ಊಟದ ತಟ್ಟೆಯಲ್ಲಿ ವಿಷಯುಕ್ತ ಆಹಾರ: ಒಬ್ಬಂಟಿ ಹೋರಾಟ ಸಾಲದು, ಸಾಂಸ್ಥಿಕ ವ್ಯವಸ್ಥೆ ಬೇಕಿದೆ

ದಶಕಗಳ ಹಿಂದೆ ಆಹಾರಕ್ಕಾಗಿ ನಡೆಸುವ ಹೋರಾಟವು ಅಸ್ತಿತ್ವದ ಪ್ರಶ್ನೆಯಾಗಿತ್ತು. ನಮ್ಮ ಜನಸಂಖ್ಯೆಗೆ ಬೇಕಾದಷ್ಟು ಆಹಾರವನ್ನು ನಾವು ಉತ್ಪಾದನೆ ಮಾಡುತ್ತಿರಲಿಲ್ಲ. ಅದಕ್ಕೆ ನೀಡಿದ ಪ್ರತಿಕ್ರಿಯೆಯು ನಿರ್ಣಾಯಕ, ಮಹತ್ವಾಕಾಂಕ್ಷೆಯಿಂದ ಕೂಡಿದ್ದ ಹಾಗೂ ಐತಿಹಾಸಿಕವಾಗಿತ್ತು. ನಾವು ʼಹಸಿರು ಕ್ರಾಂತಿʼ ಆರಂಭಿಸಿದೆವು. ಅಧಿಕ ಇಳುವರಿ ನೀಡುವ ತಳಿಗಳನ್ನು ಪರಿಚಯಿಸಿದೆವು. ನೀರಾವರಿಯನ್ನು ಇನ್ನಷ್ಟು ವಿಸ್ತರಿಸಿದೆವು. ರಾಸಾಯನಿಕ ರಸಗೊಬ್ಬರಗಳಿಗೆ ಪ್ರೋತ್ಸಾಹ ನೀಡಿದೆವು ಮತ್ತು ಆಹಾರ ಕೊರತೆಯಿದ್ದ ದೇಶವನ್ನು ಆಹಾರ ಹೆಚ್ಚಳವಿರುವ ದೇಶವನ್ನಾಗಿ ಪರಿವರ್ತಿಸಿದೆವು. ಇದು ರಾಜ್ಯದ ನೀತಿ, ಕೃಷಿ ವಿಜ್ಞಾನ ಮತ್ತು ರಾಷ್ಟ್ರೀಯ ಇಚ್ಛಾಶಕ್ತಿಯ ವಿಜಯವಾಗಿತ್ತು.

ಇವೆಲ್ಲವೂ ಕಳೆದು ದಶಕಗಳೇ ಕಳೆದಿವೆ. ಹಾಗಿದ್ದರೂ ನಮ್ಮ ಆಹಾರಕ್ಕಾಗಿರುವ ಹೋರಾಟವು ಅಸ್ತಿತ್ವದ ಪ್ರಶ್ನೆಯಾಗಿಯೇ ಮುಂದುವರಿದಿದೆ. ನಮ್ಮ ಮುಂದೆ ಇರುವ ಪ್ರಶ್ನೆ ನಮ್ಮ ತಟ್ಟೆಯಲ್ಲಿ ಸಾಕಷ್ಟು ಆಹಾರ ಇದೆಯೇ ಎಂಬುದಲ್ಲ, ಬದಲಿಗೆ ನಮ್ಮ ತಟ್ಟೆಯಲ್ಲಿರುವುದೇ ನಮ್ಮ ನಿಧಾನವಾಗಿ ವಿಷಪೂರಿತವಾಗಿ ಮಾಡುತ್ತಿದೆಯೇ ಎಂಬುದು. ಹಸಿರು ಕ್ರಾಂತಿಯೊಂದಿಗೆ ಆರಂಭವಾಗಿದ್ದು ಈಗ ಸ್ವಚ್ಛ ಕ್ರಾಂತಿಯೊಂದಿಗೆ ಮುಂದುವರಿಯಬೇಕಾಗಿದೆ.

ಇತ್ತೀಚಿನ ತಿಂಗಳುಗಳಲ್ಲಿ ದೇಶಾದ್ಯಂತ ಬಂದಿರುವ ಸುದ್ದಿ-ಶೀರ್ಷಿಕೆಗಳು ಒಂದು ಆತಂಕಕಾರಿ ವಿದ್ಯಮಾನವನ್ನು ನಮ್ಮ ಮುಂದೆ ಅನಾವರಣ ಮಾಡುತ್ತಿವೆ. ನಕಲಿ ಪನೀರ್ ಉತ್ಪಾದನಾ ಘಟಕಗಳು ಮತ್ತು ಕಾನ್ಸರ್ಕಾರಕ ಬಣ್ಣಗಳನ್ನು ಬೆರೆಸಿದ ವಿಷಕಾರಿ ಮಸಾಲೆ ಪದಾರ್ಥಗಳ ಮೇಲೇ ನಡೆಸಿದ ದಾಳಿಗಳಿಂದ ಆರಂಭಿಸಿ, ಕೈಗಾರಿಕಾ ರಾಸಾಯನಿಕಗಳನ್ನು ಬೆರೆಸಿದ ದಿನನಿತ್ಯದ ಅಡುಗೆ ಎಣ್ಣೆ ಮತ್ತು ತಾಜಾ ಹಸಿರು ಹೊಳಪಿಗಾಗಿ ಕಾಪರ್ ಸಲ್ಫೇಟ್ನಲ್ಲಿ ಅದ್ದಿದ ತರಕಾರಿಗಳ ವರೆಗೆ, ಆಹಾರ ಕಲಬೆರೆಕೆ ಎಂಬುದು ಈಗ ಕಾಲಕಾಲಕ್ಕೆ ಬರುವ ಹಬ್ಬದ ಋತುವಿನ ಹಗರಣವಾಗಿ ಮಾತ್ರ ಉಳಿದಿಲ್ಲ. ಇದು ಒಂದು ಕೈಗಾರಿಕೃತಗೊಂಡ ದಿನನಿತ್ಯದ ವ್ಯವಹಾರವಾಗಿ ಹೋಗಿದೆ.

ಒಬ್ಬ ತುಕಾರಾಂ ಮುಂಡೆ ಸಾಕೇ?

ತುಕಾರಾಮ್ ಮುಂಡೆ ಅವರಂತಹ ಆಹಾರ ಮತ್ತು ಔಷಧ ನಿಯಂತ್ರಣ ಅಧಿಕಾರಿಗಳು ಕಲಬೆರಕೆ ಸಿಂಡಿಕೇಟ್ಗಳ ವಿರುದ್ಧ ರಾಜಿರಹಿತವಾಗಿ ಯಾವುದೇ ಮುಲಾಜಿಗೆ ಒಳಗಾಗದೇ ಕಠಿಣ ಕ್ರಮಗಳನ್ನು ಕೈಗೊಂಡಾಗ ನಾಗರಿಕರು ಸಹಜವಾಗಿಯೇ ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ. ಮುಂಡಯವರ ಆಕ್ರಮಣಕಾರಿ ತಪಾಸಣೆಗಳು ಮತ್ತು ನಿರ್ಬಿಢೆಯಿಂದ ಕೈಗೊಳ್ಳುವ ಕಠಿಣ ಧೋರಣೆ ಆಡಳಿತಾತ್ಮಕ ಜವಾಬ್ದಾರಿಯ ಅಪರೂಪದ ಅನುಭವವನ್ನು ನೀಡುತ್ತದೆ.

ಹಾಗಿದ್ದೂ ನಾವು ಒಂದು ಅಹಿತಕರವಾದ ಪ್ರಶ್ನೆಯನ್ನು ಕೇಳಬೇಕಾಗಿದೆ- 140 ಕೋಟಿ ಜನರಿರುವ ನಮ್ಮ ಪ್ರಜಾಪ್ರಭುತ್ವದಲ್ಲಿ ಆಹಾರ ಸುರಕ್ಷತೆಯು ಒಬ್ಬ ವ್ಯಕ್ತಿಯ ವೈಯಕ್ತಿಕ ದಿಟ್ಟತನದ ಮೇಲೆ ಮಾತ್ರ ಯಾಕೆ ಅವಲಂಬಿತವಾಗಿದೆ?

ಈ ನಿಟ್ಟಿನಲ್ಲಿ ವೈಯಕ್ತಿಕ ಪ್ರತಿಭೆ ಮತ್ತು ಆಡಳಿತಾತ್ಮಕ ಸಮಗ್ರತೆಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಬಹುದಾದರೂ ಏಕಾಂಗಿ ಹೋರಾಟಗಾರರನ್ನು ಅವಲಂಬಿಸುವುದು ಸಾಂಸ್ಥಿಕ ವೈಫಲ್ಯವನ್ನು ಸದ್ದಿಲ್ಲದೆ ಒಪ್ಪಿಕೊಂಡಂತೆ.

ಮಹಾರಾಷ್ಟ್ರದ ತುಕಾರಾಮ್ ಮುಂಡೆ, ಹೈದರಾಬಾದ್ನಲ್ಲಿ ಕಾರ್ಯಾಚರಣೆಗೆ ಇಳಿದಿರುವ ಅಸಾಧಾರಣ ಕಾರ್ಯಪಡೆ ಅಥವಾ ಬೆಂಗಳೂರಿನಲ್ಲಿ ನಡೆದಿರುವ ಸ್ವಚ್ಛ ಆಹಾರ ಅಭಿಯಾನ ಪ್ರಶಂಸನೀಯ ಕೆಲಸ ಮಾಡುತ್ತಿದೆ. ಆದರೆ ಅಂತಹ ಯಾವುದೇ ನಾಯಕರು ಇಲ್ಲದೇ ಇರುವ ಜಿಲ್ಲೆಗಳು ಹಾಗೂ ರಾಜ್ಯಗಳ ಗತಿಯಾದರೂ ಏನು? ಸಾರ್ವಜನಿಕ ಆರೋಗ್ಯ ಎಂಬುದು ಯಾವ ಅಧಿಕಾರಿಗೆ ಎಲ್ಲಿ ಹುದ್ದೆ ಸಿಕ್ಕಿದೆ ಎಂಬುದು ಮುಖ್ಯವಾಗಬಾರದು; ಅದು ಒಬ್ಬ ವ್ಯಕ್ತಿಯಿಂದ ಪ್ರಕ್ರಿಯೆಗೆ ಬದಲಾಗಬೇಕು.

ವಿಷಕಾರಿ ತ್ರಿವಳಿಗಳು

ನಮ್ಮ ಹದಗೆಟ್ಟ ಆಹಾರ ಸರಪಳಿಯ ಪರಿಣಾಮಗಳು ಸೈದ್ಧಾಂತಿಕ ಅಥವಾ ದೂರದ ವಿಚಾರಗಳಾಗಿ ಉಳಿದಿಲ್ಲ. ಭಾರತವು ಇತ್ತೀಚಿನ ದಿನಗಳಲ್ಲಿ ದೀರ್ಘಕಾಲೀನ ಮತ್ತು ಸಾಂಕ್ರಾಮಿಕ ಅಲ್ಲದೇ ಇರುವ ಕಾಯಿಲೆಗಳಲ್ಲಿ, ಅದರಲ್ಲೂ ವಿಶೇಷವಾಗಿ ಕ್ಯಾನ್ಸರ್ಗೆ ಸಂಬಂಧಿಸಿದಂತೆ ಆತಂಕಕಾರಿ ಏರಿಕೆಯನ್ನು ಕಾಣುತ್ತಿದೆ.

ನಾವು ಸೇವನೆ ಮಾಡುವ ಆಹಾರಕ್ಕೂ, ನಮ್ಮ ಹೆಚ್ಚುತ್ತಿರುವ ರೋಗಗಳ ಹೊರೆಗೂ ನೇರಾನೇರ ಸಂಬಂಧವಿದೆ ಎಂದು ಕ್ಯಾನ್ಸರ್ ತಜ್ಞರು ಮತ್ತು ಸಾರ್ವಜನಿಕ ಆರೋಗ್ಯ ಸಂಶೋಧಕರು ಪದೇ ಪದೇ ಎಚ್ಚರಿಕೆ ನೀಡುತ್ತಿದ್ದಾರೆ. ಯಾವುದೇ ಆನುವಂಶಿಕ ರೋಗದ ಹಿನ್ನೆಲೆಯಿಲ್ಲದ ಯುವಜನರೂ ಸೇರಿದಂತೆ ನಾನಾ ಜನಸಂಖ್ಯಾ ಗುಂಪುಗಳಲ್ಲಿ ಕ್ಯಾನ್ಸರ್ ಪ್ರಕರಣಗಳು ತೀವ್ರವಾಗಿ ಹೆಚ್ಚುತ್ತಿವೆ.

ನಾವು ಹೇಳುವ ಮಾತುಗಳು ಒಂದು ರೀತಿಯಲ್ಲಿ ಪ್ರವಚನದಂತೆ ಅನ್ನಿಸಬಹುದು, ಆದರೆ ನಾವು ಕೆಟ್ಟ ಆಹಾರ, ಕೆಟ್ಟ ಗಾಳಿ ಮತ್ತು ಕೆಟ್ಟ ನೀರು ಎಂಬ ವಿಷಕಾರಿ ತ್ರಿವಳಿಗಳನ್ನು ತೀರಾ ಸಹಜವೆಂಬಂತೆ ಸ್ವೀಕರಿಸುತ್ತಿದ್ದೇವೆ. ಹಾಗಾಗಿ ಸ್ವಚ್ಛ ಆಹಾರ ಕ್ರಾಂತಿಯು ನಮ್ಮ ಆಹಾರವನ್ನು ಜಮೀನಿನಿಂದ ಮೇಜಿನ ತನಕ ನಿರ್ವಹಿಸಬೇಕಾದ ರೀತಿಯಲ್ಲಿ ಸಂಪೂರ್ಣ ವ್ಯವಸ್ಥಿತ ಸುಧಾರಣೆ ಕಾಣಬೇಕಾದ ಅಗತ್ಯವಿದೆ ಎಂದು ಸೂಚಿಸುತ್ತದೆ.

ಜಮೀನಿನಿಂದ ಮೇಜಿನ ತನಕ ವಿಷದ ಜಾಡು

ನಮ್ಮ ಜಮೀನುಗಳಲ್ಲಿ ನಾವು ಬಳಸುವ ರಸಗೊಬ್ಬರಗಳು ಮತ್ತು ನಿಷೇಧಿತ ಕೀಟನಾಶಕಗಳು ಭೂಮಿಯ ಮೇಲ್ಮಣ್ಣನ್ನು ಕಲುಷಿತಗೊಳಿಸಿದೆ ಮತ್ತು ಅಂತರ್ಜಲ ಜಲಚರಗಳ ತನಕವೂ ಅದು ಇಳಿದಿದೆ. ಈ ರಸಗೊಬ್ಬರಗಳನ್ನು ನಾವು ಯಾವುದೇ ಮೇಲ್ವಿಚಾರಣೆ ಇಲ್ಲದೆ ಅತಿಯಾಗಿ ಬಳಕೆ ಮಾಡುತ್ತಿದ್ದೇವೆ. ಹಸಿರು ಕ್ರಾಂತಿಗೆ ಶಕ್ತಿ ತುಂಬಿದ ಕೃಷಿ ವಲಯವು ಈಗ ಗೋಧಿ, ಅಕ್ಕಿ ಮತ್ತು ಬೇಳೆಕಾಳುಗಳಂತಹ ದಿನನಿತ್ಯದ ಆಹಾರ ಪದಾರ್ಥಗಳಲ್ಲಿ ಭಾರೀ ಕೀಟನಾಶಕಗಳ ಅವಶೇಷಗಳಿಗೆ ಸಾಕ್ಷಿಯಾಗುತ್ತಿದೆ.

ಇನ್ನು ಸಂಸ್ಕರಣಾ ಘಟಕಗಳಲ್ಲಿ ಅತಿಯಾಗಿ ಸಂಸ್ಕರಿಸಿದ ಸರಕಗಳು, ಅನಿಯಂತ್ರಿತ ಸಂರಕ್ಷಗಳು, ಅಗ್ಗದ ಕೈಗಾರಿಕಾ ಕಲಬೆರಕೆ ವಸ್ತುಗಳು ಹಾಗೂ ಕೃತಕ ಮಾಗಿಸುವ ಕ್ಯಾಲ್ಸಿಯಂ ಕಾರ್ಬೈಟ್ನಂತಹ ವಿಷಕಾರಿ ಅಂಶಗಳೇ ತುಂಬಿಹೋಗಿವೆ. ಇವೆಲ್ಲವೂ ನಮ್ಮ ಅಡುಗೆಮನೆಯ ಅಲಮಾರುಗಳನ್ನು ತಲುಪುವುದಕ್ಕೆ ಮೊದಲು ಮೂಲಭೂತ ಗುಣಮಟ್ಟದ ತಪಾಸಣೆಯನ್ನು ತಪ್ಪಿಸಿಕೊಳ್ಳುತ್ತವೆ.

ಅಂತಿಮವಾಗಿ ನಮ್ಮ ಊಟದ ಟೇಬಲ್ ವಿಷಕಾರಿ ಆಹಾರದ ತಾಣವಾಗುತ್ತದೆ. ಗ್ರಾಹಕರಿಗೆ ಸಿಗುವ ಹಾಲು, ಚಹಾ, ತರಕಾರಿಗಳು ಮತ್ತು ಅಡುಗೆ ಮಾಧ್ಯಮಗಳಲ್ಲಿ ಅತ್ಯಂತ ಸೂಕ್ಷ್ಮ ಪ್ರಮಾಣದ ವಿಷಾಂಶಗಳು ಸೇರ್ಪಡೆಯಾಗುತ್ತಿವೆ.

ನಮ್ಮ ಆಹಾರವನ್ನು ಅತ್ಯಂತ ವಿಷಕಾರಿ ಅಂಶಗಳೊಂದಿಗೆ ಉತ್ಪಾದನೆ ಮಾಡಿ ಮತ್ತು ಕಾನೂನು ಬಾಹಿರ ಕಲಬೆರಕೆ ಪದಾರ್ಥಗಳೊಂದಿಗೆ ಸಂಸ್ಕರಣೆ ಮಾಡಿದಾಗ ಅದರ ಒಟ್ಟು ಜೀವವೈಜ್ಞಾನಿಕ ಪರಿಣಾಮವು ವಿನಾಶಕಾರಿಯಾಗಿರುತ್ತದೆ. ಅಗ್ಗದ ಹಾಗೂ ಕಲುಷಿತ ಕ್ಯಾಲೊರಿಗಳಿಗಾಗಿ ನಾವು ಗಗನಮುಖಿಯಾದ ಆರೋಗ್ಯ ರಕ್ಷಣೆ ವೆಚ್ಚ, ಅಂಗಾಂಗ ವೈಫಲ್ಯ, ಸ್ವಯಂ ನಿರೋಧಕ ಬಿಕ್ಕಟ್ಟುಗಳು ಮತ್ತು ಮಾರಣಾಂತಿಕ ಗೆಡ್ಡೆಗಳ ರೂಪದಲ್ಲಿ ಬೆಲೆ ತೆರುತ್ತಿದ್ದೇವೆ.

ನೀತಿ ಆಧಾರಿತ ಸುಧಾರಣೆಗಳ ಅಗತ್ಯತೆ

ನಾವು ಎಲ್ಲಿಗೆ ತಲುಪಬೇಕು ಎಂಬುದನ್ನು ತಿಳಿದುಕೊಳ್ಳಲು ನಾವು ಇಲ್ಲಿಗೆ ತಲುಪಿದ್ದಾದರೂ ಹೇಗೆ ಎಂಬುದನ್ನು ಮೊದಲು ಅರ್ಥ ಮಾಡಿಕೊಳ್ಳಬೇಕು. ನಮ್ಮ ಮುಂದೆ ಇರುವ ಕ್ಷಾಮವನ್ನು ನಿಭಾಯಿಸುವುದು ಹಾಗೂ ಒಟ್ಟು ಪರಿಮಾಣದ ಉತ್ಪಾದನೆಯನ್ನು ಮಾಡುವ ಒಂದು ನಿರ್ದಿಷ್ಟ ಐತಿಹಾಸಿಕ ಸಂದರ್ಭಕ್ಕಾಗಿ ಹಸಿರು ಕ್ರಾಂತಿಯನ್ನು ರೂಪಿಸಲಾಗಿತ್ತು. ಇದು ಪ್ರತಿಯೊಂದು ಮಾನದಂಡಕ್ಕಿಂತ ಹೆಕ್ಟೇರ್ಗೆ ಸಿಗುವ ಇಳುವರಿಗೆ ಹೆಚ್ಚಿನ ಆದ್ಯತೆಯನ್ನು ನೀಡಿತು.

ಆ ಗುರಿಯು ಯಶಸ್ವಿಯಾಯಿತು. ಭಾರತವು ಆಹಾರ ಭದ್ರತೆಯನ್ನು ಸಾಧಿಸಿತು. ಆದರೆ ಪರಿಣಾಮದ ಭಯವಿಲ್ಲದ ಕೇವಲ ಪರಿಮಾಣವು ಅಪೂರ್ಣ ವಿಜಯವಾಗಿದೆ; ನಾನು ಇದನ್ನು ರಾಷ್ಟ್ರೀಯ ನಷ್ಟ ಎಂದು ಕರೆಯುತ್ತೇನೆ.

ಭಾರತವು ಆಹಾರ ಕಲಬೆರಕೆ ಮತ್ತು ಕೀಟನಾಶಕಗಳ ಕಲುಷಿತ ಶಾಪವನ್ನು ಸೋಲಿಸಬೇಕಾದರೆ, ನಮ್ಮ ಕಾರ್ಯತಂತ್ರವು ಸಾಂದರ್ಭಿಕ ಜಾರಿಗೊಳಿಸುವಿಕೆಗೆ ಬದಲಾಗಿ ರಚನಾತ್ಮಕ ನೀತಿ ಆಧಾರಿತ ಸುಧಾರಣೆಯತ್ತ ನಿರ್ಣಾಯಕವಾಗಿ ಹೆಜ್ಜೆ ಇಡಬೇಕು.

ನೀತಿ ನಿರೂಪಣೆಯ ನೀಲನಕ್ಷೆ ಹೇಗಿರಬೇಕು?

ನೀತಿಯ ಮೂಲಕ ದೇಶಾದ್ಯಂತ ನಡೆಯುವ ಸ್ವಚ್ಛ ಕ್ರಾಂತಿಯು ಹೇಗಿರಬೇಕು?

ನಿಯಂತ್ರಕರಿಗೆ ಅಧಿಕಾರ ಮತ್ತು ತಂತ್ರಜ್ಞಾನದ ಬಲ: ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ಹಾಗೂ ರಾಜ್ಯ ಮಟ್ಟದಲ್ಲಿ ಇರುವ FDAಗಳು ಸಿಬ್ಬಂದಿ ಕೊರತೆ ಮತ್ತು ಹಳೆಯ ಪ್ರಯೋಗಾಲಯಗಳ ಜೊತೆ ಕಾರ್ಯನಿರ್ವಹಿಸಲು ಸಾಧ್ಯವಿಲ್ಲ. ಮಾದರಿಗಳನ್ನು ಪರೀಕ್ಷಿಸಲು ವಾರಗಳ ಕಾಲಾವಕಾಶ ತೆಗೆದುಕೊಳ್ಳುವ ಬದಲು, ತ್ವರಿತ ಫಲಿತಾಂಶಗಳನ್ನು ನೀಡಬಲ್ಲ ಅತ್ಯಾಧುನಿಕ ಪರೀಕ್ಷಾ ಮೂಲಸೌಕರ್ಯಗಳು ಪ್ರತಿ ಜಿಲ್ಲಾ ಮಟ್ಟದಲ್ಲೂ ನಮಗೆ ಬೇಕಾಗಿದೆ.

ಜಾಡು ಪತ್ತೆಹಚ್ಚುವುದು ಮತ್ತು ಸರಬರಾಜು ಸರಪಳಿ ಲೆಕ್ಕಪರಿಶೋಧನೆ: ಸಗಟು ಮಂಡಿಗಳಿಂದ ಚಿಲ್ಲರೆ ಅಂಗಡಿಗಳ ಮಳಿಗೆಗಳವರೆಗೆ, ಬ್ಯಾಚ್ ಟ್ರ್ಯಾಕಿಂಗ್ ಎಂಬುದು ಪ್ರಮಾಣಿತ ಅಭ್ಯಾಸವಾಗಬೇಕು. ವಿಷಕಾರಿ ಕೀಟನಾಶಕ ಅಥವಾ ಕೃತಕ ಹಾಲಿನ ಬ್ಯಾಚ್ ಪತ್ತೆಯಾದರೆ, ಅಧಿಕಾರಿಗಳು ಕೆಲವೇ ಗಂಟೆಗಳಲ್ಲಿ ಅದರ ಮೂಲವನ್ನು ಪತ್ತೆಹಚ್ಚಲು ಸಾಧ್ಯವಾಗಬೇಕು. ಈ ವಿಚಾರದಲ್ಲಿ ತಂತ್ರಜ್ಞಾನವೇ ನಮ್ಮ ಅತ್ಯುತ್ತಮ ಸ್ನೇಹಿತ.

ಕಠಿಣ ಕಾನೂನು ನಿಯಂತ್ರಣ: ಆಹಾರದಲ್ಲಿ ಕಲಬೆರಕೆ ಮಾಡುವುದು ಕೇವಲ ಆರ್ಥಿಕ ಅಪರಾಧವಲ್ಲ, ಅದು ಸಾರ್ವಜನಿಕ ಆರೋಗ್ಯದ ಮೇಲಿನ ದಾಳಿ. ಉದ್ದೇಶಪೂರ್ವಕವಾಗಿ ಆಹಾರ ಕಲಬೆರಕೆ ಮಾಡುವುದನ್ನು ಗಂಭೀರ ಅಪರಾಧಗಳ ಪಟ್ಟಿಗೆ ಸೇರಿಸಿ ಅದಕ್ಕೆ ಅನುಗುಣವಾದ ಕಾನೂನು ಚೌಕಟ್ಟನ್ನು ರೂಪಿಸಬೇಕು, ತ್ವರಿತ ವಿಚಾರಣೆ ಮತ್ತು ಗಂಭೀರ ಪರಿಣಾಮಗಳನ್ನು ಖಚಿತಪಡಿಸಬೇಕು. ಅಗತ್ಯವಿದ್ದರೆ, ಕಾನೂನನ್ನೇ ಬದಲಾಯಿಸಿ ಇದನ್ನು ಕೊಲೆ ಯತ್ನ ಎಂದೇ ಪರಿಗಣಿಸಬೇಕು.

ಕೃಷಿ ನೀತಿಯ ಪುನರ್ರಚನೆ: ಕನಿಷ್ಠ ಬೆಂಬಲ ಬೆಲೆ (ಎಂಎಸ್ಪಿ) ಪ್ರೋತ್ಸಾಹಕಗಳು, ಕೃಷಿ ಇನ್ಪುಟ್ ಸಬ್ಸಿಡಿಗಳು ಮತ್ತು ರೈತ ತರಬೇತಿ ಕಾರ್ಯಕ್ರಮಗಳನ್ನು ಯುರಿಯಾ ಹಾಗೂ ರಾಸಾಯನಿಕ ಸಿಂಪಡಣೆಗಳ ಅವೈಜ್ಞಾನಿಕ ಸುರಿಯುವುದರ ಬದಲಿಗೆ, ಶೇಷರಹಿತ ಕೃಷಿ ಮತ್ತು ಸಮತೋಲಿತ ಮಣ್ಣಿನ ಪೋಷಣೆಗೆ ಪುರಸ್ಕಾರ ನೀಡುವಂತೆ ಮರುಹೊಂದಾಣಿಕೆ ಮಾಡಬೇಕು.

ಆಹಾರ ಸಮಗ್ರತೆ, ಭಾರತದ ಮುಂದಿನ ಸವಾಲು: ತನ್ನ ನಾಗರಿಕರಿಗೆ ಪ್ರತಿದಿನ ಸಿಗುವ ಆಹಾರವು ವಿಷಮುಕ್ತವಾಗಿದೆ ಎಂದು ಖಾತರಿಪಡಿಸಲು ಸಾಧ್ಯವಾಗದ ರಾಷ್ಟ್ರವು ಉದಯಿಸುತ್ತಿರುವ ಜಾಗತಿಕ ಮಹಾಶಕ್ತಿ ಎಂದು ಹೇಳಿಕೊಳ್ಳಲು ಸಾಧ್ಯವಿಲ್ಲ. ನಮ್ಮ ಜನಸಂಖ್ಯೆಯ ಗಮನಾರ್ಹ ಭಾಗವು ನಿಯಂತ್ರಿಸಬಹುದಾದ ಮತ್ತು ಸೇವನೆ-ಆಧಾರಿತ ಕಾಯಿಲೆಗಳಿಂದ ಬಳಲುತ್ತಿದ್ದರೆ, ಆರ್ಥಿಕ ಬೆಳವಣಿಗೆ, ಜನಸಂಖ್ಯಾ ಲಾಭಾಂಶ ಮತ್ತು ಉತ್ಪಾದಕತೆಯ ಲಾಭಗಳಿಗೆ ಯಾವುದೇ ಮಹತ್ವವಿರುವುದಿಲ್ಲ.

ವೈಯಕ್ತಿಕ ಮಟ್ಟದಲ್ಲಿ ಅಧಿಕಾರಿಗಳು ಬರುತ್ತಾರೆ ಮತ್ತು ಹೋಗುತ್ತಾರೆ, ವರ್ಗಾವಣೆಗಳು ನಡೆಯುತ್ತವೆ ಮತ್ತು ಅಧಿಕಾರಾವಧಿಗಳು ಮುಕ್ತವಾಗಿ ಕೊನೆಗೊಳ್ಳುತ್ತವೆ. ಹಾಗಾಗಿ ಉಳಿಯಬೇಕಾಗಿರುವುದು ಒಂದು ಬಲವಾದ, ದಣಿವರಿಯದ ವ್ಯವಸ್ಥೆಯಾಗಿದೆ. ಇದು ಸಾಮಾನ್ಯ ನಾಗರಿಕನ ತಟ್ಟೆಯಲ್ಲಿರುವ ಆಹಾರವು ಆಕಸ್ಮಿಕವಾಗಿ ಅಲ್ಲ, ಬದಲಿಗೆ ಹುಟ್ಟಿನಿಂದಲೇ ಸುರಕ್ಷಿತವಾಗಿ, ಸ್ವಚ್ಛವಾಗಿ ಮತ್ತು ಪೌಷ್ಟಿಕಯುಕ್ತವಾಗಿ ಇರಬೇಕು ಎಂಬುದನ್ನು ಖಚಿತಪಡಿಸುತ್ತದೆ.

ಹಸಿರು ಕ್ರಾಂತಿಯ ಮೂಲಕ ಇಪ್ಪತ್ತನೇ ಶತಮಾನದಲ್ಲಿ ಭಾರತವು ಆಹಾರ ಸ್ವಾವಲಂಬನೆಯನ್ನು ಸಾಧಿಸಿತು. ಇಪ್ಪತ್ತೊಂದನೇ ಶತಮಾನದ ಸವಾಲು ಆಹಾರ ಸಮಗ್ರತೆಯಾಗಿದೆ. 'ಸ್ವಚ್ಛ ಕ್ರಾಂತಿ'ಗೆ ಇದಕ್ಕಿಂತ ಉತ್ತಮ ಸಮಯ ಇನ್ನೊಂದಿಲ್ಲ.

Disclaimer: ವಿವಿಧ ವಲಯಗಳಿಂದ ಅಭಿಪ್ರಾಯಗಳನ್ನು ಕಲೆಹಾಕಿ ಪ್ರಸ್ತುತಪಡಿಸಲು ದ ಫೆಡರಲ್, ಪ್ರಯತ್ನಿಸುತ್ತದೆ. ಲೇಖನಗಳಲ್ಲಿನ ಮಾಹಿತಿ, ಕಲ್ಪನೆಗಳು ಅಥವಾ ಅಭಿಪ್ರಾಯಗಳು ಸಂಪೂರ್ಣವಾಗಿ ಲೇಖಕರದ್ದಾಗಿದ್ದು, ಅವು ʼದ ಫೆಡರಲ್‌ ಕರ್ನಾಟಕʼದ ದೃಷ್ಟಿಕೋನಗಳನ್ನು ಪ್ರತಿಬಿಂಬಿಸುವುದಿಲ್ಲ. ಮೂಲ ಲೇಖನ 'ದ ಫೆಡರಲ್‌' ಇಂಗ್ಲಿಷ್‌ ಜಾಲತಾಣದಲ್ಲಿ ಪ್ರಕಟವಾಗಿದೆ.