ಯುದ್ಧದ ಗಡುವು ಮುಗಿಯಿತು: ಇರಾನ್-ಅಮೆರಿಕ ನಡುವೆ ಈಗಲೂ ತಗ್ಗಿಲ್ಲ ತಹತಹ

ಇರಾನ್‌ನಲ್ಲಿ ಯುದ್ಧ ಕೊನೆಗೊಂಡಿದೆಯೇ? ಅಧಿಕೃತವಾಗಿ ಹಾಗೇನೂ ಆಗಿಲ್ಲ. ಸುಲಭವಾಗಿ ಗುರುತಿಸಬಹುದಾದ ಅಂತಹ ಬೆಳವಣಿಗೆಗಳೇನೂ ಆಗಿಲ್ಲ ಕೂಡ. ಯುದ್ಧವು ನಿಲ್ಲದೇ ಇದ್ದರೂ ಕಳೆದ ಹಲವಾರು ದಿನಗಳಿಂದ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿದೆ ಎಂಬುದಂತೂ ಸತ್ಯ.

ಈ ನಡುವೆ ಅಮೆರಿಕ ಮತ್ತು ಇರಾನ್‌ ನಡುವೆ ಏರ್ಪಟ್ಟಿದ್ದ ಒಡಂಬಡಿಕೆಯ ಪ್ರಕಾರ ನಿಗದಿ ಮಾಡಲಾಗಿದ್ದ ರಾಜತಾಂತ್ರಿಕವಾಗಿ ಪರಿಹಾರವನ್ನು ಕಂಡುಕೊಳ್ಳುವ ಆರವತ್ತು ದಿನಗಳ ಗಡುವು ಆಗಸ್ಟ್‌ 17ರಂದು ಸೋಮವಾರ ಸದ್ದೇ ಇಲ್ಲದೆ ಮುಕ್ತಾಯ ಕಂಡಿದೆ. ಇವೆಲ್ಲ ಬೆಳವಣಿಗೆಗಳು ಯುದ್ಧ ನಿಜಕ್ಕೂ ಮುಗಿದಿದೆ ಎಂಬ ಭಾವನೆಗಳನ್ನು ಪ್ರೇರೇಪಿಸುವಂತಿವೆ ಎಂಬುದು ನಿಜ. ಆದರೆ ವಾಸ್ತವ ಸ್ಥಿತಿ ಅಂತಹ ಯಾವುದೇ ಊಹೆಗಳಿಗೆ ಅವಕಾಶ ನೀಡುವುದಿಲ್ಲ.

ಹೊರ್ಮುಜ್‌ ಜಲಸಂಧಿಯ ಬಿಕ್ಕಟ್ಟು ಅಸ್ಪಷ್ಟವಾಗಿಯೇ ಮುಂದುವರಿದಿದೆ. ಅದು ತಮ್ಮ ದೇಶದ ನಿಯಂತ್ರಣದಲ್ಲಿಯೇ ಇದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರು ಮತ್ತೆ ಮತ್ತೆ ಪ್ರತಿಪಾದಿಸುತ್ತ ಬಂದಿದ್ದಾರೆ. ಆದರೆ ಇರಾನ್‌ ಅಂತಹ ಹೇಳಿಕೆಗಳನ್ನು ಸಾರಾಸಗಟಾಗಿ ತಳ್ಳಿ ಹಾಕುತ್ತದೆ. ಜೊತೆಗೆ ಪ್ರಮುಖ ನೌಕಾ ಮಾರ್ಗವನ್ನು ಮತ್ತೆ ತೆರೆಯುವ ವಿಧಾನಗಳ ಕುರಿತು ತನ್ನ ನೆರೆಹೊರೆಯ ರಾಷ್ಟ್ರಗಳ ಜೊತೆ ಕೆಲವು ಷರತ್ತುಗಳೊಂದಿಗೆ ಮಾತುಕತೆ ಕೂಡ ನಡೆಸುತ್ತಿದೆ.

ಟ್ರಂಪ್‌ ನಡೆಸಿದ ಸುಳ್ಳಿನ ಕಸರತ್ತು

ಅಂತಿಮವಾಗಿ ಇಡೀ ಪ್ರಕ್ರಿಯೆಯು ಟ್ರಂಪ್‌ ಮತ್ತು ಅವರ ಮಿತ್ರರಾಷ್ಟ್ರ ಇಸ್ರೇಲ್‌ ಇಸ್ರೇಲ್‌ ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಅವರಿಗೆ ನಿರಾಶದಾಯಕವಾಗಿತ್ತು ಎಂಬ ಮಾತನ್ನು ವಿರೋಧಿಸುವವರು ಕೆಲವೇ ಕೆಲವು ಜನ ಮಾತ್ರ. ಹೊರ್ಮುಜ್‌ ಜಲಸಂಧಿಯು ತಮ್ಮದೇ ಭೂಪ್ರದೇಶ ಎಂದು ಟ್ರಂಪ್‌ ಅವರು ಹೇಳುವಂತೆ ಒತ್ತಡ ಹೇರಲಾಯಿತು ಎಂಬುದರಲ್ಲಿ ಅಚ್ಚರಿಯಿಲ್ಲ. ಅದ್ಯಾವುದೂ ಇಲ್ಲದೇ ಇದ್ದರೂ ಅದರು ಅವರ ಕಲ್ಪನೆಯ ಅತಿರೇಕವೇ ಆಗಿತ್ತು. ಆ ಮಾತನ್ನು ತಮಾಷೆಗಾಗಿ ಹೇಳಲಾಗಿದೆ ಎಂದು ಟ್ರಂಪ್‌ ಆಡಳಿತವು ಕೂಡಲೇ ಸ್ಪಷ್ಟಪಡಿಸಿದ್ದ ವಿಶೇಷ.

ಕುತೂಹಲದ ಸಂಗತಿ ಎಂದರೆ ಟ್ರಂಪ್‌ ಅವರ ಈ ಹೇಳಿಕೆಯು ಅವರು ʼಸುಳ್ಳಿನ ಕಸರತ್ತಿನʼ ದೊಡ್ಡ ಚಿತ್ರಣವನ್ನು ಪ್ರತಿಬಿಂಬಿಸುತ್ತದೆ. ಇದು ಇರಾನ್‌ನ ಇಸ್ಲಾಮಿಕ್‌ ಆಡಳಿತವನ್ನು ಉರುಳಿಸುವ ಗಂಭೀರ ಮತ್ತು ಘಾತಕ ಪ್ರಯತ್ನದೊಂದಿಗೆ ಆರಂಭವಾಗಿ ಕೊನೆಗೆ ಇದೊಂದು ಹಾಸ್ಯಕ್ಕಾಗಿ ಹೇಳಿದ ಮಾತು ಎಂಬುದರೊಂದಿಗೆ ಕೊನೆಗೊಂಡಿತು. ಫೆ.28ಕ್ಕೂ ಮುನ್ನ ಹೊರ್ಮುಜ್‌ ಜಲಸಂಧಿಯ ದಿಗ್ಬಂಧನದಂತಹ ಸಮಸ್ಯೆಯೇ ಅಸ್ತಿತ್ವದಲ್ಲಿ ಇರಲಿಲ್ಲ. ಆದರೆ ಅದುವೇ ಇರಾನ್‌ಗೆ ದೊಡ್ಡ ಟ್ರಂಪ್‌ ಕಾರ್ಡ್‌ ಆಗಿ ಪರಿಣಮಿಸಿದ್ದು ತಮಾಷೆಯಲ್ಲ. ಅಷ್ಟು ಮಾತ್ರವಲ್ಲದೆ ಇಂದಿಗೂ ಅದು ಬಗೆಹರಿಯದೇ ಉಳಿದುಬಿಟ್ಟಿದೆ.

ಅಮೆರಿಕ ಮತ್ತು ಇಸ್ರೇಲ್‌ನ ಮೂಲ ಅಜೆಂಡಾವಾದರೂ ಏನು? ಅವರ ಪಾಲಿಗೆ ಅತ್ಯಂತ ನಿರ್ಣಾಯಕವಾಗಿದ್ದ ಇರಾನ್‌ನ ಪರಮಾಣು ಕಾರ್ಯಕ್ರಮವನ್ನು ನಾಶಪಡಿಸುವುದು ಈಗ ಎಲ್ಲರಿಗೆ ಮರೆತೇ ಹೋಗಿರುವಂತೆ ಕಾಣುತ್ತಿದೆ. ಮಧ್ಯವರ್ತಿಗಳ ತಾಂತ್ರಿಕ ತಂತ್ರಗಳು ಅದನ್ನು ಸಕ್ರಿಯವಾಗಿ ಪರಿಶೀಲನೆ ನಡೆಸುತ್ತಿವೆ ಎಂಬ ವರದಿಗಳು ಇದ್ದರೂ ಅವರು ಈ ಸಮಸ್ಯೆಯನ್ನು ಯಾವ ಮಟ್ಟಿಗೆ ಚರ್ಚಿಸುವ ನಿರ್ಧಾರ ಕೈಗೊಂಡರು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಇರಾನ್‌ ಹಾಕಿದ ಹೊರ್ಮುಜ್‌ ದಿಗ್ಬಂಧನದ ಪ್ರತಿಕೂಲ ಪರಿಣಾಮಗಳು ಇಡೀ ಜಗತ್ತಿನ ಮೇಲೆ ಉಂಟಾಯಿತು. ಇದರಿಂದಾಗಿಯೇ ಟ್ರಂಪ್-ನೆತನ್ಯಾಹು ಕಾರ್ಯತಂತ್ರವು ಮಕಾಡೆ ಮಲಗಿತು. ಇದು ಟ್ರಂಪ್‌ ಅವರ ಜಂಘಾಬಲವನ್ನು ಉಡುಗಿಸಿತು ಮತ್ತು ಆರ್ಥಿಕ ಬಿಕ್ಕಟ್ಟಿಗೆ ಒಳಗಾಗುವಂತೆ ಮಾಡಿತು. ಯುರೋಪ್‌ನಲ್ಲಿ ಅಮೆರಿಕದ ಮಿತ್ರ ರಾಷ್ಟ್ರಗಳು ಕೂಡ ಆರೋಪಗಳ ಸುರಿಮಳೆ ಗೆರೆದರು. ವಿಶ್ವದಾದ್ಯಂತ ಟ್ರಂಪ್‌ ಅವರ ಜನಪ್ರಿಯತೆ ನೆಲಕಚ್ಚಿತು.

ಹೊರ್ಮುಜ್ ಜಲಸಂಧಿಯ ಬಿಕ್ಕಟ್ಟು ಮುನ್ನೆಲೆಗೆ ಬಂದಾಗ, ಆಕ್ರೋಶಗೊಂಡ ಟ್ರಂಪ್ ಕದನ ವಿರಾಮ ಮುಕ್ತಾಯಗೊಂಡಿದೆ ಎಂಬ ನಾಟಕವಾಡಿ, ಇರಾನ್ ಮೇಲೆ ಮತ್ತೆ ದಾಳಿ ನಡೆಸುವ ಪ್ರಯತ್ನ ನಡೆಸಿದರು. ಆದರೆ ಅದೂ ವಿಫಲವಾಯಿತು, ಅಂತಿಮವಾಗಿ ಅಮೆರಿಕದ ಅಧ್ಯಕ್ಷರು ಹಿಂದೆ ಸರಿಯದೇ ಬೇರೆ ದಾರಿಯಿರಲಿಲ್ಲ ಮತ್ತು ಮಾತುಕತೆಗಳೇ ಮುಂದಿನ ದಾರಿ ಎಂದು ಘೋಷಿಸಬೇಕಾದ ಅನಿವಾರ್ಯತೆ ಸೃಷ್ಟಿಯಾಯಿತು.

ನೆಗಪಾಟಲಿಗೀಡಾದ ಟ್ರಂಪ್

ಆದರೆ ಈಗ 60 ದಿನಗಳ ಗಡುವು ಮುಕ್ತಾಯಗೊಂಡಿರುವುದರಿಂದ, ಈ ಸಂಘರ್ಷವು ಯಾವ ಹಂತದಲ್ಲಿದೆ? ಹೋರಾಟದಿಂದ ವಿಜಯಶಾಲಿಯಾಗಿ ಹೊರಹೊಮ್ಮಲು ಯೋಜಿಸುತ್ತಿದ್ದ ಟ್ರಂಪ್ಗೆ, ಈಗಾಗಲೇ ಹಾನಿಗೊಳಗಾಗಿರುವ ಅವರ ಕೀರ್ತಿಯು ಮತ್ತಷ್ಟು ನಗೆಪಾಟಲಿಗೀಡಾಗುವ ಅಪಾಯದಲ್ಲಿದೆ. ಜೊತೆಗೆ ಜಿದ್ದಿಗೆ ಬಿದ್ದಿರುವ ಅವರ ಇರಾನಿನ ವಿರೋಧಿಗಳು ಅವರಿಗೆ ವಿಷಯವನ್ನು ಮತ್ತಷ್ಟು ಕಠಿಣಗೊಳಿಸುತ್ತಿರುವುದು ಸ್ಪಷ್ಟವಾಗಿ ಕಾಣುತ್ತಿದೆ.

ಅಮೆರಿಕದ ಅಧ್ಯಕ್ಷರಿಗೆ ಈಗ ಕಾಡುತ್ತಿರುವುದು ಅವರ ಯುದ್ಧದ ವಿರುದ್ಧದ ವ್ಯಾಪಕ ವಿರೋಧ. ಇದು ಅವರ ರಿಪಬ್ಲಿಕನ್ ಪಕ್ಷ ಮತ್ತು MAGA ಬೆಂಬಲಿಗರಲ್ಲೂ ದಟ್ಟವಾಗಿ ಕಾಣುತ್ತಿದೆ. ಕಚ್ಚಾ ತೈಲ ಕೊರತೆಯು ಅಮೆರಿಕದ ದೇಶೀಯ ಬೆಲೆಗಳ ಮೇಲೆ ಪರಿಣಾಮ ಬೀರುವುದಿಲ್ಲ ಎಂಬ ಅವರ ಲೆಕ್ಕಾಚಾರ ಕೂಡ ತಲೆಕೆಳಗಾಯಿತು. ಇದು ಇಂಧನ ಬೆಲೆಗಳ ತೀವ್ರ ಏರಿಕೆ ಮತ್ತು ಅಮೆರಿಕದ ಆರ್ಥಿಕತೆಯ ಮೇಲೆ ಅದರ ದುಷ್ಪರಿಣಾಮದಿಂದ ಆಕ್ರೋಶಗೊಂಡ ಲಕ್ಷಾಂತರ ನಾಗರಿಕರಿಗೆ ಉತ್ತರ ನೀಡಬೇಕಾದ ಸ್ಥಿತಿ ನಿರ್ಮಾಣವಾಯಿತು.

ಈ ವರ್ಷದ ನಂತರ ಮಧ್ಯಂತರ ಚುನಾವಣೆಗಳು ಬರುವುದರಿಂದ, ಆಡಳಿತಾರೂಢ ರಿಪಬ್ಲಿಕನ್ನರು ಕೂಡ ಕೆಟ್ಟ ಪರಿಸ್ಥಿತಿಯ ಬಗ್ಗೆ ಭಯಭೀತರಾಗಿದ್ದಾರೆ. ಸಂಭಾವ್ಯ ನಕಾರಾತ್ಮಕ ಕಾರ್ಯಕ್ಷಮತೆಗೆ ಇರಾನ್ ವೈಫಲ್ಯವೇ ಪ್ರಮುಖ ಕಾರಣವಾಗಿ ಕಾಡಲಿದೆ.

ಅವರು ಪ್ರತಿನಿಧಿ ಸಭೆ ಮತ್ತು ಸೆನೆಟ್ನಲ್ಲಿ ಬಹುಮತವನ್ನು ಕಳೆದುಕೊಂಡರೆ, ತಮ್ಮ ಉಳಿದ ಅಧಿಕಾರ ಅವಧಿಯಲ್ಲಿ ಟ್ರಂಪ್ ಯಾವುದೇ ಮಹತ್ವದ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಸಾಧ್ಯವಾಗುವುದಿಲ್ಲ - ಸಂಕ್ಷಿಪ್ತವಾಗಿ ಹೇಳುವುದಾದರೆ, ಅವರು ಅತ್ಯಂತ ದುರ್ಬಲ ಅಧ್ಯಕ್ಷರಾಗುವುದು ನಿಶ್ಚಿತ.

ಇರಾನ್ ವಿರುದ್ಧ ಅಮೆರಿಕವು ಮತ್ತೆ ಮಿಲಿಟರಿ ದಾಳಿಗಳನ್ನು ಪುನರಾರಂಭಿಸುವ ಸಾಧ್ಯತೆಯು ಅತ್ಯಂತ ಕ್ಷೀಣ. ಯಾಕೆಂದರೆ ಇದುವರೆಗೆ ಯುದ್ಧದಲ್ಲಿ ಯಾವುದೇ ಗಣನೀಯ ಸಾಧನೆ ಮಾಡಲಾಗಿಲ್ಲ. ನಿರ್ಣಾಯಕವಾಗಿ, ಅಮೆರಿಕವು ತನ್ನ ಹೆಚ್ಚಿನ ನಿಖರತೆಯ ದೀರ್ಘಕಾಲೀನ ಕ್ಷಿಪಣಿಗಳನ್ನು ಬಹುತೇಕ ಸಂಪೂರ್ಣವಾಗಿ ಬಳಸಿಕೊಂಡಿದ್ದಾಗಿದೆ. ಮತ್ತಷ್ಟು ಬಳಕೆ ಮಾಡಿದರೆ ಬೇರೆಡೆ ಅನಿರೀಕ್ಷಿತ ಸಂಘರ್ಷಗಳು ಎದುರಾದಾಗ ತೊಂದರೆಯಾಗಬಹುದು ಎಂಬ ಭೀತಿ ಇದೆ. ಈಗಾಗಲೇ ಟ್ರಂಪ್ ಅವರು ರಷ್ಯಾ ವಿರುದ್ಧದ ಯುದ್ಧದಲ್ಲಿ ಉಕ್ರೇನ್ಗೆ ನೀಡುತ್ತಿದ್ದ ಅಮೆರಿಕದ ಮಿಲಿಟರಿ ಸರಬರಾಜನ್ನು ಕಡಿಮೆ ಮಾಡಿದ್ದಾರೆ. ಮೇಲಾಗಿ, ಆ ಯುದ್ಧದ ಮೇಲೆ ಹೆಚ್ಚು ಖರ್ಚು ಮಾಡುವಂತೆ ತಮ್ಮ ಯುರೋಪಿಯನ್ ನೇಟೋ ಮಿತ್ರರಾಷ್ಟ್ರಗಳ ಮೇಲೆ ಅವರು ಒತ್ತಡ ಹೇರಿದ್ದಾರೆ. ಇದು ಅಮೆರಿಕವು ತನ್ನ ಶಸ್ತ್ರಾಸ್ತ್ರಗಳ ಗಣನೀಯ ಭಾಗವನ್ನು ಖಾಲಿ ಮಾಡಿದೆ ಎಂಬುದಕ್ಕೆ ಮತ್ತೊಂದು ಸೂಚನೆ.

ಯುದ್ಧಕ್ಕೆ ಸುರಿದ ಮೊತ್ತ 40 ಬಿಲಿಯನ್ ಡಾಲರ್

ಹಣಕಾಸಿನ ದೃಷ್ಟಿಯಿಂದಲೂ, ಅಧ್ಯಕ್ಷೀಯ ಚುನಾವಣೆಯ ಪ್ರಚಾರದ ಸಮಯದಲ್ಲಿ ಮಿಲಿಟರಿ ವೆಚ್ಚವನ್ನು ಕಡಿಮೆ ಮಾಡುವುದಾಗಿ ಭರವಸೆ ನೀಡಿದ್ದ ಟ್ರಂಪ್, ಈಗ ಮತದಾರರಿಗೆ ಸಮಾಧಾನ ಹೇಳಬೇಬೇಕಾಗಿದೆ ಮತ್ತು ತಮ್ಮ ಆಡಳಿತವು ನುಡಿದಂತೆ ನಡೆಯುತ್ತಿದೆ ಎಂದು ತೋರಿಸಬೇಕಾಗಿದೆ. ಇರಾನ್ ವಿರುದ್ಧದ ಯುದ್ಧದಲ್ಲಿ ಅವರು ಇದುವರೆಗೆ ಸುಮಾರು 40 ಬಿಲಿಯನ್ ಡಾಲರ್ ಖರ್ಚು ಮಾಡಿದ್ದಾರೆಂದು ವರದಿಯಾಗಿದೆ. ಮತದಾರರ ಮೆಚ್ಚುಗೆಯನ್ನು ಮರಳಿ ಪಡೆಯುವ ಪ್ರಯತ್ನದಲ್ಲಿ, ಅವರು ಉಕ್ರೇನ್ ಯುದ್ಧದ ವೆಚ್ಚವನ್ನು ಕಡಿತಗೊಳಿಸಿದ್ದಾರೆ.

ಇವೆಲ್ಲದರ ನಡುವೆಯೇ ಸೋಮವಾರದಂದು, ಉತ್ತರ ಕೊರಿಯಾದ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್ ಅವರೊಂದಿಗೆ ತಮಗಿರುವ ಉತ್ತಮ ಸಂಬಂಧವನ್ನು ಪರಿಗಣಿಸಿ ಇದು ದುಬಾರಿಯಾಗಿದೆ ಮತ್ತು ಅನಗತ್ಯವಾಗಿದೆ ಎಂಬ ಕಾರಣಕ್ಕಾಗಿ ದಕ್ಷಿಣ ಕೊರಿಯಾದೊಂದಿಗೆ ನಡೆಸುವ ದಿನನಿತ್ಯದ ಮಿಲಿಟರಿ ಸಮರಾಭ್ಯಾಸಗಳ ಪ್ರಮಾಣವನ್ನು ತೀವ್ರವಾಗಿ ಕಡಿತಗೊಳಿಸುವಂತೆ ಅವರು ತಮ್ಮ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.

ಇರಾನ್ ಜೊತೆಗಿನ ಒಡಂಬಡಿಕೆಗೆ ಎರಡು ತಿಂಗಳ ಹಿಂದೆ ಸಹಿ ಹಾಕಿದ ನಂತರ, ಟ್ರಂಪ್ ಅವರು ಇರಾನ್ ಮೇಲಿನ ದಾಳಿಯನ್ನು ನಿಲ್ಲಿಸುವಂತೆ ನೆತನ್ಯಾಹು ಮೇಲೆ ಒತ್ತಡ ಹೇರಿದರು, ಅದನ್ನು ಇಸ್ರೇಲಿ ಪ್ರಧಾನಿ ನೆತನ್ಯಾಹು ಪಾಲಿಸಿದರು. ಇರಾನ್ನ ಒತ್ತಡಕ್ಕೆ ಮಣಿದು, ಟ್ರಂಪ್ ಅವರು ತಮ್ಮ ಯಹೂದಿ ಮಿತ್ರರಾಷ್ಟ್ರವು ಲೆಬನಾನ್ ಮೇಲೆ ಮಾಡುತ್ತಿರುವ ಬಾಂಬ್ ದಾಳಿಯನ್ನು ತಾತ್ಕಾಲಿಕವಾಗಿ ನಿಲ್ಲಿಸುವಂತೆ ಒತ್ತಾಯಿಸಿದರು. ಅಲ್ಲಲ್ಲಿ ವಿರಳವಾದ ಬಾಂಬ್ ದಾಳಿಗಳು ನಡೆದಿದ್ದರೂ, ಇಸ್ರೇಲ್ ದಕ್ಷಿಣ ಲೆಬನಾನ್ ಮೇಲೆ ತನ್ನ ಮಿಲಿಟರಿ ದಾಳಿಯನ್ನು ದೊಡ್ಡ ಮಟ್ಟದಲ್ಲಿ ಕಡಿಮೆ ಮಾಡಿದೆ ಎಂಬುದು ಇನ್ನೊಂದು ಗಮನಾರ್ಹ ಬೆಳವಣಿಗೆ.

'ವಿಜೇತ'ನಾಗಿ ಹೊರಹೊಮ್ಮಿದ ಇರಾನ್

ಯಾವುದೇ ಪ್ರಚೋದನೆಯಿಲ್ಲದೆ ದಾಳಿಗೆ ಒಳಗಾದ ಇರಾನ್, ಯುದ್ಧದ ಜಾಗತಿಕ ಗ್ರಹಿಕೆಯ ವಿಷಯದಲ್ಲಿ ಸುಸ್ಥಿತಿಯಲ್ಲಿದೆ. ಖಂಡಿತವಾಗಿಯೂ ಇದು ತನ್ನ ಪರಮಾಣು ಸೌಲಭ್ಯಗಳು, ಸೇತುವೆಗಳು, ವಿದ್ಯುತ್ ಸ್ಥಾವರಗಳು ಸೇರಿದಂತೆ ನಾಗರಿಕ ಮೂಲಭೂತ ಸೌಕರ್ಯಗಳಿಗೆ ಅಪಾರ ಹಾನಿಯನ್ನು ಅನುಭವಿಸಿದೆ ಮತ್ತು ದಾಳಿಗಳು ಪ್ರಾರಂಭವಾದ ದಿನದಂದು ಮಿನಾಬ್‌ನ ಶಾಲೆಯೊಂದರಲ್ಲಿ 170 ಮಕ್ಕಳು ಸೇರಿದಂತೆ ಸುಮಾರು 5,000 ನಾಗರಿಕರು ಸಾವನ್ನಪ್ಪಿದ್ದಾರೆ.

ಮತ್ತು ಇವುಗಳೆಲ್ಲಕ್ಕಿಂತ ಅತ್ಯಂತ ನಿರ್ಣಾಯಕವಾದ ಸಂಗತಿ ಎಂದರೆ – ಅಮೆರಿಕ -ಇಸ್ರೇಲಿ ಕಾರ್ಯಾಚರಣೆಯ ವೇಳೆ ಅಮೆರಿಕದ ಕ್ಷಿಪಣಿ ದಾಳಿಯಲ್ಲಿ ಇರಾನಿನ ಸರ್ವೋಚ್ಚ ನಾಯಕ ಅಯತೋಲ್ಲಾ ಖಮೇನಿ ಅವರ ಹತ್ಯೆ ಹಾಗೂ ಅದರ ಹಲವಾರು ಉನ್ನತ ಮಿಲಿಟರಿ ಕಮಾಂಡರ್ಗಳು, ಸರ್ಕಾರಿ ಅಧಿಕಾರಿಗಳು ಮತ್ತು ಅಧಿಕಾರಿಗಳ ಹತ್ಯೆಯಾಗಿದೆ.

ಆದರೆ ಇರಾನ್ ತನ್ನಷ್ಟಕ್ಕೆ ತಾನೇ ಯುದ್ಧವನ್ನು ಪ್ರಾರಂಭಿಸುವ ಸಾಧ್ಯತೆಯಿಲ್ಲ, ಏಕೆಂದರೆ ಅದಕ್ಕೆ ಯಾವುದೇ ಕಾರಣವಿಲ್ಲ. ಸೋಲು ಕಾಣದೆ ಇರುವುದರಿಂದ ಅದು ವಾಸ್ತವಿಕವಾಗಿ "ವಿಜೇತ"ನಾಗಿ ಹೊರಹೊಮ್ಮಿದೆ ಮತ್ತು ಟ್ರಂಪ್-ನೆತನ್ಯಾಹು ದಾಳಿಯನ್ನು ಪ್ರತಿರೋಧಿಸುವಲ್ಲಿ ಹೊರ್ಮುಜ್ ಜಲಸಂಧಿಯು ಎಷ್ಟು ಪ್ರಮುಖವಾಗಿದೆ ಎಂಬುದನ್ನು ಪರಿಗಣಿಸಿ, ಅದು ತನ್ನ ಹಿಡಿತವನ್ನು ಬಿಟ್ಟುಕೊಡುವುದಿಲ್ಲ ಎಂಬ ಎಲ್ಲ ಸೂಚನೆಗಳು ಕಾಣುತ್ತಿವೆ.

ತಾಂತ್ರಿಕವಾಗಿ, ಶಾಂತಿ ಒಪ್ಪಂದಕ್ಕೆ ಸಹಿ ಹಾಕುವವರೆಗೆ, ಹೋರಾಟವು ಮುಗಿದಿದೆ ಎಂದು ಪರಿಗಣಿಸಲು ಸಾಧ್ಯವಿಲ್ಲ. ಈ ಹಂತದಲ್ಲಿ ಶಾಂತಿ ಒಪ್ಪಂದವು ದೂರದ ಮಾತು ಎಂದು ಕಂಡರೆ ಅಚ್ಚರಿಯಿಲ್ಲ. ಇದರರ್ಥ ಮುಖ್ಯವಾಗಿ ಅಮೆರಿಕದಲ್ಲಿ, ಮತ್ತು ಅಕ್ಟೋಬರ್ನಲ್ಲಿ ಸಾರ್ವತ್ರಿಕ ಚುನಾವಣೆಗಳು ನಡೆಯಲಿರುವ ಇಸ್ರೇಲ್‌ನಲ್ಲಿ ರಾಜಕೀಯ ದೃಶ್ಯ ಬದಲಾಗುವವರೆಗೆ ಈ ಪ್ರದೇಶವು ಕನಿಷ್ಠ ಪಕ್ಷ ಆತಂಕದ ವಾತಾವರಣದಲ್ಲೇ ಮುಂದುವರಿಯುತ್ತದೆ.

Disclaimer: ವಿವಿಧ ವಲಯಗಳಿಂದ ಅಭಿಪ್ರಾಯಗಳನ್ನು ಕಲೆಹಾಕಿ ಪ್ರಸ್ತುತಪಡಿಸಲು ದ ಫೆಡರಲ್, ಪ್ರಯತ್ನಿಸುತ್ತದೆ. ಲೇಖನಗಳಲ್ಲಿನ ಮಾಹಿತಿ, ಕಲ್ಪನೆಗಳು ಅಥವಾ ಅಭಿಪ್ರಾಯಗಳು ಸಂಪೂರ್ಣವಾಗಿ ಲೇಖಕರದ್ದಾಗಿದ್ದು, ಅವು ʼದ ಫೆಡರಲ್‌ ಕರ್ನಾಟಕʼದ ದೃಷ್ಟಿಕೋನಗಳನ್ನು ಪ್ರತಿಬಿಂಬಿಸುವುದಿಲ್ಲ. ಮೂಲ ಲೇಖನ 'ದ ಫೆಡರಲ್‌' ಇಂಗ್ಲಿಷ್‌ ಜಾಲತಾಣದಲ್ಲಿ ಪ್ರಕಟವಾಗಿದೆ.