ಏಷ್ಯನ್ ಗೇಮ್ಸ್ 2026: ಈಜು ಸ್ಪರ್ಧೆಯಲ್ಲಿ ಫೈನಲ್‌ಗೆ ಲಗ್ಗೆಯಿಟ್ಟ ಶ್ರೀಹರಿ ನಟರಾಜ್

ಜಪಾನ್‌ನ ಐಚಿ-ನಗೋಯಾದಲ್ಲಿ ನಡೆಯುತ್ತಿರುವ 2026ರ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಪ್ರಮುಖ ಈಜುಪಟು ಶ್ರೀಹರಿ ನಟರಾಜ್ ಅವರು ಪುರುಷರ 50 ಮೀಟರ್ ಬ್ಯಾಕ್‌ಸ್ಟ್ರೋಕ್ ವಿಭಾಗದ ಅಂತಿಮ ಸುತ್ತಿಗೆ (ಫೈನಲ್) ಅರ್ಹತೆ ಪಡೆದುಕೊಂಡಿದ್ದಾರೆ. ಸೋಮವಾರ ಬೆಳಿಗ್ಗೆ ನಡೆದ ಅರ್ಹತಾ ಹಂತದ ಹೀಟ್ಸ್‌ನಲ್ಲಿ ಗಮನಾರ್ಹ ಪ್ರದರ್ಶನ ನೀಡುವ ಮೂಲಕ ಅವರು ಫೈನಲ್ ಬಾಗಿಲು ತೆರೆದಿದ್ದಾರೆ.

ಶ್ರೀಹರಿ ನಟರಾಜ್ ತಮ್ಮ ಹೀಟ್ಸ್ ಪಂದ್ಯವನ್ನು 25.37 ಸೆಕೆಂಡ್‌ಗಳಲ್ಲಿ ಪೂರ್ಣಗೊಳಿಸಿ ಮೂರನೇ ಸ್ಥಾನ ಗಳಿಸಿದರು. ಹೀಟ್‌ನ ಅಗ್ರಸ್ಥಾನದಲ್ಲಿದ್ದ ಈಜುಗಾರನಿಗಿಂತ ಅವರು 0.57 ಸೆಕೆಂಡ್‌ಗಳಷ್ಟು ಹಿನ್ನಡೆಯಲ್ಲಿದ್ದರು. ಒಟ್ಟು ಮೂರು ಹೀಟ್ಸ್‌ನ ಫಲಿತಾಂಶಗಳ ಆಧಾರದ ಮೇಲೆ ಶ್ರೀಹರಿ ಜಂಟಿ ಒಂಬತ್ತನೇ ಸ್ಥಾನ ಪಡೆದು, ಫೈನಲ್ ಪ್ರವೇಶಿಸಿದ ಅಗ್ರ 10 ಈಜುಗಾರರ ಪಟ್ಟಿಯಲ್ಲಿ ಜಾಗ ಗಿಟ್ಟಿಸಿಕೊಂಡರು.

ಮೀಸಲು ಸ್ಪರ್ಧಿಯಾಗಿ ರಿಷಭ್ ದಾಸ್ಇದೇ 50 ಮೀಟರ್ ಬ್ಯಾಕ್‌ಸ್ಟ್ರೋಕ್ ವಿಭಾಗದಲ್ಲಿ ಸ್ಪರ್ಧಿಸಿದ್ದ ಭಾರತದ ಮತ್ತೊಬ್ಬ ಈಜುಪಟು ರಿಷಭ್ ದಾಸ್ 25.41 ಸೆಕೆಂಡ್‌ಗಳಲ್ಲಿ ಗುರಿ ತಲುಪಿ ತಮ್ಮ ಹೀಟ್ಸ್‌ನಲ್ಲಿ ನಾಲ್ಕನೇ ಸ್ಥಾನ ಪಡೆದರು. ಆದರೂ ಮುಖ್ಯ ಫೈನಲ್‌ಗೆ ಅರ್ಹತೆ ಪಡೆಯಲು ಸ್ವಲ್ಪದರಲ್ಲೇ ವಿಫಲರಾದ ಅವರು ಮೀಸಲು ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ.

ಸೆಪಕ್ ಟಕ್ರಾದಲ್ಲಿ ಭಾರತ ತಂಡಕ್ಕೆ ರೋಚಕ ಜಯ

ಇನ್ನೊಂದೆಡೆ, ಪುರುಷರ ಸೆಪಕ್ ಟಕ್ರಾ ‘ರೆಗು’ ವಿಭಾಗದಲ್ಲಿ ಭಾರತದ ತಂಡವು ಅದ್ಭುತ ಪ್ರದರ್ಶನ ನೀಡಿದೆ. ಗ್ರೂಪ್ ‘ಬಿ’ ಪಂದ್ಯದಲ್ಲಿ ಆತಿಥೇಯ ಜಪಾನ್ ವಿರುದ್ಧ ಸ್ಪರ್ಧಿಸಿದ್ದ ಭಾರತ 2-0 ಅಂತರದ ನೇರ ಸೆಟ್‌ಗಳ ಗೆಲುವು ದಾಖಲಿಸಿತು. ಮೊದಲ ಸೆಟ್‌ನಲ್ಲಿ ಆರಂಭದಲ್ಲಿ 3-6 ಹಾಗೂ 5-10 ರಿಂದ ತೀವ್ರ ಹಿನ್ನಡೆಯಲ್ಲಿದ್ದ ಭಾರತೀಯ ತಂಡ, ನಂತರ ಸಾಹಸಿಕ ತಿರುಗೇಟು ನೀಡಿ 15-13 ಅಂತರದಿಂದ ಸೆಟ್ ವಶಪಡಿಸಿಕೊಂಡಿತು. ಎರಡನೇ ಸೆಟ್‌ನ ಆರಂಭದಲ್ಲಿ 2-2 ಸಮಬಲ ಕಂಡುಬಂದರೂ, ನಂತರ ಪೂರ್ಣ ಮೇಲುಗೈ ಸಾಧಿಸಿದ ಭಾರತ 14-5 ರಿಂದ ಮುನ್ನಡೆ ಕಾಯ್ದುಕೊಂಡು ಅಂತಿಮವಾಗಿ 15-9 ರಲ್ಲಿ ಸೆಟ್ ಮತ್ತು ಪಂದ್ಯವನ್ನು ತನ್ನದಾಗಿಸಿಕೊಂಡಿತು.

ಫೈನಲ್ ಪಂದ್ಯದಲ್ಲಿ ಪದಕದ ನಿರೀಕ್ಷೆ

ಸೋಮವಾರ ನಡೆಯಲಿರುವ ಪುರುಷರ 50 ಮೀಟರ್ ಬ್ಯಾಕ್‌ಸ್ಟ್ರೋಕ್ ಫೈನಲ್ ಸ್ಪರ್ಧೆಯಲ್ಲಿ ಶ್ರೀಹರಿ ನಟರಾಜ್ ಕಣಕ್ಕಿಳಿಯಲಿದ್ದು, ಭಾರತೀಯ ಈಜು ತಂಡಕ್ಕೆ ಪದಕ ಗೆದ್ದುಕೊಡುವ ಮಹತ್ವದ ಅವಕಾಶ ಮತ್ತು ನಿರೀಕ್ಷೆ ಮೂಡಿದೆ.