ವಸೂಲಾಗದ ಸಂಚಾರ ದಂಡ ಮೊತ್ತ ಸಂಗ್ರಹಕ್ಕೆ ವಿದ್ಯುತ್ ಬಿಲ್ ಜತೆ ಸೇರಿಸಲು ಸುಪ್ರೀಂ ಸಲಹೆ
ಇ-ಚಲನ್ ವ್ಯವಸ್ಥೆಯಡಿ 45 ಸಾವಿರ ಕೋಟಿ ರೂ. ದಂಡ ವಸೂಲಿ ಮಾಡಬೇಕಿದೆ. ಆದರೆ, ಈವರೆಗೆ ವಸೂಲಾಗಿರುವುದು ಕೇವಲ 25 ಸಾವಿರ ಕೋಟಿ ರೂ. ಮಾತ್ರ. 20 ಸಾವಿರ ಕೋಟಿ ರೂ. ಸರ್ಕಾರದ ಖಜಾನೆ ಸೇರಬೇಕಿದೆ.
ಸಂಚಾರ ನಿಯಮ ಉಲ್ಲಂಘನೆ ಮತ್ತು ಅದಕ್ಕೆ ಸಂಬಂಧಿಸಿದ ದಂಡ ಪಾವತಿಯು ದಶಕಗಳಿಂದಲೂ ಒಂದು ದೊಡ್ಡ ಸವಾಲಾಗಿದೆ. ಲಕ್ಷಾಂತರ ರೂಪಾಯಿ ದಂಡ ಬಾಕಿ ಉಳಿದಿದ್ದರೂ, ಅದನ್ನು ವಸೂಲಿ ಮಾಡುವಲ್ಲಿ ಆಡಳಿತ ಯಂತ್ರ ವಿಫಲವಾಗಿದೆ. ಈ ಹಿನ್ನೆಲೆಯಲ್ಲಿ, ಸಂಚಾರ ದಂಡ ವಸೂಲಾತಿಗೆ ಪರಿಣಾಮಕಾರಿ ಮಾರ್ಗವೊಂದನ್ನು ಸೂಚಿಸಿರುವ ಸುಪ್ರೀಂಕೋರ್ಟ್, ಬಾಕಿ ಇರುವ ದಂಡದ ಮೊತ್ತವನ್ನು ನಾಗರಿಕರ ವಿದ್ಯುತ್ ಬಿಲ್‌ಗಳೊಂದಿಗೆ ಜೋಡಿಸುವ ಕುರಿತು ಗಂಭೀರ ಚಿಂತನೆ ನಡೆಸುವಂತೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ ಸಲಹೆ ನೀಡಿದೆ.
ನ್ಯಾಯಮೂರ್ತಿಗಳಾದ ಜೆ.ಬಿ. ಪರ್ದಿವಾಲಾ ಮತ್ತು ಕೆ.ವಿ. ವಿಶ್ವನಾಥನ್ ಅವರನ್ನೊಳಗೊಂಡ ಸುಪ್ರೀಂಕೋರ್ಟ್‌ನ ದ್ವಿಸದಸ್ಯ ಪೀಠವು ರಸ್ತೆ ಸುರಕ್ಷತೆ ಮತ್ತು ಸಂಚಾರ ನಿಯಮಗಳ ಜಾರಿ ಕುರಿತಾದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯೊಂದನ್ನು ವಿಚಾರಣೆ ನಡೆಸುತ್ತಿತ್ತು. ಈ ಸಂದರ್ಭದಲ್ಲಿ ದೇಶಾದ್ಯಂತ ಸಂಚಾರ ನಿಯಮ ಉಲ್ಲಂಘನೆಗಾಗಿ ವಿಧಿಸಲಾದ ದಂಡದ ಮೊತ್ತವು ಸರಿಯಾಗಿ ಪಾವತಿಯಾಗುತ್ತಿಲ್ಲ ಎಂಬ ಅಂಶವನ್ನು ನ್ಯಾಯಾಲಯ ಗಮನಿಸಿತು. ಕೇವಲ ಇ-ಚಲನ್‌ಗಳನ್ನು ವಿತರಿಸುವುದರಿಂದಲೇ ಕೆಲಸ ಮುಗಿಯುವುದಿಲ್ಲ ಎಂದು ಸಲಹೆ ನೀಡಿದ ಪೀಠ, "ಕೇವಲ ಚಲನ್ ನೀಡುವುದು ಸಾಕಾಗುವುದಿಲ್ಲ, ಆ ದಂಡದ ಮೊತ್ತವನ್ನು ಸಕಾಲದಲ್ಲಿ ವಸೂಲಿ ಮಾಡುವುದು ಅತ್ಯಗತ್ಯ. ದಂಡ ವಸೂಲಿಗೆ ಪರ್ಯಾಯ ಮತ್ತು ಪರಿಣಾಮಕಾರಿ ಮಾರ್ಗಗಳನ್ನು ಸರ್ಕಾರಗಳು ಕಂಡುಕೊಳ್ಳಬೇಕು" ಎಂದು ಅಭಿಪ್ರಾಯಪಟ್ಟಿದೆ.
ವಿದ್ಯುತ್ ಬಿಲ್ ಜೋಡಣೆ: ಹೇಗೆ ಕೆಲಸ ಮಾಡುತ್ತದೆ?
ಸುಪ್ರೀಂಕೋರ್ಟ್ ಸೂಚಿಸಿರುವ ಈ ಹೊಸ ವ್ಯವಸ್ಥೆಯು ಅತ್ಯಂತ ಸರಳ ಮತ್ತು ಶಕ್ತಿಶಾಲಿ. ದಂಡ ಪಾವತಿಸದ ವಾಹನ ಸವಾರರ ಬಾಕಿ ಮೊತ್ತವನ್ನು ಅವರ ವಿದ್ಯುತ್ ಬಿಲ್‌ನೊಂದಿಗೆ ಸೇರಿಸುವುದು ಈ ಪ್ರಸ್ತಾವನೆಯ ಮೂಲ ಉದ್ದೇಶ. ಒಂದು ವೇಳೆ ಗ್ರಾಹಕರು ತಮ್ಮ ವಿದ್ಯುತ್ ಬಿಲ್ ಪಾವತಿಸದಿದ್ದರೆ, ವಿದ್ಯುತ್ ಸಂಪರ್ಕ ಕಡಿತಗೊಳಿಸಲಾಗುತ್ತದೆ. ಹೀಗೆ ಮಾಡುವ ಮೂಲಕ, ಜನರು ತಮ್ಮ ದಂಡದ ಮೊತ್ತವನ್ನೂ ಅನಿವಾರ್ಯವಾಗಿ ಪಾವತಿಸಬೇಕಾಗುತ್ತದೆ ಎಂಬುದು ಪೀಠದ ತರ್ಕವಾಗಿದೆ. ಇದು ಸರ್ಕಾರಿ ಆದಾಯವನ್ನು ಹೆಚ್ಚಿಸುವುದಲ್ಲದೆ, ಸಂಚಾರ ನಿಯಮಗಳನ್ನು ಪಾಲಿಸುವಂತೆ ಜನರಲ್ಲಿ ಜಾಗೃತಿಯನ್ನೂ ಮೂಡಿಸುತ್ತದೆ ಎಂದು ನ್ಯಾಯಾಲಯದ ಆಶಯವಾಗಿದೆ.
20ಸಾವಿರ ಕೋಟಿ ರೂಪಾಯಿ ವಸೂಲಾಗದ ದಂಡ..!
ದೇಶಾದ್ಯಂತ ಇರುವ ಸಂಚಾರ ಉಲ್ಲಂಘನೆಯ ಪರಿಸ್ಥಿತಿಯನ್ನು ವಿವರಿಸಿದ ನ್ಯಾಯಾಲಯಕ್ಕೆ ನೀಡಲಾದ ಮಾಹಿತಿಯ ಪ್ರಕಾರ, ಇ-ಚಲನ್ ವ್ಯವಸ್ಥೆಯಡಿ ಒಟ್ಟು 45 ಸಾವಿರ ಕೋಟಿ ರೂಪಾಯಿ ದಂಡವನ್ನು ವಸೂಲಿ ಮಾಡಬೇಕಿತ್ತು. ಆದರೆ, ಇಲ್ಲಿಯವರೆಗೆ ವಸೂಲಾಗಿರುವುದು ಕೇವಲ 25 ಸಾವಿರ ಕೋಟಿ ರೂಪಾಯಿ ಮಾತ್ರ. ಅಂದರೆ, ಸುಮಾರು 20 ಸಾವಿರ ಕೋಟಿ ರೂಪಾಯಿ ದಂಡದ ಮೊತ್ತವು ಇನ್ನೂ ಸರ್ಕಾರಿ ಬೊಕ್ಕಸ ಸೇರದೆ ಬಾಕಿ ಉಳಿದಿದೆ. ನ್ಯಾಯಾಲಯವು ಈ ವಿಚಾರದಲ್ಲಿ ಅಧಿಕಾರಿಗಳಿಗೆ ಚಾಟಿ ಬೀಸಿದೆ. ಇ-ಚಲನ್‌ಗಳನ್ನು ಕಳುಹಿಸುವುದು ಕೇವಲ ಒಂದು ಆಡಳಿತಾತ್ಮಕ ಪ್ರಕ್ರಿಯೆಯಾಗಬಾರದು. ಚಲನ್ ವಿತರಣೆಯಾದ ಮೇಲೆ ಅದನ್ನು ವಸೂಲಿ ಮಾಡುವುದು ಅಧಿಕಾರಿಗಳ ಪ್ರಾಥಮಿಕ ಕರ್ತವ್ಯ. ಆದರೆ, ಬಹುತೇಕ ರಾಜ್ಯಗಳಲ್ಲಿ ಈ ಪ್ರಕ್ರಿಯೆಯು ನಿಧಾನಗತಿಯಲ್ಲಿದೆ. ತಂತ್ರಜ್ಞಾನದ ಯುಗದಲ್ಲಿ ಸಣ್ಣ ಪುಟ್ಟ ತಪ್ಪುಗಳಿಗೂ ಇ-ಚಲನ್ ಬರುತ್ತದೆ, ಆದರೆ ದಂಡ ಕಟ್ಟಲು ಅಥವಾ ವಿರೋಧಿಸಲು ಸೂಕ್ತ ವೇದಿಕೆಗಳಿಲ್ಲದಿರುವುದು ಅಥವಾ ಕಟ್ಟದಿದ್ದರೂ ಕ್ರಮ ಕೈಗೊಳ್ಳದಿರುವುದು ದೊಡ್ಡ ಸಮಸ್ಯೆಯಾಗಿದೆ. ಸುಪ್ರೀಂಕೋರ್ಟ್‌ನ ಸಲಹೆಯು ಅಧಿಕಾರಿಗಳಿಗೆ ದಂಡ ವಸೂಲಾತಿಯನ್ನು ಆದ್ಯತೆಯ ಕೆಲಸವನ್ನಾಗಿ ಪರಿವರ್ತಿಸಲು ಒತ್ತಡ ಹೇರಲಿದೆ.
ರಸ್ತೆ ಸುರಕ್ಷತೆಯ ದೃಷ್ಟಿಯಿಂದ ಮಹತ್ವ
ಈ ವಿಚಾರಣೆಯು ಕೇವಲ ದಂಡ ವಸೂಲಿಗೆ ಸೀಮಿತವಾಗಿಲ್ಲ. ರಸ್ತೆ ಸುರಕ್ಷತೆ, ಸಂಚಾರ ನಿಯಮಗಳ ಜಾರಿ ಮತ್ತು ಅಪಘಾತದ ನಂತರ ಸಂತ್ರಸ್ತರಿಗೆ ನೀಡುವ ತುರ್ತು ಆರೈಕೆ ಸೇರಿದಂತೆ ಸಮಗ್ರ ಸುಧಾರಣೆಗಳಿಗಾಗಿ ಸುಪ್ರೀಂ ಕೋರ್ಟ್ ಈ ಅರ್ಜಿಯನ್ನು ಕೈಗೆತ್ತಿಕೊಂಡಿದೆ. ಸಂಚಾರ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಮಾಡಲು ದಂಡ ವಸೂಲಾತಿಯು ಒಂದು ಪ್ರಮುಖ ಅಸ್ತ್ರವಾಗಿದೆ. ದಂಡದ ಮೊತ್ತ ಪಾವತಿಸದಿದ್ದಲ್ಲಿ ಅಂತಹವರಿಗೆ ವಾಹನ ಚಲಾಯಿಸುವ ಹಕ್ಕಿಲ್ಲ ಎಂಬ ಭಾವನೆ ಮೂಡಬೇಕು. ಅಂದಾಗ ಮಾತ್ರ ರಸ್ತೆಗಳಲ್ಲಿ ಅಪಘಾತಗಳು ಕಡಿಮೆಯಾಗಲು ಸಾಧ್ಯ. ಸುಪ್ರೀಂ ಕೋರ್ಟ್‌ನ ಈ ಸಲಹೆಯನ್ನು ಜಾರಿಗೊಳಿಸುವುದು ರಾಜ್ಯ ಸರ್ಕಾರಗಳಿಗೆ ಮತ್ತು ಸಂಬಂಧಪಟ್ಟ ವಿದ್ಯುತ್ ಸರಬರಾಜು ಕಂಪನಿಗಳಿಗೆ ಒಂದು ದೊಡ್ಡ ಸವಾಲಿನ ಕೆಲಸವಾಗಿದೆ. ಇದು ತಾಂತ್ರಿಕವಾಗಿ ಮತ್ತು ಕಾನೂನಾತ್ಮಕವಾಗಿ ಹಲವು ತೊಡಕುಗಳನ್ನು ಹೊಂದಿರಬಹುದು. ಉದಾಹರಣೆಗೆ, ಬಾಡಿಗೆ ಮನೆಯಲ್ಲಿರುವವರು, ವಿದ್ಯುತ್ ಮೀಟರ್ ಹೆಸರಿನಲ್ಲಿರುವ ವ್ಯಕ್ತಿ ಮತ್ತು ವಾಹನ ಮಾಲೀಕರು ಬೇರೆ ಬೇರೆಯಾಗಿರಬಹುದು. ಇಂತಹ ಸಂದರ್ಭಗಳಲ್ಲಿ ಈ ವ್ಯವಸ್ಥೆಯನ್ನು ಹೇಗೆ ಜಾರಿಗೊಳಿಸಬೇಕು ಎಂಬ ಬಗ್ಗೆ ಸಮಗ್ರ ನೀತಿಯನ್ನು ಸರ್ಕಾರಗಳು ರೂಪಿಸಬೇಕಿದೆ ಎಂದು ಹೇಳಿದೆ.
