ಬ್ರಾಹ್ಮಣ, ಕ್ಷತ್ರಿಯ, ಯಾದವ್​​; ಈ ರೀತಿ ಕಾರಿನ ಮೇಲೆ ಜಾತಿ ಸೂಚಕ ಪದಗಳಿದ್ದರೆ ಬೀಳಲಿದೆ 2,000 ರೂ. ದಂಡ

ಕಾರು ಅಥವಾ ಬೈಕ್‌ನ ಹಿಂಬದಿಯಲ್ಲಿ 'ಬ್ರಾಹ್ಮಣ', 'ಕ್ಷತ್ರಿಯ', 'ಯಾದವ್' ಎಂದು ದೊಡ್ಡದಾಗಿ ಬರೆಸಿಕೊಂಡು, ರಾಜಾರೋಷವಾಗಿ ತಿರುಗಾಡುವವರ ಗಮನಕ್ಕೆ, ನಿಮ್ಮ ವಾಹನದ ಮೇಲಿರುವ ಈ ಜಾತಿ ಸೂಚಕ ಪದಗಳು ಇನ್ಮುಂದೆ ನಿಮಗೆ 2,000 ರೂಪಾಯಿಗಳ ದಂಡಕ್ಕೆ ಕಾರಣವಾಗಬಹುದು. ಹೌದು, ಬಿಹಾರದ ಸಾರಿಗೆ ಇಲಾಖೆಯು ಇಂತಹ ಜಾತಿ ಪ್ರದರ್ಶನಕ್ಕೆ ಬ್ರೇಕ್ ಹಾಕಲು ಮುಂದಾಗಿದ್ದು, ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತಂದಿದೆ.

ಸಾರ್ವಜನಿಕ ರಸ್ತೆಗಳಲ್ಲಿ ಜಾತಿವಾದವನ್ನು ಪ್ರಚೋದಿಸುವ ಇಂತಹ ಬರಹಗಳು, ವಾಕ್ಯಗಳು ಅಥವಾ ಸ್ಟಿಕ್ಕರ್‌ಗಳನ್ನು ವಾಹನಗಳಿಂದ ತೆಗೆದುಹಾಕಲು ಸಾರಿಗೆ ಇಲಾಖೆಯು ಒಂದು ತಿಂಗಳ ಕಾಲಾವಕಾಶ ನೀಡಿದೆ. ವಾಹನ ಮಾಲೀಕರು ಜೂನ್ ಮೊದಲ ವಾರದೊಳಗೆ ಸ್ವಯಂಪ್ರೇರಿತವಾಗಿ ಇವುಗಳನ್ನು ತೆರವುಗೊಳಿಸಬೇಕಾಗಿದೆ. ಡೆಡ್‌ಲೈನ್ ಮುಗಿದ ನಂತರ, ಟ್ರಾಫಿಕ್ ಪೊಲೀಸರು ರಾಜ್ಯಾದ್ಯಂತ ತಪಾಸಣೆ ಆರಂಭಿಸಲಿದ್ದಾರೆ. ಈ ನಿಯಮ ಉಲ್ಲಂಘಿಸುವವರಿಗೆ ಮೋಟಾರು ವಾಹನ ಕಾಯ್ದೆ 1988ರ ಸೆಕ್ಷನ್ 177ರ ಅಡಿಯಲ್ಲಿ 500 ರೂ. ಮತ್ತು ಸೆಕ್ಷನ್ 179ರ ಅಡಿಯಲ್ಲಿ 2,000 ರೂ. ವರೆಗೆ ದಂಡ ವಿಧಿಸಲು ಇಲಾಖೆ ಎಚ್ಚರಿಕೆ ನೀಡಿದೆ.

ಎಐ (AI) ಕ್ಯಾಮೆರಾಗಳ ಹದ್ದಿನ ಕಣ್ಣು: ತಪ್ಪಿಸಿಕೊಳ್ಳಲು ಸಾಧ್ಯವೇ ಇಲ್ಲ!

ನಿಯಮಗಳ ಜಾರಿಯ ಜೊತೆಗೆ ಬಿಹಾರ ಸರ್ಕಾರವು ತನ್ನ ಟ್ರಾಫಿಕ್ ನಿರ್ವಹಣಾ ವ್ಯವಸ್ಥೆಗೆ ಹೈಟೆಕ್ ಸ್ಪರ್ಶ ನೀಡುತ್ತಿದೆ. ರಾಜ್ಯದ ಪ್ರಮುಖ 500 ರಿಂದ 700 ಜಂಕ್ಷನ್‌ಗಳು ಹಾಗೂ ಅಪಘಾತ ವಲಯಗಳಲ್ಲಿ 'ಇಂಟೆಲಿಜೆಂಟ್ ಟ್ರಾಫಿಕ್ ಮ್ಯಾನೇಜ್‌ಮೆಂಟ್ ಸಿಸ್ಟಮ್' ಅಳವಡಿಸಲು ಸಚಿವ ಸಂಪುಟ ಅನುಮೋದನೆ ನೀಡಿದೆ. ಪಾಟ್ನಾ, ಗಯಾ, ಭಾಗಲ್ಪುರ್ ಸೇರಿದಂತೆ ಪ್ರಮುಖ ನಗರಗಳಲ್ಲಿ ಮೊದಲ ಹಂತದಲ್ಲಿ 1,000 ಕ್ಕೂ ಹೆಚ್ಚು ಎಐ ಕ್ಯಾಮೆರಾಗಳನ್ನು ಅಳವಡಿಸಲಾಗುತ್ತಿದೆ.

ರಿಯಲ್-ಟೈಮ್ ಟ್ರ್ಯಾಕಿಂಗ್: ಸಿಗ್ನಲ್ ಜಂಪ್, ಓವರ್‌ ಸ್ಪೀಡ್, ರಾಂಗ್ ಸೈಡ್ ಡ್ರೈವಿಂಗ್ ಮತ್ತು ಹೆಲ್ಮೆಟ್ ರಹಿತ ಚಾಲನೆಯನ್ನು ಈ ಕ್ಯಾಮೆರಾಗಳು ನಿಖರವಾಗಿ ಗುರುತಿಸುತ್ತವೆ.

ಆಟೋಮ್ಯಾಟಿಕ್ ಇ-ಚಲನ್: ನಿಯಮ ಉಲ್ಲಂಘನೆಯಾದ ತಕ್ಷಣವೇ ಈ ವ್ಯವಸ್ಥೆಯು ಕಮಾಂಡ್ ಸೆಂಟರ್ ಮೂಲಕ ಆಟೋಮ್ಯಾಟಿಕ್ ಆಗಿ ಇ-ಚಲನ್ (e-challan) ಜನರೇಟ್ ಮಾಡುತ್ತದೆ.

ಫೇಸ್ ರೆಕಗ್ನಿಷನ್: ಟ್ರಾಫಿಕ್ ಕಂಟ್ರೋಲ್ ಮಾತ್ರವಲ್ಲ, ಪದೇ ಪದೇ ನಿಯಮ ಮುರಿಯುವವರನ್ನು ಹಾಗೂ ಅಪರಾಧ ಚಟುವಟಿಕೆಗಳಲ್ಲಿ ಭಾಗಿಯಾದವರನ್ನು ಮುಖಚಹರೆ (Facial recognition) ಮೂಲಕ ಪತ್ತೆಹಚ್ಚುವ ತಂತ್ರಜ್ಞಾನವೂ ಇದರಲ್ಲಿದೆ.

ಜಾತಿ ಸ್ಟಿಕ್ಕರ್‌ಗಳ ಹಾವಳಿಯನ್ನು ತಡೆಯಲು ಮತ್ತು ರಸ್ತೆ ಸುರಕ್ಷತೆಯನ್ನು ಹೆಚ್ಚಿಸಲು ಬಿಹಾರ ಸರ್ಕಾರ ಕೈಗೊಂಡಿರುವ ಈ ಕಠಿಣ ಹಾಗೂ ತಾಂತ್ರಿಕವಾಗಿ ಮುಂದುವರಿದ ಕ್ರಮವು, ಇತರೆ ರಾಜ್ಯಗಳಿಗೂ ಮಾದರಿಯಾಗುವ ನಿರೀಕ್ಷೆಯಿದೆ.