ಕುನೊ ರಾಷ್ಟ್ರೀಯ ಉದ್ಯಾನದಲ್ಲಿ ಐದು ಮರಿಗಳಿಗೆ ಜನ್ಮ ನೀಡಿದ ಹೆಣ್ಣು ಚೀತಾ ಜ್ವಾಲಾ.
5 ಮರಿಗಳಿಗೆ ಜನ್ಮ ನೀಡಿದ 'ಜ್ವಾಲಾ': ಭಾರತದಲ್ಲಿ ಅರ್ಧಶತಕ ಗಡಿ ದಾಟಿದ ಚೀತಾಗಳ ಸಂಖ್ಯೆ
ನಮೀಬಿಯಾದಿಂದ ಭಾರತಕ್ಕೆ ಸ್ಥಳಾಂತರಗೊಂಡಿದ್ದ ಹೆಣ್ಣು ಚೀತಾ ಜ್ವಾಲಾ, ಕುನೋ ರಾಷ್ಟ್ರೀಯ ಉದ್ಯಾನವನದ ಪರಿಸರಕ್ಕೆ ಅತ್ಯುತ್ತಮವಾಗಿ ಹೊಂದಿಕೊಂಡಿದೆ. ಇದೀಗ ಯಶಸ್ವಿಯಾಗಿ ಮೂರನೇ ಬಾರಿಗೆ ತಾಯಿಯಾಗಿದೆ.
ಭಾರತದ ಮಹತ್ವಾಕಾಂಕ್ಷೆಯ 'ಪ್ರಾಜೆಕ್ಟ್ ಚೀತಾ' ಯೋಜನೆಗೆ ಮತ್ತೊಂದು ಭಾರಿ ಯಶಸ್ಸು ಸಿಕ್ಕಿದ್ದು, ದೇಶದಲ್ಲಿ ಚೀತಾಗಳ ಒಟ್ಟು ಸಂಖ್ಯೆ ಅರ್ಧಶತಕದ ಗಡಿ ದಾಟಿದೆ. ನಮೀಬಿಯಾದಿಂದ ತರಲಾಗಿದ್ದ 'ಜ್ವಾಲಾ' ಹೆಸರಿನ ಹೆಣ್ಣು ಚೀತಾ ಮಧ್ಯಪ್ರದೇಶದ ಕುನೋ ರಾಷ್ಟ್ರೀಯ ಉದ್ಯಾನವನದಲ್ಲಿ ಐದು ಮುದ್ದಾದ ಮರಿಗಳಿಗೆ ಜನ್ಮ ನೀಡಿದೆ. ಈ ಮೂಲಕ ವನ್ಯಜೀವಿ ಸಂರಕ್ಷಣೆಯ ಇತಿಹಾಸದಲ್ಲಿ ಭಾರತವು ಮತ್ತೊಂದು ಐತಿಹಾಸಿಕ ಹಾಗೂ ಹೃದಯಸ್ಪರ್ಶಿ ಮೈಲಿಗಲ್ಲನ್ನು ತಲುಪಿದಂತಾಗಿದೆ.
ನಮೀಬಿಯಾದಿಂದ ಭಾರತಕ್ಕೆ ಸ್ಥಳಾಂತರಗೊಂಡಿದ್ದ ಹೆಣ್ಣು ಚೀತಾ ಜ್ವಾಲಾ, ಕುನೋ ರಾಷ್ಟ್ರೀಯ ಉದ್ಯಾನವನದ ಪರಿಸರಕ್ಕೆ ಅತ್ಯುತ್ತಮವಾಗಿ ಹೊಂದಿಕೊಂಡಿದೆ. ಇದೀಗ ಯಶಸ್ವಿಯಾಗಿ ಮೂರನೇ ಬಾರಿಗೆ ತಾಯಿಯಾಗುವ ಮೂಲಕ ಪ್ರಾಜೆಕ್ಟ್ ಚೀತಾ ಯೋಜನೆಯ ಮುನ್ನಡೆಗೆ ಬಹುದೊಡ್ಡ ಕೊಡುಗೆ ನೀಡಿದೆ. ಒಂದೇ ಬಾರಿಗೆ ಐದು ಆರೋಗ್ಯಕರ ಮರಿಗಳಿಗೆ ಜನ್ಮ ನೀಡಿರುವುದು ಅರಣ್ಯ ಇಲಾಖೆ ಅಧಿಕಾರಿಗಳು ಹಾಗೂ ವನ್ಯಜೀವಿ ಪ್ರೇಮಿಗಳಲ್ಲಿ ಹರ್ಷ ಮೂಡಿಸಿದೆ. ಇದು ಭಾರತದ ನೆಲದಲ್ಲಿ ಚೀತಾಯೊಂದು ಯಶಸ್ವಿಯಾಗಿ ಮರಿಗಳಿಗೆ ಜನ್ಮ ನೀಡಿದ ಹತ್ತನೇ ಹೆರಿಗೆಯಾಗಿದೆ.
53ಕ್ಕೇರಿದ ಒಟ್ಟು ಚೀತಾಗಳ ಸಂಖ್ಯೆ
ಹೊಸದಾಗಿ ಜನಿಸಿದ ಈ ಐದು ಮರಿಗಳೊಂದಿಗೆ, ಭಾರತದ ನೆಲದಲ್ಲಿಯೇ ಜನಿಸಿ ಆರೋಗ್ಯವಾಗಿರುವ ಚೀತಾ ಮರಿಗಳ ಒಟ್ಟು ಸಂಖ್ಯೆ 33ಕ್ಕೆ ಏರಿಕೆಯಾಗಿದೆ. ಇದರೊಂದಿಗೆ ಕುನೋ ರಾಷ್ಟ್ರೀಯ ಉದ್ಯಾನವನದಲ್ಲಿರುವ ಒಟ್ಟು ಚೀತಾಗಳ ಸಂಖ್ಯೆ 53ಕ್ಕೆ ತಲುಪಿದ್ದು, ಹೆಮ್ಮೆಯಿಂದ ಅರ್ಧಶತಕದ ಗಡಿಯನ್ನು ದಾಟಿದೆ. ಭಾರತದ ಅರಣ್ಯಗಳಲ್ಲಿ ಅಳಿವಿನಂಚಿನಲ್ಲಿದ್ದ ಚೀತಾಗಳ ಸಂತತಿಯನ್ನು ಮರುಸೃಷ್ಟಿಸುವ ಉದ್ದೇಶದಿಂದ ಆರಂಭಿಸಲಾದ ಈ ಯೋಜನೆಯು ನಿರಂತರವಾಗಿ ಸಕಾರಾತ್ಮಕ ಫಲಿತಾಂಶಗಳನ್ನು ನೀಡುತ್ತಿದೆ.
ಸಿಬ್ಬಂದಿಯ ಶ್ರಮಕ್ಕೆ ಒಲಿದ ಯಶಸ್ಸು
ಈ ಐತಿಹಾಸಿಕ ಸಾಧನೆಯ ಹಿಂದೆ ಹಗಲಿರುಳು ಶ್ರಮಿಸಿದ ಪಶುವೈದ್ಯರು, ಕ್ಷೇತ್ರ ಸಿಬ್ಬಂದಿ ಹಾಗೂ ತಳಮಟ್ಟದ ಕಾರ್ಮಿಕರ ಪಾತ್ರ ಬಹಳ ದೊಡ್ಡದಿದೆ. ನಿರಂತರ ನಿಗಾ, ಅತ್ಯುತ್ತಮ ಆರೈಕೆ ಹಾಗೂ ಕಾಡುಪ್ರಾಣಿಗಳಿಗೆ ಸೂಕ್ತ ವಾತಾವರಣ ನಿರ್ಮಿಸಿಕೊಡುವಲ್ಲಿ ಅವರೆಲ್ಲರೂ ಶ್ರಮ ವಹಿಸಿದ್ದರು. ಹೊಸದಾಗಿ ಜನಿಸಿರುವ ಮರಿಗಳು ಹಾಗೂ ತಾಯಿ ಜ್ವಾಲಾ ಸಂಪೂರ್ಣ ಆರೋಗ್ಯದಿಂದಿದ್ದು, ಭವಿಷ್ಯದಲ್ಲಿ ಇವು ಭಾರತದ ಕಾಡುಗಳಲ್ಲಿ ಬಲಿಷ್ಠವಾಗಿ ಬೆಳೆದು ಸ್ವಚ್ಛಂದವಾಗಿ ವಿಹರಿಸಲಿವೆ ಎಂದು ಅಧಿಕಾರಿಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
