ಹಿಂದೂಗಳ ಹಬ್ಬದ ಅವಹೇಳನ: ಸ್ವಿಸ್ ಪ್ರವಾಸಿಗನಿಗೆ ಒಂದು ವರ್ಷ ಜೈಲು

ಇಂಡೋನೇಷ್ಯಾದ ಬಾಲಿ ದ್ವೀಪದಲ್ಲಿ ಆಚರಿಸಲಾಗುವ ಹಿಂದೂಗಳ ಪವಿತ್ರ ‘ನಿಯೆಪಿ’ ಹಬ್ಬದ ನಿಯಮಗಳನ್ನು ಉಲ್ಲಂಘಿಸಿ, ಹಬ್ಬವನ್ನು ಅವಹೇಳನ ಮಾಡಿದ ವಿಡಿಯೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದ ಸ್ವಿಟ್ಜರ್‌ಲ್ಯಾಂಡ್‌ನ 26 ವರ್ಷದ ಪ್ರವಾಸಿಗನಿಗೆ ಒಂದು ವರ್ಷದ ಜೈಲು ಶಿಕ್ಷೆ ವಿಧಿಸಲಾಗಿದೆ.

ಲೂಜಿಯನ್ ಆಂಡ್ರಿನ್ ಝ್‌ಗ್ರಾಗೆನ್ ಎಂಬಾತನಿಗೆ ಡೆನ್ಪಸಾರ್ ನ್ಯಾಯಾಲಯ ಶಿಕ್ಷೆ ವಿಧಿಸಿದೆ. ನಿಯೆಪಿ ಆಚರಣೆಯ ಸಂದರ್ಭದಲ್ಲಿ ವಿಧಿಸಲಾಗಿದ್ದ ನಿರ್ಬಂಧಗಳನ್ನು ಉಲ್ಲಂಘಿಸಿದ್ದಲ್ಲದೆ, ಹಬ್ಬದ ಬಗ್ಗೆ ಅವಹೇಳನಕಾರಿ ಹೇಳಿಕೆಗಳನ್ನು ಒಳಗೊಂಡ ವಿಡಿಯೊವನ್ನು ಅಪ್​ಲೋಡ್ ಮಾಡಿದ್ದ ಆರೋಪ ಆತನ ವಿರುದ್ಧ ಕೇಳಿಬಂದಿತ್ತು.

ನಿಯೆಪಿ ದಿನ ನಿಯಮ ಉಲ್ಲಂಘಿಸಿ ವಿಡಿಯೊ

ಬಾಲಿಯಲ್ಲಿ ಹಿಂದೂಗಳ ಪ್ರಮುಖ ಆಚರಣೆಗಳಲ್ಲಿ ಒಂದಾದ ನಿಯೆಪಿಯನ್ನು ‘ನಿಶ್ಯಬ್ದ ದಿನ’ ಎಂದೂ ಕರೆಯಲಾಗುತ್ತದೆ. ಈ ಸಂದರ್ಭದಲ್ಲಿ ಜನರು ಮನೆಗಳಲ್ಲೇ ಉಳಿಯುವುದು, ಕೆಲಸ ಹಾಗೂ ಮನರಂಜನಾ ಚಟುವಟಿಕೆಗಳಿಂದ ದೂರವಿರುವುದು ಸೇರಿದಂತೆ ಹಲವು ಕಟ್ಟುನಿಟ್ಟಿನ ನಿಯಮಗಳನ್ನು ಪಾಲಿಸಲಾಗುತ್ತದೆ. ಸ್ಥಳೀಯ ನಿವಾಸಿಗಳಷ್ಟೇ ಅಲ್ಲದೆ ವಿದೇಶಿ ಪ್ರವಾಸಿಗರೂ ಈ ನಿರ್ಬಂಧಗಳನ್ನು ಪಾಲಿಸಬೇಕಾಗುತ್ತದೆ.

ಮಾರ್ಚ್ 19ರಂದು ನಡೆದ ನಿಯೆಪಿ ಆಚರಣೆಯ ಸಂದರ್ಭದಲ್ಲಿ ಝ್‌ಗ್ರಾಗೆನ್ ಹೊರಗೆ ಸಂಚರಿಸಿ ಖಾಲಿ ಬೀಚ್‌ಗೆ ತೆರಳಿದ್ದ. ಈ ದೃಶ್ಯಗಳನ್ನು ವಿಡಿಯೊ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದ ಆತ, ಹಬ್ಬದ ಬಗ್ಗೆ ಅವಹೇಳನಕಾರಿ ಪದಗಳನ್ನು ಬಳಸಿದ್ದ ಎನ್ನಲಾಗಿದೆ. ಈ ವಿಡಿಯೊ ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದ್ದು, ಪೊಲೀಸರಿಗೆ ದೂರುಗಳು ಸಲ್ಲಿಕೆಯಾಗಿದ್ದವು.

ಹಸಿವು, ಬೇಸರದಿಂದ ವಿಡಿಯೊ ಮಾಡಿದ್ದೆ ಎಂದ ಆರೋಪಿ

ಬಾಲಿಗೆ ಫೆಬ್ರವರಿಯಲ್ಲೇ ಆಗಮಿಸಿದ್ದ ಸ್ವಿಸ್ ಪ್ರವಾಸಿಗನಿಗೆ ನಿಯೆಪಿ ದಿನದ ನಿರ್ಬಂಧಗಳ ಬಗ್ಗೆ ಹೋಟೆಲ್ ಸಿಬ್ಬಂದಿ ಮಾಹಿತಿ ನೀಡಿದ್ದರು ಎಂದು ವರದಿಯಾಗಿದೆ. ಆದರೆ, ಹಬ್ಬದ ದಿನ ಆಹಾರ ಸಿಗದೆ ಹಸಿವು ಮತ್ತು ಬೇಸರದಿಂದ ವಿಡಿಯೊ ಮಾಡಿದ್ದಾಗಿ ಆತ ನ್ಯಾಯಾಲಯದ ಮುಂದೆ ಹೇಳಿಕೊಂಡಿದ್ದಾನೆ.

ತಾನು ಸ್ಥಳೀಯ ನಿಯಮಗಳನ್ನು ಸರಿಯಾಗಿ ಅರ್ಥಮಾಡಿಕೊಂಡಿರಲಿಲ್ಲ ಎಂದು ಹೇಳಿರುವ ಆತ, ತನ್ನ ಕೃತ್ಯದ ಬಗ್ಗೆ ವಿಷಾದ ವ್ಯಕ್ತಪಡಿಸಿದ್ದಾನೆ. ಬಾಲಿಯ ಜನರು ಮತ್ತು ಅವರ ಧಾರ್ಮಿಕ ಸಂಪ್ರದಾಯಗಳಿಗೆ ನೋವುಂಟು ಮಾಡಿರುವುದಕ್ಕೆ ಕ್ಷಮೆಯಾಚಿಸಿದ್ದಾನೆ.

ಐದು ತಿಂಗಳ ಬಂಧನ ಅವಧಿ ಶಿಕ್ಷೆಯಲ್ಲಿ ಹೊಂದಾಣಿಕೆ

ನ್ಯಾಯಾಧೀಶರು, ಆರೋಪಿಯ ನಡೆ ಬಾಲಿಯ ಜನರ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದಿದ್ದು, ಸಾರ್ವಜನಿಕ ಆಕ್ರೋಶಕ್ಕೆ ಕಾರಣವಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಕೃತ್ಯಕ್ಕೆ ಆರೋಪಿ ಹೊಣೆಗಾರನಾಗಬೇಕು ಎಂದು ತಿಳಿಸಿ ಒಂದು ವರ್ಷದ ಜೈಲು ಶಿಕ್ಷೆ ವಿಧಿಸಲಾಗಿದೆ.

ಬಂಧನದ ನಂತರ ಈಗಾಗಲೇ ಐದು ತಿಂಗಳು ವಿಚಾರಣಾಧೀನ ಬಂಧನದಲ್ಲಿದ್ದ ಅವಧಿಯನ್ನು ಶಿಕ್ಷೆಯ ಅವಧಿಯಲ್ಲಿ ಹೊಂದಾಣಿಕೆ ಮಾಡಲಾಗುವುದು. ಈ ನಡುವೆ ಸ್ವಿಟ್ಜರ್‌ಲ್ಯಾಂಡ್ ಅಧಿಕಾರಿಗಳು ಆರೋಪಿಗೆ ಅಗತ್ಯವಾದ ಕಾನ್ಸುಲರ್ ನೆರವು ನೀಡುತ್ತಿದ್ದಾರೆ ಎಂದು ತಿಳಿದುಬಂದಿದೆ.

24 ಗಂಟೆ ಸ್ಥಬ್ಧವಾಗುವ ಬಾಲಿ

ನಿಯೆಪಿ ಸಂದರ್ಭದಲ್ಲಿ ಬಾಲಿ ದ್ವೀಪದ ಸಾಮಾನ್ಯ ಜನಜೀವನ ಬಹುತೇಕ ಸಂಪೂರ್ಣ ಸ್ಥಗಿತಗೊಳ್ಳುತ್ತದೆ. ಬಾಲಿಯ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವೂ ಒಂದು ದಿನ ಮುಚ್ಚಲಾಗುತ್ತದೆ. ರಸ್ತೆ ಮತ್ತು ಬೀಚ್‌ಗಳು ಜನರಿಲ್ಲದೆ ಖಾಲಿಯಾಗುತ್ತವೆ. ಮನರಂಜನಾ ಕಾರ್ಯಕ್ರಮಗಳಿಗೆ ನಿರ್ಬಂಧ ವಿಧಿಸಲಾಗುತ್ತದೆ ಹಾಗೂ ಹಲವು ಪ್ರದೇಶಗಳಲ್ಲಿ ವಿದ್ಯುತ್ ಬಳಕೆಯನ್ನು ಕಡಿಮೆ ಮಾಡುವ ಪದ್ಧತಿಯಿದೆ.

ಕಳೆದ ವರ್ಷ ಸುಮಾರು 70 ಲಕ್ಷ ಅಂತಾರಾಷ್ಟ್ರೀಯ ಪ್ರವಾಸಿಗರನ್ನು ಆಕರ್ಷಿಸಿದ್ದ ಬಾಲಿಯಲ್ಲಿ, ವಿದೇಶಿ ಪ್ರವಾಸಿಗರಿಂದ ಸ್ಥಳೀಯ ಸಂಪ್ರದಾಯಗಳ ಉಲ್ಲಂಘನೆ ಹೆಚ್ಚುತ್ತಿರುವ ಬಗ್ಗೆ ಆತಂಕ ವ್ಯಕ್ತವಾಗಿದೆ. ಧಾರ್ಮಿಕ ಸ್ಥಳಗಳಲ್ಲಿ ಅನುಚಿತ ವರ್ತನೆ, ಸಂಚಾರ ನಿಯಮ ಉಲ್ಲಂಘನೆ ಮತ್ತು ಸ್ಥಳೀಯ ಆಚರಣೆಗಳಿಗೆ ಅಗೌರವ ತೋರುವ ಘಟನೆಗಳ ಹಿನ್ನೆಲೆಯಲ್ಲಿ ಪ್ರವಾಸಿಗರ ಮೇಲೆ ಹೆಚ್ಚಿನ ನಿಗಾ ಇರಿಸಲು ಬಾಲಿ ಆಡಳಿತ ಮುಂದಾಗಿದೆ.