Jan 23 news LIVE: "ಶಬರಿಮಲೆ ಅಕ್ರಮದ ತನಿಖೆ ಮೋದಿ ಗ್ಯಾರಂಟಿ" ಎಂದ ಪ್ರಧಾನಿ

ಅಂಡಮಾನ್-ನಿಕೋಬಾರ್‌ಗೆ 'ಆಜಾದ್ ಹಿಂದ್' ಹೆಸರಿಡಿ: ಪ್ರಧಾನಿ ಮೋದಿಗೆ ಸಂಸದೆ ಪತ್ರ!

ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ 129ನೇ ಜನ್ಮದಿನಾಚರಣೆಯಾದ 'ಪರಾಕ್ರಮ ದಿವಸ್' ಅಂಗವಾಗಿ ತೆಲಂಗಾಣ ಜಾಗೃತಿ ಸಂಘಟನೆಯ ಅಧ್ಯಕ್ಷೆ ಮತ್ತು ಮಾಜಿ ಸಂಸದೆ ಕೆ. ಕವಿತಾ ಅವರು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿದ್ದು, ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳನ್ನು 'ಆಜಾದ್ ಹಿಂದ್' ಎಂದು ಮರುನಾಮಕರಣ ಮಾಡುವಂತೆ ಮನವಿ ಮಾಡಿದ್ದಾರೆ. 1943ರಲ್ಲಿ ಬ್ರಿಟಿಷ್ ವಸಾಹತುಶಾಹಿ ಆಡಳಿತದಿಂದ ಮುಕ್ತಗೊಂಡು ಆಜಾದ್ ಹಿಂದ್ ಸರ್ಕಾರದ ಅಡಿಯಲ್ಲಿ ಸ್ವತಂತ್ರಗೊಂಡ ಮೊದಲ ಭಾರತೀಯ ಭೂಭಾಗ ಎಂಬ ಐತಿಹಾಸಿಕ ಪರಂಪರೆಯನ್ನು ಗೌರವಿಸುವ ಉದ್ದೇಶದಿಂದ ಈ ಪ್ರಸ್ತಾವನೆಯನ್ನು ಸಲ್ಲಿಸಲಾಗಿದೆ ಎಂದು ಸಾಂಸ್ಕೃತಿಕ ಮತ್ತು ಸಾಮಾಜಿಕ ಸಂಸ್ಥೆಯಾದ ತೆಲಂಗಾಣ ಜಾಗೃತಿಯ ಮುಖ್ಯಸ್ಥೆ ತಿಳಿಸಿದ್ದಾರೆ.

"ಶಬರಿಮಲೆ ಅಕ್ರಮದ ತನಿಖೆ ಮೋದಿ ಗ್ಯಾರಂಟಿ"- ಕೇರಳದಲ್ಲಿ ಬದಲಾವಣೆ ಅನಿವಾರ್ಯ ಎಂದ ಪ್ರಧಾನಿ

ತಿರುವನಂತಪುರಂನಲ್ಲಿ ನಡೆದ ಬೃಹತ್‌ ಸಮಾವೇಶದಲ್ಲಿ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ ಅವರು ಕೇರಳದ ರಾಜಕೀಯ ಇತಿಹಾಸದಲ್ಲಿ ಬದಲಾವಣೆ ಈಗ ಅನಿವಾರ್ಯವಾಗಿದೆ ಎಂದು ಘೋಷಿಸಿದರು. ಕೇರಳದ ಜನರು ಇದುವರೆಗೆ ಕೇವಲ ಎಲ್‌ಡಿಎಫ್‌ ಮತ್ತು ಯುಡಿಎಫ್‌ ಎಂಬ ಎರಡು ಮುಖಗಳನ್ನು ಮಾತ್ರ ನೋಡಿದ್ದಾರೆ. ಈ ಎರಡೂ ಮೈತ್ರಿಕೂಟಗಳು ಆಡಳಿತ ನಡೆಸಿದ ಅವಧಿಯಲ್ಲಿ ರಾಜ್ಯದ ಅಭಿವೃದ್ಧಿಯನ್ನು ಕಡೆಗಣಿಸಿ, ಭ್ರಷ್ಟಾಚಾರ ಮತ್ತು ತುಷ್ಟೀಕರಣದ ರಾಜಕಾರಣದ ಮೂಲಕ ಕೇರಳವನ್ನು ವಿನಾಶದ ಹಾದಿಗೆ ತಳ್ಳಿವೆ ಎಂದು ಅವರು ಕಟುವಾಗಿ ಟೀಕಿಸಿದರು.

ಈ ಎರಡೂ ಪಕ್ಷಗಳ ಧ್ವಜಗಳು ಮತ್ತು ಹೆಸರುಗಳು ಬೇರೆಯಾಗಿದ್ದರೂ, ಇಬ್ಬರ ಅಜೆಂಡಾ ಮಾತ್ರ ಒಂದೇ ಆಗಿದೆ. ಅದು ಲೂಟಿ ಮತ್ತು ಅಧಿಕಾರ ಹಂಚಿಕೆ. ಈಗ ಕೇರಳದ ಜನರಿಗೆ ಈ ಎರಡೂ ಪಕ್ಷಗಳ ಆಡಳಿತ ಸಾಕು ಎನಿಸಿದೆ. ಇತ್ತೀಚೆಗೆ ತಿರುವನಂತಪುರಂ ನಗರ ಪಾಲಿಕೆ ಚುನಾವಣೆಯಲ್ಲಿ ಬಿಜೆಪಿ ಸಾಧಿಸಿದ ಐತಿಹಾಸಿಕ ಜಯವೇ ಇದಕ್ಕೆ ಸಾಕ್ಷಿಯಾಗಿದ್ದು, ಇದು ಕೇರಳದಲ್ಲಿ ಪಕ್ಷದ ಉದಯದ ಮುನ್ಸೂಚನೆಯಾಗಿದೆ. ಗುಜರಾತ್‌ನಲ್ಲಿ ಹೇಗೆ ಒಂದು ನಗರದಿಂದ ಆರಂಭವಾದ ಪಕ್ಷದ ಗೆಲುವು ಇಡೀ ರಾಜ್ಯವನ್ನು ಆವರಿಸಿತೋ, ಹಾಗೆಯೇ ಕೇರಳದಲ್ಲೂ ಕೂಡ ಈ ಬದಲಾವಣೆಯ ಗಾಳಿ ಬೀಸುತ್ತಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

ಶಬರಿಮಲೆ ದೇವಾಲಯದ ಸಂಪ್ರದಾಯಗಳಿಗೆ ಎಲ್‌ಡಿಎಫ್‌ ಸರ್ಕಾರ ಧಕ್ಕೆ ತರುತ್ತಿದೆ ಎಂದು ಆರೋಪಿಸಿದ ಅವರು, ದೇವಾಲಯದ ಚಿನ್ನದ ಕಳ್ಳತನದ ಬಗ್ಗೆ ಸಮಗ್ರ ತನಿಖೆ ನಡೆಸಿ ತಪ್ಪಿತಸ್ಥರನ್ನು ಜೈಲಿಗಟ್ಟಲಾಗುವುದು. ಇದು ಮೋದಿಯವರ ಗ್ಯಾರಂಟಿ ಎಂದು ಭರವಸೆ ನೀಡಿದರು. ಬಿಜೆಪಿ ಮತ್ತು ಎನ್‌ಡಿಎ ಕೇವಲ ಅಧಿಕಾರಕ್ಕಾಗಿ ಕೆಲಸ ಮಾಡುವುದಿಲ್ಲ, ಬದಲಾಗಿ ಅಭಿವೃದ್ಧಿ ಮತ್ತು ಸುಶಾಸನಕ್ಕಾಗಿ ಶ್ರಮಿಸುತ್ತದೆ. ಕೇರಳದ ಯುವ ಸಮೂಹಕ್ಕೆ ಉದ್ಯೋಗ ಮತ್ತು ಉತ್ತಮ ಭವಿಷ್ಯ ಕಲ್ಪಿಸಲು ಬಿಜೆಪಿಗೆ ಒಂದು ಅವಕಾಶ ನೀಡುವಂತೆ ಅವರು ಜನರಲ್ಲಿ ಮನವಿ ಮಾಡಿದರು.

ಆಸ್ಕರ್ ಇತಿಹಾಸದಲ್ಲೇ ಹೊಸ ದಾಖಲೆ: 16 ನಾಮನಿರ್ದೇಶನಗಳೊಂದಿಗೆ 'ಸಿನ್ನರ್ಸ್' ಅಬ್ಬರ!

ರಿಯಾನ್ ಕೂಗ್ಲರ್ ಅವರ ಹಾರರ್‌ ಸಿನಿಮಾ 'ಸಿನ್ನರ್ಸ್' (Sinners) ಒಟ್ಟು 16 ವಿಭಾಗಗಳಲ್ಲಿ ಆಸ್ಕರ್ ನಾಮನಿರ್ದೇಶನ ಪಡೆಯುವ ಮೂಲಕ, ಈ ಹಿಂದೆ 14 ನಾಮನಿರ್ದೇಶನಗಳನ್ನು ಪಡೆದಿದ್ದ 'ಟೈಟಾನಿಕ್' ಮತ್ತು 'ಲಾ ಲಾ ಲ್ಯಾಂಡ್' ಚಿತ್ರಗಳ ದಾಖಲೆಯನ್ನು ಮುರಿದಿದೆ.

ಈ ಚಿತ್ರದ ಮೂಲಕ ರಿಯಾನ್ ಕೂಗ್ಲರ್ ಅತ್ಯುತ್ತಮ ನಿರ್ದೇಶಕ ಮತ್ತು ಚಿತ್ರಕಥೆ ವಿಭಾಗದಲ್ಲಿ ನಾಮನಿರ್ದೇಶನಗೊಂಡರೆ, ನಟ ಮೈಕೆಲ್ ಬಿ ಜೋರ್ಡಾನ್ ತಮ್ಮ ವೃತ್ತಿಜೀವನದ ಮೊದಲ ಆಸ್ಕರ್ (ಅತ್ಯುತ್ತಮ ನಟ) ನಾಮನಿರ್ದೇಶನವನ್ನು ಪಡೆದುಕೊಂಡಿದ್ದಾರೆ.

ಅಮೆರಿಕದಲ್ಲಿ ಟಿಕ್‌ಟಾಕ್ ಬ್ಯಾನ್ ಭೀತಿ ಅಂತ್ಯ: ಹೊಸ ರೂಪದಲ್ಲಿ ಅಪ್ಲಿಕೇಶನ್ ಲಭ್ಯ!

ಅಮೆರಿಕದಲ್ಲಿ ಟಿಕ್‌ಟಾಕ್ ಮೇಲಿದ್ದ ನಿಷೇಧದ ತೂಗುಗತ್ತಿ ಕೊನೆಗೂ ನಿವಾರಣೆಯಾಗಿದ್ದು, ಹೊಸ 'ಅಮೆರಿಕನ್ ಆವೃತ್ತಿ'ಯನ್ನು ರೂಪಿಸಲು ಕಂಪನಿಯು ಪ್ರಮುಖ ಒಪ್ಪಂದಗಳನ್ನು ಅಂತಿಮಗೊಳಿಸಿದೆ. ಚೀನಾದ ಬೈಟ್‌ಡ್ಯಾನ್ಸ್ ಒಡೆತನದಿಂದ ಹೊರಬರಲು ಓರಾಕಲ್, ಸಿಲ್ವರ್ ಲೇಕ್ ಮತ್ತು MGX ನಂತಹ ಪ್ರಮುಖ ಹೂಡಿಕೆದಾರರೊಂದಿಗೆ ಟಿಕ್‌ಟಾಕ್ ಒಪ್ಪಂದ ಮಾಡಿಕೊಂಡಿದೆ.

ಈ ಹೊಸ ಅಪ್ಲಿಕೇಶನ್ ಅಮೆರಿಕದ ರಾಷ್ಟ್ರೀಯ ಭದ್ರತೆ, ಡೇಟಾ ಸಂರಕ್ಷಣೆ ಮತ್ತು ಅಲ್ಗಾರಿದಮ್ ಭದ್ರತೆಗೆ ಒತ್ತು ನೀಡಲಿದ್ದು, ಆಡಮ್ ಪ್ರೆಸರ್ ಇದರ ಸಿಇಒ ಆಗಿ ಕಾರ್ಯನಿರ್ವಹಿಸಲಿದ್ದಾರೆ. ಜನವರಿ 2025ರ ಗಡುವಿನೊಳಗೆ ಮಾಲೀಕತ್ವ ಬದಲಾಗದಿದ್ದರೆ ಆ್ಯಪ್ ಸ್ಥಗಿತಗೊಳ್ಳಬೇಕಿತ್ತು, ಆದರೆ ಅಧಿಕಾರ ವಹಿಸಿಕೊಂಡ ಮೊದಲ ದಿನವೇ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಟಿಕ್‌ಟಾಕ್ ಕಾರ್ಯನಿರ್ವಹಣೆಗೆ ಅವಕಾಶ ನೀಡಿ ಕಾರ್ಯಕಾರಿ ಆದೇಶಕ್ಕೆ ಸಹಿ ಹಾಕುವ ಮೂಲಕ ಈ ಮಹತ್ವದ ಬದಲಾವಣೆಗೆ ಹಾದಿ ಸುಗಮಗೊಳಿಸಿದ್ದಾರೆ.

ಅಮೆಜಾನ್‌ನಲ್ಲಿ ಮತ್ತೆ ಉದ್ಯೋಗ ಕಡಿತದ ಭೀತಿ: ಮುಂದಿನ ವಾರವೇ 15,000 ಸಿಬ್ಬಂದಿ ಮನೆಗೆ?

ಅಮೆಜಾನ್ ಕಂಪನಿಯು ಸುಮಾರು 30,000 ಕಾರ್ಪೊರೇಟ್ ಉದ್ಯೋಗಿಗಳನ್ನು ವಜಾಗೊಳಿಸುವ ತನ್ನ ಗುರಿಯ ಭಾಗವಾಗಿ, ಮುಂದಿನ ವಾರ ಎರಡನೇ ಹಂತದ ಉದ್ಯೋಗ ಕಡಿತಕ್ಕೆ ಯೋಜಿಸಿದೆ ಎಂದು ಮೂಲಗಳು ತಿಳಿಸಿವೆ. ಕಳೆದ ಅಕ್ಟೋಬರ್‌ನಲ್ಲಿ ಕಂಪನಿಯು ಸುಮಾರು 14,000 'ವೈಟ್ ಕಾಲರ್' ಉದ್ಯೋಗಗಳನ್ನು ಕಡಿತಗೊಳಿಸಿತ್ತು. ಈ ಬಾರಿ ಕೂಡ ಅಷ್ಟೇ ಪ್ರಮಾಣದ ಅಂದರೆ ಸುಮಾರು 15,000 ಉದ್ಯೋಗಿಗಳನ್ನು ಕೈಬಿಡುವ ಸಾಧ್ಯತೆಯಿದ್ದು, ಈ ಪ್ರಕ್ರಿಯೆಯು ಮಂಗಳವಾರದಿಂದಲೇ ಆರಂಭವಾಗಬಹುದು ಎಂದು ವರದಿಯಾಗಿದೆ. ಅಮೆಜಾನ್ ವೆಬ್ ಸರ್ವಿಸಸ್ (AWS), ರೀಟೇಲ್, ಪ್ರೈಮ್ ವಿಡಿಯೋ ಮತ್ತು ಮಾನವ ಸಂಪನ್ಮೂಲ (HR) ವಿಭಾಗದ ಉದ್ಯೋಗಿಗಳ ಮೇಲೆ ಇದು ಹೆಚ್ಚಿನ ಪರಿಣಾಮ ಬೀರಲಿದೆ ಎನ್ನಲಾಗಿದ್ದು, ಅಮೆಜಾನ್ ಈ ಬಗ್ಗೆ ಅಧಿಕೃತವಾಗಿ ಪ್ರತಿಕ್ರಿಯಿಸಲು ನಿರಾಕರಿಸಿದೆ.

ಪ್ರವಾಸಿಗರ ಸ್ವರ್ಗ ಗುಲ್ಮಾರ್ಗ್‌ಗೆ ಮತ್ತೆ ಹಿಮದ ಹೊದಿಕೆ

ಕಾಶ್ಮೀರದ ಪ್ರಸಿದ್ಧ ಸ್ಕೀ-ರೆಸಾರ್ಟ್ ಆದ ಗುಲ್ಮಾರ್ಗ್ ಸೇರಿದಂತೆ ಕಣಿವೆಯ ಹಲವು ಪ್ರದೇಶಗಳಲ್ಲಿ ಗುರುವಾರ ರಾತ್ರಿ ಹೊಸದಾಗಿ ಹಿಮಪಾತವಾಗಿದೆ. ಪ್ರಬಲ ಪಶ್ಚಿಮ ಮಾರುತಗಳ ಪ್ರಭಾವದಿಂದಾಗಿ ಉತ್ತರ ಕಾಶ್ಮೀರದ ಬಾರಾಮುಲ್ಲಾ ಜಿಲ್ಲೆಯ ಗುಲ್ಮಾರ್ಗ್‌ನಲ್ಲಿ ಹಿಮಪಾತ ಆರಂಭವಾಗಿದ್ದು, ರೆಸಾರ್ಟ್ ಸುತ್ತಮುತ್ತ ಈಗಾಗಲೇ ಎರಡು ಇಂಚಿನಷ್ಟು ಹಿಮ ಸಂಗ್ರಹವಾಗಿದೆ.

ಕುಪ್ವಾರ, ಬಾರಾಮುಲ್ಲಾ ಮತ್ತು ಶೋಪಿಯಾನ್‌ನ ಎತ್ತರದ ಪ್ರದೇಶಗಳಲ್ಲೂ ಹಿಮಪಾತ ಮುಂದುವರಿದಿದ್ದು, ಶ್ರೀನಗರ ಸೇರಿದಂತೆ ಕಣಿವೆಯ ಬಯಲು ಪ್ರದೇಶಗಳಲ್ಲಿ ಮಳೆ ಸುರಿಯುತ್ತಿದೆ. ಇದರೊಂದಿಗೆ ಕಾಶ್ಮೀರದ ಹಲವು ಭಾಗಗಳಲ್ಲಿ ಭಾರೀ ವೇಗದ ಗಾಳಿ ಬೀಸುತ್ತಿದ್ದು, ಅನೇಕ ಕಡೆಗಳಲ್ಲಿ ಮರಗಳು ಬುಡಮೇಲಾಗಿವೆ. ಮುನ್ನೆಚ್ಚರಿಕಾ ಕ್ರಮವಾಗಿ ವಿದ್ಯುತ್ ಸಂಪರ್ಕವನ್ನು ಕಡಿತಗೊಳಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

72 ಗಂಟೆಗಳಲ್ಲಿ 3,200ಕ್ಕೂ ಹೆಚ್ಚು ಗ್ಯಾಂಗ್‌ಸ್ಟರ್‌ಗಳ ಬಂಧನ!

ಪಂಜಾಬ್ ರಾಜ್ಯವನ್ನು ಗ್ಯಾಂಗ್‌ಸ್ಟರ್ ಮುಕ್ತಗೊಳಿಸುವ ಉದ್ದೇಶದಿಂದ ಪಂಜಾಬ್ ಪೊಲೀಸರು ನಡೆಸಿದ 72 ಗಂಟೆಗಳ ಬೃಹತ್ ಕಾರ್ಯಾಚರಣೆ 'ಆಪರೇಷನ್ ಪ್ರಹಾರ್' ಅಡಿಯಲ್ಲಿ ಒಟ್ಟು 3,256 ವ್ಯಕ್ತಿಗಳನ್ನು ಬಂಧಿಸಲಾಗಿದೆ. ರಾಜ್ಯ ಪೊಲೀಸ್ ಮುಖ್ಯಸ್ಥ ಗೌರವ್ ಯಾದವ್ ಅವರ ಮಾರ್ಗದರ್ಶನದಲ್ಲಿ ನಡೆದ ಈ ಕಾರ್ಯಾಚರಣೆಯಲ್ಲಿ 12,000ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ಒಳಗೊಂಡ 2,000 ಪೊಲೀಸ್ ತಂಡಗಳು ವಿದೇಶಗಳಲ್ಲಿ ತಲೆಮರೆಸಿಕೊಂಡಿರುವ 60 ಗ್ಯಾಂಗ್‌ಸ್ಟರ್‌ಗಳ ಸಹಚರರಿಗೆ ಸೇರಿದ ಸ್ಥಳಗಳ ಮೇಲೆ ಏಕಕಾಲಕ್ಕೆ ದಾಳಿ ನಡೆಸಿವೆ.

ಈ ಕಾರ್ಯಾಚರಣೆಯ ಸಮಯದಲ್ಲಿ ಪೊಲೀಸರು 69 ಮಾರಕಾಸ್ತ್ರಗಳು, 6.5 ಕೆಜಿ ಹೆರಾಯಿನ್, 10.5 ಕೆಜಿ ಅಫೀಮು ಸೇರಿದಂತೆ ಅಪಾರ ಪ್ರಮಾಣದ ಮಾದಕ ವಸ್ತುಗಳು ಮತ್ತು 2.69 ಲಕ್ಷ ರೂಪಾಯಿ ನಗದನ್ನು ವಶಪಡಿಸಿಕೊಂಡಿದ್ದಾರೆ. ಪಂಜಾಬ್‌ನಿಂದ ಗ್ಯಾಂಗ್‌ಸ್ಟರ್ ಸಂಸ್ಕೃತಿಯನ್ನು ಸಂಪೂರ್ಣವಾಗಿ ತೊಡೆದುಹಾಕುವವರೆಗೆ ಇಂತಹ ಕಠಿಣ ಕ್ರಮಗಳು ಮುಂದುವರಿಯಲಿವೆ ಎಂದು ವಿಶೇಷ ಪೊಲೀಸ್ ಮಹಾನಿರ್ದೇಶಕ ಅರ್ಪಿತ್ ಶುಕ್ಲಾ ತಿಳಿಸಿದ್ದಾರೆ.

ಬಸಂತ ಪಂಚಮಿ Vs ಶುಕ್ರವಾರದ ನಮಾಜ್: ಸುಪ್ರೀಂ ಕೋರ್ಟ್ ಆದೇಶದಲ್ಲೇನಿದೆ?

ಮಧ್ಯಪ್ರದೇಶದ ಧಾರ್ ಜಿಲ್ಲೆಯ ವಿವಾದಿತ 11ನೇ ಶತಮಾನದ ಭೋಜಶಾಲಾ-ಕಮಲ್ ಮೌಲಾ ಮಸೀದಿ ಸಂಕೀರ್ಣದಲ್ಲಿ ಬಸಂತ ಪಂಚಮಿ ಮತ್ತು ಶುಕ್ರವಾರದ ನಮಾಜ್ ಒಂದೇ ದಿನ ಬಂದಿರುವ ಹಿನ್ನೆಲೆಯಲ್ಲಿ, ಯಾವುದೇ ಕೋಮು ಸಂಘರ್ಷ ಉಂಟಾಗದಂತೆ ತಡೆಯಲು ಸುಪ್ರೀಂ ಕೋರ್ಟ್ ಮಹತ್ವದ ಆದೇಶ ನೀಡಿದೆ.

ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ನೇತೃತ್ವದ ಪೀಠವು ಪೂಜಾ ವಿಧಿವಿಧಾನಗಳಿಗಾಗಿ ಸಮಯವನ್ನು ನಿಗದಿ ಮಾಡಿದ್ದು, ಹಿಂದೂ ಸಮುದಾಯಕ್ಕೆ ಸೂರ್ಯೋದಯದಿಂದ ಸೂರ್ಯಾಸ್ತದವರೆಗೆ ಬಸಂತ ಪಂಚಮಿ ಪೂಜೆಗೆ ಹಾಗೂ ಮುಸ್ಲಿಂ ಸಮುದಾಯಕ್ಕೆ ಮಧ್ಯಾಹ್ನ 1:00 ರಿಂದ 3:00 ರವರೆಗೆ ನಮಾಜ್ ಸಲ್ಲಿಸಲು ಅನುಮತಿ ನೀಡಿದೆ. ಮುಂಜಾಗ್ರತಾ ಕ್ರಮವಾಗಿ ಸ್ಥಳದಲ್ಲಿ 8,000ಕ್ಕೂ ಹೆಚ್ಚು ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದ್ದು, ಡ್ರೋನ್ ಮತ್ತು ಸಿಸಿಟಿವಿಗಳ ಮೂಲಕ ತೀವ್ರ ನಿಗಾ ಇರಿಸಲಾಗಿದೆ. ಅಲ್ಲದೆ, ನಮಾಜ್‌ನಲ್ಲಿ ಭಾಗವಹಿಸುವವರ ಪಟ್ಟಿಯನ್ನು ಮುಂಚಿತವಾಗಿಯೇ ಜಿಲ್ಲಾಡಳಿತಕ್ಕೆ ನೀಡುವಂತೆ ಮುಸ್ಲಿಂ ಸಮುದಾಯಕ್ಕೆ ನ್ಯಾಯಾಲಯ ಸೂಚಿಸಿದೆ.

“ಗ್ರೀನ್‌ಲ್ಯಾಂಡ್ ಮಾರಾಟಕ್ಕಿಲ್ಲ”- ಟ್ರಂಪ್‌ಗೆ ಡೆನ್ಮಾರ್ಕ್ ಖಡಕ್ ಪ್ರತ್ಯುತ್ತರ!

ಆರ್ಕ್ಟಿಕ್ ಭದ್ರತೆ ಮತ್ತು ಗ್ರೀನ್‌ಲ್ಯಾಂಡ್ ಮೇಲಿನ ಅಮೆರಿಕದ ನಿಯಂತ್ರಣದ ಕುರಿತು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೀಡಿರುವ ಹೇಳಿಕೆಗಳು ಜಾಗತಿಕ ಮಟ್ಟದಲ್ಲಿ ತೀವ್ರ ಚರ್ಚೆಗೆ ಕಾರಣವಾಗಿವೆ. ಗ್ರೀನ್‌ಲ್ಯಾಂಡ್‌ನ ಸಾರ್ವಭೌಮತ್ವದ ವಿಚಾರದಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳಲು ಸಾಧ್ಯವಿಲ್ಲ ಎಂದು ಡೆನ್ಮಾರ್ಕ್ ಪ್ರಧಾನಿ ಸ್ಪಷ್ಟಪಡಿಸಿದ್ದಾರೆ.

ಗ್ರೀನ್‌ಲ್ಯಾಂಡ್ ಪ್ರಧಾನಿ ಜೆನ್ಸ್-ಫ್ರೆಡೆರಿಕ್ ನೀಲ್ಸನ್ ಈ ಕುರಿತು ಪ್ರತಿಕ್ರಿಯಿಸಿ, "ನನ್ನ ದೇಶದ ಬಗ್ಗೆ ನಡೆದಿರುವ ಈ ಒಪ್ಪಂದದಲ್ಲಿ ಏನಿದೆ ಎಂಬುದು ನನಗೆ ತಿಳಿದಿಲ್ಲ. ಆದರೆ ನಮ್ಮ ಸಾರ್ವಭೌಮತ್ವದ ಮೇಲೆ ಯಾರೂ ಹಕ್ಕು ಸಾಧಿಸಲು ಸಾಧ್ಯವಿಲ್ಲ" ಎಂದು ಹೇಳಿದ್ದಾರೆ.

ಗ್ರೀನ್‌ಲ್ಯಾಂಡ್ ಅನ್ನು ಖರೀದಿ ಮಾಡುವ ಅಥವಾ ಅದರ ಮೇಲೆ ಸಂಪೂರ್ಣ ನಿಯಂತ್ರಣ ಸಾಧಿಸುವ ಅಮೆರಿಕದ ಹಠಕ್ಕೆ ಈಗ ಡೆನ್ಮಾರ್ಕ್ ಸರ್ಕಾರ ಬ್ರೇಕ್ ಹಾಕಿದೆ. ಗ್ರೀನ್‌ಲ್ಯಾಂಡ್ ಡೆನ್ಮಾರ್ಕ್‌ನ ಒಂದು ಸ್ವಾಯತ್ತ ಪ್ರದೇಶವಾಗಿದ್ದು, ಅಲ್ಲಿನ ಸಂಪನ್ಮೂಲ ಮತ್ತು ಆಯಕಟ್ಟಿನ ಜಾಗದ ಮೇಲೆ ಅಮೆರಿಕ ಕಣ್ಣಿಟ್ಟಿದೆ.