Tamil Nadu Election Result 2026 |ಬಹುಮತದ ಹೊಸ್ತಿಲಲ್ಲಿ ಎಡವಿದ 'ಟಿವಿಕೆ'! ವಿಜಯ್ ಕೈತಪ್ಪಿದ ಆ 10 ಕ್ಷೇತ್ರಗಳು ಯಾವುವು?
ತಮಿಳುನಾಡು ಚುನಾವಣೆಯಲ್ಲಿ 108 ಸ್ಥಾನ ಗೆದ್ದ ದಳಪತಿ ವಿಜಯ್ ಅವರ ಟಿವಿಕೆ ಪಕ್ಷಕ್ಕೆ ಬಹುಮತಕ್ಕೆ ಬೇಕಿರೋದು ಕೇವಲ 10 ಸ್ಥಾನಗಳು. ಅತ್ಯಲ್ಪ ಮತಗಳ ಅಂತರದಿಂದ ವಿಜಯ್ ಕೈತಪ್ಪಿದ ಆ 10 ಪ್ರಮುಖ ಕ್ಷೇತ್ರಗಳ ಕಂಪ್ಲೀಟ್ ಲಿಸ್ಟ್ ಇಲ್ಲಿದೆ.
ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ನಟ ವಿಜಯ್ ನೇತೃತ್ವದ 'ತಮಿಳಗ ವೆಟ್ರಿ ಕಳಗಂ' (TVK) ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದ್ದರೂ, ಬಹುಮತದ ಮ್ಯಾಜಿಕ್ ಸಂಖ್ಯೆ 118 ತಲುಪುವಲ್ಲಿ ಕೇವಲ 10 ಸ್ಥಾನಗಳ ಅಂತರದಿಂದ ಹಿಂದೆ ಬಿದ್ದಿದೆ. 108 ಸ್ಥಾನಗಳನ್ನು ಗೆದ್ದಿರುವ ವಿಜಯ್, ಅತ್ಯಲ್ಪ ಮತಗಳ ಅಂತರದಿಂದ ಈ 10 ಕ್ಷೇತ್ರಗಳನ್ನು ಕಳೆದುಕೊಳ್ಳದಿದ್ದರೆ ಇಂದು ಸ್ವಂತ ಬಲದ ಮೇಲೆ ಸರ್ಕಾರ ರಚಿಸಬಹುದಿತ್ತು. ಅತ್ಯಂತ ಕಡಿಮೆ ಮತಗಳ ಅಂತರದಿಂದ ಟಿವಿಕೆ ಸೋತ ಆ 10 ಪ್ರಮುಖ ಕ್ಷೇತ್ರಗಳ ವಿವರ ಇಲ್ಲಿದೆ:
1. ತಿರುಕ್ಕೊಯಿಲೂರ್: ಕೇವಲ 285 ಮತಗಳ ಅಂತರ!
ಇಡೀ ಚುನಾವಣೆಯಲ್ಲಿ ಅತ್ಯಂತ ಕಡಿಮೆ ಅಂತರದ ಸೋಲು ಇದು. ಇಲ್ಲಿ ಟಿವಿಕೆಯ ವಿಜಯ್ ಆರ್. ಭರಣಿಬಾಲಾಜಿ ಅವರು ಎಐಎಡಿಎಂಕೆಯ ಎಸ್. ಪಳನಿಸ್ವಾಮಿ ವಿರುದ್ಧ ಕೇವಲ 285 ಮತಗಳಿಂದ ಪರಾಭವಗೊಂಡರು.
2. ಪಳನಿ: 693 ಮತಗಳ ವ್ಯತ್ಯಾಸ
ಪಳನಿಯಲ್ಲಿ ಟಿವಿಕೆಯ ಡಾ. ಎಂ. ಪ್ರವೀಣ್ ಕುಮಾರ್ ಅವರು ಎಐಎಡಿಎಂಕೆಯ ರವಿಮನೋಹರನ್ ವಿರುದ್ಧ ಕೇವಲ 693 ಮತಗಳ ಅಂತರದಿಂದ ಸೋತರು. ಸಾಂಪ್ರದಾಯಿಕ ಭದ್ರಕೋಟೆಯಲ್ಲೂ ಟಿವಿಕೆ ಪ್ರಬಲ ಪೈಪೋಟಿ ನೀಡಿದ್ದು ಇಲ್ಲಿ ಸಾಬೀತಾಯಿತು.
3. ಉದಕಮಂಡಲಂ (ಊಟಿ): 976 ಮತಗಳು
ನೀಲಗಿರಿಯ ಈ ಕ್ಷೇತ್ರದಲ್ಲಿ ಟಿವಿಕೆ ಅಭ್ಯರ್ಥಿ ಆರ್. ಇಬ್ರಾಹಿಂ ಅವರು ಬಿಜೆಪಿಯ ಭೋಜರಾಜನ್ ವಿರುದ್ಧ ಕೇವಲ 976 ಮತಗಳಿಂದ ಸೋಲೊಪ್ಪಿಕೊಂಡರು. ಅಂಚೆ ಮತಗಳ ಎಣಿಕೆ ಇಲ್ಲಿ ನಿರ್ಣಾಯಕವಾಯಿತು.
4. ಪಾಪನಾಶಂ: 1,065 ಮತಗಳು
ಟಿವಿಕೆಯ ಅಜರುದ್ದೀನ್ ಉಡುಮಾನ್ ಅಲಿ ಅವರು ಐಯುಎಂಎಲ್ (IUML) ಅಭ್ಯರ್ಥಿ ಎಂ. ಶಹಜಹಾನ್ ವಿರುದ್ಧ 1,065 ಮತಗಳ ಅಂತರದಿಂದ ಸೋತರು. ಸುಲಭ ಗೆಲುವು ನಿರೀಕ್ಷಿಸಿದ್ದ ಮೈತ್ರಿಕೂಟಕ್ಕೆ ವಿಜಯ್ ಅಭ್ಯರ್ಥಿ ಬೆವರಿಳಿಸಿದ್ದರು.
5. ದಿಂಡಿಗಲ್: 1,131 ಮತಗಳು
ಡಿಎಂಕೆ ಪ್ರಭಾವಿ ನಾಯಕ ಸೆಂಥಿಲ್ ಕುಮಾರ್ ವಿರುದ್ಧ ಟಿವಿಕೆಯ ನಜೀರ್ ರಾಜಾ ಕೇವಲ 1,131 ಮತಗಳಿಂದ ಸೋತರು. ಎಣಿಕೆಯ ಕೊನೆಯ ಸುತ್ತಿನಲ್ಲಿ ಅನುಭವದ ಬಲದಿಂದ ಡಿಎಂಕೆ ಜಯಿಸಿತು.
6. ಕಿಳ್ಳಿಯೂರು: 1,311 ಮತಗಳು
ಕರಾವಳಿ ತೀರದ ಈ ಕ್ಷೇತ್ರದಲ್ಲಿ ಟಿವಿಕೆಯ ಎಸ್. ಸಬಿನ್ ಅವರು ಕಾಂಗ್ರೆಸ್ ನಾಯಕ ಎಸ್. ರಾಜೇಶ್ ಕುಮಾರ್ ಅವರಿಗೆ ತೀವ್ರ ಪೈಪೋಟಿ ನೀಡಿ 1,311 ಮತಗಳಿಂದ ಹಿಂದೆ ಬಿದ್ದರು.
7. ತಿರುಮಯಂ: 1,492 ಮತಗಳು
ಗ್ರಾಮೀಣ ಭಾಗದ ಈ ಕ್ಷೇತ್ರದಲ್ಲಿ ಟಿವಿಕೆಯ ಸಿ. ಚಿಂತಾಮಣಿ ಅವರು ಡಿಎಂಕೆ ಹಿರಿಯ ನಾಯಕ ಜಿ. ರಘುಪತಿ ವಿರುದ್ಧ ಕೇವಲ 1,492 ಮತಗಳ ಅಂತರದಿಂದ ಸೋಲುವ ಮೂಲಕ ಅಚ್ಚರಿ ಮೂಡಿಸಿದರು.
8. ಪುದುಕ್ಕೊಟ್ಟೈ: 1,867 ಮತಗಳು
ದಿನವಿಡೀ ತೀವ್ರ ಕುತೂಹಲ ಕೆರಳಿಸಿದ್ದ ಇಲ್ಲಿ ಡಿಎಂಕೆಯ ಮುತ್ತುರಾಜ ಅವರು ಟಿವಿಕೆಯ ಕೆ.ಎಂ. ಶರೀಫ್ ವಿರುದ್ಧ 1,867 ಮತಗಳ ಅಂತರದಿಂದ ಗೆಲುವು ಸಾಧಿಸಿದರು.
9. ಏರ್ಕಾಡ್: 2,189 ಮತಗಳು
ಗುಡ್ಡಗಾಡು ಪ್ರದೇಶದ ಈ ಕ್ಷೇತ್ರದಲ್ಲಿ ಟಿವಿಕೆಯ ಜೆ. ಲಕ್ಷ್ಮಿ ಜನಾರ್ದನನ್ ಅವರು ಎಐಎಡಿಎಂಕೆ ಅಭ್ಯರ್ಥಿ ವಿರುದ್ಧ ಕೇವಲ 2,189 ಮತಗಳಿಂದ ಸೋತರು. ಇದು ಬುಡಕಟ್ಟು ಪ್ರದೇಶಗಳಲ್ಲಿ ಟಿವಿಕೆಯ ಪ್ರಭಾವವನ್ನು ತೋರಿಸಿತು.
10. ತಿರುತ್ತಣಿ: 5,793 ಮತಗಳು
ಟಿವಿಕೆ ಅಭ್ಯರ್ಥಿ ಸತ್ಯ ಕುಮಾರ್ ಅವರು ಎಐಎಡಿಎಂಕೆಯ ಜಿ. ಹರಿ ವಿರುದ್ಧ 5,793 ಮತಗಳಿಂದ ಸೋಲುವ ಮೂಲಕ ಪಟ್ಟಿಯ ಕೊನೆಯ ಸ್ಥಾನ ಪಡೆದರು.
ಈ ಹತ್ತು ಕ್ಷೇತ್ರಗಳಲ್ಲಿ ಪರಿಸ್ಥಿತಿ ತುಸು ಬದಲಾಗಿದ್ದರೂ ಇಂದು ತಮಿಳುನಾಡಿನಲ್ಲಿ ವಿಜಯ್ ಅವರ ಏಕಪಕ್ಷೀಯ ಆಡಳಿತ ಆರಂಭವಾಗುತ್ತಿತ್ತು. ಈಗ ವಿಜಯ್ ಸರ್ಕಾರ ರಚಿಸಲು ಮೈತ್ರಿ ಪಕ್ಷಗಳ ಬೆಂಬಲ ಪಡೆಯುವುದು ಅನಿವಾರ್ಯವಾಗಿದೆ.
