ಪೆಟ್ರೋಲ್ ಬಳಕೆಯಿಂದ ವಾಹನಗಳ ಮೈಲೇಜ್ ಕುಸಿಯುತ್ತಿದೆ ಎಂಬ ಸಾರ್ವಜನಿಕರ ದೂರುಗಳ ನಡುವೆಯೇ, ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ಮಹತ್ವದ ಹೇಳಿಕೆ ನೀಡಿದ್ದಾರೆ.
ಇ20 ಪೆಟ್ರೋಲ್ ವಿವಾದ: ವಾಹನ ಮಾಲೀಕರು ಸ್ವತಃ ಮೈಲೇಜ್ ಪರೀಕ್ಷಿಸಲು ಸಾಧ್ಯವಿಲ್ಲ ಎಂದ ನಿತಿನ್ ಗಡ್ಕರಿ
ಕಚ್ಚಾ ತೈಲದ ಆಮದು ವೆಚ್ಚವನ್ನು ತಗ್ಗಿಸಲು, ವಿದೇಶಿ ವಿನಿಮಯವನ್ನು ಉಳಿಸಲು ಮತ್ತು ಪರಿಸರ ಮಾಲಿನ್ಯವನ್ನು ನಿಯಂತ್ರಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರವು ದೇಶಾದ್ಯಂತ ಇ20 ಪೆಟ್ರೋಲ್ ಮಾರಾಟವನ್ನು ಕಡ್ಡಾಯಗೊಳಿಸಿದೆ.
ದೇಶದಲ್ಲಿ ಜಾರಿಗೆ ತರಲಾಗಿರುವ ಇ20 (ಶೇ. 20ರಷ್ಟು ಎಥನಾಲ್ ಮಿಶ್ರಿತ) ಪೆಟ್ರೋಲ್ ಬಳಕೆಯಿಂದ ವಾಹನಗಳ ಮೈಲೇಜ್ ಕುಸಿಯುತ್ತಿದೆ ಎಂಬ ಸಾರ್ವಜನಿಕರ ದೂರುಗಳ ನಡುವೆಯೇ, ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಅವರು ಮಹತ್ವದ ಹೇಳಿಕೆ ನೀಡಿದ್ದಾರೆ. ಸಾಮಾನ್ಯ ವಾಹನ ಮಾಲೀಕರು ತಮ್ಮ ಕಾರುಗಳ ಮೈಲೇಜ್ ಅನ್ನು ಸ್ವತಃ ನಿಖರವಾಗಿ ಅಳೆಯಲು ಸಾಧ್ಯವಿಲ್ಲ. ಮೈಲೇಜ್ ಪರೀಕ್ಷೆಗಾಗಿ ಅವರು ಅಧಿಕೃತ ಡೀಲರ್ಗಳ ತಾಂತ್ರಿಕ ಯಂತ್ರೋಪಕರಣಗಳನ್ನೇ ಅವಲಂಬಿಸಬೇಕು ಎಂದು ಗಡ್ಕರಿ ಪ್ರತಿಪಾದಿಸಿದ್ದಾರೆ.
ದೂರದರ್ಶನ ವಾಹಿನಿಯೊಂದರ ಸಂದರ್ಶನದಲ್ಲಿ ಪತ್ರಕರ್ತೆಯೊಬ್ಬರು, ತಾವು 2023 ರಲ್ಲಿ ಖರೀದಿಸಿದ ಕಾರಿನ ಮೈಲೇಜ್ ಇ20 ಪೆಟ್ರೋಲ್ ಬಳಕೆಯಿಂದಾಗಿ ಪ್ರತಿ ಲೀಟರ್ಗೆ 11 ಕಿಲೋಮೀಟರ್ನಿಂದ 7 ಕಿಲೋಮೀಟರ್ಗೆ ಕುಸಿದಿದೆ ಎಂದು ಡ್ಯಾಶ್ಬೋರ್ಡ್ ರೀಡಿಂಗ್ ಆಧಾರಿಸಿ ದೂರಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಚಿವರು, ಡ್ಯಾಶ್ಬೋರ್ಡ್ನಲ್ಲಿ ತೋರ್ಪಡಿಸುವ ಅಂಕಿ-ಅಂಶಗಳು ಸಂಪೂರ್ಣ ನಿಖರವಾಗಿರುವುದಿಲ್ಲ ಎಂದು ಸ್ಪಷ್ಟಪಡಿಸಿದರು.
ಮೈಲೇಜ್ ಅಳತೆಗೆ ತಾಂತ್ರಿಕ ಯಂತ್ರ ಅಗತ್ಯ
ಎಥನಾಲ್ ಮಿಶ್ರಿತ ಇಂಧನ ನೀತಿಯನ್ನು ಬಲವಾಗಿ ಸಮರ್ಥಿಸಿಕೊಂಡ ನಿತಿನ್ ಗಡ್ಕರಿ, "ನೀವಾಗಲಿ ಅಥವಾ ನಾನಾಗಲಿ ಸ್ವತಃ ಕಾರಿನ ಮೈಲೇಜ್ ಅನ್ನು ನಿಖರವಾಗಿ ಪರೀಕ್ಷಿಸಲು ಸಾಧ್ಯವಿಲ್ಲ. ಕಾರಿನ ಮೈಲೇಜ್ ಎಷ್ಟಿದೆ ಎಂಬುದನ್ನು ಕಂಪನಿಯ ಅಧಿಕೃತ ಡೀಲರ್ ಬಳಿ ಇರುವ ತಾಂತ್ರಿಕ ಯಂತ್ರದ (ಡಯಾಗ್ನೋಸ್ಟಿಕ್ ಟೂಲ್) ಸಹಾಯದಿಂದ ಮಾತ್ರವೇ ನಿಖರವಾಗಿ ಪತ್ತೆಹಚ್ಚಲು ಸಾಧ್ಯ," ಎಂದು ಹೇಳಿದರು. ವಾಹನ ತಯಾರಕ ಸಂಸ್ಥೆಗಳ ತಾಂತ್ರಿಕ ಪರಿಶೀಲನೆಯೇ ಅಂತಿಮ ಮಾನದಂಡ ಎಂದು ಅವರು ಒತ್ತಿಹೇಳಿದರು.
ಆದರೆ, ವಾಹನ ತಜ್ಞರ ಪ್ರಕಾರ, ಆಧುನಿಕ ಕಾರುಗಳ ಡ್ಯಾಶ್ಬೋರ್ಡ್ ಇಂಧನ ಇಂಜೆಕ್ಷನ್ ಮತ್ತು ಚಾಲನೆಯ ದೂರವನ್ನು ಆಧರಿಸಿ ಶೇ. 2 ರಿಂದ 5 ರಷ್ಟು ವ್ಯತ್ಯಾಸದೊಂದಿಗೆ ಮೈಲೇಜ್ ಅಂದಾಜನ್ನು ಪ್ರದರ್ಶಿಸುತ್ತವೆ. ಗ್ರಾಹಕರು ಸಾಮಾನ್ಯವಾಗಿ ಬಳಸುವ ಟ್ಯಾಂಕ್-ಫುಲ್ ವಿಧಾನವು (ಇಂಧನ ಟ್ಯಾಂಕ್ ಪೂರ್ತಿ ತುಂಬಿಸಿ ಚಲಿಸಿದ ದೂರವನ್ನು ಲೆಕ್ಕ ಹಾಕುವುದು) ಪ್ರಾಯೋಗಿಕ ಮೈಲೇಜ್ ಅನ್ನು ತಿಳಿಯಲು ಸಹಕಾರಿಯಾಗಿದೆ. ಆದರೆ ಡೀಲರ್ಗಳ ಬಳಿ ಇರುವ ಯಂತ್ರಗಳು ಎಂಜಿನ್ನ ತಾಂತ್ರಿಕ ದೋಷಗಳನ್ನು ಪತ್ತೆಹಚ್ಚುತ್ತವೆಯೇ ಹೊರತು ರಸ್ತೆಯ ವಾಸ್ತವ ಸ್ಥಿತಿಯ ಮೈಲೇಜ್ ಅನ್ನಲ್ಲ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ.
ಮೈಲೇಜ್ ಕುಸಿತ ಒಪ್ಪಿಕೊಂಡ ಕೇಂದ್ರ ಸರ್ಕಾರ
ಕೇಂದ್ರ ಇಂಧನ ಸಚಿವಾಲಯವು ಇತ್ತೀಚೆಗೆ ಬಿಡುಗಡೆ ಮಾಡಿದ ಪ್ರಕಟಣೆಯಲ್ಲಿ, ಇ20 ಪೆಟ್ರೋಲ್ ಬಳಕೆಯಿಂದ ಕೆಲವು ನಿರ್ದಿಷ್ಟ ವಾಹನಗಳಲ್ಲಿ ಇಂಧನ ದಕ್ಷತೆಯು ಶೇ. 3 ರಿಂದ 5 ರಷ್ಟು ಕಡಿಮೆಯಾಗುವ ಸಾಧ್ಯತೆಯಿದೆ ಎಂಬುದನ್ನು ಅಧಿಕೃತವಾಗಿ ಒಪ್ಪಿಕೊಂಡಿದೆ. ಆದರೆ, ದೇಶದ ಇಂಧನ ಭದ್ರತೆಯ ದೃಷ್ಟಿಯಿಂದ ಕೇವಲ ಮೈಲೇಜ್ ಒಂದನ್ನೇ ಮಾನದಂಡವಾಗಿ ಪರಿಗಣಿಸಲು ಸಾಧ್ಯವಿಲ್ಲ ಎಂದು ಸರ್ಕಾರ ಸಮರ್ಥಿಸಿಕೊಂಡಿದೆ.
ಕಚ್ಚಾ ತೈಲದ ಆಮದು ವೆಚ್ಚವನ್ನು ತಗ್ಗಿಸಲು, ವಿದೇಶಿ ವಿನಿಮಯವನ್ನು ಉಳಿಸಲು ಮತ್ತು ಪರಿಸರ ಮಾಲಿನ್ಯವನ್ನು ನಿಯಂತ್ರಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರವು ದೇಶಾದ್ಯಂತ ಇ20 ಪೆಟ್ರೋಲ್ ಮಾರಾಟವನ್ನು ಕಡ್ಡಾಯಗೊಳಿಸಿದೆ. ಆದರೆ, ಗ್ರಾಹಕರು ಮೈಲೇಜ್ ಕುಸಿತದ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸುತ್ತಿದ್ದು, ವಾಹನ ಉದ್ಯಮ ವಲಯವೂ ಹಳೆಯ ವಾಹನಗಳ ಎಂಜಿನ್ ಸಾಮರ್ಥ್ಯದ ಮೇಲೆ ಇದು ಬೀರುವ ಪರಿಣಾಮಗಳ ಕುರಿತು ಕಳವಳ ವ್ಯಕ್ತಪಡಿಸಿದೆ.
