ಆಪರೇಷನ್ ಸಿಂಧೂರ್ ರಹಸ್ಯ ಕಾರ್ಯಾಚರಣೆ: ಮೊದಲ ಬಾರಿಗೆ ಮಾಹಿತಿ ಹಂಚಿಕೊಂಡ ಜನರಲ್ ಅನಿಲ್ ಚೌಹಾಣ್
ಪ್ರಧಾನಿ ಮೋದಿ ಸೇನೆಗೆ ಸಂಪೂರ್ಣ ಸ್ವಾತಂತ್ರ್ಯ ನೀಡುತ್ತಲೇ, ಒಂದು ಸ್ಪಷ್ಟ ಸೂಚನೆಯನ್ನು ನೀಡಿದ್ದರು. ನಿಮ್ಮ ಅನುಕೂಲಕ್ಕೆ ತಕ್ಕಂತೆ ಕಾರ್ಯಾಚರಣೆ ನಡೆಸಿ, ಆದರೆ ಯಾವುದೇ ವೈಫಲ್ಯವಿರಬಾರದು ಎಂದು ಅನಿಲ್ ಚೌಹಾಣ್ ತಿಳಿಸಿದ್ದಾರೆ.
ಪಹಲ್ಗಾಮ್ನಲ್ಲಿ ನಡೆದ ಭಯೋತ್ಪಾದಕ ದಾಳಿಗೆ ಪ್ರತಿಯಾಗಿ ಭಾರತ ನಡೆಸಿದ ಆಪರೇಷನ್ ಸಿಂಧೂರ್ ಇತಿಹಾಸದ ಪುಟಗಳಲ್ಲಿ ಅಚ್ಚಳಿಯದೆ ಉಳಿಯುವಂತಹ ಸಾಹಸಗಾಥೆ. ಇದೀಗ ನಿವೃತ್ತ ಸಿಡಿಎಸ್ ಜನರಲ್ ಅನಿಲ್ ಚೌಹಾಣ್ ಅವರು ಈ ಐತಿಹಾಸಿಕ ಕಾರ್ಯಾಚರಣೆಯ ಹಿಂದಿನ ರಹಸ್ಯ ಸಿದ್ಧತೆಗಳು, ಪ್ರಧಾನಿ ನರೇಂದ್ರ ಮೋದಿ ಅವರ ದೃಢ ನಿರ್ಧಾರಗಳು ಮತ್ತು ಸೇನೆಯ ವ್ಯೂಹರಚನೆಯ ಕುರಿತು ಮೊದಲ ಬಾರಿಗೆ ವಿಸ್ತೃತ ಮಾಹಿತಿ ಹಂಚಿಕೊಂಡಿದ್ದಾರೆ.
ಪಹಲ್ಗಾಮ್ ದಾಳಿ ಭಾರತದ ಭದ್ರತಾ ವ್ಯವಸ್ಥೆಗೆ ದೊಡ್ಡ ಸವಾಲಾಗಿತ್ತು. ಗಡಿಯಾಚೆಗಿನ ಭಯೋತ್ಪಾದನೆಯನ್ನು ಬೇರುಸಹಿತ ಕಿತ್ತುಹಾಕಬೇಕು ಎಂಬ ದೃಢ ನಿರ್ಧಾರವನ್ನು ಸರ್ಕಾರ ಕೈಗೊಂಡಿತ್ತು. ಸಭೆಯಲ್ಲಿ ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ಎನ್ಎಸ್ಎ ಅಜಿತ್ ದೋವಲ್ ಮತ್ತು ಮೂರೂ ಸೇನಾಪಡೆಗಳ ಮುಖ್ಯಸ್ಥರು ಭಾಗವಹಿಸಿದ್ದರು. ಇಲ್ಲಿ ಕಾರ್ಯಾಚರಣೆಯ ನೀಲನಕ್ಷೆ ಸಿದ್ಧವಾಯಿತು. ಪ್ರಧಾನಿ ಮೋದಿ ಅವರು ಸೇನೆಗೆ ಸಂಪೂರ್ಣ ಸ್ವಾತಂತ್ರ್ಯ ನೀಡುತ್ತಲೇ, ಒಂದು ಸ್ಪಷ್ಟ ಸೂಚನೆಯನ್ನು ನೀಡಿದ್ದರು. ನಿಮ್ಮ ಅನುಕೂಲಕ್ಕೆ ತಕ್ಕಂತೆ ಕಾರ್ಯಾಚರಣೆ ನಡೆಸಿ, ಆದರೆ ಯಾವುದೇ ವೈಫಲ್ಯವಿರಬಾರದು. ನಾವು ಮಾಡುವ ಪ್ರತಿ ದಾಳಿಗೂ ನಮ್ಮ ಬಳಿ ಗಟ್ಟಿಯಾದ ಸಾಕ್ಷ್ಯವಿರಬೇಕು ಎಂದು ಅನಿಲ್ ಚೌಹಾಣ್ ಹೇಳಿದರು.
ಬಹವಾಲ್ಪುರದ ಗುರಿ: ಸವಾಲು ಮತ್ತು ವಾಯುಪಡೆಯ ಬಳಕೆ
ಆಪರೇಷನ್ ಸಿಂಧೂರ್ನ ಪ್ರಮುಖ ಆಕರ್ಷಣೆ ಎಂದರೆ ಪಾಕಿಸ್ತಾನದ ಆಳದಲ್ಲಿರುವ ಬಹವಾಲ್ಪುರದ ಮರ್ಕಜ್ ಸುಭಾನಲ್ಲಾ ಮತ್ತು ಮುರಿಡ್ಕೆಯ ಮರ್ಕಜ್ ತಯ್ಯಬಾದಂತಹ ಭಯೋತ್ಪಾದಕ ನೆಲೆಗಳ ಮೇಲಿನ ದಾಳಿ ನಡೆಸುವುದಾಗಿದೆ. ರಕ್ಷಣಾ ಸಚಿವರ ಒತ್ತಾಯದ ಮೇರೆಗೆ ಬಹವಾಲ್ಪುರವನ್ನು ಗುರಿ ಪಟ್ಟಿಗೆ ಸೇರಿಸಲಾಗಿತ್ತು. "ನಾವು ಏನಾದರೂ ದೊಡ್ಡದನ್ನು ಸಾಧಿಸಬೇಕಿದೆ" ಎಂಬ ಪ್ರಧಾನಿಯವರ ಇಚ್ಛಾಶಕ್ತಿಯೇ ಇದಕ್ಕೆ ಪ್ರೇರಣೆಯಾಗಿತ್ತು. ಈ ಗುರಿಗಳು ಗಡಿಯಿಂದ ಬಹಳ ದೂರದಲ್ಲಿದ್ದವು. ಲೋಯ್ಟರ್ ಮ್ಯುನೀಷನ್ಸ್ ಅಥವಾ ಸಾಮಾನ್ಯ ಡ್ರೋನ್ಗಳು ಅಲ್ಲಿಗೆ ತಲುಪುವುದು ಅಸಾಧ್ಯವಾಗಿತ್ತು. ಹೀಗಾಗಿ, ವಾಯುಪಡೆಯನ್ನು ಬಳಸುವ ಅನಿವಾರ್ಯತೆ ಸೃಷ್ಟಿಯಾಯಿತು. ಇದು ಭಾರತದ ಸೇನೆಯ ತಾಂತ್ರಿಕ ಸಿದ್ಧತೆಯ ಪರಾಕಾಷ್ಠೆಯನ್ನು ಪ್ರದರ್ಶಿಸಿತು ಎಂದರು.
ಅನಿರೀಕ್ಷಿತ ಆಘಾತ: ರಾತ್ರಿಯ ಕಾರ್ಯಾಚರಣೆಯ ತಂತ್ರ
ಕಾರ್ಯಾಚರಣೆಯ ಯಶಸ್ಸಿನಲ್ಲಿ ರಾತ್ರಿಯ ಸಮಯ ನಿರ್ಣಾಯಕ ಪಾತ್ರ ವಹಿಸಿತು. ಶತ್ರುಗಳಿಗೆ ಕನಿಷ್ಠ ಹಾನಿಯ ಮುನ್ಸೂಚನೆ ಸಿಗಬಾರದು ಮತ್ತು ನಾಗರಿಕರ ಸಾವು-ನೋವುಗಳನ್ನು ಕನಿಷ್ಠಗೊಳಿಸಬೇಕು ಎಂಬ ಮಾನವೀಯ ದೃಷ್ಟಿಕೋನವನ್ನು ಸರ್ಕಾರ ಹೊಂದಿತ್ತು. ಸಂಪೂರ್ಣ ಕತ್ತಲೆಯಲ್ಲಿ ದಾಳಿ ನಡೆಸುವಾಗ ಸಾಕ್ಷ್ಯಗಳನ್ನು ಸಂಗ್ರಹಿಸುವುದು ಹೇಗೆ ಎಂಬ ಚಿಂತೆ ಸೇನಾಧಿಕಾರಿಗಳಲ್ಲಿ ಇತ್ತು. ಆದರೆ, ತಮ್ಮ ಸಾಮರ್ಥ್ಯದ ಮೇಲಿದ್ದ ಅಚಲ ವಿಶ್ವಾಸದಿಂದ ಸೇನೆ ಈ ಅಪಾಯಕಾರಿ ನಿರ್ಧಾರವನ್ನು ಕೈಗೊಂಡಿತು. ಇದು ಪಾಕಿಸ್ತಾನದ ಆಡಳಿತಕ್ಕೆ ಅನಿರೀಕ್ಷಿತ ಆಘಾತವನ್ನು ನೀಡಿತು. 2025ರ ಮೇ 7ರ ಮುಂಜಾನೆ, ಭಾರತೀಯ ವಾಯುಪಡೆ ಮತ್ತು ವಿಶೇಷ ಪಡೆಗಳು ಜಂಟಿಯಾಗಿ ಒಂಬತ್ತು ಭಯೋತ್ಪಾದಕ ನೆಲೆಗಳ ಮೇಲೆ ಪ್ರಹಾರ ನಡೆಸಿದವು. ಈ ಕಾರ್ಯಾಚರಣೆಯಲ್ಲಿ 100ಕ್ಕೂ ಹೆಚ್ಚು ಭಯೋತ್ಪಾದಕರು ಹತರಾದರು. ಜೈಶ್-ಎ-ಮೊಹಮ್ಮದ್ನಂತಹ ಸಂಘಟನೆಗಳ ತಾಣಗಳು ಧ್ವಂಸವಾದವು. ಜನರಲ್ ಚೌಹಾಣ್ ಅವರ ಪ್ರಕಾರ, ಯಾವುದೇ ರಾಜಕೀಯ ಒತ್ತಡವಿಲ್ಲದೆ, ಕೇವಲ ದೇಶದ ಭದ್ರತೆ ಮತ್ತು ವೈಫಲ್ಯರಹಿತ ಕಾರ್ಯನಿರ್ವಹಣೆಯ ಮೇಲೆ ಮಾತ್ರವೇ ಪ್ರಧಾನಿ ಗಮನಹರಿಸಿದ್ದರು. ಇದು ಸೇನಾ ಪಡೆಯ ಆತ್ಮವಿಶ್ವಾಸವನ್ನು ಇಮ್ಮಡಿಗೊಳಿಸಿತ್ತು ಎಂದು ತಿಳಿಸಿದರು.
ಈ ಕಾರ್ಯಾಚರಣೆಯ ಮಹತ್ವವೇನು?
ಪ್ರಧಾನಿಯವರು ತಕ್ಷಣವೇ ದಾಳಿ ಮಾಡುವಂತೆ ಒತ್ತಡ ಹೇರದೆ, ಸೇನೆಗೆ ಸಂಪೂರ್ಣ ಸ್ವಾತಂತ್ರ್ಯ ನೀಡಿದ್ದು ಕಾರ್ಯಾಚರಣೆಯ ಯಶಸ್ಸಿಗೆ ಕಾರಣವಾಯಿತು. ದೂರದ ಗುರಿಗಳನ್ನು ತಲುಪಲು ವಾಯುಪಡೆಯ ಸಮರ್ಥ ಬಳಕೆ ಮತ್ತು ನಿಖರ ದಾಳಿಯ ತಂತ್ರಗಳ ಕುರಿತು ಕಾರ್ಯತಂತ್ರ ರೂಪಿಸಲಾಯಿತು. ಆಧುನಿಕ ಯುದ್ಧತಂತ್ರದಲ್ಲಿ ಸಾಕ್ಷ್ಯಗಳ ಮಹತ್ವವನ್ನು ಅರಿತಿದ್ದ ಭಾರತ, ಪ್ರತಿಯೊಂದು ಹಂತವನ್ನೂ ದಾಖಲಿಸಿತ್ತು. ಮೂರೂ ಸೇನಾಪಡೆಗಳ ನಡುವೆ ಇದ್ದ ಅಪ್ರತಿಮ ಸಮನ್ವಯವು ಈ ಕಾರ್ಯಾಚರಣೆಯನ್ನು ಯಶಸ್ವಿಗೊಳಿಸಿತು ಎಂದು ವಿವರಿಸಿದರು.
