ಶಕೀರಾ ಮತ್ತು ಬರ್ನಾ ಬಾಯ್ ಅವರ ಅಧಿಕೃತ "ಡೈ ಡೈ" ಗೀತೆಯ ಪ್ರದರ್ಶನವೇ ಈ ಸಮಾರಂಭದ ಪ್ರಮುಖ ಆಕರ್ಷಣೆ.
2026ರ ಫಿಫಾ ವಿಶ್ವಕಪ್ಗೆ ಅದ್ಧೂರಿ ಚಾಲನೆ: ಶಕೀರಾ, ಬರ್ನಾ ಬಾಯ್ ಜುಗಲ್ಬಂದಿ
ಮೆಕ್ಸಿಕೋದ ಅಜ್ಟೆಕಾ ಕ್ರೀಡಾಂಗಣದಲ್ಲಿ 2026ರ ಫಿಫಾ ವಿಶ್ವಕಪ್ಗೆ ಅದ್ಧೂರಿ ಚಾಲನೆ. ಶಕೀರಾ ಮತ್ತು ಬರ್ನಾ ಬಾಯ್ ಅವರ ಅಧಿಕೃತ "ಡೈ ಡೈ" ಗೀತೆಯ ಪ್ರದರ್ಶನವೇ ಈ ಸಮಾರಂಭದ ಪ್ರಮುಖ ಆಕರ್ಷಣೆ.
ಮೆಕ್ಸಿಕೋ ಸಿಟಿಯ ಪ್ರಸಿದ್ಧ ಎಸ್ಟಾಡಿಯೋ ಅಜ್ಟೆಕಾ ಕ್ರೀಡಾಂಗಣದಲ್ಲಿ 2026ರ ಫಿಫಾ ವಿಶ್ವಕಪ್ಗೆ ಅದ್ಧೂರಿ ಚಾಲನೆ ಸಿಗುತ್ತಿದೆ. ಇಡೀ ವಿಶ್ವವೇ ಕಾತರದಿಂದ ಕಾಯುತ್ತಿರುವ ಈ ಕ್ರೀಡಾ ಹಬ್ಬದ ಉದ್ಘಾಟನಾ ಸಮಾರಂಭವು ಜಾಗತಿಕ ಸಂಗೀತ ತಾರೆಯರ ದಂಡಿನೊಂದಿಗೆ ಅತ್ಯಂತ ವರ್ಣರಂಜಿತವಾಗಿ ಮೂಡಿಬರಲಿದೆ.
ಈ ಬಾರಿಯ ವಿಶ್ವಕಪ್ನ ಅಧಿಕೃತ ಗೀತೆಯಾದ "ಡೈ ಡೈ" ಹಾಡಿಗೆ ಖ್ಯಾತ ಪಾಪ್ ಗಾಯಕಿ ಶಕೀರಾ ಮತ್ತು ನೈಜೀರಿಯಾದ ಅಫ್ರೋಬೀಟ್ಸ್ ತಾರೆ ಬರ್ನಾ ಬಾಯ್ ಒಟ್ಟಿಗೆ ಹೆಜ್ಜೆ ಹಾಕುತ್ತಿರುವುದು ಈ ಸಮಾರಂಭದ ಪ್ರಮುಖ ಆಕರ್ಷಣೆಯಾಗಿದೆ.ಈ ಅಧಿಕೃತ 2026 ರ ಫಿಫಾ ವಿಶ್ವಕಪ್ ಹಾಡು ಭಿನ್ನತೆಗಳನ್ನು ಸಂಭ್ರಮಿಸುವುದು, ಒಗ್ಗಟ್ಟು, ಸ್ಥಿತಿಸ್ಥಾಪಕತ್ವ ಮತ್ತು ಸಾಂಘಿಕ ಚಟುವಟಿಕೆಯನ್ನು (ಟೀಮ್ವರ್ಕ್) ಒಳಗೊಂಡಿದೆ. ಇದರ ಪ್ರಮುಖ ಸಾಲಾದ "Dai dai, ikou, dale, allez, let's go!" ಎಂದರೆ ವಿವಿಧ ಭಾಷೆಗಳಲ್ಲಿ "ಬನ್ನಿ" ಅಥವಾ "ಹೋಗೋಣ" ಎಂದರ್ಥ. ವಿಶೇಷವೆಂದರೆ, ಫಿಫಾ ವಿಶ್ವಕಪ್ ಇತಿಹಾಸದಲ್ಲೇ ಎರಡು ಬಾರಿ ಅಧಿಕೃತ ವಿಶ್ವಕಪ್ ಗೀತೆಗಳನ್ನು ಹಾಡಿದ ಮೊದಲ ಗಾಯಕಿ ಎಂಬ ಹೆಗ್ಗಳಿಕೆಗೆ ಶಕೀರಾ ಪಾತ್ರರಾಗಿದ್ದಾರೆ.
ಈ ಮಹಾ ವೇದಿಕೆಯಲ್ಲಿ ಕೇವಲ ಶಕೀರಾ ಮಾತ್ರವಲ್ಲದೆ ಜೆ ಬಾಲ್ವಿನ್, ಅಲೆಜಾಂಡ್ರೊ ಫೆರ್ನಾಂಡಿಸ್, ಬೆಲಿಂಡಾ, ಡ್ಯಾನಿ ಓಷನ್, ಲಿಲಾ ಡೌನ್ಸ್, ಲಾಸ್ ಏಂಜಲೀಸ್ ಅಜುಲೆಸ್, ಮಾನಾ ಮತ್ತು ಟೈಲಾ ಸೇರಿದಂತೆ ವಿಶ್ವದ ಮೂಲೆ ಮೂಲೆಗಳ ಪ್ರಸಿದ್ಧ ಕಲಾವಿದರು ಪ್ರದರ್ಶನ ನೀಡಲಿದ್ದಾರೆ.
ಕೊಲಂಬಿಯಾದ ಖ್ಯಾತ ರಾಪರ್ ರೇಯಾನ್ ಕ್ಯಾಸ್ಟ್ರೋ ಅವರು ಜೆ ಬಾಲ್ವಿನ್ ಅವರೊಂದಿಗೆ ವೇದಿಕೆ ಹಂಚಿಕೊಳ್ಳಲಿದ್ದಾರೆ. ಇನ್ನು ಸಮಾರಂಭದಲ್ಲಿ ಮೆಕ್ಸಿಕೋದ ರಾಷ್ಟ್ರಗೀತೆಯನ್ನು ಅಲೆಜಾಂಡ್ರೊ ಫೆರ್ನಾಂಡಿಸ್ ಹಾಡಲಿದ್ದರೆ, ದಕ್ಷಿಣ ಆಫ್ರಿಕಾದ ರಾಷ್ಟ್ರಗೀತೆಯನ್ನು ಟೈಲಾ ಅವರು ಪ್ರಸ್ತುತಪಡಿಸಲಿದ್ದಾರೆ. ಅಕಾಡೆಮಿ ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿರುವ ಪ್ರಸಿದ್ಧ ಮೆಕ್ಸಿಕನ್-ಅಮೆರಿಕನ್ ನಟಿ ಮತ್ತು ನಿರ್ದೇಶಕಿ ಸಲ್ಮಾ ಹಾಯೆಕ್ ಪಿನಾಲ್ಟ್ ಅವರು ಈ ಬಾರಿ ಮೆಕ್ಸಿಕೋದ ವಿಶ್ವಕಪ್ ರಾಯಭಾರಿಯಾಗಿ ಕಾಣಿಸಿಕೊಳ್ಳುತ್ತಿರುವುದು ಸ್ಥಳೀಯ ಅಭಿಮಾನಿಗಳಲ್ಲಿ ಸಂಭ್ರಮವನ್ನು ಹೆಚ್ಚಿಸಿದೆ.
ಫಿಫಾ ಅಧ್ಯಕ್ಷ ಜಿಯಾನಿ ಇನ್ಫಾಂಟಿನೋ ಈ ಬಗ್ಗೆ ಮಾತನಾಡಿ, ಫಿಫಾ ವಿಶ್ವಕಪ್ ಇಡೀ ಜಗತ್ತೇ ಒಂದಾಗಿ ಸಂಭ್ರಮಿಸುವ ಕ್ಷಣವಾಗಿದ್ದು, ಮೆಕ್ಸಿಕೋ ಸಿಟಿಯಿಂದ ಆರಂಭವಾಗಿ ಮುಂದಿನ ದಿನಗಳಲ್ಲಿ ಟೊರೊಂಟೊ ಮತ್ತು ಲಾಸ್ ಏಂಜಲೀಸ್ನಲ್ಲಿ ಮುಂದುವರಿಯಲಿರುವ ಈ ಸಮಾರಂಭಗಳು ಸಂಗೀತ, ಸಂಸ್ಕೃತಿ ಮತ್ತು ಫುಟ್ಬಾಲ್ ಅನ್ನು ಬೆಸೆಯಲಿವೆ ಎಂದು ತಿಳಿಸಿದ್ದಾರೆ. ಮೆಕ್ಸಿಕೋದ ಮೊದಲ ಪಂದ್ಯ ಆರಂಭವಾಗುವ 90 ನಿಮಿಷಗಳ ಮೊದಲು ಅಂದರೆ ಭಾರತೀಯ ಕಾಲಮಾನ ರಾತ್ರಿ 11 ಗಂಟೆಗೆ ಈ ಅದ್ಭುತ ಉದ್ಘಾಟನಾ ಸಮಾರಂಭವು ನೇರಪ್ರಸಾರವಾಗಲಿದ್ದು, ಭಾರತದಲ್ಲಿ ಕ್ರೀಡಾ ಪ್ರೇಮಿಗಳು ಸ್ಪೋರ್ಟ್ಸ್ 18 ವಾಹಿನಿ ಹಾಗೂ ಜಿಯೋ ಸಿನಿಮಾ ಆ್ಯಪ್ ಮೂಲಕ ಈ ಸಾಂಸ್ಕೃತಿಕ ಹಬ್ಬವನ್ನು ಕಣ್ತುಂಬಿಕೊಳ್ಳಬಹುದು.
