2,000 ರೂ.ಗಳಿಗೂ ಅಧಿಕ ಯುಪಿಐ ಪಾವತಿಗೆ ಶುಲ್ಕ: ತಡೆ ನೀಡಲು ಸುಪ್ರೀಂ ಕೋರ್ಟ್ ನಿರಾಕರಣೆ

2,000 ರೂ.ಗಳಿಗೂ ಅಧಿಕ ಮೊತ್ತದ ಕೆಲವು ಯುಪಿಐ ವ್ಯಾಪಾರಿ ಪಾವತಿಗಳಿಗೆ ಮರ್ಚೆಂಟ್ ಡಿಸ್ಕೌಂಟ್ ರೇಟ್‌ (ಎಂಡಿಆರ್) ವಿಧಿಸುವ ಕೇಂದ್ರ ಸರ್ಕಾರದ ನಿರ್ಧಾರಕ್ಕೆ ಮಧ್ಯಂತರ ತಡೆ ನೀಡಲು ಸುಪ್ರೀಂ ಕೋರ್ಟ್ ಸೋಮವಾರ ನಿರಾಕರಿಸಿದೆ. ಆದರೆ, ಹೊಸ ಶುಲ್ಕ ವ್ಯವಸ್ಥೆಯ ಕಾನೂನು ಆಧಾರ ಮತ್ತು ಅದನ್ನು ಜಾರಿಗೆ ತರುವ ಹಿನ್ನೆಲೆಯನ್ನು ವಿವರಿಸಿ ಅಫಿಡವಿಟ್ ಸಲ್ಲಿಸುವಂತೆ ಕೇಂದ್ರ ಸರ್ಕಾರಕ್ಕೆ ನ್ಯಾಯಾಲಯ ಸೂಚಿಸಿದೆ.

ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ನೇತೃತ್ವದ ನ್ಯಾಯಮೂರ್ತಿಗಳಾದ ಜಾಯ್ಮಲ್ಯ ಬಾಗ್ಚಿ ಮತ್ತು ವಿ. ಮೋಹನಾ ಅವರ ಪೀಠವು ವಕೀಲ ಅಂಜನ್ ದತ್ತಾ ಸಲ್ಲಿಸಿರುವ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ ವಿಚಾರಣೆ ನಡೆಸಿತು. 2,000 ರೂ.ಗಳಿಗೂ ಅಧಿಕ ಮೊತ್ತದ ನಿರ್ದಿಷ್ಟ ವ್ಯಕ್ತಿಯಿಂದ ವ್ಯಾಪಾರಿಗೆ ಮಾಡುವ ಯುಪಿಐ ಪಾವತಿಗಳಿಗೆ ಅಕ್ಟೋಬರ್ 15ರಿಂದ ಹೊಸ ಎಂಡಿಆರ್ ವ್ಯವಸ್ಥೆ ಜಾರಿಗೆ ಬರಲಿದೆ.

ಹೊಸ ವ್ಯವಸ್ಥೆಯಡಿ ಸಾಮಾನ್ಯ ವ್ಯಕ್ತಿಯಿಂದ ವ್ಯಾಪಾರಿಗೆ ಮಾಡುವ 2,000ರೂ.ಗಳಿಗೂ ಅಧಿಕ ಯುಪಿಐ ವಹಿವಾಟುಗಳಿಗೆ ಶೇ.0.4ರಷ್ಟು ಎಂಡಿಆರ್ ಅನ್ವಯವಾಗಲಿದೆ. 75,000 ರೂ. ಅಥವಾ ಅದಕ್ಕಿಂತ ಹೆಚ್ಚಿನ ವಹಿವಾಟಿಗೆ ಈ ಶುಲ್ಕ ಗರಿಷ್ಠ 300ರೂ.ಗಳಿಗೆ ಸೀಮಿತವಾಗಿರುತ್ತದೆ. ರೈಲ್ವೆ, ದೂರಸಂಪರ್ಕ, ವಿಮೆ, ಇಂಧನ ಮತ್ತು ಕೃಷಿ ಒಳಹರಿವುಗಳಂತಹ ಅಗತ್ಯ ಹಾಗೂ ಕಡಿಮೆ ಲಾಭಾಂಶದ ಕ್ಷೇತ್ರಗಳಿಗೆ 2,000 ರೂ.ಗಳಿಗೂ ಅಧಿಕ ವಹಿವಾಟಿನ ಮೇಲೆ ಪ್ರತಿ ವಹಿವಾಟಿಗೆ 5 ರೂ.ರಷ್ಟು ನಿಗದಿತ ಶುಲ್ಕ ಇರಲಿದೆ. ಬಂಡವಾಳ ಮಾರುಕಟ್ಟೆ ಸಂಬಂಧಿತ ವಹಿವಾಟುಗಳಿಗೆ ಶೇ.0.02ರಷ್ಟು ಎಂಡಿಆರ್, ಗರಿಷ್ಠ 300 ರೂ.ರವರೆಗೆ ಅನ್ವಯವಾಗಲಿದೆ.

ಎಂಡಿಆರ್ ತೆರಿಗೆಯೇ? ಶುಲ್ಕವೇ? ಸುಪ್ರೀಂ ಕೋರ್ಟ್ ಪ್ರಶ್ನೆ

ವಿಚಾರಣೆ ವೇಳೆ ಹೊಸ ಶುಲ್ಕ ವಿಧಿಸುವುದಕ್ಕೆ ಕಾನೂನು ಆಧಾರವೇನು ಎಂದು ನ್ಯಾಯಪೀಠ ಪ್ರಶ್ನಿಸಿದೆ. ಎಂಡಿಆರ್ ತೆರಿಗೆಯೇ ಅಥವಾ ಶುಲ್ಕವೇ ಎಂಬುದನ್ನು ಸ್ಪಷ್ಟಪಡಿಸುವಂತೆ ನ್ಯಾಯಾಲಯ ಪ್ರಶ್ನಿಸಿದ್ದು, ಎರಡೂ ಅಲ್ಲದಿದ್ದರೆ ಕಾರ್ಯಾಂಗಕ್ಕೆ ಶುಲ್ಕ ವಿಧಿಸುವ ಅಧಿಕಾರ ಯಾವ ಆಧಾರದ ಮೇಲೆ ಬಂದಿದೆ ಎಂಬುದನ್ನೂ ಕೇಳಿದೆ. ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 269ಎಸ್‌ಯು ಅಡಿಯಲ್ಲಿರುವ ಎಲೆಕ್ಟ್ರಾನಿಕ್ ಪಾವತಿ ಸೌಲಭ್ಯಕ್ಕೆ ಸಂಬಂಧಿಸಿದ ನಿಯಮವನ್ನೂ ನ್ಯಾಯಾಲಯ ಉಲ್ಲೇಖಿಸಿದೆ.

ಕೇಂದ್ರ ಸರ್ಕಾರದ ಪರ ಹೆಚ್ಚುವರಿ ಸಾಲಿಸಿಟರ್ ಜನರಲ್ ಎನ್. ವೆಂಕಟರಮಣ್, ಎಂಡಿಆರ್ ತೆರಿಗೆಯೂ ಅಲ್ಲ, ಸರ್ಕಾರ ವಿಧಿಸುವ ಶುಲ್ಕವೂ ಅಲ್ಲ ಎಂದು ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ. ಈ ಹಣದ ಯಾವುದೇ ಭಾಗ ಸರ್ಕಾರಕ್ಕೆ ಹೋಗುವುದಿಲ್ಲ. ಬದಲಾಗಿ, ಡಿಜಿಟಲ್ ಪಾವತಿಗಳನ್ನು ನಿರ್ವಹಿಸುವ ಬ್ಯಾಂಕ್‌ಗಳು ಹಾಗೂ ಇತರ ಪಾವತಿ ವ್ಯವಸ್ಥೆಯ ಭಾಗಿದಾರರಿಗೆ ಉಂಟಾಗುವ ವೆಚ್ಚವನ್ನು ಸರಿದೂಗಿಸುವ ವ್ಯವಸ್ಥೆಯ ಶುಲ್ಕವಾಗಿದೆ ಎಂದು ಕೇಂದ್ರದ ಪರ ವಾದಿಸಲಾಗಿದೆ.

ಶೇ.96ರಷ್ಟು ವ್ಯಾಪಾರಿ ವಹಿವಾಟಿಗೆ ಪರಿಣಾಮ ಇಲ್ಲ

ಹೊಸ ವ್ಯವಸ್ಥೆಯಿಂದ ಸುಮಾರು ಶೇ.96ರಷ್ಟು ವ್ಯಾಪಾರಿ ವಹಿವಾಟುಗಳಿಗೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ. ವ್ಯಕ್ತಿಯಿಂದ ವ್ಯಕ್ತಿಗೆ ಮಾಡುವ ಯುಪಿಐ ಪಾವತಿಗಳು ಯಾವುದೇ ಮೊತ್ತವಾಗಿದ್ದರೂ ಉಚಿತವಾಗಿಯೇ ಮುಂದುವರಿಯಲಿವೆ. 2,000 ರೂ.ವರೆಗಿನ ವ್ಯಾಪಾರಿ ಪಾವತಿಗಳಿಗೂ ಎಂಡಿಆರ್ ಇರುವುದಿಲ್ಲ. ತಿಂಗಳಿಗೆ ಯುಪಿಐ ಕ್ಯೂಆರ್ ಕೋಡ್ ಮೂಲಕ 1 ಲಕ್ಷ ರೂ.ವರೆಗೆ ಸ್ವೀಕರಿಸುವ ಸಣ್ಣ ವ್ಯಾಪಾರಿಗಳು ಶೂನ್ಯ-ಎಂಡಿಆರ್ ವ್ಯವಸ್ಥೆಯ ವ್ಯಾಪ್ತಿಯಲ್ಲೇ ಮುಂದುವರಿಯಲಿದ್ದಾರೆ.

ಆದರೆ, ಅರ್ಜಿದಾರರು ಹೊಸ ಶುಲ್ಕಕ್ಕೆ ಕಾನೂನು ಆಧಾರ, 2,000 ರೂ.ರ ಮಿತಿ ಹಾಗೂ ಯುಪಿಐ ಮತ್ತು ರೂಪೇ ಡೆಬಿಟ್ ಕಾರ್ಡ್ ಪಾವತಿಗಳಿಗೆ ನೀಡಲಾಗಿರುವ ವಿಭಿನ್ನ ಪರಿಗಣನೆಯನ್ನು ಪ್ರಶ್ನಿಸಿದ್ದಾರೆ. ಶುಲ್ಕದ ಪರಿಣಾಮವನ್ನು ವ್ಯಾಪಾರಿಗಳು ಗ್ರಾಹಕರಿಗೆ ವರ್ಗಾಯಿಸುವ ಸಾಧ್ಯತೆಯ ಬಗ್ಗೆಯೂ ಅರ್ಜಿಯಲ್ಲಿ ಆಕ್ಷೇಪ ವ್ಯಕ್ತಪಡಿಸಲಾಗಿದೆ.

ಹೊಸ ವ್ಯವಸ್ಥೆ ಜಾರಿಗೆ ಬಂದರೆ ವ್ಯಾಪಾರಿಗಳು ಯುಪಿಐ ಸ್ವೀಕರಿಸುವುದರಿಂದ ಹಿಂದೆ ಸರಿಯಬಹುದು ಅಥವಾ ನಗದು ವಹಿವಾಟು ಹೆಚ್ಚಾಗಬಹುದು ಎಂಬ ವಾದದೊಂದಿಗೆ ಅರ್ಜಿದಾರರು ಮಧ್ಯಂತರ ತಡೆ ಕೋರಿದ್ದರು. ಆದರೆ ಸುಪ್ರೀಂ ಕೋರ್ಟ್ ತಡೆ ನೀಡದೆ, ಕೇಂದ್ರ ಸರ್ಕಾರ, ಭಾರತೀಯ ರಿಸರ್ವ್ ಬ್ಯಾಂಕ್‌ (ಆರ್‌ಬಿಐ), ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮ(ಎನ್‌ಪಿಸಿಐ) ಸೇರಿದಂತೆ ಸಂಬಂಧಿಸಿದ ಪ್ರತಿವಾದಿಗಳಿಗೆ ನೋಟಿಸ್ ನೀಡಿದೆ.