ರಷ್ಯಾ, ಇರಾನ್ ಮೇಲಿನ ನಿರ್ಬಂಧಗಳಿಗೆ ಟ್ರಂಪ್ ವಿನಾಯಿತಿ: ತೈಲ ಮಾರುಕಟ್ಟೆಯಲ್ಲಿ ಭಾರತಕ್ಕೆ ನಿರಾಳತೆ

ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ರಷ್ಯಾ ಮತ್ತು ಇರಾನ್ ಮೇಲಿನ ಕಠಿಣ ನಿರ್ಬಂಧಗಳ ಕಾಯಿದೆಯ ಅಡಿಯಲ್ಲಿ ಜಾರಿಯಲ್ಲಿದ್ದ ನಿರ್ಬಂಧಗಳು, ನಿಯಂತ್ರಣಗಳು ಮತ್ತು ಸುಂಕಗಳಿಗೆ ವಿನಾಯಿತಿ ಘೋಷಿಸುವ ಮೂಲಕ ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ಮಹತ್ವದ ಬದಲಾವಣೆ ಮಾಡಿದ್ದಾರೆ. ರಾಷ್ಟ್ರೀಯ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟುಕೊಂಡು ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಶ್ವೇತಭವನ ಪ್ರಕಟಿಸಿದೆ.

ಅಮೆರಿಕದ ವಿದೇಶಾಂಗ ನೀತಿಯಲ್ಲಿನ ಅನಿವಾರ್ಯತೆಯನ್ನು ಎತ್ತಿ ತೋರಿಸುತ್ತದೆ. ಸೆಪ್ಟೆಂಬರ್ 16ರಂದು ಅಮೆರಿಕದ ಕಾಂಗ್ರೆಸ್ ಅಂಗೀಕರಿಸಿದ್ದ ಗ್ರಹಾಂ ಕಾಯಿದೆಗೆ ಟ್ರಂಪ್ ಸಹಿ ಹಾಕಿದ್ದರು. ಈ ಕಾಯಿದೆಯಡಿ ರಷ್ಯಾದ ಕಚ್ಚಾ ತೈಲ ಅಥವಾ ಅನಿಲವನ್ನು ಆಮದು ಮಾಡಿಕೊಳ್ಳುವ ದೇಶಗಳ ಸರಕುಗಳ ಮೇಲೆ ಶೇ.100ರವರೆಗೆ ಸುಂಕ ವಿಧಿಸುವ ಅವಕಾಶವಿತ್ತು. ಆದರೆ, ಈ ಕಾಯಿದೆಯ ಸೆಕ್ಷನ್ 115ರಲ್ಲಿ ಅಡಕವಾಗಿರುವ ಅಧಿಕಾರವನ್ನು ಬಳಸಿಕೊಂಡು, ಟ್ರಂಪ್ ಅವರು ಅಮೆರಿಕದ ರಾಷ್ಟ್ರೀಯ ಹಿತಾಸಕ್ತಿಗೆ ಪೂರಕವಾಗಿ ನಿರ್ಬಂಧಗಳಿಂದ ವಿನಾಯಿತಿ ನೀಡಲಾಗುತ್ತಿದೆ ಎಂದು ಕಾಂಗ್ರೆಸ್‌ಗೆ ಪ್ರಮಾಣಪತ್ರ ಸಲ್ಲಿಸಿದ್ದಾರೆ.

ಭಾರತಕ್ಕೆ ಏಕೆ ಈ ವಿನಾಯಿತಿ ಅತ್ಯಗತ್ಯವಾಗಿತ್ತು?

ಭಾರತದ ಇಂಧನ ಭದ್ರತೆಯ ದೃಷ್ಟಿಯಿಂದ ಈ ನಿರ್ಧಾರವು ಅತ್ಯಂತ ನಿರ್ಣಾಯಕವಾಗಿದೆ. ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್. ಜೈಶಂಕರ್ ಅವರು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಅವರೊಂದಿಗೆ ನಡೆಸಿದ ಚರ್ಚೆಯಲ್ಲಿ ಭಾರತದ ತಾಂತ್ರಿಕ ಅಗತ್ಯಗಳನ್ನು ಸ್ಪಷ್ಟಪಡಿಸಿದ್ದರು.

ಭಾರತದ ಹೆಚ್ಚಿನ ತೈಲ ಸಂಸ್ಕರಣಾಗಾರಗಳನ್ನು ಮೀಡಿಯಂ ಸವರ್ ಕ್ರೂಡ್ ಸಂಸ್ಕರಿಸಲು ವಿನ್ಯಾಸಗೊಳಿಸಲಾಗಿದೆ. ಇದು ಮುಖ್ಯವಾಗಿ ರಷ್ಯಾ ಮತ್ತು ಮಧ್ಯಪ್ರಾಚ್ಯ ದೇಶಗಳಿಂದ ಲಭ್ಯವಾಗುತ್ತದೆ. ಮತ್ತೊಂದೆಡೆ, ಅಮೆರಿಕವು ಹೆಚ್ಚಾಗಿ ಲೈಟ್ ಕ್ರೂಡ್ ಉತ್ಪಾದಿಸುತ್ತದೆ, ಇರಾನ್ ಅಥವಾ ವೆನೆಜುವೆಲಾ ಮೂಲದ ತೈಲಗಳು ಹೆಚ್ಚು ಸಾಂದ್ರತೆಯನ್ನು ಹೊಂದಿರುತ್ತವೆ. ಭಾರತೀಯ ಸಂಸ್ಕರಣಾಗಾರಗಳಲ್ಲಿ ತೈಲವನ್ನು ಸಂಸ್ಕರಿಸಲು ಇವುಗಳ ಮಿಶ್ರಣ ಅತ್ಯಗತ್ಯ. ಈ ತಾಂತ್ರಿಕ ವಾಸ್ತವತೆಯನ್ನು ಮನಗಂಡು, ಭಾರತಕ್ಕೆ ರಷ್ಯಾದ ತೈಲದ ಅಗತ್ಯವಿದೆ ಎಂದು ಜೈಶಂಕರ್ ಮನವರಿಕೆ ಮಾಡಿಕೊಟ್ಟಿದ್ದರು.

ಮಧ್ಯಪ್ರಾಚ್ಯದ ಬಿಕ್ಕಟ್ಟು, ಅನಿವಾರ್ಯತೆ

ಇರಾನ್-ಇಸ್ರೇಲ್ ಸಂಘರ್ಷ ಮತ್ತು ಮಧ್ಯಪ್ರಾಚ್ಯದಲ್ಲಿನ ಅಸ್ಥಿರತೆಯು ಜಾಗತಿಕ ತೈಲ ಪೂರೈಕೆಯ ಸರಪಳಿಯನ್ನು ತುಂಡರಿಸಿದೆ. ಪರ್ಯಾಯ ಮೂಲಗಳಿಲ್ಲದೆ ತೈಲ ಆರ್ಥಿಕತೆಯನ್ನು ಮುನ್ನಡೆಸುವುದು ಭಾರತಕ್ಕೆ ಕಷ್ಟಕರವಾಗಿತ್ತು. ಇಂತಹ ಸಂದರ್ಭದಲ್ಲಿ, ಅಮೆರಿಕದ ನಿರ್ಬಂಧಗಳು ಜಾರಿಯಲ್ಲಿದ್ದರೆ ಅದು ಪರೋಕ್ಷವಾಗಿ ಭಾರತದ ಆರ್ಥಿಕತೆಯ ಮೇಲೆ ದುಷ್ಪರಿಣಾಮ ಬೀರಬಹುದಾಗಿತ್ತು. ಈಗ ಟ್ರಂಪ್ ಅವರ ವಿನಾಯಿತಿಯಿಂದಾಗಿ, ಭಾರತವು ರಷ್ಯಾದಿಂದ ಸುಗಮವಾಗಿ ತೈಲ ಆಮದು ಮಾಡಿಕೊಳ್ಳಲು ಮಾರ್ಗ ಸುಗಮವಾಗಿದೆ. ಮಾರ್ಕೊ ರೂಬಿಯೊ ಅವರ ಭಾರತ ಭೇಟಿಯ ಹೊಸ್ತಿಲಲ್ಲೇ ಈ ಆದೇಶ ಹೊರಬಿದ್ದಿರುವುದು ಅಮೆರಿಕ ಮತ್ತು ಭಾರತದ ನಡುವಿನ ಬಲವಾದ ದ್ವಿಪಕ್ಷೀಯ ಬಾಂಧವ್ಯವನ್ನು ಪ್ರತಿಬಿಂಬಿಸುತ್ತದೆ. ಟ್ರಂಪ್ ಅವರು ರಷ್ಯಾದೊಂದಿಗೆ ಡೀಸೆಲ್ ಪೂರೈಕೆಯ ಒಪ್ಪಂದವನ್ನು ಮಾಡಿಕೊಂಡ ಕೆಲವೇ ದಿನಗಳಲ್ಲಿ ಈ ವಿನಾಯಿತಿ ನೀಡಿರುವುದು, ಅಮೆರಿಕದ ಆಂತರಿಕ ಮತ್ತು ಜಾಗತಿಕ ಇಂಧನ ಅಗತ್ಯಗಳನ್ನು ಸಮತೋಲನಗೊಳಿಸುವ ತಂತ್ರಗಾರಿಕೆಯನ್ನು ತೋರಿಸುತ್ತದೆ.

ಅಧ್ಯಕ್ಷ ಟ್ರಂಪ್ ಅವರ ಈ ಕ್ರಮವು ಅಮೆರಿಕದ ಕಾಂಗ್ರೆಸ್‌ನಲ್ಲಿನ ಕೆಲವು ಮೂಲಗಳ ಅಸಮಾಧಾನಕ್ಕೂ ಕಾರಣವಾಗಬಹುದು. ಆದರೆ, ಜಾಗತಿಕ ಹಣದುಬ್ಬರವನ್ನು ನಿಯಂತ್ರಣದಲ್ಲಿಡಲು ಮತ್ತು ಮిత್ರರಾಷ್ಟ್ರಗಳ ಆರ್ಥಿಕತೆಯನ್ನು ಸ್ಥಿರವಾಗಿಡಲು ಇಂಧನ ಬೆಲೆಗಳ ನಿಯಂತ್ರಣ ಅನಿವಾರ್ಯ ಎಂಬ ವಾಸ್ತವವನ್ನು ಅಮೆರಿಕ ಒಪ್ಪಿಕೊಂಡಂತಾಗಿದೆ.