ಟ್ಯಾಂಕರ್ ಪಲ್ಟಿ: ತಿರುಪತಿಯಲ್ಲಿ ಲಡ್ಡು ಪ್ರಸಾದಕ್ಕೆ ತುಪ್ಪದ ಕೊರತೆ ಇದೆಯೇ? ಟಿಟಿಡಿ ಸ್ಪಷ್ಟನೆ ಏನು?
ಮಹಾರಾಷ್ಟ್ರದ ಇಂದಾಪುರ ಡೈರಿಯಿಂದ ತಿರುಮಲಕ್ಕೆ ತುಪ್ಪ ಸರಬರಾಜು ಮಾಡುತ್ತಿದ್ದ ಟ್ಯಾಂಕರ್ವೊಂದು ಕಡಪ ಜಿಲ್ಲೆಯ ಕೊಂಡಾಪುರಂ ಬಳಿ ಅಪಘಾತಕ್ಕೀಡಾಗಿ ಪಲ್ಟಿಯಾದ ಘಟನೆ ಇತ್ತೀಚೆಗೆ ವರದಿಯಾದ ಬಳಿಕ ಈ ರೀತಿಯ ಸುದ್ದಿ ಹರಡಿತ್ತು.
ತಿರುಮಲ ಶ್ರೀವಾರಿ ಲಡ್ಡು ಪ್ರಸಾದ ತಯಾರಿಸಲು ತುಪ್ಪದ ಕೊರತೆ ಉಂಟಾಗುವ ಸಾಧ್ಯತೆ ಇದೆ ಎಂಬ ಆತಂಕವನ್ನು ತಿರುಮಲ ತಿರುಪತಿ ದೇವಸ್ಥಾನಂ (ಟಿಟಿಡಿ) ತಳ್ಳಿಹಾಕಿದ್ದು, ಪ್ರಸಾದ ತಯಾರಿಕೆಗೆ ಅಗತ್ಯವಾದ ಹಸುವಿನ ತುಪ್ಪ ಸಾಕಷ್ಟು ಪ್ರಮಾಣದಲ್ಲಿ ಲಭ್ಯವಿದೆ ಎಂದು ಸ್ಪಷ್ಟಪಡಿಸಿದೆ.
ಮಹಾರಾಷ್ಟ್ರದ ಇಂದಾಪುರ ಡೈರಿಯಿಂದ ತಿರುಮಲಕ್ಕೆ ತುಪ್ಪ ಸರಬರಾಜು ಮಾಡುತ್ತಿದ್ದ ಟ್ಯಾಂಕರ್ವೊಂದು ಕಡಪ ಜಿಲ್ಲೆಯ ಕೊಂಡಾಪುರಂ ಬಳಿ ಅಪಘಾತಕ್ಕೀಡಾಗಿ ಪಲ್ಟಿಯಾದ ಘಟನೆ ಇತ್ತೀಚೆಗೆ ವರದಿಯಾಗಿತ್ತು. ಈ ಘಟನೆಯನ್ನೇ ಮುಂದಿಟ್ಟುಕೊಂಡು, ಪ್ರಸ್ತುತ ತಿರುಮಲದಲ್ಲಿ ಕೇವಲ ಎರಡು ದಿನಗಳಿಗೆ ಮಾತ್ರ ಸಾಕಾಗುವಷ್ಟು ತುಪ್ಪದ ದಾಸ್ತಾನು ಇದೆ ಮತ್ತು ಮುಂದಿನ ದಿನಗಳಲ್ಲಿ ಲಡ್ಡು ಪ್ರಸಾದ ತಯಾರಿಕೆಗೆ ಬಿಕ್ಕಟ್ಟು ಎದುರಾಗಲಿದೆ ಎಂದು ಟಿಟಿಡಿ ಮಾಜಿ ಅಧ್ಯಕ್ಷ ಹಾಗೂ ವೈಎಸ್ಆರ್ಸಿಪಿ ಮುಖಂಡ ಭೂಮನ ಕರುಣಾಕರ್ ರೆಡ್ಡಿ ಆತಂಕ ವ್ಯಕ್ತಪಡಿಸಿದ್ದರು. ಅಲ್ಲದೆ, ಇಂದಾಪುರ ಡೈರಿಯೊಂದಿಗೆ ಪ್ರತಿ ಕೆ.ಜಿ.ಗೆ 716 ರೂ. ನಂತೆ ದುಬಾರಿ ಮೊತ್ತಕ್ಕೆ ತುಪ್ಪ ಖರೀದಿಸುವ ಒಪ್ಪಂದ ಮಾಡಿಕೊಂಡಿದ್ದರ ಬಗ್ಗೆಯೂ ಅವರು ಆಕ್ಷೇಪ ವ್ಯಕ್ತಪಡಿಸಿ, ಇದರಲ್ಲಿ ಅಕ್ರಮ ನಡೆದಿದೆ ಎಂದು ಆರೋಪಿಸಿದ್ದರು.
ಕಡಪಾ ಬಳಿ ಟ್ಯಾಂಕರ್ ಪಲ್ಟಿಯಾಗಿರುವುದು.
ಟಿಟಿಡಿಯಿಂದ ಸ್ಪಷ್ಟನೆ ಹಾಗೂ ಪರ್ಯಾಯ ವ್ಯವಸ್ಥೆ
ಭೂಮನ ಕರುಣಾಕರ್ ರೆಡ್ಡಿ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಟಿಟಿಡಿ, ತಿರುಮಲದಲ್ಲಿ ತುಪ್ಪದ ಕೊರತೆಯಿಲ್ಲ ಎಂದು ಸ್ಪಷ್ಟಪಡಿಸಿದೆ. ಈ ಕುರಿತು ಪ್ರಕಟಣೆ ನೀಡಿರುವ ಟಿಟಿಡಿ ಮುಖ್ಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ, ಪ್ರಸಾದ ತಯಾರಿಕೆಗೆ ಅಗತ್ಯವಿರುವಷ್ಟು ಹಸುವಿನ ತುಪ್ಪದ ದಾಸ್ತಾನು ಲಭ್ಯವಿದೆ ಎಂದು ತಿಳಿಸಿದ್ದಾರೆ. "ತುಪ್ಪ ಪೂರೈಕೆಗಾಗಿ ನಾವು ಮೂರು ಹಂತದ ಖರೀದಿ ವ್ಯವಸ್ಥೆಯನ್ನು ಅಳವಡಿಸಿಕೊಂಡಿದ್ದು, ಕೇವಲ ಒಂದು ಕಂಪನಿಯನ್ನು ನೆಚ್ಚಿಕೊಂಡಿಲ್ಲ. ಬದಲಾಗಿ, ಮೂರು ವಿಭಿನ್ನ ಕಂಪನಿಗಳಿಂದ ತುಪ್ಪ ಸರಬರಾಜಾಗುತ್ತಿದೆ. ಒಂದು ಟ್ಯಾಂಕರ್ ಅಪಘಾತಕ್ಕೀಡಾಗಿದ್ದರೂ, ಉಳಿದೆರಡು ಕಂಪನಿಗಳಿಂದ ನಿರಂತರವಾಗಿ ತುಪ್ಪ ಪೂರೈಕೆಯಾಗುತ್ತಿರುವುದರಿಂದ ಪ್ರಸಾದ ತಯಾರಿಕೆಗೆ ಯಾವುದೇ ಅಡ್ಡಿಯಾಗಿಲ್ಲ" ಎಂದು ಅವರು ವಿವರಿಸಿದ್ದಾರೆ.
ಲಡ್ಡುಗಳ ಬಫರ್ ಸ್ಟಾಕ್
ತಿರುಮಲದಲ್ಲಿ ಪ್ರತಿದಿನ ಸರಾಸರಿ 3.50 ಲಕ್ಷದಿಂದ 4 ಲಕ್ಷ ಲಡ್ಡುಗಳನ್ನು ತಯಾರಿಸಲಾಗುತ್ತಿದೆ. ಪ್ರಸ್ತುತ ಸುಮಾರು ಏಳು ಲಕ್ಷ ಲಡ್ಡುಗಳ ಬಫರ್ ಸ್ಟಾಕ್ (ಮುನ್ನೆಚ್ಚರಿಕೆ ದಾಸ್ತಾನು) ಸಿದ್ಧವಾಗಿದೆ. ಹಾಗಾಗಿ ಲಡ್ಡು ಪ್ರಸಾದ ವಿತರಣೆಯಲ್ಲಿ ಯಾವುದೇ ಅಡಚಣೆ ಇಲ್ಲ. ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ತುಪ್ಪದ ಕೊರತೆಯ ವದಂತಿಗಳು ಸತ್ಯಕ್ಕೆ ದೂರವಾದವು ಎಂದು ಟಿಟಿಡಿ ಆಡಳಿತ ಮಂಡಳಿ ಸ್ಪಷ್ಟಪಡಿಸಿದೆ. ಭಕ್ತರ ದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು ಲಡ್ಡು ತಯಾರಿಕಾ ಘಟಕದ (ಪೋಟು) ಯಂತ್ರೋಪಕರಣಗಳ ನಿರ್ವಹಣೆಯನ್ನು ಸಹ ನಿಯಮಿತವಾಗಿ ಮಾಡಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ತಿರುಮಲದಲ್ಲಿ ತುಪ್ಪದ ಕೊರತೆ ಇದೆಯೇ?
ಶ್ರೀವಾರಿ ದರ್ಶನಕ್ಕಾಗಿ ತಿರುಮಲಕ್ಕೆ ಬರುವ ಯಾತ್ರಾರ್ಥಿಗಳ ಸಂಖ್ಯೆ ದಿನದಿಂದ ದಿನಕ್ಕೆ ಗಮನಾರ್ಹವಾಗಿ ಹೆಚ್ಚುತ್ತಿದೆ. ಇದರೊಂದಿಗೆ ತಿರುಮಲದಲ್ಲಿ ಲಡ್ಡು ಪ್ರಸಾದ ತಯಾರಿಸುವ ಸಾಮರ್ಥ್ಯವೂ ವೃದ್ಧಿಯಾಗಿದೆ. ಪ್ರಸ್ತುತ, ದಿನಕ್ಕೆ ಸರಾಸರಿ 3.50 ಲಕ್ಷದಿಂದ 4 ಲಕ್ಷದವರೆಗೆ ಲಡ್ಡುಗಳನ್ನು ತಯಾರಿಸಲಾಗುತ್ತಿದೆ. ಅಲ್ಲದೆ 4 ಲಕ್ಷ ಲಡ್ಡುಗಳ ಬಫರ್ ಸ್ಟಾಕ್ (ಕಾಯ್ದಿರಿಸಿದ ದಾಸ್ತಾನು) ಇರಿಸಲಾಗಿದೆ. ತಿರುಮಲದಲ್ಲಿ ತಯಾರಾಗುವ ಶ್ರೀವಾರಿ ಲಡ್ಡು ಪ್ರಸಾದಗಳು ತಿರುಮಲದಲ್ಲಿ ಮಾತ್ರವಲ್ಲದೆ, ದೇಶದ ವಿವಿಧೆಡೆ ಇರುವ ಟಿಟಿಡಿ ಮಾಹಿತಿ ಕೇಂದ್ರಗಳು ಮತ್ತು ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಾಲಯಗಳಲ್ಲಿಯೂ ಲಭ್ಯವಿರುತ್ತವೆ. ಪ್ರತಿ ಮಂಗಳವಾರ ಸಾವಿರಾರು ಲಡ್ಡುಗಳನ್ನು ಹೈದರಾಬಾದ್, ದೆಹಲಿ, ಚೆನ್ನೈ ಮತ್ತು ಬೆಂಗಳೂರಿನಲ್ಲಿರುವ ಟಿಟಿಡಿ ಮಾಹಿತಿ ಕೇಂದ್ರಗಳಿಗೆ ಕಳುಹಿಸಲಾಗುತ್ತದೆ. ಪ್ರತಿದಿನ ಯಾತ್ರಿಕರು ಕನಿಷ್ಠ ಮೂರೂವರೆ ಲಕ್ಷ ಲಡ್ಡುಗಳನ್ನು ಖರೀದಿಸುತ್ತಾರೆ.
ತಿರುಮಲದಲ್ಲಿ ಶ್ರೀವಾರಿ ಲಡ್ಡು ಪ್ರಸಾದವನ್ನು ತಯಾರಿಸಲು ಬಳಸಬೇಕಾದ ಪದಾರ್ಥಗಳ (ದಿಟ್ಟಂ) ಪ್ರಮಾಣವನ್ನು ಟಿಟಿಡಿಯು ಮೊದಲು 1950 ರಲ್ಲಿ ಅಂತಿಮಗೊಳಿಸಿತ್ತು. ಯಾತ್ರಿಕರ ಸಂಖ್ಯೆಯಲ್ಲಿನ ಹೆಚ್ಚಳವನ್ನು ಗಮನದಲ್ಲಿಟ್ಟುಕೊಂಡು ಈ 'ದಿಟ್ಟಂ' ಅನ್ನು 2001 ರಲ್ಲಿ ಪರಿಷ್ಕರಿಸಲಾಯಿತು.
ದಿಟ್ಟ ಎಂದರೇನು?
ತಿರುಮಲದಲ್ಲಿ 5,100 ಲಡ್ಡುಗಳನ್ನು ತಯಾರಿಸಲು ಒಂದು ನಿರ್ದಿಷ್ಟ ಅಳತೆಯಿದೆ. ಇದಕ್ಕಾಗಿ ಸುಮಾರು 830 ಕೆ.ಜಿ ಕಚ್ಚಾ ವಸ್ತುಗಳನ್ನು ಬಳಸಲಾಗುತ್ತದೆ . ಇದರಲ್ಲಿ 165 ಕೆ.ಜಿ ಹಸುವಿನ ತುಪ್ಪ, 180 ಕೆ.ಜಿ ಕಡಲೆ ಹಿಟ್ಟು, 400 ಕೆ.ಜಿ ಸಕ್ಕರೆ , 30 ಕೆ.ಜಿ ಗೋಡಂಬಿ, 16 ಕೆ.ಜಿ ಒಣದ್ರಾಕ್ಷಿ, 8 ಕೆ.ಜಿ ಕಲ್ಕಂಡ ಮತ್ತು 4 ಕೆ.ಜಿ ಏಲಕ್ಕಿ ಬಳಸಲಾಗುತ್ತದೆ. ಒಟ್ಟಾರೆಯಾಗಿ ದಿನಕ್ಕೆ ಸುಮಾರು 15 ಮೆಟ್ರಿಕ್ ಟನ್ ತುಪ್ಪವನ್ನು ಬಳಸಲಾಗುತ್ತದೆ. ತಿರುಮಲದಲ್ಲಿ ಲಡ್ಡುಗಳನ್ನು ತಯಾರಿಸಲು ಅನುಸರಿಸುವ ಸಾಮಾನ್ಯ ವಿಧಾನ ಇದಾಗಿದೆ.
ಟಿಟಿಡಿ ಅಧ್ಯಕ್ಷ ಬಿ.ಆರ್. ನಾಯ್ಡು ನೇತೃತ್ವದ ಆಡಳಿತ ಮಂಡಳಿಯು ಪ್ರಸ್ತುತ ಮಹಾರಾಷ್ಟ್ರದ ಇಂದಾಪುರ ಡೈರಿಗೆ ಮತ್ತು ಗುಣಮಟ್ಟದ ತುಪ್ಪ ಪೂರೈಕೆಗಾಗಿ ಮತ್ತೊಂದು ಕಂಪನಿಗೆ ಒಪ್ಪಂದವನ್ನು ನೀಡಿದೆ. "ಶ್ರೀವಾರಿ ಅನ್ನ ಪ್ರಸಾದ ಮಾತ್ರವಲ್ಲದೆ ಲಡ್ಡು ಪ್ರಸಾದ ತಯಾರಿಕೆಯಲ್ಲಿಯೂ ಉತ್ತಮ ಗುಣಮಟ್ಟದ ತುಪ್ಪವನ್ನು ಬಳಸಲು ನಾವು ಆದ್ಯತೆ ನೀಡುತ್ತಿದ್ದೇವೆ. ಇದರಲ್ಲಿ ರಾಜಿ ಮಾಡಿಕೊಳ್ಳುವ ಪ್ರಶ್ನೆಯೇ ಇಲ್ಲ" ಎಂದು ಟಿಟಿಡಿ ಅಧ್ಯಕ್ಷ ಬಿ.ಆರ್. ನಾಯ್ಡು ಹಲವಾರು ಬಾರಿ ಸ್ಪಷ್ಟಪಡಿಸಿದ್ದಾರೆ.
ಶ್ರೀವಾರಿ ಲಡ್ಡು ಪ್ರಸಾದ ತಯಾರಿಸಲು ಅಗತ್ಯವಿರುವ ಹಸುವಿನ ತುಪ್ಪದ ಪೂರೈಕೆಯನ್ನು ಮೂರು ಹಂತದ ಖರೀದಿ ವ್ಯವಸ್ಥೆಯ ಮೂಲಕ ಮಾಡಲಾಗುತ್ತಿದೆ. ಒಂದೇ ಕಂಪನಿಯನ್ನು ಅವಲಂಬಿಸುವ ಬದಲು, ಮೂರು ವಿಭಿನ್ನ ಕಂಪನಿಗಳು ತುಪ್ಪವನ್ನು ಪೂರೈಸುತ್ತಿವೆ. ಅನಿರೀಕ್ಷಿತ ಸಂದರ್ಭಗಳು ಎದುರಾದರೂ ಪೂರೈಕೆಯಲ್ಲಿ ಯಾವುದೇ ಅಡಚಣೆ ಉಂಟಾಗದಂತೆ ಟಿಟಿಡಿ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡಿದೆ" ಎಂದು ಅವರು ಸ್ಪಷ್ಟಪಡಿಸಿದರು.
ವಿತರಣೆಯಲ್ಲಿ ಅಡಚಣೆ ಇಲ್ಲ
ಇಂದಾಪುರ ಡೈರಿಯಿಂದ ತಿರುಮಲಕ್ಕೆ ಬರುತ್ತಿದ್ದ ತುಪ್ಪದ ಟ್ಯಾಂಕರ್ ಇತ್ತೀಚೆಗೆ ಕಡಪ ಜಿಲ್ಲೆಯ ಕೊಂಡಾಪುರ ಬಳಿ ಅಪಘಾತಕ್ಕೀಡಾಯಿತು. ಕೇವಲ ಒಂದು ಕಂಪನಿಗೆ ಸೇರಿದ ಟ್ಯಾಂಕರ್ ಅಪಘಾತಕ್ಕೀಡಾಗಿದ್ದು, ಇದರಿಂದ ತುಪ್ಪದ ಪೂರೈಕೆಯಲ್ಲಿ ಯಾವುದೇ ವ್ಯತ್ಯಯವಾಗಿಲ್ಲ ಎಂದು ಟಿಟಿಡಿ ತಿಳಿಸಿದೆ. ಉಳಿದ ಎರಡು ಕಂಪನಿಗಳಿಂದ ತುಪ್ಪದ ಪೂರೈಕೆ ಎಂದಿನಂತೆ ಮುಂದುವರೆದಿದೆ ಎಂದು ವಿವರಿಸಿದೆ. ತಿರುಮಲದಲ್ಲಿ ಪ್ರಸ್ತುತ ಸುಮಾರು 7 ಲಕ್ಷ ಲಡ್ಡು ಪ್ರಸಾದಗಳು ಸಿದ್ಧವಾಗಿವೆ. ಆದ್ದರಿಂದ, ಲಡ್ಡು ಪ್ರಸಾದಗಳ ತಯಾರಿಕೆ ಮತ್ತು ವಿತರಣೆ ಯಾವುದೇ ಅಡಚಣೆಯಿಲ್ಲದೆ ಸಾಗುತ್ತಿದೆ.
"ಬೇಸಿಗೆಯಲ್ಲಿ ತಿರುಮಲದಲ್ಲಿ ಭಕ್ತರ ದಟ್ಟಣೆ ಹೆಚ್ಚಾಗುವ ಸಾಧ್ಯತೆಯನ್ನು ಗಮನದಲ್ಲಿಟ್ಟುಕೊಂಡು ನಾವು ಮುಂಚಿತವಾಗಿ ಎಲ್ಲಾ ವ್ಯವಸ್ಥೆಗಳನ್ನು ಮಾಡಿಕೊಂಡಿದ್ದೇವೆ. ಲಡ್ಡು ತಯಾರಿಸುವ ಯಂತ್ರೋಪಕರಣಗಳು ಮತ್ತು ಕನ್ವೇಯರ್ ಬೆಲ್ಟ್ಗಳನ್ನು ಪೋಟು ವಿಭಾಗದಲ್ಲಿ ನಿಯಮಿತವಾಗಿ ನಿರ್ವಹಣೆ ಮಾಡಲಾಗುತ್ತಿದೆ" ಎಂದು ಅವರು ಹೇಳಿದರು. ಟಿಟಿಡಿಯಲ್ಲಿ ತುಪ್ಪದ ದಾಸ್ತಾನು ಇಲ್ಲ ಎಂಬ ವದಂತಿಗಳಲ್ಲಿ ಯಾವುದೇ ಸತ್ಯವಿಲ್ಲ ಮತ್ತು ಶ್ರೀವಾರಿ ಕೈಂಕರ್ಯಗಳು ಹಾಗೂ ಲಡ್ಡು ಪ್ರಸಾದಗಳ ತಯಾರಿಕೆಯಲ್ಲಿ ಯಾವುದೇ ಅಡಚಣೆ ಉಂಟಾಗಿಲ್ಲ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
