ಪಶ್ಚಿಮ ಏಷ್ಯಾದಲ್ಲಿ ಅಸ್ಥಿರತೆ: ಎಂತಹದ್ದೇ ಪರಿಸ್ಥಿತಿಗೂ ಭಾರತ ಸಿದ್ಧವಾಗಿರಬೇಕು; ರಾಜನಾಥ್ ಸಿಂಗ್

ಪಶ್ಚಿಮ ಏಷ್ಯಾದಲ್ಲಿನ ಪ್ರಸ್ತುತ ಪರಿಸ್ಥಿತಿಯು "ಅಸ್ಥಿರ"ವಾಗಿದ್ದು, ಆ ಪ್ರದೇಶದಲ್ಲಿ ದಿಢೀರನೆ ಉಂಟಾಗಬಹುದಾದ ಯಾವುದೇ ಬಿಕ್ಕಟ್ಟನ್ನು ಎದುರಿಸಲು ಭಾರತ ಸನ್ನದ್ಧವಾಗಿರಬೇಕು ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಶನಿವಾರ (ಏಪ್ರಿಲ್ 18) ಪ್ರತಿಪಾದಿಸಿದ್ದಾರೆ.

ಪಶ್ಚಿಮ ಏಷ್ಯಾದ ಪರಿಸ್ಥಿತಿಯನ್ನು ಅವಲೋಕಿಸಲು ರಚಿಸಲಾದ 'ಅನೌಪಚಾರಿಕ ಸಚಿವರ ಗುಂಪಿನ' ಉನ್ನತ ಮಟ್ಟದ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. ಸಭೆಯಲ್ಲಿ ವಿದೇಶಾಂಗ ಸಚಿವ ಎಸ್. ಜೈಶಂಕರ್, ತೈಲ ಸಚಿವ ಹರ್ದೀಪ್ ಸಿಂಗ್ ಪುರಿ, ರಸಗೊಬ್ಬರ ಸಚಿವ ಜೆ.ಪಿ. ನಡ್ಡಾ, ಗ್ರಾಹಕ ವ್ಯವಹಾರಗಳ ಸಚಿವ ಪ್ರಲ್ಹಾದ್ ಜೋಶಿ, ನಾಗರಿಕ ವಿಮಾನಯಾನ ಸಚಿವ ಕಿಂಜರಪು ರಾಮ್ಮೋಹನ್ ನಾಯ್ಡು, ಬಂದರು ಸಚಿವ ಸರ್ಬಾನಂದ ಸೋನೊವಾಲ್ ಮತ್ತು ವಿದ್ಯುತ್ ಸಚಿವ ಮನೋಹರ್ ಲಾಲ್ ಪಾಲ್ಗೊಂಡಿದ್ದರು.

ಯುದ್ಧದ ಆತಂಕ; ಸನ್ನದ್ಧತೆಗೆ ಕರೆ

"ಪಶ್ಚಿಮ ಏಷ್ಯಾದಲ್ಲಿ ಸಂಘರ್ಷದ ಪರಿಸ್ಥಿತಿಯು ಅನಿಶ್ಚಿತ ಹಾಗೂ ಅಸ್ಥಿರವಾಗಿದೆ. ಪರಿಸ್ಥಿತಿ ತಿಳಿಯಾದರೆ ಮಾತ್ರವಲ್ಲ, ಹೊಸದಾಗಿ ಮತ್ತೆ ಉಲ್ಬಣಗೊಂಡರೂ ಅದನ್ನು ಎದುರಿಸಲು ಭಾರತ ಸಿದ್ಧವಾಗಿರಬೇಕಾದ ಅಗತ್ಯವಿದೆ" ಎಂದು ರಾಜನಾಥ್ ಸಿಂಗ್ ತಿಳಿಸಿದರು. ಬಿಕ್ಕಟ್ಟಿನಿಂದ ಉಂಟಾಗುವ ಯಾವುದೇ ಸಂಭಾವ್ಯ ಅಪಾಯಗಳು ಅಥವಾ ಸಮಸ್ಯೆಗಳನ್ನು ತಗ್ಗಿಸಲು ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರವು "ತ್ವರಿತ ಮತ್ತು ಪರಿಣಾಮಕಾರಿ" ಕ್ರಮಗಳನ್ನು ತೆಗೆದುಕೊಳ್ಳುತ್ತಿದೆ ಎಂದು ಅವರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

'ಭಾರತ್ ಮ್ಯಾರಿಟೈಮ್ ಇನ್ಶೂರೆನ್ಸ್ ಪೂಲ್'ಗೆ ಅನುಮೋದನೆ

ನಿರಂತರ ಕಡಲ ವಿಮಾ ಕವರೇಜ್‌ಗಳನ್ನು ಸುಗಮಗೊಳಿಸುವ ನಿಟ್ಟಿನಲ್ಲಿ 12,980 ಕೋಟಿ ರೂ.ಗಳ ಸಾರ್ವಭೌಮ ಖಾತರಿಯೊಂದಿಗೆ 'ಭಾರತ್ ಮ್ಯಾರಿಟೈಮ್ ಇನ್ಶೂರೆನ್ಸ್ ಪೂಲ್' ರಚಿಸುವ ಪ್ರಸ್ತಾವನೆಗೆ ಕೇಂದ್ರ ಸಚಿವ ಸಂಪುಟ ಅನುಮೋದನೆ ನೀಡಿರುವುದನ್ನು ರಕ್ಷಣಾ ಸಚಿವರು ವಿಶೇಷವಾಗಿ ಉಲ್ಲೇಖಿಸಿದರು.

ಯಾವುದೇ ಅಂತರರಾಷ್ಟ್ರೀಯ ಮೂಲದಿಂದ ಭಾರತೀಯ ಬಂದರುಗಳಿಗೆ ಮತ್ತು ಭಾರತದಿಂದ ವಿದೇಶಗಳಿಗೆ ಸರಕುಗಳನ್ನು ಸಾಗಿಸುವ ಹಡಗುಗಳಿಗೆ ಕೈಗೆಟುಕುವ ದರದಲ್ಲಿ ವಿಮೆ ಸಿಗುವುದನ್ನು ಈ ಸ್ವದೇಶಿ ವಿಮಾ ಪೂಲ್ ಖಚಿತಪಡಿಸುತ್ತದೆ. ಅಸ್ಥಿರ ಕಡಲ ಕಾರಿಡಾರ್‌ಗಳ ಮೂಲಕ ಸಾಗುವಾಗಲೂ ಇದು ರಕ್ಷಣೆ ನೀಡಲಿದೆ. "ಈ ನಿರ್ಧಾರವು ಭಾರತದ ಆಮದು-ರಫ್ತು ಕಾರ್ಯಾಚರಣೆಗಳ ಭದ್ರತೆ ಮತ್ತು ಸ್ಥಿರತೆಯನ್ನು ಬಲಪಡಿಸಲಿದ್ದು, ಬಲಿಷ್ಠ ಹಾಗೂ ಸುರಕ್ಷಿತ ವ್ಯಾಪಾರ ಪರಿಸರ ವ್ಯವಸ್ಥೆಯತ್ತ ಇಟ್ಟ ಪ್ರಮುಖ ಹೆಜ್ಜೆಯಾಗಿದೆ" ಎಂದು ಸಿಂಗ್ ವಿವರಿಸಿದರು.

ಭಾರತದ ಬಳಿ ಸಾಕಷ್ಟು ತೈಲ ದಾಸ್ತಾನು

ಜಾಗತಿಕ ಪೂರೈಕೆಯಲ್ಲಿ ಭಾರಿ ಆಘಾತ ಉಂಟಾಗಿದ್ದರೂ, ಭಾರತವು ಸಾಕಷ್ಟು ಇಂಧನ ದಾಸ್ತಾನು ಕಾಯ್ದುಕೊಂಡಿದೆ. ಅಡೆತಡೆಯಿಲ್ಲದ ಪೂರೈಕೆಯನ್ನು ಖಚಿತಪಡಿಸಿಕೊಳ್ಳಲು ಸಕ್ರಿಯ ಪ್ರಯತ್ನಗಳನ್ನು ಮಾಡಲಾಗುತ್ತಿದೆ ಎಂದು ಸಭೆಗೆ ಮಾಹಿತಿ ನೀಡಲಾಯಿತು. "ಪ್ರಸ್ತುತ, ಭಾರತವು 60 ದಿನಗಳ ಬಳಕೆಗೂ ಮೀರಿದ ಕಚ್ಚಾ ತೈಲ, ಪೆಟ್ರೋಲ್, ಡೀಸೆಲ್ ಮತ್ತು ಎಟಿಎಫ್ (ವಿಮಾನದ ಇಂಧನ) ದಾಸ್ತಾನು ಹೊಂದಿದೆ. ಇದಲ್ಲದೆ, ದೇಶೀಯ ಉತ್ಪಾದನೆಯ ಬೆಂಬಲದೊಂದಿಗೆ ಸುಮಾರು 50 ದಿನಗಳಿಗೆ ಸಾಕಾಗುವಷ್ಟು ಎಲ್‌ಎನ್‌ಜಿ ಮತ್ತು 40 ದಿನಗಳಿಗೆ ಸಾಕಾಗುವಷ್ಟು ಎಲ್‌ಪಿಜಿ ದಾಸ್ತಾನುಗಳನ್ನು ನಿರ್ವಹಿಸಲಾಗುತ್ತಿದೆ" ಎಂದು ರಕ್ಷಣಾ ಸಚಿವಾಲಯದ ಹೇಳಿಕೆ ತಿಳಿಸಿದೆ.

ಆಮದು ಮೂಲಗಳ ವಿಸ್ತರಣೆ

ಹೊರ್ಮುಜ್ ಜಲಸಂಧಿಯ ಮೇಲಿನ ಅತಿಯಾದ ಅವಲಂಬನೆಯಿಂದ ಉಂಟಾಗುವ ಅಪಾಯಗಳನ್ನು ತಗ್ಗಿಸಲು, ಸರ್ಕಾರವು ತನ್ನ ಆಮದು ಮೂಲಗಳನ್ನು ವಿಸ್ತರಿಸಿದೆ. ಅಮೆರಿಕ, ಆಸ್ಟ್ರೇಲಿಯಾ ಮತ್ತು ಲ್ಯಾಟಿನ್ ಅಮೆರಿಕ ಸೇರಿದಂತೆ ಹಲವು ಪ್ರದೇಶಗಳಿಂದ ಕಚ್ಚಾ ತೈಲ, ಎಲ್‌ಎನ್‌ಜಿ ಮತ್ತು ಎಲ್‌ಪಿಜಿ ಪೂರೈಕೆಯನ್ನು ಭದ್ರಪಡಿಸಿಕೊಂಡಿದೆ. 2026ರ ಏಪ್ರಿಲ್ ಮತ್ತು ಮೇ ತಿಂಗಳ ಆಮದು ಅಗತ್ಯಗಳನ್ನು ಬಹುಪಾಲು ಭದ್ರಪಡಿಸಿಕೊಳ್ಳಲಾಗಿದ್ದು, ಪೂರೈಕೆಯ ನಿರಂತರತೆಯನ್ನು ಖಚಿತಪಡಿಸಲಾಗಿದೆ ಎಂದು ಸಚಿವಾಲಯ ಮಾಹಿತಿ ನೀಡಿದೆ.