E20 ಪೆಟ್ರೋಲ್ ಸತ್ಯವೇನು? ಕಾರುಗಳ ಇಂಜಿನ್‌ಗೆ ಅಪಾಯವೇ?

ನಿಮ್ಮ ಕಾರಿನ ಮೈಲೇಜ್ ಇದ್ದಕ್ಕಿದ್ದಂತೆ ಕಡಿಮೆ ಆಗ್ತಿದ್ಯಾ? ಇಂಜಿನ್ ಮೊದಲಿನಂತೆ ಸ್ಮೂತ್ ಆಗಿ ಕೆಲಸ ಮಾಡ್ತಿಲ್ವಾ? ಬೆಳಿಗ್ಗೆ ಸ್ಟಾರ್ಟ್ ಮಾಡುವಾಗ ಹೆಚ್ಚು ಸಮಯ ತೆಗೆದುಕೊಳ್ಳುತ್ತಿದೆಯೇ? ಅಥವಾ ಯೂಟ್ಯೂಬ್, ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್‌ನಲ್ಲಿ "E20 ಪೆಟ್ರೋಲ್ ನಿಮ್ಮ ಕಾರಿನ ಇಂಜಿನ್ ಹಾಳು ಮಾಡುತ್ತೆ", "ಕಂಪನಿಗಳು ಸತ್ಯ ಮುಚ್ಚಿಡುತ್ತೆ", "E20 ಪೆಟ್ರೋಲ್ ಹಾಕಿಸಿದ್ರೆ ಲಕ್ಷಾಂತರ ರೂಪಾಯಿ ಖರ್ಚು ಬರುತ್ತೆ" ಅನ್ನುವಂತಹ ಶೀರ್ಷಿಕೆಗಳಿರುವ ವಿಡಿಯೋಗಳನ್ನು ನೋಡಿ ನೀವು ಆತಂಕಕ್ಕೊಳಗಾಗಿದ್ದೀರಾ? ಕಳೆದ ಒಂದು ವರ್ಷದಿಂದ ಭಾರತದಲ್ಲಿ E20 ಪೆಟ್ರೋಲ್ ಬಗ್ಗೆ ಭಾರಿ ಚರ್ಚೆ ನಡೀತಾನೆ ಇದೆ. ಒಂದು ಕಡೆ ಸರ್ಕಾರ E20 ಸಂಪೂರ್ಣ ಸುರಕ್ಷಿತ ಅಂತ ಹೇಳ್ತಿದ್ದರೆ, ಮತ್ತೊಂದು ಕಡೆ ಕೆಲವು ಯೂಟ್ಯೂಬ್ ಚಾನೆಲ್‌ಗಳು ಇದು ನಿಮ್ಮ ಕಾರಿನ ಇಂಜಿನ್‌ಗಳಿಗೆ ದೊಡ್ಡ ಅಪಾಯ ಅಂತ ಹೇಳ್ತಿವೆ. ಹಾಗಾದರೆ ಸತ್ಯ ಯಾವುದು? ಸರ್ಕಾರ ಸುಳ್ಳು ಹೇಳ್ತಿದೀಯಾ ಅಥವಾ ಸಾಮಾಜಿಕ ಜಾಲತಾಣಗಳಲ್ಲಿ ಸುಳ್ಳು ಸುದ್ದಿಗಳು ಹರಡುತಿದೆಯಾ? ನಿಮ್ಮ ಕಾರಿಗೆ E20 ನಿಜಕ್ಕೂ ಡೇಂಜರಸ್ ಅಥವಾ ಇದು ಅನಗತ್ಯ ಭಯನಾ? ಈ ಎಲ್ಲಾ ಪ್ರಶ್ನೆಗಳಿಗೆ ವೈಜ್ಞಾನಿಕ ಆಧಾರ, ಸರ್ಕಾರಿ ದಾಖಲೆಗಳು ಹಾಗೂ ಆಟೋಮೊಬೈಲ್ ತಜ್ಞರ ಅಭಿಪ್ರಾಯಗಳೊಂದಿಗೆ ನಾವು ಉತ್ತರ ಹುಡುಕಬೇಕಾಗಿದೆ.

ಏನಿದು E20 ಇಂಧನ?

ಮೊದಲಿಗೆ E20 ಅಂದ್ರೆ ಏನು ಅಂತ ನೋಡೋಣ. E20 ಅಂದ್ರೆ 80% ಪೆಟ್ರೋಲ್ ಮತ್ತು 20% ಎಥನಾಲ್ ಮಿಶ್ರಣ. ಇಲ್ಲಿ ಎಥನಾಲ್ ಅಂದ್ರೆ ಪೆಟ್ರೋಲಿಯಂ ಉತ್ಪನ್ನ ಅಲ್ಲ; ಇದು ಸಸ್ಯಗಳಿಂದ ತಯಾರಾಗುವಂತಹ ಜೈವಿಕ ಇಂಧನ. ಭಾರತದಲ್ಲಿ ಮುಖ್ಯವಾಗಿ ಕಬ್ಬು, ಜೋಳ, ಮೆಕ್ಕೆಜೋಳ ಹಾಗೂ ಇತರ ಕೃಷಿ ಉತ್ಪನ್ನಗಳಿಂದ ಎಥನಾಲ್ ತಯಾರಿಸಲಾಗುತ್ತದೆ. ಅಂದರೆ ಪೆಟ್ರೋಲ್ ಜೊತೆಗೆ ಕೃಷಿ ಮೂಲದ ಇಂಧನವನ್ನು ಸೇರಿಸಿ ಬಳಸೋದನ್ನೇ E20 ಅಂತ ಕರೆಯಲಾಗುತ್ತೆ. ಆದರೆ ಪ್ರಶ್ನೆ ಏನಂದ್ರೆ, ಇಷ್ಟು ವರ್ಷ ಚೆನ್ನಾಗಿದ್ದಂತ ಪೆಟ್ರೋಲ್ ಬಿಟ್ಟು ಸರ್ಕಾರ ಈಗ ಯಾಕೆ ಈ ನಿರ್ಧಾರ ತಗೊಳ್ತು? ಇದಕ್ಕೆ ಪ್ರಮುಖ ಮೂರು ಕಾರಣಗಳಿವೆ. ಮೊದಲನೆಯದಾಗಿ, ಭಾರತ ತನಗೆ ಬೇಕಾದಂತಹ 85% ಕಚ್ಚಾತೈಲವನ್ನು ವಿದೇಶದಿಂದ ಇಂಪೋರ್ಟ್ ಮಾಡಿಕೊಳ್ಳುತ್ತೆ. ಜಾಗತಿಕ ಮಾರುಕಟ್ಟೆಯಲ್ಲಿ ಬೆಲೆ ಜಾಸ್ತಿ ಆದಾಗ ದೇಶದ ಆರ್ಥಿಕತೆಗೆ ಹೊಡೆತ ಬೀಳುತ್ತೆ. ಅದೇ ಕಾರಣಕ್ಕೆ ದೇಶದಲ್ಲೇ ಎಥನಾಲ್ ತಯಾರು ಮಾಡಿದ್ರೆ ವಿದೇಶಿ ಅವಲಂಬನೆ ಕಡಿಮೆ ಆಗುತ್ತೆ, ದೇಶದ ಹಣ ದೇಶದಲ್ಲೇ ಉಳಿಯುತ್ತೆ. ಇನ್ನು ಎರಡನೇ ಕಾರಣ, ಕಬ್ಬು ಹಾಗೂ ಮೆಕ್ಕೆಜೋಳ ಬೆಳೆಯುವ ರೈತರಿಗೆ ಈಗ ಸಕ್ಕರೆ ಫ್ಯಾಕ್ಟರಿ ಮಾತ್ರ ಅಲ್ಲದೆ ಎಥನಾಲ್ ಪ್ಲಾಂಟ್‌ಗಳು ಕೂಡ ದೊಡ್ಡ ಗ್ರಾಹಕರಾಗುತ್ತವೆ. ಮೂರನೇ ಕಾರಣ ಪರಿಸರ ಕಾಳಜಿ. ಎಥನಾಲ್ ಪೆಟ್ರೋಲ್‌ಗಿಂತ ಕ್ಲೀನ್ ಆಗಿ ಉರಿಯುವುದರಿಂದ ವಾಯು ಮಾಲಿನ್ಯದ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗುತ್ತದೆ. ಪ್ರಧಾನಿ ನರೇಂದ್ರ ಮೋದಿಯವರು 2030ಕ್ಕೆ ಇಟ್ಟುಕೊಂಡಿದ್ದ ಈ ಟಾರ್ಗೆಟ್ ಅನ್ನು ಐದು ವರ್ಷ ಮುಂಚಿತವಾಗಿಯೇ, ಅಂದರೆ 2025-26ರ ಒಳಗಾಗಿ ದೇಶಾದ್ಯಂತ ಜಾರಿಗೆ ತರ್ತೀವಿ ಅಂತ ಘೋಷಣೆ ಮಾಡಿದ್ರು. ಇವತ್ತು ಕರ್ನಾಟಕದ ಆಲ್ಮೋಸ್ಟ್ ಎಲ್ಲಾ ಪೆಟ್ರೋಲ್ ಬಂಕ್‌ಗಳಲ್ಲೂ ನೀವು ಹಾಕಿಸಿಕೊಳ್ಳುತ್ತಿರೋದೆ ಈ E20 ಪೆಟ್ರೋಲ್.

ಸೋಷಿಯಲ್ ಮೀಡಿಯಾ ಆರೋಪಗಳು ಮತ್ತು ವಾಸ್ತವ

ಎಲ್ಲವೂ ಓಕೆ, ಆದರೆ ಜನ ಮಾತ್ರ ಇಷ್ಟೊಂದು ಹೆದರುತ್ತಿರೋದಾದರೂ ಯಾಕೆ? ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿರುವ ಪ್ರಮುಖ ಆರೋಪಗಳೆಂದರೆ—ಎಥನಾಲ್ ಇಂಜಿನ್ ಒಳಗಿರುವ ರಬ್ಬರ್ ಪೈಪ್‌ಗಳನ್ನು ಕರಗಿಸಿ ಇಂಜಿನ್ ಹಾಳು ಮಾಡುತ್ತೆ, ಮೈಲೇಜ್ 30 ರಿಂದ 40 ಶೇಕಡ ಬಿದ್ದು ಹೋಗುತ್ತೆ, ಇಂಜಿನ್ ಒಳಗಡೆ ವಿಚಿತ್ರ ಶಬ್ದ ಬರುತ್ತೆ, ಎಥನಾಲ್ ಗಾಳಿಯಲ್ಲಿರುವ ನೀರನ್ನು ಹೀರಿಕೊಂಡು ಫ್ಯೂಲ್ ಟ್ಯಾಂಕ್ ತುಕ್ಕು ಹಿಡಿಯುವಂತೆ ಮಾಡುತ್ತೆ ಮತ್ತು E20 ಪೆಟ್ರೋಲ್ ಹಾಕಿಸಿದರೆ ಕಾರು ಕಂಪನಿಗಳು ವಾರಂಟಿ ಹಾಗೂ ಇನ್ಶೂರೆನ್ಸ್ ಕೊಡಲ್ಲ ಅನ್ನೋದು. ಈ ಬಗ್ಗೆ ಕೇಂದ್ರ ಪೆಟ್ರೋಲಿಯಂ ಸಚಿವಾಲಯ ಮತ್ತು ARAI (ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾ) ಸಾವಿರಾರು ವಾಹನಗಳನ್ನು ಬಳಸಿ 40 ಸಾವಿರ ಕಿಲೋಮೀಟರ್‌ಗೂ ಹೆಚ್ಚು ಓಡಿಸಿ ಟೆಸ್ಟ್ ಮಾಡಿದೆ. ಅವರ ರಿಪೋರ್ಟ್ ಪ್ರಕಾರ ಇಂಜಿನ್‌ಗೆ ಯಾವುದೇ ಅಸಹಜ ಹಾನಿ ಸಂಭವಿಸಿಲ್ಲ.

ಎಥನಾಲ್ ಎನರ್ಜಿ ವ್ಯಾಲ್ಯೂ ಸ್ವಲ್ಪ ಕಡಿಮೆ ಇರೋದ್ರಿಂದ ಮೈಲೇಜ್‌ನಲ್ಲಿ ವ್ಯತ್ಯಾಸ ಆಗೋದು ನಿಜ. ಆದರೆ ರೀಲ್ಸ್‌ನಲ್ಲಿ ಹೇಳೋ ತರ ಶೇಕಡ 30-40 ರಷ್ಟು ಅಲ್ಲ, ತಾಂತ್ರಿಕವಾಗಿ ಕೇವಲ ಎರಡರಿಂದ ಆರು ಶೇಕಡದಷ್ಟು ಮಾತ್ರ ಮೈಲೇಜ್ ಕಡಿಮೆ ಆಗಬಹುದು. ಅದು ಕೂಡ ನಿಮ್ಮ ಡ್ರೈವಿಂಗ್ ಸ್ಟೈಲ್, ಟ್ರಾಫಿಕ್ ಮತ್ತು ಎಸಿ ಬಳಕೆಯ ಮೇಲೆ ಡಿಪೆಂಡ್ ಆಗಿರುತ್ತೆ. ಆಧುನಿಕ ಕಾರುಗಳಲ್ಲಿ ಎಲೆಕ್ಟ್ರಾನಿಕ್ ಕಂಟ್ರೋಲ್ ಯೂನಿಟ್ (ECU) ಮತ್ತು ಆಕ್ಸಿಜನ್ ಸೆನ್ಸರ್ ಇರುವುದರಿಂದ ಇಂಧನ ಸ್ಪ್ರೇಯನ್ನು ಅದು ಆಟೋಮ್ಯಾಟಿಕ್ ಆಗಿ ಕಂಟ್ರೋಲ್ ಮಾಡುತ್ತದೆ. ಹಾಗಾಗಿ ಹೊಸ ಕಾರುಗಳಿಗೆ ಯಾವುದೇ ತೊಂದರೆ ಇರೋದಿಲ್ಲ. ಇನ್ನು ತೇವಾಂಶ ಸೆಳೆಯುವ ಗುಣ ಎಥನಾಲ್‌ಗೆ ಇರುವುದು ನಿಜವಾದರೂ, ದಿನಾಲೂ ಗಾಡಿ ಓಡಿಸುವವರಿಗೆ ಇದರಿಂದ ಯಾವುದೇ ಹೆದರಿಕೆ ಬೇಡ. ವಾಹನವನ್ನು ತಿಂಗಳುಗಟ್ಟಲೆ ಅರ್ಧ ಟ್ಯಾಂಕ್ ಪೆಟ್ರೋಲ್‌ನೊಂದಿಗೆ ಮಳೆಯಲ್ಲಿ ನಿಲ್ಲಿಸಿದರೆ ಮಾತ್ರ ಈ ಸಮಸ್ಯೆ ಎದುರಾಗಬಹುದು.

ನಿಮ್ಮ ಕಾರು ಯಾವ ತಲೆಮಾರಿನದ್ದು?

ಇಲ್ಲಿ ನೀವು ಮುಖ್ಯವಾಗಿ ಗಮನಿಸಬೇಕಾದ ವಿಚಾರವೆಂದರೆ ನಿಮ್ಮ ಕಾರು ಯಾವ ಮಾಡೆಲ್‌ನದ್ದು ಎಂಬುದು. ನಿಮ್ಮದು BS6 ಅಥವಾ 2020ರ ನಂತರದ ಹೊಸ ಕಾರ್ ಆಗಿದ್ದರೆ ಯಾವುದೇ ಟೆನ್ಷನ್ ಬೇಡ. ಕಂಪನಿಗಳು ಈ ಕಾರುಗಳನ್ನು E20 ಪೆಟ್ರೋಲ್ ಮೈಂಡ್‌ಸೆಟ್‌ನಲ್ಲೇ ಡಿಸೈನ್ ಮಾಡಿವೆ, ಇದರಿಂದ ವಾರಂಟಿ ರದ್ದಾಗಲ್ಲ. ಒಂದು ವೇಳೆ ನಿಮ್ಮದು BS4 ಕಾರುಗಳಾಗಿದ್ದರೆ (2010ರ ನಂತರದ್ದು), ಇವುಗಳಲ್ಲಿ ಉತ್ತಮ ಗುಣಮಟ್ಟದ ECU ಮತ್ತು ಫ್ಯೂಯಲ್ ಪೈಪ್‌ಗಳಿರುವುದರಿಂದ ದೊಡ್ಡ ಸಮಸ್ಯೆ ಬರುವ ಸಾಧ್ಯತೆ ಕಡಿಮೆ. ಆದರೆ ನಿಮ್ಮದು BS3 ಅಥವಾ ಅದಕ್ಕಿಂತ ಹಳೆಯ ಕಾರ್ ಆಗಿದ್ದರೆ ಅಥವಾ ಕಾರ್ಬೊರೇಟರ್ ಗಾಡಿಗಳಾಗಿದ್ದರೆ ನೀವು ಸ್ವಲ್ಪ ಎಚ್ಚರಿಕೆ ವಹಿಸಬೇಕು. ಹಳೆಯ ರಬ್ಬರ್ ಪೈಪ್‌ಗಳು ಹಾಗೂ ಗ್ಯಾಸ್ಕೆಟ್‌ಗಳು ಎಥನಾಲ್‌ಗೆ ಹೊಂದಿಕೊಳ್ಳದೆ ಇರಬಹುದು. ಹಾಗಾಗಿ ಹಳೆಯ ಗಾಡಿ ಇರೋರು ಒಮ್ಮೆ ಮೆಕ್ಯಾನಿಕ್ ಹತ್ತಿರ ಹೋಗಿ棋 ಚೆಕ್ ಮಾಡಿಸಿ, ಬೇಕಿದ್ದರೆ ಪೈಪ್‌ಗಳನ್ನು ಅಪ್‌ಗ್ರೇಡ್ ಮಾಡಿಸಿಕೊಳ್ಳಿ. ಸಮಸ್ಯೆ ಇರೋದು ಇಂಧನದಲ್ಲಲ್ಲ, ಹಳೆಯ ವಾಹನದ ತಾಂತ್ರಿಕ ಮಿತಿಯಲ್ಲಿ ಅನ್ನೋದನ್ನು ನಾವು ಅರ್ಥ ಮಾಡಿಕೊಳ್ಳಬೇಕು. ವಾಸ್ತವದಲ್ಲಿ ಕೊಳಕು ಇಂಜೆಕ್ಟರ್, ಹಳೆಯ活 ಸ್ಪಾರ್ಕ್ ಪ್ಲಗ್ ಹಾಗೂ ಕಲುಷಿತ ಏರ್ ಫಿಲ್ಟರ್ ಇಟ್ಟುಕೊಂಡು ಗಾಡಿ ಓಡಿಸಿದರೆ ಯಾವುದೇ ಪೆಟ್ರೋಲ್ ಹಾಕಿದ್ರೂ ಗಾಡಿ ಹಾಳಾಗೇ ಆಗುತ್ತದೆ.

ಕರ್ನಾಟಕಕ್ಕೆ ಈ ಯೋಜನೆಯಿಂದಾಗುವ ಲಾಭಗಳೇನು?

ಈ ಇಂಧನ ಕ್ರಾಂತಿಯಿಂದ ನಮ್ಮ ಕರ್ನಾಟಕ ರಾಜ್ಯಕ್ಕಾಗುವ ಲಾಭ ಮಹತ್ವದ್ದಾಗಿದೆ. ಎಥನಾಲ್ ಉತ್ಪಾದನೆಯಲ್ಲಿ ಕರ್ನಾಟಕ ದೇಶದಲ್ಲೇ ಪ್ರಮುಖ ರಾಜ್ಯಗಳಲ್ಲಿ ಒಂದಾಗಿದೆ. ಏಷ್ಯಾದಲ್ಲೇ ದೊಡ್ಡ ಪ್ರಮಾಣದಲ್ಲಿ ಎಥನಾಲ್ ಉತ್ಪಾದನೆ ನಡೆಯುವ ಪ್ರದೇಶಗಳಲ್ಲಿ ಕರ್ನಾಟಕವು ಸೇರಿದೆ. ಇನ್ನೊಂದು ವಿಶೇಷ ಅಂದರೆ ಕಬ್ಬಿನ ಹಾಲಿನಿಂದ ನೇರವಾಗಿ ಎಥನಾಲ್ ಉತ್ಪಾದಿಸುವ ತಂತ್ರಜ್ಞಾನವನ್ನು ಅಳವಡಿಸಿಕೊಂಡಿರುವ ಕರ್ನಾಟಕದ ಮೊದಲ ಸಕ್ಕರೆ ಕಾರ್ಖಾನೆ ಇರೋದು ಬಾಗಲಕೋಟೆ ಜಿಲ್ಲೆಯ ಜಮಖಂಡಿಯಲ್ಲಿ. ಕಬ್ಬಿನ ಜೊತೆಗೆ ಮೆಕ್ಕೆಜೋಳದಿಂದಲೂ ಎಥನಾಲ್ ಉತ್ಪಾದನೆ ಸಾಧ್ಯವಿದ್ದು, ರೈತರಿಗೆ ಇದೊಂದು ಮತ್ತೊಂದು ಪರ್ಯಾಯ ಅವಕಾಶವಾಗಿದೆ. 2024ರ ಅಂಕಿಅಂಶಗಳ ಪ್ರಕಾರ ಉತ್ತರಪ್ರದೇಶ ಮತ್ತು ಮಹಾರಾಷ್ಟ್ರದ ನಂತರ ಕರ್ನಾಟಕ 56.47 ಮಿಲಿಯನ್ ಟನ್ ಕಬ್ಬು ಉತ್ಪಾದಿಸಿ ದೇಶದಲ್ಲೇ ಪ್ರಮುಖ ಸ್ಥಾನದಲ್ಲಿದೆ. ರಾಷ್ಟ್ರೀಯ ಕಬ್ಬು ಉತ್ಪಾದನೆಯಲ್ಲಿ ಕರ್ನಾಟಕದ ಪಾಲು ಶೇಕಡ 14ಕ್ಕಿಂತ ಹೆಚ್ಚಿದೆ. ಹೀಗಾಗಿ E20 ಪೆಟ್ರೋಲ್ ಕೇವಲ ಇಂಧನ ಬದಲಾವಣೆ ಮಾತ್ರವಲ್ಲ, ಇದು ರೈತರ ಆದಾಯ ಹೆಚ್ಚಿಸುವ, ಸಕ್ಕರೆ ಉದ್ಯಮಕ್ಕೆ ಹೊಸ ಮಾರುಕಟ್ಟೆ ನೀಡುವ ಮತ್ತು ಕರ್ನಾಟಕದಂತಹ ಕೃಷಿ ಆಧಾರಿತ ರಾಜ್ಯಗಳಿಗೆ ಹೊಸ ಆರ್ಥಿಕ ಅವಕಾಶ ಸೃಷ್ಟಿ ಮಾಡುವಂತಹ ಯೋಜನೆಯಾಗಿದೆ.

ತಜ್ಞರ ಮತ್ತು ಸರ್ಕಾರದ ಅಧಿಕೃತ ಬೈಟ್ ಕೋಟ್‌ಗಳು

ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವರು: "ಬಯೋಫ್ಯೂಲ್ ಬ್ಲೆಂಡಿಂಗ್ ಇವತ್ತು ದೇಶದಲ್ಲಿ ದೊಡ್ಡ ಕ್ರಾಂತಿ ಮಾಡ್ತಿದೆ. ಎಥನಾಲ್ ಬಳಸೋದ್ರಿಂದ ಇಂಜಿನ್ ಡ್ಯಾಮೇಜ್ ಆಗುತ್ತೆ, ಫ್ಯೂಲ್ ಪಂಪ್ ಬಂದ್ ಆಗುತ್ತೆ ಅನ್ನೋದೆಲ್ಲ ಸುಳ್ಳು. ನಾವು ಸ್ವತಃ ತಂತ್ರಜ್ಞಾನವನ್ನು ಪರೀಕ್ಷಿಸಿದ್ದೇವೆ. ಫೋರ್ಡ್ ಮೋಟಾರ್ ಕಂಪನಿಯ ಕಾಲದಲ್ಲೇ ಬಯೋಫ್ಯೂಲ್ ಬಳಕೆಯ ಪ್ರಯತ್ನ ನಡೆದಿತ್ತು. ಭಾರತದಲ್ಲಿ ಇದರ ಮೊದಲ ಯೋಜನೆಯನ್ನು ಕಾಂಗ್ರೆಸ್ ಸರ್ಕಾರವೇ ರೂಪಿಸಿತ್ತು. ಇದು ಇಂಜಿನ್ ಹಾಳು ಮಾಡಲ್ಲ, ಬದಲಿಗೆ ದೇಶದ ಇಂಧನ ಸ್ವಾವಲಂಬನೆಗೆ ಇದು ಅನಿವಾರ್ಯ."

ಆಟೋಮೋಟಿವ್ ರಿಸರ್ಚ್ ಅಸೋಸಿಯೇಷನ್ ಆಫ್ ಇಂಡಿಯಾ (ARAI) ತಜ್ಞರು: "ಭಾರತದಲ್ಲಿ 2023ರ ಮುಂಚೆ ತಯಾರಾದ ವಾಹನಗಳನ್ನು ನಾವು E20 ಇಂಧನ ಬಳಸಿ ಪರೀಕ್ಷಿಸಿದ್ದೇವೆ. E10 ಗಾಗಿ ವಿನ್ಯಾಸಗೊಳಿಸಲಾದ ಈ ಹಳೆಯ ಕಾರುಗಳಲ್ಲಿ E20 ಬಳಸಿದಾಗ ಇಂಜಿನ್ ಸವಕಳಿ, ತುಕ್ಕು ಅಥವಾ ಬಿಡಿಭಾಗಗಳ ಜೀವಿತಾವಧಿಗೆ ಯಾವುದೇ ರೀತಿಯ ಗಂಭೀರ ಹಾನಿಯಾಗಿರುವುದು ನಮ್ಮ ಎಲ್ಲಾ ಪ್ಯಾರಾಮೀಟರ್‌ಗಳ ಟೆಸ್ಟಿಂಗ್‌ನಲ್ಲಿ ಕಂಡುಬಂದಿಲ್ಲ. ಸುರಕ್ಷತೆಯ ಎಲ್ಲಾ ಅಂಶಗಳನ್ನು ಗಮನದಲ್ಲಿಟ್ಟುಕೊಂಡೇ ಇದನ್ನು ಜಾರಿಗೆ ತರಲಾಗಿದೆ."

ಒಟ್ಟಿನಲ್ಲಿ ವೀಕ್ಷಕರೇ, E20 ಪೆಟ್ರೋಲ್ ಸಂಪೂರ್ಣ ಅಪಾಯಕಾರಿಯೂ ಅಲ್ಲ, ಹಾಗಂತ ಹಳೆಯ ಗಾಡಿಗಳಿಗೆ ಸಂಪೂರ್ಣ ಕೇರ್ ಫ್ರೀ ಅನ್ನೋದು ಕೂಡ ಅಲ್ಲ. ಆಧುನಿಕ ವಾಹನಗಳಿಗೆ ಇದು ನೂರಕ್ಕೆ ನೂರು ಸೇಫ್ ಇದೆ, ಹಳೆಯ ವಾಹನಗಳಿಗೆ ಸ್ವಲ್ಪ ಎಕ್ಸ್‌ಟ್ರಾ ಕೇರ್ ಬೇಕು ಅಷ್ಟೇ. ಇಂಜಿನ್ ತಕ್ಷಣಹಾಳಾಗುತ್ತೆ, ವಾರಂಟಿ ರದ್ದಾಗುತ್ತೆ ಅನ್ನೋ ಹೇಳಿಕೆಗಳಿಗೆ ಯಾವುದೇ ವೈಜ್ಞಾನಿಕ ಸಾಕ್ಷಿಗಳಿಲ್ಲ. ಇಂಜಿನ್ ಆರೋಗ್ಯವನ್ನು ನಿರ್ಧರಿಸುವುದು ಕೇವಲ ಇಂಧನ ಮಾತ್ರವಲ್ಲ; ಸರಿಯಾದ ಸಮಯಕ್ಕೆ ಸರ್ವಿಸ್, ಉತ್ತಮ ನಿರ್ವಹಣೆ ಮತ್ತು ಜವಾಬ್ದಾರಿಯುತ ಚಾಲನೆಯೂ ಅಷ್ಟೇ ಮುಖ್ಯ.