ಮಿಡ್ನೈಟ್ ಆಪರೇಷನ್: ಸಾಮಾನ್ಯ ಮಹಿಳೆಯಂತೆ ರಸ್ತೆಗಿಳಿದ ಮಹಿಳಾ IPS ಅಧಿಕಾರಿ 40 ಕಾಮುಕರು ಅರೆಸ್ಟ್!
ಹೈದರಾಬಾದ್ ನಗರದ ಮಹಿಳೆಯರ ಸುರಕ್ಷತೆಯ ರಿಯಾಲಿಟಿ ಚೆಕ್ ಮಾಡಲು ಮಲ್ಕಾಜ್ಗಿರಿ ಪೊಲೀಸ್ ಕಮಿಷನರ್ ಐಪಿಎಸ್ ಸುಮತಿ (IPS Sumathi) ತಾವೇ ಒಂಟಿ ಮಹಿಳೆಯಂತೆ ಮಧ್ಯರಾತ್ರಿ ರಸ್ತೆಗಿಳಿದಾಗ ಏನಾಯಿತು?
ಹೈದರಾಬಾದ್ ನಗರದಲ್ಲಿ ಮಹಿಳೆಯರ ಸುರಕ್ಷತೆಯ ಬಗ್ಗೆ ಕೇವಲ ಕಾಗದದ ವರದಿಗಳನ್ನು ನಂಬದೆ, ವಾಸ್ತವ ತಿಳಿಯಲು ಖುದ್ದು ಅಖಾಡಕ್ಕಿಳಿದ ಹೈದರಾಬಾದ್ನ ಮಲ್ಕಾಜ್ಗಿರಿ ಪೊಲೀಸ್ ಕಮಿಷನರ್ ಐಪಿಎಸ್ ಸುಮತಿ ಅವರ ಸಾಹಸಮಯ 'ಮಿಡ್ನೈಟ್ ಆಪರೇಷನ್' ಈಗ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ.
ಮಧ್ಯರಾತ್ರಿಯ ಆ ಕರಾಳ ಮುಖ
ಮೇ 5, 2026ರ ರಾತ್ರಿ ಸುಮಾರು 12:30. ಹೈದರಾಬಾದ್ನ ನಿರ್ಜನ ರಸ್ತೆಯೊಂದರಲ್ಲಿ ಒಬ್ಬ ಮಹಿಳೆ ಒಂಟಿಯಾಗಿ ನಿಂತಿದ್ದರು. ಸಾಧಾರಣ ಉಡುಪಿನಲ್ಲಿದ್ದ ಆಕೆಯನ್ನು ಕಂಡವರು ಯಾರೋ ಬರುವಿಕೆಗಾಗಿ ಕಾಯುತ್ತಿದ್ದಾರೆ ಎಂದು ಭಾವಿಸಿದ್ದರು. ಆದರೆ, ಆ ಮೂರು ಗಂಟೆಗಳಲ್ಲಿ (ಬೆಳಗಿನ ಜಾವ 3:30ರ ವರೆಗೆ) ನಡೆದ ಘಟನೆಗಳು ನಾಗರಿಕ ಸಮಾಜವೇ ತಲೆತಗ್ಗಿಸುವಂತಿದ್ದವು.
ಮೂರು ಗಂಟೆ, 40 ಕಿಡಿಗೇಡಿಗಳು!
ಕೇವಲ ಮೂರು ಗಂಟೆಗಳ ಅವಧಿಯಲ್ಲಿ ಆಕೆಯ ಬಳಿ ಬರೊಬ್ಬರಿ 40ಕ್ಕೂ ಹೆಚ್ಚು ಪುರುಷರು ಬಂದಿದ್ದರು. ಕೆಲವರು ಬೈಕ್ನಲ್ಲಿ, ಕೆಲವರು ಐಷಾರಾಮಿ ಕಾರುಗಳಲ್ಲಿ ಇನ್ನು ಕೆಲವರು ನಡೆದುಕೊಂಡು ಬಂದು ಆಕೆಯ ಜೊತೆ ಅಸಭ್ಯವಾಗಿ ವರ್ತಿಸಲು ಶುರು ಮಾಡಿದರು.
ಕಿರುಕುಳ ನೀಡಿದವರಲ್ಲಿ ಕೇವಲ ರೌಡಿಗಳಷ್ಟೇ ಇರಲಿಲ್ಲ; ವಿದ್ಯಾರ್ಥಿಗಳು, ಐಟಿ ಕಂಪನಿಗಳ ಉದ್ಯೋಗಿಗಳು ಮತ್ತು ಸುಶಿಕ್ಷಿತ ನಾಗರಿಕರು ಸೇರಿದ್ದರು. ಕೆಲವರು ಮದ್ಯಪಾನ ಮಾಡಿ ಬಂದು ಅಶ್ಲೀಲವಾಗಿ ಮಾತನಾಡಿಸಿದರೆ, ಇನ್ನು ಕೆಲವರು ಒಂಟಿ ಮಹಿಳೆಯನ್ನು ಕಂಡು ಸಿಕ್ಕಿದ್ದೇ ಅವಕಾಶ ಎಂದು ಮಿತಿಮೀರಿ ವರ್ತಿಸಿದರು.
ಟ್ವಿಸ್ಟ್ ನೀಡಿದ 'ಅಂಡರ್ ಕವರ್' ಆಫೀಸರ್
ಕಿಡಿಗೇಡಿಗಳಿಗೆ ತಾವು ಮಾಡುತ್ತಿರುವುದು ಅಪರಾಧ ಎನ್ನುವ ಭಯವೇ ಇರಲಿಲ್ಲ. ಆದರೆ, ರಸ್ತೆಯಲ್ಲಿ ನಿಂತಿದ್ದ ಆ ಮಹಿಳೆ ಸಾಮಾನ್ಯ ಮಹಿಳೆಯಾಗಿರಲಿಲ್ಲ; ಅವರು ಮಲ್ಕಾಜ್ಗಿರಿ ಪೊಲೀಸ್ ಕಮಿಷನರ್ ಐಪಿಎಸ್ ಸುಮತಿ. ನಗರದ ಮಹಿಳೆಯರ ಸುರಕ್ಷತೆಯ ಬಗ್ಗೆ ಸ್ವತಃ ರಿಯಾಲಿಟಿ ಚೆಕ್ ಮಾಡಲು ಅವರು ಯಾವುದೇ ಭದ್ರತೆ ಅಥವಾ ಸಮವಸ್ತ್ರವಿಲ್ಲದೆ ಅಂಡರ್ ಕವರ್ ಆಫೀಸರ್ ಆಗಿ ಕಣಕ್ಕಿಳಿದಿದ್ದರು.
ಯಾವಾಗ ಕಾಮುಕರು ಮಿತಿಮೀರಿ ವರ್ತಿಸಲು ಶುರು ಮಾಡಿದರೋ, ಸ್ವಲ್ಪ ದೂರದಲ್ಲೇ ಹೊಂಚು ಹಾಕಿ ಕುಳಿತಿದ್ದ ಸುಮತಿ ಅವರ ವಿಶೇಷ ಪೊಲೀಸ್ ತಂಡ ತಕ್ಷಣ ಅಲರ್ಟ್ ಆಯಿತು. ಸ್ಥಳದಲ್ಲೇ 40ಕ್ಕೂ ಹೆಚ್ಚು ಕಿಡಿಗೇಡಿಗಳನ್ನು ಪೊಲೀಸರು ವಶಕ್ಕೆ ಪಡೆದರು. ಕತ್ತಲಲ್ಲಿ ತಮಗೆ ಯಾರೂ ಏನೂ ಮಾಡಲಾರರು ಎಂಬ ಧೈರ್ಯದಲ್ಲಿದ್ದ ಕಾಮುಕರಿಗೆ ಕಮಿಷನರ್ ರೂಪದಲ್ಲಿ ಸಿಂಹಸ್ವಪ್ನ ಎದುರಾಗಿತ್ತು.
"ಸುರಕ್ಷತೆಯಲ್ಲಿ ಯಾವುದೇ ರಾಜಿ ಇಲ್ಲ"
ಯಶಸ್ವಿ ಕಾರ್ಯಾಚರಣೆಯ ನಂತರ ಮಾತನಾಡಿದ ಐಪಿಎಸ್ ಸುಮತಿ ಅವರು, "ಮಹಿಳೆಯರ ಸುರಕ್ಷತೆಯ ವಿಷಯದಲ್ಲಿ ನಾವು ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ. ಕಾಗದದ ಮೇಲಿನ ವರದಿಗಳಿಗಿಂತ ತಳಮಟ್ಟದ ವಾಸ್ತವ ನಮಗೆ ಮುಖ್ಯ. ಇಂತಹ ಸರ್ಪ್ರೈಸ್ ಆಪರೇಷನ್ಗಳು ಮುಂದೆಯೂ ಮುಂದುವರಿಯಲಿವೆ" ಎಂದು ಕಿಡಿಗೇಡಿಗಳಿಗೆ ಖಡಕ್ ಎಚ್ಚರಿಕೆ ನೀಡಿದ್ದಾರೆ.
ಕಾನೂನು ಕೇವಲ ಪುಸ್ತಕಗಳಲ್ಲಿ ಇರದೇ, ಸ್ಮಾರ್ಟ್ ಆಗಿ ಜಾರಿಯಾದಾಗ ಮಾತ್ರ ಸಮಾಜದಲ್ಲಿ ಬದಲಾವಣೆ ಸಾಧ್ಯ ಎಂಬುದಕ್ಕೆ ಐಪಿಎಸ್ ಸುಮತಿ ಅವರ ಈ ನಡೆ ಒಂದು ಜ್ವಲಂತ ಉದಾಹರಣೆ. ಒಬ್ಬ ಅಧಿಕಾರಿ ಮನಸ್ಸು ಮಾಡಿದರೆ ವ್ಯವಸ್ಥೆಯನ್ನು ಹೇಗೆ ಸುಧಾರಿಸಬಹುದು ಎಂಬುದನ್ನು ಅವರು ತೋರಿಸಿಕೊಟ್ಟಿದ್ದಾರೆ.
