ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಐತಿಹಾಸಿಕ ಸಾಧನೆ: 17ರ ಕುಮ್‌ಕುಮ್‌ ಮೊಹೋದ್‌ಗೆ ರಿಕರ್ವ್ ಆರ್ಚರಿಯಲ್ಲಿ ಚಿನ್ನ

ಜಪಾನ್‌ನ ಒಕಜಾಕಿಯಲ್ಲಿ ನಡೆಯುತ್ತಿರುವ ಏಷ್ಯನ್ ಕ್ರೀಡಾಕೂಟದಲ್ಲಿ ಭಾರತದ 17 ವರ್ಷದ ಬಿಲ್ಲುಗಾರ್ತಿ ಕುಮ್‌ಕುಮ್‌ ಮೊಹೋದ್ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಮಹಿಳೆಯರ ವೈಯಕ್ತಿಕ ರಿಕರ್ವ್ ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದಿರುವ ಅವರು, ಈ ವಿಭಾಗದಲ್ಲಿ ಭಾರತಕ್ಕೆ ಮೊದಲ ಚಾಂಪಿಯನ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಚಿನ್ನದ ಪದಕಕ್ಕಾಗಿ ನಡೆದ ರೋಚಕ ಫೈನಲ್‌ನಲ್ಲಿ ಕುಮ್‌ಕುಮ್‌ ಮೊಹೋದ್ ದಕ್ಷಿಣ ಕೊರಿಯಾದ ಯೆಜಿನ್ ಓ ಅವರನ್ನು ಸೋಲಿಸಿದರು. ಐದು ಸೆಟ್‌ಗಳ ಪಂದ್ಯ 5-5 ಅಂಕಗಳ ಸಮಬಲದಲ್ಲಿ ಅಂತ್ಯಗೊಂಡ ಹಿನ್ನೆಲೆಯಲ್ಲಿ ಫಲಿತಾಂಶ ನಿರ್ಧರಿಸಲು ಶೂಟ್-ಆಫ್ ಮೊರೆ ಹೋಗಲಾಯಿತು.

ಶೂಟ್-ಆಫ್‌ನಲ್ಲಿ ಇಬ್ಬರೂ ಬಿಲ್ಲುಗಾರ್ತಿಯರಿಗೆ ಒಂದೇ ಒಂದು ನಿರ್ಣಾಯಕ ಬಾಣ ಎಸೆಯುವ ಅವಕಾಶ ನೀಡಲಾಯಿತು. ದಕ್ಷಿಣ ಕೊರಿಯಾದ ಯೆಜಿನ್ ಓ 8 ಅಂಕಗಳನ್ನು ಗಳಿಸಿದರೆ, ಭಾರತದ ಕುಮ್‌ಕುಮ್‌ ಮೊಹೋದ್ ಒತ್ತಡದ ನಡುವೆಯೂ ನಿಖರವಾಗಿ 10 ಅಂಕಗಳನ್ನು ಗಳಿಸಿದರು. ಈ ಮೂಲಕ 6-5 ಅಂತರದಲ್ಲಿ ಗೆಲುವು ಸಾಧಿಸಿ ಚಿನ್ನದ ಪದಕವನ್ನು ತಮ್ಮದಾಗಿಸಿಕೊಂಡರು. 17ರ ಹರೆಯದಲ್ಲೇ ಏಷ್ಯನ್ ಕ್ರೀಡಾಕೂಟದ ವೈಯಕ್ತಿಕ ರಿಕರ್ವ್ ವಿಭಾಗದಲ್ಲಿ ಚಿನ್ನ ಗೆದ್ದಿರುವ ಕುಂಕುಮ್ ಅವರ ಸಾಧನೆ ಭಾರತೀಯ ಬಿಲ್ಲುಗಾರಿಕೆಗೆ ಮಹತ್ವದ ಮೈಲಿಗಲ್ಲಾಗಿದೆ.

ಭಾರತಕ್ಕೆ 77 ಪದಕ

ಇದೇ ವೇಳೆ ಏಷ್ಯನ್ ಕ್ರೀಡಾಕೂಟದಲ್ಲಿ ಭಾರತ ಈಗಾಗಲೇ 77 ಪದಕಗಳನ್ನು ಗೆದ್ದಿದ್ದು, ಅಂತಿಮ ದಿನವಾದ ಶನಿವಾರ ಮತ್ತಷ್ಟು ಪದಕಗಳ ನಿರೀಕ್ಷೆಯಲ್ಲಿದೆ. ಪದಕ ಪಟ್ಟಿಯಲ್ಲಿ ಭಾರತ ಸದ್ಯ ಐದನೇ ಸ್ಥಾನದಲ್ಲಿದ್ದು, ಅಗ್ರ ನಾಲ್ಕು ಸ್ಥಾನಗಳೊಳಗೆ ಪ್ರವೇಶಿಸುವ ಗುರಿಯೊಂದಿಗೆ ಅಂತಿಮ ದಿನದ ಸ್ಪರ್ಧೆಗಳಿಗೆ ಸಜ್ಜಾಗಿದೆ.

ಗಾಲ್ಫ್‌ನಲ್ಲಿ ಪ್ರಣವಿ ಉರ್ಸ್ ಐತಿಹಾಸಿಕ ಚಿನ್ನದ ಪದಕದತ್ತ ಮುನ್ನಡೆಯುತ್ತಿದ್ದರೆ, ಪುರುಷರ ಕ್ರಿಕೆಟ್‌ನಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವಿನ ಫೈನಲ್ ಪಂದ್ಯವೂ ಕುತೂಹಲ ಮೂಡಿಸಿದೆ. ಇದರ ಜತೆಗೆ ಪುರುಷರ ಹಾಕಿ ತಂಡ ಮಲೇಷ್ಯಾ ವಿರುದ್ಧ ಚಿನ್ನದ ಪದಕಕ್ಕಾಗಿ ಸೆಣಸಲಿದೆ. ಅಂತಿಮ ದಿನದ ಪ್ರಮುಖ ಸ್ಪರ್ಧೆಗಳಲ್ಲಿ ಭಾರತ ಮತ್ತಷ್ಟು ಪದಕಗಳನ್ನು ಗೆಲ್ಲುವ ನಿರೀಕ್ಷೆಯಿದ್ದು, ಈಗಾಗಲೇ ಕುಂಕುಮ್ ಮೊಹೋದ್ ಅವರ ಐತಿಹಾಸಿಕ ಚಿನ್ನದ ಪದಕದಿಂದ ಭಾರತದ ಅಭಿಯಾನಕ್ಕೆ ಭರ್ಜರಿ ಆರಂಭ ದೊರೆತಿದೆ.