Thalapathy Vijay | ವಿಜಯ್‌ ಭೇಟಿಗಾಗಿ ಕೇರಳದಿಂದ ಚೆನ್ನೈಗೆ ಪಾದಯಾತ್ರೆ ಹೊರಟ ವ್ಲಾಗರ್ ದಂಪತಿ!

ಸಿನಿಮಾ ಮತ್ತು ರಾಜಕೀಯದ ಮೇಲಿರುವ ಅಭಿಮಾನವು ಮನುಷ್ಯನಿಂದ ಏನೆಲ್ಲಾ ಮಾಡಿಸಬಹುದು ಎಂಬುದಕ್ಕೆ ಈ ದಂಪತಿಯೇ ಸಾಕ್ಷಿ. ಕೇರಳದ ಮಲಪ್ಪುರಂ ಜಿಲ್ಲೆಯ ತಾನೂರಿನ ದಂಪತಿಗಳು ತಮ್ಮ ನೆಚ್ಚಿನ ನಟ ಹಾಗೂ ತಮಿಳುನಾಡಿನ ನಿಯೋಜಿತ ಮುಖ್ಯಮಂತ್ರಿ 'ದಳಪತಿ' ವಿಜಯ್ ಅವರನ್ನು ಭೇಟಿ ಮಾಡಲು ಸುಮಾರು 650 ಕಿಲೋಮೀಟರ್ ಪಾದಯಾತ್ರೆ ಕೈಗೊಂಡಿದ್ದಾರೆ.

650 ಕಿ.ಮೀ ಗುರಿ: ಬರಿಗೈಲಿ ಹೊರಟ ದಂಪತಿ

ಕೆ.ಎಸ್. ಮೊಹಮ್ಮದ್ ರಾಫಿ (ವೃತ್ತಿಯಲ್ಲಿ ಚಾಲಕ) ಮತ್ತು ಅವರ ಪತ್ನಿ ಸಿ.ಪಿ. ಉಮ್ಮು ಶಹನಾಮೋಲ್ ಈ ಸಾಹಸಕ್ಕೆ ಕೈಹಾಕಿದವರು. ಬೆನ್ನಿಗೊಂದು ಬ್ಯಾಗ್, ಮಲಗಲು ಸಣ್ಣ ಟೆಂಟ್ ಹಿಡಿದು ಈ ದಂಪತಿ ಕಳೆದ ಗುರುವಾರ ಕೇರಳದ ತಾನೂರಿನಿಂದ ತಮ್ಮ ಪಾದಯಾತ್ರೆಯನ್ನು ಆರಂಭಿಸಿದ್ದಾರೆ. ಪಾಲಕ್ಕಾಡ್ ಮೂಲಕ ತಮಿಳುನಾಡು ಪ್ರವೇಶಿಸಿ, ಅಲ್ಲಿಂದ ಚೆನ್ನೈ ತಲುಪುವುದು ಇವರ ಗುರಿ.

ವೈರಲ್ ಆದ ವ್ಲಾಗ್ಸ್

ಸಾಮಾಜಿಕ ಜಾಲತಾಣಗಳಲ್ಲಿ ಈ ದಂಪತಿಯ ವಿಡಿಯೋಗಳು ಸಖತ್ ಸದ್ದು ಮಾಡುತ್ತಿವೆ. ದಾರಿಯುದ್ದಕ್ಕೂ ಸಿಗುವ ಸ್ಥಳೀಯರೊಂದಿಗೆ ಸಂವಾದ, ರಸ್ತೆಯ ಪಕ್ಕದಲ್ಲೇ ಸಣ್ಣ ಟೆಂಟ್ ಹಾಕಿ ವಿಶ್ರಾಂತಿ ಪಡೆಯುವ ಕ್ಷಣಗಳು ಮತ್ತು ವಿಜಯ್ ಅವರನ್ನು ಭೇಟಿ ಮಾಡುವ ಅವರ ಉತ್ಸಾಹ ಅಭಿಮಾನಿಗಳ ಗಮನ ಸೆಳೆಯುತ್ತಿದೆ. 'ದಳಪತಿ' ಅಭಿಮಾನಿಗಳು ಈ ದಂಪತಿಯ ಪಯಣಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಬೆಂಬಲ ಸೂಚಿಸುತ್ತಿದ್ದಾರೆ.

ಏಕೆ ಈ ಪಾದಯಾತ್ರೆ?

ತಮ್ಮ ದೈನಂದಿನ ವ್ಲಾಗ್‌ನಲ್ಲಿ ಈ ಕುರಿತು ಮಾತನಾಡಿರುವ ದಂಪತಿಗಳು, "ನಾವು ಹಲವು ವರ್ಷಗಳಿಂದ ವಿಜಯ್ ಅವರ ಚಿತ್ರಗಳನ್ನು ಮತ್ತು ಅವರ ಪಾತ್ರಗಳನ್ನು ಇಷ್ಟಪಡುತ್ತಾ ಬಂದಿದ್ದೇವೆ. ಈಗ ವಿಜಯ್ ಅವರು ರಾಜಕೀಯ ಪಕ್ಷ ಆರಂಭಿಸಿ, ಚುನಾವಣೆಯಲ್ಲಿ ಜಯಗಳಿಸಿ ತಮಿಳುನಾಡಿನ ಮುಖ್ಯಮಂತ್ರಿಯಾಗಿದ್ದಾರೆ. ಈ ಸಂಭ್ರಮದ ಸಮಯದಲ್ಲಿ ಅವರನ್ನು ಖುದ್ದಾಗಿ ಭೇಟಿ ಮಾಡಬೇಕೆಂಬ ನಮ್ಮ ಹಂಬಲ ಹೆಚ್ಚಾಯಿತು. ಹಾಗಾಗಿ ಈ ಪಾದಯಾತ್ರೆಯ ನಿರ್ಧಾರ ಮಾಡಿದೆವು," ಎಂದಿದ್ದಾರೆ.

ಭೇಟಿಯ ಬಗ್ಗೆ ಇಲ್ಲ ಪ್ಲಾನ್, ಆದರೂ ಇದೆ ಭರವಸೆ!

ವಿಶೇಷವೆಂದರೆ, ಚೆನ್ನೈ ತಲುಪಿದ ಮೇಲೆ ವಿಜಯ್ ಅವರನ್ನು ಹೇಗೆ ಭೇಟಿ ಮಾಡಬೇಕು ಎಂಬ ಯಾವುದೇ ಪೂರ್ವಯೋಜಿತ ಪ್ಲಾನ್ ಇವರ ಬಳಿ ಇಲ್ಲ. "ಚೆನ್ನೈ ತಲುಪಿದ ಮೇಲೆ ಎಲ್ಲವೂ ಸರಿಯಾಗಲಿದೆ, ನಮ್ಮನ್ನು ಅವರು ಭೇಟಿ ಮಾಡುತ್ತಾರೆ ಎಂಬ ನಂಬಿಕೆ ನಮಗಿದೆ" ಎಂದು ದಂಪತಿಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಕೇರಳದಿಂದ ತಮಿಳುನಾಡಿನತ್ತ ಸಾಗುತ್ತಿರುವ ಇವರ ಈ ವಿಶಿಷ್ಟ ಅಭಿಮಾನದ ಪಯಣ ಈಗ ಇಂಟರ್ನೆಟ್‌ನಲ್ಲಿ ಚರ್ಚೆಯ ವಿಷಯವಾಗಿದೆ.