Apple CEO News |ಆಪಲ್ ಸಿಇಒ ಸ್ಥಾನಕ್ಕೆ ಟಿಮ್ ಕುಕ್ ರಾಜೀನಾಮೆ; ಜಾನ್ ಟೆರ್ನಸ್ ಹೊಸ ಮುಖ್ಯಸ್ಥ
ಆಪಲ್ ಕಂಪನಿಯ ಸಿಇಒ ಸ್ಥಾನದಿಂದ ಟಿಮ್ ಕುಕ್ ಕೆಳಗಿಳಿಯಲಿದ್ದಾರೆ. ಸೆಪ್ಟೆಂಬರ್ 1 ರಿಂದ ಜಾನ್ ಟೆರ್ನಸ್ ಹೊಸ ಸಿಇಒ ಆಗಿ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.
ಟೆಕ್ ದೈತ್ಯ ಆಪಲ್ ಕಂಪನಿಯ ಸಿಇಒ ಆಗಿ ದೀರ್ಘಕಾಲ ಸೇವೆ ಸಲ್ಲಿಸಿರುವ ಟಿಮ್ ಕುಕ್ ಅವರು ತಮ್ಮ ಸ್ಥಾನದಿಂದ ಕೆಳಗಿಳಿಯಲಿದ್ದಾರೆ ಎಂದು ಕಂಪನಿ ಸೋಮವಾರ ಘೋಷಿಸಿದೆ. ಇವರ ಜಾಗಕ್ಕೆ ಆಪಲ್ನ ಹಾರ್ಡ್ವೇರ್ ಎಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥರಾಗಿರುವ ಜಾನ್ ಟೆರ್ನಸ್ ಅವರು ಸೆಪ್ಟೆಂಬರ್ 1 ರಿಂದ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ. ಮುಂದಿನ ದಿನಗಳಲ್ಲಿ ಟಿಮ್ ಕುಕ್ ಅವರು ಆಪಲ್ ಮಂಡಳಿಯ ಕಾರ್ಯನಿರ್ವಾಹಕ ಅಧ್ಯಕ್ಷರಾಗಿ ಮುಂದುವರಿಯಲಿದ್ದಾರೆ.
ಟಿಮ್ ಕುಕ್ ಅವರ ವಿದಾಯದ ಮಾತುಗಳು
ಆಪಲ್ ಮುನ್ನಡೆಸಿದ್ದನ್ನು ತಮ್ಮ ಜೀವನದ ದೊಡ್ಡ ಸೌಭಾಗ್ಯ ಎಂದು ಬಣ್ಣಿಸಿದ ಕುಕ್, ಇದು ಒಂದು ಅಸಾಧಾರಣ ಪ್ರಯಾಣ ಎಂದು ನೆನಪಿಸಿಕೊಂಡಿದ್ದಾರೆ. ಉತ್ತರಾಧಿಕಾರಿ ಜಾನ್ ಟೆರ್ನಸ್ ಅವರನ್ನು ಶ್ಲಾಘಿಸಿದ ಅವರು, "ಟೆರ್ನಸ್ ಒಬ್ಬ ದಾರ್ಶನಿಕ. ಅವರಲ್ಲಿ ಎಂಜಿನಿಯರ್ನ ಬುದ್ಧಿವಂತಿಕೆ ಮತ್ತು ಹೊಸತನವನ್ನು ಸೃಷ್ಟಿಸುವ ನಾವೀನ್ಯಕಾರನ ಮನಸ್ಸಿದೆ. ಕಂಪನಿಯನ್ನು ಮುಂದಿನ ಹಂತಕ್ಕೆ ಕೊಂಡೊಯ್ಯುವ ಸಾಮರ್ಥ್ಯ ಅವರಲ್ಲಿದೆ," ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಕುಕ್ ಅವರ 13 ವರ್ಷಗಳ ಸುದೀರ್ಘ ಪಯಣ
2011 ರಲ್ಲಿ ಸ್ಟೀವ್ ಜಾಬ್ಸ್ ಅವರ ನಿಧನಕ್ಕೂ ಮುನ್ನ ಕುಕ್ ಸಿಇಒ ಆಗಿ ಅಧಿಕಾರ ವಹಿಸಿಕೊಂಡಿದ್ದರು. ಇವರ ಅವಧಿಯಲ್ಲಿ ಆಪಲ್ ವಿಶ್ವದ ಅತ್ಯಂತ ಮೌಲ್ಯಯುತ ಕಂಪನಿಯಾಗಿ ಬೆಳೆಯಿತು. ಐಫೋನ್, ಐಪ್ಯಾಡ್ ಮತ್ತು ಮ್ಯಾಕ್ ಹೊರತುಪಡಿಸಿ, ಆಪಲ್ ಮ್ಯೂಸಿಕ್, ಐಕ್ಲೌಡ್ ಮತ್ತು ಆಪಲ್ ಟಿವಿ+ ನಂತಹ ಸೇವಾ ಕ್ಷೇತ್ರಗಳನ್ನು ಕುಕ್ ಬಲಪಡಿಸಿದರು. ಆಪಲ್ ವಾಚ್ ಮತ್ತು ಏರ್ಪಾಡ್ಸ್ಗಳಂತಹ ವೇರಬಲ್ ಸಾಧನಗಳನ್ನು ಪರಿಚಯಿಸಿದ್ದು ಇವರ ಪ್ರಮುಖ ಸಾಧನೆಗಳಲ್ಲಿ ಒಂದು.
1998 ರಲ್ಲಿ ಆಪಲ್ ಸೇರಿದ್ದ ಟಿಮ್ ಕುಕ್, ಆರಂಭದಲ್ಲಿ ಕಾರ್ಯಚರಣೆಗಳ ವಿಭಾಗವನ್ನು ನೋಡಿಕೊಳ್ಳುತ್ತಿದ್ದರು. ವಿಶ್ವದ ಅತ್ಯಂತ ಸಮರ್ಥ ಪೂರೈಕೆ ಸರಪಳಿಯನ್ನು ನಿರ್ಮಿಸಿದ ಕೀರ್ತಿ ಇವರಿಗೆ ಸಲ್ಲುತ್ತದೆ. ಡ್ಯೂಕ್ ವಿಶ್ವವಿದ್ಯಾಲಯದಿಂದ ಎಂಬಿಎ ಮತ್ತು ಆಬರ್ನ್ ವಿಶ್ವವಿದ್ಯಾಲಯದಿಂದ ಇಂಡಸ್ಟ್ರಿಯಲ್ ಎಂಜಿನಿಯರಿಂಗ್ ಪದವಿ ಪಡೆದಿರುವ ಇವರು, ಆಪಲ್ ಸೇರುವ ಮೊದಲು ಐಬಿಎಂ (IBM) ಮತ್ತು ಕಾಂಪ್ಯಾಕ್ (Compaq) ಕಂಪನಿಗಳಲ್ಲಿ ಕೆಲಸ ಮಾಡಿದ್ದರು.
ಮುಂದಿನ ಹಾದಿ
ಖಾಸಗಿತನ, ಸುಸ್ಥಿರತೆ ಮತ್ತು ನವೀಕರಿಸಬಹುದಾದ ಇಂಧನದ ಮೇಲೆ ಹೆಚ್ಚಿನ ಗಮನ ಹರಿಸಿದ್ದ ಕುಕ್, ಆಪಲ್ ಅನ್ನು ಒಂದು ನಂಬಿಕಸ್ತ ಬ್ರ್ಯಾಂಡ್ ಆಗಿ ರೂಪಿಸಿದರು. ಈಗ ಜಾನ್ ಟೆರ್ನಸ್ ಅವರ ನೇತೃತ್ವದಲ್ಲಿ ಆಪಲ್ ತನ್ನ ಹಾರ್ಡ್ವೇರ್ ನಾವೀನ್ಯತೆ ಮತ್ತು ಸೇವಾ ಪರಿಸರ ವ್ಯವಸ್ಥೆಯನ್ನು ಮತ್ತಷ್ಟು ವಿಸ್ತರಿಸುವ ನಿರೀಕ್ಷೆಯಿದೆ.
