ಕೇರಳದಲ್ಲಿ ಚರ್ಚ್ ಮಾಲೀಕತ್ವ ವಿವಾದ: ಕ್ರೈಸ್ತ ಪಂಗಡಗಳ ನಡುವೆ ಘರ್ಷಣೆ, 22 ಜನರ ವಿರುದ್ಧ ಕೇಸ್
ಸ್ಥಳೀಯ ನ್ಯಾಯಾಲಯದ ತೀರ್ಪು ತಮ್ಮ ಪರವಾಗಿ ಬಂದಿದೆ ಎಂದು ಹೇಳಿಕೊಂಡು ಆರ್ಥೊಡಾಕ್ಸ್ ಪಂಗಡದ ಕೆಲವು ಪಾದ್ರಿಗಳು ಭಾನುವಾರ ಚರ್ಚ್ಗೆ ಆಗಮಿಸಿದ್ದರು. ಆದರೆ, ಜಾಕೊಬೈಟ್ ಪಾದ್ರಿ ಹಾಗೂ ಅಲ್ಲಿದ್ದ ಭಕ್ತರು ಅವರ ಪ್ರವೇಶವನ್ನು ವಿರೋಧಿಸಿದ್ದಾರೆ.
ಕೇರಳದ ಕೊಚ್ಚಿ ಸಮೀಪ ಚರ್ಚ್ ಮಾಲೀಕತ್ವದ ವಿಚಾರವಾಗಿ ಸಿರಿಯನ್ ಜಾಕೊಬೈಟ್ ಮತ್ತು ಮಲಂಕರ ಆರ್ಥೊಡಾಕ್ಸ್ ಕ್ರೈಸ್ತ ಪಂಗಡಗಳ ಪಾದ್ರಿಗಳು ಹಾಗೂ ಭಕ್ತರ ನಡುವೆ ಘರ್ಷಣೆ ನಡೆದಿದೆ. ಘಟನೆಗೆ ಸಂಬಂಧಿಸಿದಂತೆ ಎರಡೂ ಗುಂಪುಗಳ ಸದಸ್ಯರ ವಿರುದ್ಧ ಪೊಲೀಸರು ಪ್ರತ್ಯೇಕ ಪ್ರಕರಣಗಳನ್ನು ದಾಖಲಿಸಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕೊಚ್ಚಿಯ ಪಿರಮಾಡೋಮ್ನಲ್ಲಿರುವ ಸೇಂಟ್ ಜಾನ್ಸ್ ಬೆತ್ಲಹೆಮ್ ಚರ್ಚ್ನಲ್ಲಿ ಭಾನುವಾರ ಈ ಘಟನೆ ನಡೆದಿದೆ. ಈ ಚರ್ಚ್ನ ಮಾಲೀಕತ್ವ ಮತ್ತು ಆಡಳಿತದ ವಿಚಾರವಾಗಿ ಜಾಕೊಬೈಟ್ ಹಾಗೂ ಆರ್ಥೊಡಾಕ್ಸ್ ಪಂಗಡಗಳ ನಡುವೆ ಹಲವು ವರ್ಷಗಳಿಂದ ವಿವಾದ ಮುಂದುವರಿದಿದೆ. ಸದ್ಯ ಚರ್ಚ್ ಜಾಕೊಬೈಟ್ ಪಂಗಡದ ನಿಯಂತ್ರಣದಲ್ಲಿದೆ.
A clash broke out between members of the Malankara Orthodox Syrian Church and the Jacobite Syrian Christian Church at St John’s Bethlehem Church in Piramadam, Muvattupuzha, in Kerala’s Ernakulam district, on Sunday after Orthodox clergy entered the church to conduct prayers,… pic.twitter.com/z4OUKsIxy2
— Hate Detector 🔍 (@HateDetectors) August 10, 2026
ಕೋರ್ಟ್ ಆದೇಶದ ಬೆನ್ನಲ್ಲೇ ಚರ್ಚ್ಗೆ ಬಂದ ಆರ್ಥೊಡಾಕ್ಸ್ ಪಾದ್ರಿಗಳು
ಸ್ಥಳೀಯ ನ್ಯಾಯಾಲಯದ ತೀರ್ಪು ತಮ್ಮ ಪರವಾಗಿ ಬಂದಿದೆ ಎಂದು ಹೇಳಿಕೊಂಡು ಆರ್ಥೊಡಾಕ್ಸ್ ಪಂಗಡದ ಕೆಲವು ಪಾದ್ರಿಗಳು ಭಾನುವಾರ ಚರ್ಚ್ಗೆ ಆಗಮಿಸಿದ್ದರು. ಆದರೆ, ಜಾಕೊಬೈಟ್ ಪಾದ್ರಿ ಹಾಗೂ ಅಲ್ಲಿದ್ದ ಭಕ್ತರು ಅವರ ಪ್ರವೇಶವನ್ನು ವಿರೋಧಿಸಿದ್ದಾರೆ.
ತಮ್ಮ ಪರವಾಗಿಯೂ ಮುನ್ಸಿಫ್ ಕೋರ್ಟ್ ಆದೇಶವಿದೆ ಎಂದು ಜಾಕೊಬೈಟ್ ಪಂಗಡದವರು ವಾದಿಸಿದ್ದಾರೆ. ಈ ವಿಚಾರವಾಗಿ ಎರಡೂ ಕಡೆಯವರ ನಡುವೆ ಮೊದಲು ಮಾತಿನ ಚಕಮಕಿ ನಡೆದಿದೆ. ಬಳಿಕ ಪರಿಸ್ಥಿತಿ ವಿಕೋಪಕ್ಕೆ ತಿರುಗಿ ಪಾದ್ರಿಗಳು ಹಾಗೂ ಎರಡೂ ಪಂಗಡಗಳ ಸದಸ್ಯರ ನಡುವೆ ತಳ್ಳಾಟ, ನೂಕಾಟ ನಡೆದಿದೆ. ಘರ್ಷಣೆಯಲ್ಲಿ ತಮ್ಮ ಪಂಗಡದ ಪಾದ್ರಿಗಳಿಗೆ ಗಾಯಗಳಾಗಿವೆ ಎಂದು ಎರಡೂ ಕಡೆಯವರು ಪೊಲೀಸರಿಗೆ ತಿಳಿಸಿದ್ದಾರೆ.
ಎರಡೂ ಕಡೆಯವರ ವಿರುದ್ಧ ಪ್ರಕರಣ
ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಎರಡೂ ಗುಂಪುಗಳ ದೂರಿನ ಆಧಾರದ ಮೇಲೆ ಪ್ರತ್ಯೇಕ ಪ್ರಕರಣಗಳನ್ನು ದಾಖಲಿಸಿದ್ದಾರೆ. ಜಾಕೊಬೈಟ್ ಪಂಗಡದ ಪಾದ್ರಿಗಳು ಸೇರಿದಂತೆ 10 ಮಂದಿ ವಿರುದ್ಧ ಒಂದು ಪ್ರಕರಣ ದಾಖಲಾಗಿದ್ದರೆ, ಆರ್ಥೊಡಾಕ್ಸ್ ಪಂಗಡದ 12 ಪಾದ್ರಿಗಳು ಮತ್ತು ಭಕ್ತರ ವಿರುದ್ಧ ಮತ್ತೊಂದು ಪ್ರಕರಣ ದಾಖಲಿಸಲಾಗಿದೆ.
ಎರಡೂ ಪ್ರಕರಣಗಳಲ್ಲಿ ಜಾಮೀನು ಸಿಗದಂತಹ ಗಂಭೀರ ಆರೋಪಗಳನ್ನು ದಾಖಲಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಘಟನೆ ಕುರಿತು ಪೊಲೀಸರು ತನಿಖೆ ನಡೆಸುತ್ತಿದ್ದು, ಮತ್ತಷ್ಟು ಹಿಂಸಾಚಾರ ನಡೆಯದಂತೆ ಚರ್ಚ್ ಆವರಣದಲ್ಲಿ ಪೊಲೀಸ್ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ.
ವಿವಾದ ಬಗೆಹರಿಸಲು ಜಿಲ್ಲಾಡಳಿತದ ಸಭೆ
ಚರ್ಚ್ ಮಾಲೀಕತ್ವದ ವಿಚಾರವಾಗಿ ಎರಡೂ ಪಂಗಡಗಳ ನಡುವೆ ಹಲವು ವರ್ಷಗಳಿಂದ ವಿವಾದ ನಡೆಯುತ್ತಿರುವ ಹಿನ್ನೆಲೆಯಲ್ಲಿ, ಸಮಸ್ಯೆಯನ್ನು ಸೌಹಾರ್ದಯುತವಾಗಿ ಬಗೆಹರಿಸುವ ಪ್ರಯತ್ನ ಆರಂಭವಾಗಿದೆ. ಎರ್ನಾಕುಲಂ ಜಿಲ್ಲಾಡಳಿತವು ಎರಡೂ ಪಂಗಡಗಳ ಪ್ರತಿನಿಧಿಗಳ ಸಭೆಯನ್ನು ಕರೆದಿದ್ದು, ವಿವಾದಕ್ಕೆ ಪರಿಹಾರ ಕಂಡುಕೊಳ್ಳುವ ಕುರಿತು ಚರ್ಚೆ ನಡೆಸಲು ಮುಂದಾಗಿದೆ.
ಜಾಕೊಬೈಟ್ ಮತ್ತು ಮಲಂಕರ ಆರ್ಥೊಡಾಕ್ಸ್ ಪಂಗಡಗಳ ನಡುವಿನ ವಿವಾದ ಹಲವು ವರ್ಷಗಳಿಂದ ಮುಂದುವರಿದಿದ್ದು, ಚರ್ಚ್ಗಳು ಹಾಗೂ ಅವುಗಳಿಗೆ ಸಂಬಂಧಿಸಿದ ಆಸ್ತಿಗಳ ಮಾಲೀಕತ್ವ ಮತ್ತು ಆಡಳಿತದ ವಿಚಾರವಾಗಿ ಹಲವು ಪ್ರಕರಣಗಳು ನ್ಯಾಯಾಲಯಗಳಲ್ಲಿ ವಿಚಾರಣೆಯಲ್ಲಿವೆ. ಸದ್ಯ ಸೇಂಟ್ ಜಾನ್ಸ್ ಬೆತ್ಲಹೆಮ್ ಚರ್ಚ್ನಲ್ಲಿ ಬಿಗಿ ಪೊಲೀಸ್ ಭದ್ರತೆ ಮುಂದುವರಿದಿದ್ದು, ಎರಡೂ ಪಂಗಡಗಳ ನಡುವಿನ ಉದ್ವಿಗ್ನತೆ ಮತ್ತಷ್ಟು ಹೆಚ್ಚಾಗದಂತೆ ಅಧಿಕಾರಿಗಳು ಮುನ್ನೆಚ್ಚರಿಕೆ ವಹಿಸಿದ್ದಾರೆ.
