'ಪ್ಯಾಕ್ಸ್ ಸಿಲಿಕಾ' ಸಮಾವೇಶದಲ್ಲಿ ಭಾರತದ ಪ್ರತಿನಿಧಿಗಳು ಪ್ರತಿನಿಧಿಸಿದ್ದರು.
ಅಮೆರಿಕದ ಮಹತ್ವದ 'ಪ್ಯಾಕ್ಸ್ ಸಿಲಿಕಾ' ಉಪಕ್ರಮಕ್ಕೆ ಭಾರತ ಸೇರಿ 35 ದೇಶಗಳ ಐತಿಹಾಸಿಕ ಒಪ್ಪಂದ
ಈ ಶೃಂಗಸಭೆಯ ಹೊರತಾಗಿ ಅರ್ಜೆಂಟೀನಾ, ಜರ್ಮನಿ, ನೆದರ್ಲ್ಯಾಂಡ್ಸ್, ಚಿಲಿ, ಕೋಸ್ಟರಿಕಾ, ಗ್ರೀಸ್, ಕಝಾಕಿಸ್ತಾನ್, ಪನಾಮ ಮತ್ತು ಯುರೋಪಿಯನ್ ಒಕ್ಕೂಟಗಳು ಸಹ 'ಪ್ಯಾಕ್ಸ್ ಸಿಲಿಕಾ' ಉಪಕ್ರಮವನ್ನು ಅಧಿಕೃತವಾಗಿ ಸೇರಿಕೊಂಡಿವೆ.
ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನಕ್ಕೆ ಪೂರಕವಾಗಿ ಅತ್ಯಂತ ವಿಶ್ವಾಸಾರ್ಹ ಹಾಗೂ ಬಲವಾದ ಪೂರೈಕೆ ಸರಪಳಿಗಳನ್ನು ನಿರ್ಮಿಸುವ ಅಮೆರಿಕದ ಮಹತ್ವದ ಉಪಕ್ರಮಕ್ಕೆ ಭಾರತ ಸೇರಿದಂತೆ ವಿಶ್ವದ 35 ರಾಷ್ಟ್ರಗಳು ಕೈಜೋಡಿಸಿವೆ.
ವಾಷಿಂಗ್ಟನ್ನಲ್ಲಿ ಗುರುವಾರ ನಡೆದ ಎರಡನೇ 'ಪ್ಯಾಕ್ಸ್ ಸಿಲಿಕಾ ಶೃಂಗಸಭೆ'ಯಲ್ಲಿ ಈ ಐತಿಹಾಸಿಕ ಬೆಳವಣಿಗೆ ನಡೆದಿದ್ದು, ಪಾಲ್ಗೊಂಡಿದ್ದ 35 ದೇಶಗಳು 'AI ಅವಕಾಶದ ಜಂಟಿ ಹೇಳಿಕೆ'ಗೆ ಸಹಿ ಹಾಕಿವೆ. ಈ ಮೂಲಕ AI ಯುಗದ ಅಭಿವೃದ್ಧಿ ಹಾಗೂ ನಾವೀನ್ಯತೆಗೆ ಪೂರಕವಾದ ನಿಯಂತ್ರಕ ವಿಧಾನದ ಹಿಂದೆ ಜಾಗತಿಕ ಶಕ್ತಿಗಳು ಒಂದಾದಂತಾಗಿದೆ.
ಖಾಸಗಿ ವಲಯ ಹಾಗೂ ಮೂಲಸೌಕರ್ಯಕ್ಕೆ ಒತ್ತು
ಈ ಕುರಿತು ಮಾಹಿತಿ ನೀಡಿರುವ ಆರ್ಥಿಕ ವ್ಯವಹಾರಗಳ ಅಮೆರಿಕದ ಅಧೀನ ಕಾರ್ಯದರ್ಶಿ ಜಾಕೋಬ್ ಹೆಲ್ಬರ್ಗ್, "ಇದು ವಿಶ್ವಾಸಾರ್ಹ ಪೂರೈಕೆ ಸರಪಳಿಗಳನ್ನು ರೂಪಿಸಲು, ಖಾಸಗಿ ವಲಯವನ್ನು ಸಜ್ಜುಗೊಳಿಸಲು ಮತ್ತು ಮುಂದಿನ ಶತಮಾನಕ್ಕೆ ಶಕ್ತಿ ತುಂಬುವ ಭವಿಷ್ಯದ ಮೂಲಸೌಕರ್ಯವನ್ನು ನಿರ್ಮಿಸಲು ದೇಶಗಳು ತೋರಿರುವ ಬದ್ಧತೆಯಾಗಿದೆ," ಎಂದು ತಿಳಿಸಿದ್ದಾರೆ. ಈ ಶೃಂಗಸಭೆಯ ಹೊರತಾಗಿ ಅರ್ಜೆಂಟೀನಾ, ಜರ್ಮನಿ, ನೆದರ್ಲ್ಯಾಂಡ್ಸ್, ಚಿಲಿ, ಕೋಸ್ಟರಿಕಾ, ಗ್ರೀಸ್, ಕಝಾಕಿಸ್ತಾನ್, ಪನಾಮ ಮತ್ತು ಯುರೋಪಿಯನ್ ಒಕ್ಕೂಟಗಳು ಸಹ 'ಪ್ಯಾಕ್ಸ್ ಸಿಲಿಕಾ' ಉಪಕ್ರಮವನ್ನು ಅಧಿಕೃತವಾಗಿ ಸೇರಿಕೊಂಡಿವೆ.
ಭಾರತದ ಪ್ರಮುಖ ಪಾತ್ರ
ಈ ಉನ್ನತ ಮಟ್ಟದ ಶೃಂಗಸಭೆಯಲ್ಲಿ ಭಾರತವನ್ನು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ ಕಾರ್ಯದರ್ಶಿ ಎಸ್. ಕೃಷ್ಣನ್ ಹಾಗೂ ವಿದೇಶಾಂಗ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ (ಅಮೆರಿಕ) ನಾಗರಾಜ್ ನಾಯ್ಡು ಮತ್ತು ಭಾರತೀಯ ಉದ್ಯಮದ ಪ್ರಮುಖ ಪ್ರತಿನಿಧಿಗಳು ಪ್ರತಿನಿಧಿಸಿದ್ದರು. ಭಾರತೀಯ ನಿಯೋಗವು ಜಾಗತಿಕ ಮಟ್ಟದಲ್ಲಿ ಅರೆವಾಹಕಗಳು, ಕೃತಕ ಬುದ್ಧಿಮತ್ತೆ ಮತ್ತು ಸ್ಥಿತಿಸ್ಥಾಪಕ ತಂತ್ರಜ್ಞಾನದ ಪೂರೈಕೆ ಸರಪಳಿಗಳಲ್ಲಿ ಪರಸ್ಪರ ಸಹಯೋಗವನ್ನು ಮುಂದುವರಿಸುವ ಕುರಿತು ಇತರ ದೇಶಗಳ ಸರ್ಕಾರಗಳು ಮತ್ತು ಉದ್ಯಮ ರಂಗದ ಗಣ್ಯರೊಂದಿಗೆ ಸುದೀರ್ಘ ಚರ್ಚೆ ನಡೆಸಿತು.
"AI ನ ಭವಿಷ್ಯವನ್ನು ಯಾರು ಮೊದಲು ನಿಯಂತ್ರಿಸುತ್ತಾರೆ ಎಂಬುದರ ಮೂಲಕ ನಿರ್ಧರಿಸಲಾಗುವುದಿಲ್ಲ. ಬದಲಿಗೆ ಯಾರು ಮೊದಲು ಮತ್ತು ಹೆಚ್ಚಿನ ಸಾಮರ್ಥ್ಯವನ್ನು ನಿರ್ಮಿಸುತ್ತಾರೆ ಎಂಬುದರ ಮೇಲೆ ಅದು ನಿರ್ಧಾರವಾಗುತ್ತದೆ. ಹೆಚ್ಚು ಶಕ್ತಿ, ಹೆಚ್ಚು ಕಂಪ್ಯೂಟ್, ಹೆಚ್ಚು ಚಿಪ್ಸ್, ಹೆಚ್ಚು ಪ್ರತಿಭೆ ಮತ್ತು ಹೆಚ್ಚು ಬಿಲ್ಡರ್ಗಳು ಇರುವ ನಾವೀನ್ಯತೆಯ ಭವಿಷ್ಯವನ್ನು ನಾವು ಸ್ವಾಗತಿಸುತ್ತೇವೆ." ಎಂದು ಆರ್ಥಿಕ ವ್ಯವಹಾರಗಳ ಅಮೆರಿಕದ ಅಧೀನ ಕಾರ್ಯದರ್ಶಿ ಜಾಕೋಬ್ ಹೆಲ್ಬರ್ಗ್ ತಿಳಿಸಿದ್ದಾರೆ.
ಏನಿದು ಪ್ಯಾಕ್ಸ್ ಸಿಲಿಕಾ ಉಪಕ್ರಮ?
ಕಳೆದ ವರ್ಷದ ಡಿಸೆಂಬರ್ನಲ್ಲಿ ಕೇವಲ ಬೆರಳೆಣಿಕೆಯಷ್ಟು ದೇಶಗಳೊಂದಿಗೆ ಈ 'ಪ್ಯಾಕ್ಸ್ ಸಿಲಿಕಾ' ಉಪಕ್ರಮವನ್ನು ಪ್ರಾರಂಭಿಸಲಾಗಿತ್ತು. ಭಾರತವು ಇದೇ ವರ್ಷದ ಫೆಬ್ರವರಿಯಲ್ಲಿ ನವದೆಹಲಿಯಲ್ಲಿ ನಡೆದ 'AI ಇಂಪ್ಯಾಕ್ಟ್ ಶೃಂಗಸಭೆ'ಯ ಸಂದರ್ಭದಲ್ಲಿ ಈ ಜಾಗತಿಕ ಒಕ್ಕೂಟವನ್ನು ಅಧಿಕೃತವಾಗಿ ಸೇರಿಕೊಂಡಿತ್ತು. ಇದೀಗ ಒಟ್ಟು 35 ದೇಶಗಳು ಒಂದಾಗಿ, ಜನರ ಸೇವೆ, ಬಲಿಷ್ಠ ಆರ್ಥಿಕತೆ, ಉದ್ಯಮಶೀಲತೆ ಮತ್ತು ಕಾನೂನಿನ ನಿಯಮಗಳನ್ನು ಗೌರವಿಸುವ ಸುರಕ್ಷಿತ AI ಭವಿಷ್ಯವನ್ನು ನಿರ್ಮಿಸಲು ಒಟ್ಟಾಗಿ ಹೆಜ್ಜೆ ಇಟ್ಟಿವೆ.
