ಏಷ್ಯನ್ ಗೇಮ್ಸ್ನಲ್ಲಿ ಭಾರತಕ್ಕೆ ಮೊದಲ ಪದಕ; 10 ಮೀಟರ್ ಏರ್ ರೈಫಲ್ನಲ್ಲಿ ಬೆಳ್ಳಿ ಗೆದ್ದ ಶೂಟರ್ಗಳು
ಅತ್ಯಂತ ರೋಚಕವಾಗಿ ನಡೆದ ಸ್ಪರ್ಧೆಯಲ್ಲಿ ಭಾರತ ಒಟ್ಟು 1898.0 ಅಂಕ ಗಳಿಸಿ ಎರಡನೇ ಸ್ಥಾನ ಪಡೆದಿತು. ಚೀನಾ 1904.2 ಅಂಕಗಳೊಂದಿಗೆ ಚಿನ್ನದ ಪದಕ ತನ್ನದಾಗಿಸಿಕೊಂಡಿತು.
ಜಪಾನ್ನ ನಗೊಯಾದಲ್ಲಿ ನಡೆಯುತ್ತಿರುವ 2026ರ ಏಷ್ಯನ್ ಗೇಮ್ಸ್ನಲ್ಲಿ ಭಾರತ ತನ್ನ ಪದಕ ಬೇಟೆಯನ್ನು ಬೆಳ್ಳಿ ಪದಕದೊಂದಿಗೆ ಆರಂಭಿಸಿದೆ. ಮಹಿಳೆಯರ 10 ಮೀಟರ್ ಏರ್ ರೈಫಲ್ ತಂಡ ವಿಭಾಗದಲ್ಲಿ ಸೋನಂ ಉತ್ತಮ್ ಮಸ್ಕರ್, ಎಲವೆನಿಲ್ ವಲರಿವನ್ ಮತ್ತು ವಿದರ್ಶಾ ವಿನೋದ್ ಅವರನ್ನೊಳಗೊಂಡ ಭಾರತ ತಂಡ ಬೆಳ್ಳಿ ಪದಕ ಗೆದ್ದಿದೆ.
ಅತ್ಯಂತ ರೋಚಕವಾಗಿ ನಡೆದ ಸ್ಪರ್ಧೆಯಲ್ಲಿ ಭಾರತ ಒಟ್ಟು 1898.0 ಅಂಕ ಗಳಿಸಿ ಎರಡನೇ ಸ್ಥಾನ ಪಡೆದಿತು. ಚೀನಾ 1904.2 ಅಂಕಗಳೊಂದಿಗೆ ಚಿನ್ನದ ಪದಕ ತನ್ನದಾಗಿಸಿಕೊಂಡಿತು. ಆತಿಥೇಯ ಜಪಾನ್ 1897.1 ಅಂಕಗಳೊಂದಿಗೆ ಕಂಚಿನ ಪದಕಕ್ಕೆ ತೃಪ್ತಿಪಟ್ಟಿತು. ಭಾರತ ಮತ್ತು ಜಪಾನ್ ನಡುವೆ ಬೆಳ್ಳಿ ಪದಕಕ್ಕಾಗಿ ತೀವ್ರ ಪೈಪೋಟಿ ನಡೆದಿದ್ದು, ಅಂತಿಮವಾಗಿ ಕೇವಲ 0.9 ಅಂಕಗಳ ಅಂತರದಲ್ಲಿ ಭಾರತ ಮೇಲುಗೈ ಸಾಧಿಸಿತು.
ಸೋನಂ, ಎಲವೆನಿಲ್ರಿಂದ ಬಲಿಷ್ಠ ಪ್ರದರ್ಶನ
ತಂಡದ ಪರ ಸೋನಂ ಮಸ್ಕರ್ ಅತ್ಯುತ್ತಮ ಪ್ರದರ್ಶನ ನೀಡಿದರು. ಅರ್ಹತಾ ಸುತ್ತಿನಲ್ಲಿ 634.1 ಅಂಕ ಗಳಿಸಿದ ಅವರು ಮೂರನೇ ಸ್ಥಾನ ಪಡೆದರು. ಅನುಭವಿ ಶೂಟರ್ ಎಲವೆನಿಲ್ ವಲರಿವನ್ 633.5 ಅಂಕ ಗಳಿಸಿ ಏಳನೇ ಸ್ಥಾನದಲ್ಲಿದ್ದರು. ಏಷ್ಯನ್ ಗೇಮ್ಸ್ಗೆ ಮೊದಲ ಬಾರಿಗೆ ಸ್ಪರ್ಧಿಸುತ್ತಿರುವ ವಿದರ್ಶಾ ವಿನೋದ್ 630.4 ಅಂಕ ಗಳಿಸಿ 12ನೇ ಸ್ಥಾನ ಪಡೆದರು.
ಮೂವರು ಶೂಟರ್ಗಳ ಅರ್ಹತಾ ಸುತ್ತಿನ ಒಟ್ಟು ಅಂಕಗಳ ಆಧಾರದ ಮೇಲೆ ತಂಡದ ಪದಕ ನಿರ್ಧಾರವಾಗಿದ್ದು, ಈ ಮೂವರ ಸ್ಥಿರ ಪ್ರದರ್ಶನ ಭಾರತಕ್ಕೆ ಬೆಳ್ಳಿ ಪದಕ ತಂದುಕೊಟ್ಟಿತು.
ವಿದರ್ಶಾ ಪ್ರದರ್ಶನ ನಿರ್ಣಾಯಕ
ವೈಯಕ್ತಿಕ ವಿಭಾಗದ ಅಂತಿಮ ಸುತ್ತಿಗೆ ಅರ್ಹತೆ ಪಡೆಯಲು ವಿದರ್ಶಾಗೆ ಸಾಧ್ಯವಾಗಲಿಲ್ಲ. ಆದರೆ ತಂಡದ ಸ್ಪರ್ಧೆಯಲ್ಲಿ ಅವರ ಕೊಡುಗೆ ನಿರ್ಣಾಯಕವಾಯಿತು. ವಿಶೇಷವೆಂದರೆ ವಿದರ್ಶಾ ಕೇವಲ ಎರಡು ತಿಂಗಳ ಹಿಂದಷ್ಟೇ 10 ಮೀಟರ್ ಏರ್ ರೈಫಲ್ ಸ್ಪರ್ಧೆಯನ್ನು ಆರಂಭಿಸಿದ್ದರು. ಅವರ ಪ್ರಮುಖ ವಿಭಾಗ 50 ಮೀಟರ್ ರೈಫಲ್ ಮೂರು ಸ್ಥಾನಗಳ ಸ್ಪರ್ಧೆಯಾಗಿದ್ದರೂ, ಅಲ್ಪಾವಧಿಯಲ್ಲೇ ಏರ್ ರೈಫಲ್ಗೆ ಹೊಂದಿಕೊಂಡು ಮಹತ್ವದ ಪ್ರದರ್ಶನ ನೀಡಿದ್ದಾರೆ.
ಪ್ರಮುಖ ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಯಾವುದೇ ಒತ್ತಡಕ್ಕೆ ಒಳಗಾಗದೆ ಆತ್ಮವಿಶ್ವಾಸದಿಂದ ಸ್ಪರ್ಧಿಸಿದ್ದಾಗಿ ವಿದರ್ಶಾ ತಿಳಿಸಿದ್ದಾರೆ. ತಂಡಕ್ಕೆ ಬೆಳ್ಳಿ ಪದಕ ದೊರೆತಿರುವುದು ಉತ್ತಮ ಆರಂಭವಾಗಿದೆ ಎಂದೂ ಅವರು ಹೇಳಿದ್ದಾರೆ.
ಚೀನಾದಿಂದ ಹೊಸ ದಾಖಲೆ
ಚೀನಾ ತಂಡ 1904.2 ಅಂಕ ಗಳಿಸುವ ಮೂಲಕ ಚಿನ್ನದ ಪದಕ ಗೆದ್ದಿದ್ದಲ್ಲದೆ, ಅರ್ಹತಾ ಸುತ್ತಿನಲ್ಲಿ ಹೊಸ ವಿಶ್ವದಾಖಲೆಯನ್ನೂ ನಿರ್ಮಿಸಿತು. ಈ ಮೂಲಕ 1902.0 ಅಂಕಗಳ ತನ್ನದೇ ಹಿಂದಿನ ದಾಖಲೆಯನ್ನು ಚೀನಾ ಉತ್ತಮಪಡಿಸಿಕೊಂಡಿತು.
ಚೀನಾದ ವಾಂಗ್ ಜಿಫೈ 638.8 ಅಂಕಗಳೊಂದಿಗೆ ಅರ್ಹತಾ ಸುತ್ತಿನಲ್ಲಿ ಅಗ್ರಸ್ಥಾನ ಪಡೆದರು. ಸೋನಂ ಮತ್ತು ಎಲವೆನಿಲ್ ಕೂಡ ವೈಯಕ್ತಿಕ ವಿಭಾಗದ ಅಂತಿಮ ಸುತ್ತಿಗೆ ಅರ್ಹತೆ ಪಡೆದಿರುವುದರಿಂದ, ಏಷ್ಯನ್ ಗೇಮ್ಸ್ನ ಮೊದಲ ದಿನವೇ ಭಾರತಕ್ಕೆ ಮತ್ತೊಂದು ಪದಕದ ನಿರೀಕ್ಷೆ ಮೂಡಿದೆ.
