ಉತ್ತರ ಭಾರತದಲ್ಲಿ ಜಲಾಶಯಗಳು ಶೇ.70ರಷ್ಟು ಭರ್ತಿ, ದಕ್ಷಿಣದಲ್ಲಿ ನೀರಿನ ಕೊರತೆ ಹೆಚ್ಚಳ

ದೇಶಾದ್ಯಂತ ಮುಂಗಾರು ಮಳೆಯ ಪ್ರಮಾಣದಲ್ಲಿ ಪ್ರಾದೇಶಿಕ ಅಂತರ ಹೆಚ್ಚಾಗುತ್ತಿರುವ ನಡುವೆಯೇ, ಉತ್ತರ ಭಾರತದ ಪ್ರಮುಖ ಜಲಾಶಯಗಳಲ್ಲಿನ ನೀರಿನ ಸಂಗ್ರಹ ಪ್ರಮಾಣ ಶೇ.70.3ಕ್ಕೆ ಏರಿಕೆಯಾಗಿದೆ. ಸೆಪ್ಟೆಂಬರ್ 3ರ ವೇಳೆಗೆ ಜಲಾಶಯಗಳ ಒಟ್ಟು ಸಂಗ್ರಹ ಶೇ.70.3ರಷ್ಟು ಸಾಮರ್ಥ್ಯ ತಲುಪಿದ್ದು, ಹಿಂದಿನ ವಾರ ಶೇ.67.8ರಷ್ಟಿತ್ತು ಎಂದು ಡೋಲಾಟ್ ಕ್ಯಾಪಿಟಲ್ ವರದಿ ತಿಳಿಸಿದೆ.

ಇನ್ನು ದಕ್ಷಿಣ ಭಾರತ ಮಾತ್ರ ಜಲಾಶಯ ಸಂಗ್ರಹದಲ್ಲಿ ಕುಸಿತ ದಾಖಲಿಸಿದೆ. ಸಂಗ್ರಹ ಶೇ.56.8ಕ್ಕೆ ಇಳಿದಿದ್ದು, ಸಾಮಾನ್ಯ ಮಟ್ಟಕ್ಕೆ ಹೋಲಿಸಿದರೆ ಕೊರತೆ ಶೇ.18.1ರಿಂದ ಶೇ.19.1ಕ್ಕೆ ಹೆಚ್ಚಾಗಿದೆ. ದಕ್ಷಿಣ ಭಾರತದಲ್ಲಿ ತೆಲಂಗಾಣ ಅತ್ಯಂತ ದುರ್ಬಲ ಸ್ಥಿತಿಯಲ್ಲಿದ್ದು, ಸಾಮಾನ್ಯ ಮಟ್ಟಕ್ಕೆ ಹೋಲಿಸಿದರೆ ನೀರಿನ ಸಂಗ್ರಹ ಕೊರತೆ ಶೇ.43ಕ್ಕಿಂತಲೂ ಹೆಚ್ಚಾಗಿದೆ.

ಉತ್ತರ ಭಾರತದಲ್ಲಿ 10 ವರ್ಷಗಳ ಸರಾಸರಿ ಸಂಗ್ರಹಕ್ಕೆ ಹೋಲಿಸಿದರೆ ಕೊರತೆಯ ಪ್ರಮಾಣವೂ ಸ್ವಲ್ಪ ತಗ್ಗಿದೆ. ಹಿಂದಿನ ವಾರ ಶೇ.-3.7ರಷ್ಟಿದ್ದ ವ್ಯತ್ಯಾಸ ಇದೀಗ ಶೇ.-3.3ಕ್ಕೆ ಇಳಿಕೆಯಾಗಿದೆ. ವಾರದ ನೀರಿನ ಸಂಗ್ರಹ ಏರಿಕೆ ಐತಿಹಾಸಿಕ ಋತುಮಾನ ಸರಾಸರಿಗಿಂತ ಕೊಂಚ ಹೆಚ್ಚಾಗಿದ್ದರೂ, ದೇಶದ ವಿವಿಧ ಭಾಗಗಳ ನಡುವೆ ಮಳೆ ಮತ್ತು ಜಲಾಶಯಗಳ ಸ್ಥಿತಿಯಲ್ಲಿ ಭಾರಿ ವ್ಯತ್ಯಾಸ ಮುಂದುವರಿದಿದೆ.

ಪಶ್ಚಿಮ, ಮಧ್ಯ ಭಾರತದಲ್ಲಿ ಉತ್ತಮ ಸ್ಥಿತಿ

ಪ್ರಾದೇಶಿಕವಾಗಿ ಪಶ್ಚಿಮ ಭಾರತ ಶೇ.81.2ರಷ್ಟು ಜಲಾಶಯ ಸಾಮರ್ಥ್ಯ ಭರ್ತಿಯೊಂದಿಗೆ ಮುಂಚೂಣಿಯಲ್ಲಿದೆ. ಆದರೆ 10 ವರ್ಷಗಳ ಸಾಮಾನ್ಯ ಮಟ್ಟಕ್ಕೆ ಹೋಲಿಸಿದರೆ ಹೆಚ್ಚುವರಿ ಸಂಗ್ರಹದ ಅಂತರ ಶೇ.13ರಿಂದ ಶೇ.9.9ಕ್ಕೆ ಕುಸಿದಿದೆ.

ಮಧ್ಯ ಭಾರತದಲ್ಲಿ ಜಲಾಶಯಗಳ ಸಂಗ್ರಹ ಶೇ.80.6ಕ್ಕೆ ಏರಿಕೆಯಾಗಿದ್ದು, ಸಾಮಾನ್ಯ ಮಟ್ಟಕ್ಕಿಂತ ಶೇ.6.1ರಷ್ಟು ಹೆಚ್ಚುವರಿ ಸಂಗ್ರಹವಿದೆ. ಹಿಂದಿನ ವಾರ ಈ ಹೆಚ್ಚುವರಿ ಪ್ರಮಾಣ ಶೇ.4.2ರಷ್ಟಿತ್ತು. ಪೂರ್ವ ಭಾರತದಲ್ಲೂ ಪರಿಸ್ಥಿತಿ ಸುಧಾರಿಸಿದ್ದು, ಜಲಾಶಯಗಳ ಸಂಗ್ರಹ ಶೇ.69.6ಕ್ಕೆ ತಲುಪಿದೆ. ಸಾಮಾನ್ಯ ಮಟ್ಟಕ್ಕೆ ಹೋಲಿಸಿದರೆ ಹಿಂದಿನ ವಾರ ಶೇ.-0.6ರಷ್ಟಿದ್ದ ವ್ಯತ್ಯಾಸ ಇದೀಗ ಶೇ.6.1ರಷ್ಟು ಹೆಚ್ಚುವರಿಯಾಗಿ ಮಾರ್ಪಟ್ಟಿದೆ.

ದೇಶದ ಮಳೆ ಕೊರತೆ ಶೇ.14ರಲ್ಲೇ ಸ್ಥಿರ

ದೇಶದ ಒಟ್ಟಾರೆ ಮುಂಗಾರು ಮಳೆ ಕೊರತೆ ಹಿಂದಿನ ವಾರದಂತೆಯೇ ಶೇ.14ರಲ್ಲಿದೆ. ಆದರೆ ವಿವಿಧ ಪ್ರದೇಶಗಳಲ್ಲಿನ ಮಳೆಯ ಪ್ರಮಾಣದಲ್ಲಿ ವ್ಯತ್ಯಾಸ ಮತ್ತಷ್ಟು ಹೆಚ್ಚಾಗಿದೆ.

ಪೂರ್ವ ಮತ್ತು ಈಶಾನ್ಯ ಭಾರತದಲ್ಲಿ ಮಳೆ ಕೊರತೆ ಶೇ.26ರಿಂದ ಶೇ.24ಕ್ಕೆ ಇಳಿದಿದೆ. ವಾಯವ್ಯ ಭಾರತದಲ್ಲೂ ಕೊರತೆ ಶೇ.11ರಿಂದ ಶೇ.8ಕ್ಕೆ ತಗ್ಗಿದೆ. ಇದಕ್ಕೆ ವಿರುದ್ಧವಾಗಿ ಮಧ್ಯ ಭಾರತದಲ್ಲಿ ಕೊರತೆ ಶೇ.4ರಿಂದ ಶೇ.5ಕ್ಕೆ ಹಾಗೂ ದಕ್ಷಿಣ ಪರ್ಯಾಯ ದ್ವೀಪದಲ್ಲಿ ಶೇ.24ರಿಂದ ಶೇ.27ಕ್ಕೆ ಹೆಚ್ಚಾಗಿದೆ.

ಮಳೆಯ ವ್ಯಾಪ್ತಿ ಕುಸಿತ

ಪೂರ್ವ ಮತ್ತು ಮಧ್ಯ ಭಾರತದಲ್ಲಿ ಕಡಿಮೆ ಒತ್ತಡದ ವ್ಯವಸ್ಥೆಯ ಪರಿಣಾಮ ಸಾಮಾನ್ಯಕ್ಕಿಂತ ಹೆಚ್ಚು ಮಳೆಯಾಗಿದ್ದರೆ, ದಕ್ಷಿಣ ಪರ್ಯಾಯ ದ್ವೀಪ ಮತ್ತು ಪಶ್ಚಿಮ ಭಾರತದಲ್ಲಿ ಮಳೆ ಚಟುವಟಿಕೆ ದುರ್ಬಲವಾಗಿದೆ. ಮಧ್ಯ ಉತ್ತರ ಪ್ರದೇಶದ ಮೇಲೆ ಹೊಸದಾಗಿ ರೂಪುಗೊಂಡ ಕಡಿಮೆ ಒತ್ತಡದ ಪ್ರದೇಶ ಮತ್ತು ಪೂರ್ವಕ್ಕೆ ವಿಸ್ತರಿಸಿರುವ ಮುಂಗಾರು ತಗ್ಗು ರೇಖೆಯಿಂದಾಗಿ ಪೂರ್ವ ಹಾಗೂ ಮಧ್ಯ ಭಾರತದಲ್ಲಿ ಮಳೆ ಚಟುವಟಿಕೆ ಮುಂದುವರಿದಿದೆ.

ದೇಶದಲ್ಲಿ ಕೊರತೆಯ ಮಳೆ ದಾಖಲಾದ ಪ್ರದೇಶದ ಪ್ರಮಾಣ ಶೇ.39ರಿಂದ ಶೇ.49ಕ್ಕೆ ಏರಿಕೆಯಾಗಿದೆ. ಸಾಮಾನ್ಯ ಮಳೆ ಪಡೆದ ಪ್ರದೇಶ ಶೇ.54ರಿಂದ ಶೇ.46ಕ್ಕೆ ಇಳಿದಿದೆ. ಹೆಚ್ಚುವರಿ ಹಾಗೂ ತೀವ್ರ ಕೊರತೆಯ ವರ್ಗಗಳಲ್ಲಿ ಕ್ರಮವಾಗಿ ಶೇ.5 ಮತ್ತು ಶೇ.0ರಷ್ಟು ಪ್ರದೇಶ ದಾಖಲಾಗಿದೆ.

ಖಾರಿಫ್ ಬಿತ್ತನೆ ಕೊರತೆ ಕೊಂಚ ತಗ್ಗು

ಖಾರಿಫ್ ಹಂಗಾಮಿನ ಬಿತ್ತನೆ ಪ್ರಗತಿ ಕಳೆದ ವಾರ ಸ್ವಲ್ಪ ಚೇತರಿಸಿಕೊಂಡಿದೆ. ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಒಟ್ಟಾರೆ ಬಿತ್ತನೆ ಕೊರತೆ 18.9 ಲಕ್ಷ ಹೆಕ್ಟೇರ್‌ನಿಂದ 17.7 ಲಕ್ಷ ಹೆಕ್ಟೇರ್‌ಗೆ ಇಳಿದಿದೆ. ಪ್ರಮುಖವಾಗಿ ಸಿರಿಧಾನ್ಯಗಳ ಬಿತ್ತನೆ ಪ್ರಮಾಣದಲ್ಲಿ ಕಂಡುಬಂದ ಸುಧಾರಣೆ ಇದಕ್ಕೆ ಕಾರಣವಾಗಿದೆ.

ಬೇಳೆಕಾಳುಗಳ ಬಿತ್ತನೆ ಹೆಚ್ಚುವರಿ ಪ್ರಮಾಣ ಮತ್ತಷ್ಟು ವಿಸ್ತರಿಸಿದ್ದು, ಎಣ್ಣೆಕಾಳು ಮತ್ತು ಕಬ್ಬಿನ ಬಿತ್ತನೆ ಹಿಂದಿನ ವಾರದ ಮಟ್ಟದಲ್ಲೇ ಬಹುತೇಕ ಸ್ಥಿರವಾಗಿದೆ. ಆದರೆ ಭತ್ತ ಮತ್ತು ಹತ್ತಿಯ ಬಿತ್ತನೆ ಕೊರತೆ ಮತ್ತಷ್ಟು ಹೆಚ್ಚಾಗಿದೆ.

ಸೆಪ್ಟೆಂಬರ್ ಮಧ್ಯದವರೆಗೆ ಮಳೆ ದುರ್ಬಲ?

ಭಾರತೀಯ ಹವಾಮಾನ ಇಲಾಖೆ ಮುನ್ಸೂಚನೆಯ ಪ್ರಕಾರ ಸೆಪ್ಟೆಂಬರ್ ಮಧ್ಯದವರೆಗೆ ದೇಶದಲ್ಲಿ ಮಳೆ ಚಟುವಟಿಕೆ ದುರ್ಬಲವಾಗುವ ಸಾಧ್ಯತೆಯಿದೆ. ಪೂರ್ವ ಮತ್ತು ಮಧ್ಯ ಭಾರತ ಮಾತ್ರ ಇದಕ್ಕೆ ಪ್ರಮುಖ ಅಪವಾದವಾಗಿರಲಿದ್ದು, ಜಾಗತಿಕ ಹವಾಮಾನ ಪರಿಸ್ಥಿತಿಗಳ ಒತ್ತಡದ ನಡುವೆಯೂ ದೇಶದ ವಿವಿಧ ಭಾಗಗಳಲ್ಲಿ ಮುಂಗಾರು ಮಳೆಯ ಅಂತರ ಮುಂದುವರಿಯುವ ಸಾಧ್ಯತೆಯಿದೆ.