ಪೈಪೋಟಿ ಏರ್ಪಟ್ಟಿದೆ. ಅಲ್ಲದೆ, ಮೂರು ಬೇರೆ ಬೇರೆ ವಿಶ್ವಕಪ್ಗಳ ನಾಕೌಟ್ ಹಂತದಲ್ಲಿ ಕನಿಷ್ಠ 3 ಗೋಲು ಗಳಿಸಿದ ಏಕೈಕ ಆಟಗಾರ ಎಂಬ ಹೆಗ್ಗಳಿಕೆಗೂ ಎಂಬಪ್ಪೆ ಪಾತ್ರರಾಗಿದ್ದಾರೆ.
ಪ್ರಶಸ್ತಿ ಉಳಿಸಿಕೊಳ್ಳುವ ಹಾದಿಯಲ್ಲಿ ಫ್ರಾನ್ಸ್
ಕಳೆದ 2018ರಲ್ಲಿ ಚಾಂಪಿಯನ್ ಆಗಿದ್ದ ಫ್ರಾನ್ಸ್, 2022ರ ಕತಾರ್ ವಿಶ್ವಕಪ್ ಫೈನಲ್ನಲ್ಲಿ ಅರ್ಜೆಂಟೀನಾ ವಿರುದ್ಧ ಪೆನಾಲ್ಟಿ ಶೂಟೌಟ್ನಲ್ಲಿ ಸೋತಿತ್ತು. ಆದರೆ ಈ ಬಾರಿ ಭರ್ಜರಿ ಫಾರ್ಮ್ನಲ್ಲಿರುವ ಫ್ರಾನ್ಸ್, ಈವರೆಗೆ ಆಡಿದ ಪಂದ್ಯಗಳಲ್ಲಿ 14-2 ಗೋಲುಗಳ ಬೃಹತ್ ಅಂತರ ಕಾಯ್ದುಕೊಂಡು ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡವಾಗಿ ಹೊರಹೊಮ್ಮಿದೆ. ಕ್ವಾರ್ಟರ್ ಫೈನಲ್ ತಲುಪಿರುವ ಫ್ರಾನ್ಸ್ ತಂಡವು ಮ್ಯಾಸಚೂಸೆಟ್ಸ್ನ ಫಾಕ್ಸ್ಬರೋದಲ್ಲಿ ಗುರುವಾರ(ಜು.9) ನಡೆಯಲಿರುವ ಮುಂದಿನ ಪಂದ್ಯದಲ್ಲಿ ಮೊರಾಕೊ ತಂಡವನ್ನು ಎದುರಿಸಲಿದೆ.
