ವೈಜಾಗ್ ಬಳಿ 1.35 ಲಕ್ಷ ಕೋಟಿ ರೂ. ವೆಚ್ಚದ 'ಗೂಗಲ್ ಎಐ ಡೇಟಾ ಸೆಂಟರ್'ಗೆ ಶಂಕುಸ್ಥಾಪನೆ

ಭಾರತದ ಡಿಜಿಟಲ್ ಮೂಲಸೌಕರ್ಯ ವಲಯದಲ್ಲಿ ಹೊಸ ಮೈಲಿಗಲ್ಲೊಂದು ನಿರ್ಮಾಣವಾಗಲಿದ್ದು, ಆಂಧ್ರಪ್ರದೇಶದ ವಿಶಾಖಪಟ್ಟಣಂ (ವೈಜಾಗ್) ಬಳಿ ಬರೋಬ್ಬರಿ 15 ಬಿಲಿಯನ್ ಡಾಲರ್ (ಸುಮಾರು 1.35 ಲಕ್ಷ ಕೋಟಿ ರೂ.) ವೆಚ್ಚದ 'ಗೂಗಲ್ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಡೇಟಾ ಸೆಂಟರ್‌'ಗೆ ರಾಜ್ಯದ ಮುಖ್ಯಮಂತ್ರಿ ಎನ್. ಚಂದ್ರಬಾಬು ನಾಯ್ಡು ಅವರು ಮಂಗಳವಾರ ಶಂಕುಸ್ಥಾಪನೆ ನೆರವೇರಿಸಿದ್ದಾರೆ. ಈ ಬೃಹತ್ ಯೋಜನೆಯು ಭಾರತದ ಹಾಗೂ ಈ ಭಾಗದ ಪ್ರಮುಖ ಆರ್ಥಿಕ ಬೆಳವಣಿಗೆಯ ಶಕ್ತಿಯಾಗಲಿದೆ ಎಂದು ಅವರು ಬಣ್ಣಿಸಿದ್ದಾರೆ.

ಕೇಂದ್ರ ಐಟಿ ಸಚಿವ ಅಶ್ವಿನಿ ವೈಷ್ಣವ್ ಅವರ ಉಪಸ್ಥಿತಿಯಲ್ಲಿ ನಡೆದ ಶಂಕುಸ್ಥಾಪನಾ ಸಮಾರಂಭವನ್ನು ಉದ್ದೇಶಿಸಿ ಮಾತನಾಡಿದ ಸಿಎಂ ನಾಯ್ಡು, "ಇದು ನಮ್ಮೆಲ್ಲರಿಗೂ ಐತಿಹಾಸಿಕ ಹಾಗೂ ಮಹತ್ತರವಾದ ದಿನ. 2026ರ ಏಪ್ರಿಲ್ 28 ಆಂಧ್ರಪ್ರದೇಶ ಮತ್ತು ಭಾರತದ ಇತಿಹಾಸದಲ್ಲಿ ಸದಾ ನೆನಪಿನಲ್ಲಿ ಉಳಿಯಲಿದೆ. ಗೂಗಲ್‌ನ ಈ ಎಐ ಡೇಟಾ ಸೆಂಟರ್ ದೇಶದ ಅಭಿವೃದ್ಧಿಗೆ ಹೊಸ ವೇಗ ನೀಡಲಿದೆ," ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಏಷ್ಯಾದಲ್ಲೇ ಅತಿ ದೊಡ್ಡ ಡೇಟಾ ಸೆಂಟರ್

ಉತ್ತರ ಆಂಧ್ರ ಪ್ರದೇಶದ ಹೆಮ್ಮೆಯ ಸಂಕೇತವಾಗಿ ತಲೆ ಎತ್ತಲಿರುವ ಈ 1.35 ಲಕ್ಷ ಕೋಟಿ ರೂ. ವೆಚ್ಚದ ಗೂಗಲ್ ಡೇಟಾ ಸೆಂಟರ್, ಏಷ್ಯಾದಲ್ಲೇ ಅತಿ ದೊಡ್ಡ ಸೌಲಭ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ. ಇದು ಕೇವಲ ಸಾಮಾನ್ಯ ಕಟ್ಟಡದ ಶಂಕುಸ್ಥಾಪನೆಯಲ್ಲ, ದಕ್ಷಿಣ ಭಾರತದ ಡಿಜಿಟಲ್ ಭವಿಷ್ಯದ ಅಡಿಪಾಯವಾಗಿದೆ ಎಂದು ಮುಖ್ಯಮಂತ್ರಿಗಳು ಬಣ್ಣಿಸಿದರು.

"ಇಡೀ ಜಗತ್ತು ಗೂಗಲ್‌ನಲ್ಲಿ ಹುಡುಕುತ್ತಿದ್ದರೆ, ಗೂಗಲ್ ಮಾತ್ರ ಆಂಧ್ರಪ್ರದೇಶವನ್ನು ಆಯ್ಕೆ ಮಾಡಿಕೊಂಡಿದೆ. ಇದು ಈ ನೆಲದ ಸೌಂದರ್ಯ ಮತ್ತು ಸಾಮರ್ಥ್ಯವನ್ನು ತೋರಿಸುತ್ತದೆ," ಎಂದರು. 2025ರ ಸೆಪ್ಟೆಂಬರ್‌ನಲ್ಲಿ ಆರಂಭವಾದ ಈ ಯೋಜನೆಯು 2028ರ ಸೆಪ್ಟೆಂಬರ್ 28 ರಂದು ಪ್ರಧಾನಿ ನರೇಂದ್ರ ಮೋದಿ ಅವರಿಂದ ಉದ್ಘಾಟನೆಗೊಳ್ಳಲಿದೆ ಎಂದು ಮಾಹಿತಿ ನೀಡಿದರು.

ಪ್ರತಿಯೊಬ್ಬರಿಗೂ 'ಎಐ' ವೈಯಕ್ತಿಕ ಸಹಾಯಕ

ಗೂಗಲ್‌ನ ಹೊಸ ಆವಿಷ್ಕಾರಗಳೊಂದಿಗೆ ವಿವಿಧ ಕ್ಷೇತ್ರಗಳಲ್ಲಿ ಅತ್ಯುತ್ತಮ ಮಾದರಿಗಳನ್ನು ರೂಪಿಸುವ ಗುರಿಯನ್ನು ರಾಜ್ಯ ಹೊಂದಿದೆ ಎಂದ ನಾಯ್ಡು, "ಶೀಘ್ರದಲ್ಲೇ ಪ್ರತಿಯೊಬ್ಬ ನಾಗರಿಕನಿಗೂ ಎಐ (AI) ವೈದ್ಯರು, ಎಐ ವೈಯಕ್ತಿಕ ಸಹಾಯಕರು ಲಭ್ಯವಾಗಲಿದ್ದಾರೆ. ನನ್ನ ಬಳಿ ಈಗ ನಾಲ್ವರು ಐಎಎಸ್ ಕಾರ್ಯದರ್ಶಿಗಳಿದ್ದಾರೆ. ಆದರೆ, ನಾಳೆಯಿಂದ ಅವರೆಲ್ಲರಿಗಿಂತ ಮೇಲಾಗಿ ಕೆಲಸ ಮಾಡುವ ಎಐ ಸಹಾಯಕನನ್ನು ನಾನು ಹೊಂದಲಿದ್ದೇನೆ," ಎಂದು ಹೇಳಿದರು.

ಈ ಬೃಹತ್ ಯೋಜನೆ ಸಾಕಾರಗೊಳ್ಳಲು ಪ್ರಧಾನಿ ಮೋದಿ ಮತ್ತು ಸಚಿವ ಅಶ್ವಿನಿ ವೈಷ್ಣವ್ ಅವರ ಸಹಕಾರವನ್ನು ಸ್ಮರಿಸಿದ ಸಿಎಂ ನಾಯ್ಡು, ತಂತ್ರಜ್ಞಾನದ ಬಗ್ಗೆ ಪ್ರಧಾನಿಯವರ ದೂರದೃಷ್ಟಿಯನ್ನು ಶ್ಲಾಘಿಸಿದರು. ಆಂಧ್ರಪ್ರದೇಶವು ದೇಶದಲ್ಲೇ ಅತ್ಯುತ್ತಮ ನೀತಿಗಳನ್ನು ಜಾರಿಗೆ ತರುತ್ತಿದ್ದು, ಜಲ, ಭೂಮಿ ಮತ್ತು ಹಸಿರು ಇಂಧನದ ಸಮೃದ್ಧಿಯನ್ನು ಹೊಂದಿದೆ ಎಂದು ಒತ್ತಿ ಹೇಳಿದರು.

ಯೋಜನೆಯ ಮುಖ್ಯಾಂಶಗಳು

1 ಗಿಗಾವ್ಯಾಟ್ (GW) ಸಾಮರ್ಥ್ಯದ ಈ ಡೇಟಾ ಸೆಂಟರ್, ಭಾರತದ ಡಿಜಿಟಲ್ ಮೂಲಸೌಕರ್ಯ ಬೆಳವಣಿಗೆಯಲ್ಲಿ ಪ್ರಮುಖ ಹೆಜ್ಜೆಯಾಗಿದೆ.

* ಇದು ದೇಶದ ಅತಿದೊಡ್ಡ ಎಐ ಡೇಟಾ ಸೆಂಟರ್‌ಗಳಲ್ಲಿ ಒಂದಾಗಲಿದ್ದು, ಸುಧಾರಿತ ಎಐ ಕ್ಲೌಡ್ ಮೂಲಸೌಕರ್ಯ ಮತ್ತು ಬೃಹತ್ ಪ್ರಮಾಣದ ಡೇಟಾ ಶೇಖರಣಾ ಸಾಮರ್ಥ್ಯವನ್ನು ಒದಗಿಸಲಿದೆ.

* ತರ್ಲುವಾಡ, ಅಡವಿವರಂ ಮತ್ತು ರಾಂಬಿಲ್ಲಿ ಗ್ರಾಮಗಳ ವ್ಯಾಪ್ತಿಯ 600 ಎಕರೆ ಪ್ರದೇಶದಲ್ಲಿ ಖಾಸಗಿ ಪಾಲುದಾರರೊಂದಿಗೆ ಈ ಸೌಲಭ್ಯವನ್ನು ನಿರ್ಮಿಸಲಾಗುತ್ತಿದೆ.

* ಭವಿಷ್ಯದಲ್ಲಿ ಒಟ್ಟು 6.5 ಗಿಗಾವ್ಯಾಟ್ ಸಾಮರ್ಥ್ಯದ ಮಲ್ಟಿ-ಗಿಗಾವ್ಯಾಟ್ ಡಿಜಿಟಲ್ ಪರಿಸರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವ ಮೂಲಕ ಆಂಧ್ರಪ್ರದೇಶವನ್ನು ಪ್ರಮುಖ ಡೇಟಾ ಹಬ್ ಆಗಿ ರೂಪಿಸುವ ದೀರ್ಘಕಾಲೀನ ಗುರಿಯನ್ನು ರಾಜ್ಯ ಸರ್ಕಾರ ಹೊಂದಿದೆ.