ಒರಾಕಲ್‌ನಲ್ಲಿ ಜಾಗತಿಕವಾಗಿ 10 ಸಾವಿರ ಹುದ್ದೆಗಳಿಗೆ ಕುತ್ತು? ಭಾರತದಲ್ಲಿ 1000 ಉದ್ಯೋಗ ಕಡಿತ ಸಾಧ್ಯತೆ

ಟೆಕ್‌ ದೈತ್ಯ ಒರಾಕಲ್‌ನಲ್ಲಿ ಮತ್ತೊಂದು ಸುತ್ತಿನ ಬೃಹತ್ ಉದ್ಯೋಗ ಕಡಿತ ನಡೆಯುವ ಸಾಧ್ಯತೆ ಎದುರಾಗಿದೆ. ಜಾಗತಿಕವಾಗಿ 7,000ರಿಂದ 10,000 ಉದ್ಯೋಗಗಳು ಅಪಾಯದಲ್ಲಿರಬಹುದು ಎಂದು ವರದಿಗಳು ತಿಳಿಸಿವೆ. ಇದರಿಂದ ಭಾರತದಲ್ಲಿರುವ ಒರಾಕಲ್ ಉದ್ಯೋಗಿಗಳ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದ್ದು, ಎಷ್ಟು ಹುದ್ದೆಗಳಿಗೆ ಕತ್ತರಿ ಬೀಳಬಹುದು ಎಂಬುದು ಸದ್ಯಕ್ಕೆ ಖಚಿತವಾಗಿಲ್ಲ.

ಈ ಸಂಭಾವ್ಯ ಉದ್ಯೋಗ ಕಡಿತವು ಒರಾಕಲ್‌ ಉದ್ಯೋಗಿಗಳಿಗೆ ಮತ್ತಷ್ಟು ಆತಂಕ ಮೂಡಿಸಿದೆ. ಕಳೆದ ಒಂದು ವರ್ಷದಲ್ಲೇ ಕಂಪನಿ ತನ್ನ ಉದ್ಯೋಗಿಗಳ ಸಂಖ್ಯೆಯನ್ನು ಗಣನೀಯವಾಗಿ ಕಡಿಮೆ ಮಾಡಿದ್ದು, ಇದೇ ವೇಳೆ ಕ್ಲೌಡ್‌ ಕಂಪ್ಯೂಟಿಂಗ್‌ ಮತ್ತು ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದಲ್ಲಿ ಹೂಡಿಕೆಯನ್ನು ಹೆಚ್ಚಿಸುತ್ತಿದೆ.

ಖರ್ಚು ಕಡಿತಕ್ಕೆ ತಂಡಗಳಿಗೆ ಸೂಚನೆ?

ಇತ್ತೀಚಿನ ಬೆಳವಣಿಗೆಗಳ ಬಗ್ಗೆ ಮಾಹಿತಿ ಹೊಂದಿರುವ ಮೂಲಗಳನ್ನು ಉಲ್ಲೇಖಿಸಿ ಮನಿ ಕಂಟ್ರೋಲ್‌ ವರದಿ ಮಾಡಿರುವಂತೆ, ಕಂಪನಿಯು ವಿವಿಧ ತಂಡಗಳಿಗೆ ತಮ್ಮ ಖರ್ಚುಗಳನ್ನು ಕಡಿಮೆ ಮಾಡುವ ಮಾರ್ಗಗಳನ್ನು ಹುಡುಕುವಂತೆ ಸೂಚಿಸಿದೆ ಎನ್ನಲಾಗಿದೆ.

ಇದರ ಪರಿಣಾಮವಾಗಿ ಒಂದೇ ವಿಭಾಗಕ್ಕೆ ಸೀಮಿತವಾಗದೆ, ಕಂಪನಿಯ ಹಲವು ವಿಭಾಗಗಳಲ್ಲಿ ಉದ್ಯೋಗ ಕಡಿತ ನಡೆಯುವ ಸಾಧ್ಯತೆಯಿದೆ. ಆದರೆ ಈ ಬಗ್ಗೆ ಒರಾಕಲ್‌ ಯಾವುದೇ ಅಧಿಕೃತ ಘೋಷಣೆ ಮಾಡಿಲ್ಲ.

ಸೆಪ್ಟೆಂಬರ್‌ನಲ್ಲಿ ಸ್ಪಷ್ಟ ಚಿತ್ರಣ?

ಒರಾಕಲ್‌ನಲ್ಲಿ ಸೆಪ್ಟೆಂಬರ್‌ನಲ್ಲಿ ಉದ್ಯೋಗ ಕಡಿತ ಘೋಷಣೆಯಾಗಬಹುದು ಎಂಬ ಚರ್ಚೆ ಉದ್ಯೋಗಿಗಳ ನಡುವೆ ನಡೆಯುತ್ತಿದೆ ಎನ್ನಲಾಗಿದೆ. ಸೆಪ್ಟೆಂಬರ್‌ 1ರಂದು ಉದ್ಯೋಗ ಕಡಿತ ಪ್ರಕ್ರಿಯೆ ಆರಂಭವಾಗಬಹುದು ಎಂಬ ಭೀತಿ ಈ ಹಿಂದೆ ಇತ್ತು. ಇದೀಗ ಸೆಪ್ಟೆಂಬರ್‌ 15ರ ದಿನಾಂಕದ ಬಗ್ಗೆಯೂ ಚರ್ಚೆ ನಡೆಯುತ್ತಿದೆ ಎನ್ನಲಾಗಿದೆ.

ಆದರೆ ಉದ್ಯೋಗ ಕಡಿತ ಯಾವಾಗ ಆರಂಭವಾಗಲಿದೆ ಅಥವಾ ಎಷ್ಟು ಮಂದಿ ಉದ್ಯೋಗ ಕಳೆದುಕೊಳ್ಳಲಿದ್ದಾರೆ ಎಂಬುದರ ಬಗ್ಗೆ ಇನ್ನೂ ಯಾವುದೇ ಖಚಿತತೆ ಇಲ್ಲ. ಕೆಲವು ಮ್ಯಾನೇಜರ್‌ಗಳಿಗೂ ಯಾವ ಹುದ್ದೆಗಳನ್ನು ತೆಗೆದುಹಾಕಲಾಗುತ್ತದೆ ಎಂಬ ಸಂಪೂರ್ಣ ಮಾಹಿತಿ ಇಲ್ಲ ಎನ್ನಲಾಗಿದೆ.

ಭಾರತದ ಉದ್ಯೋಗಿಗಳಿಗೂ ಹೊಡೆತ?

ಒರಾಕಲ್‌ನ ಭಾರತದಲ್ಲಿನ ಉದ್ಯೋಗಿಗಳ ಮೇಲೂ ಈ ಸಂಭಾವ್ಯ ಉದ್ಯೋಗ ಕಡಿತದ ಪರಿಣಾಮ ಬೀರುವ ಸಾಧ್ಯತೆಯಿದೆ. ಭಾರತದಲ್ಲಿ ಒರಾಕಲ್‌ ಎಂಜಿನಿಯರಿಂಗ್‌, ಕ್ಲೌಡ್‌ ಸೇವೆಗಳು, ತಂತ್ರಜ್ಞಾನ ಮತ್ತು ಸಪೋರ್ಟ್‌ ವಿಭಾಗಗಳಲ್ಲಿ ದೊಡ್ಡ ಪ್ರಮಾಣದ ಉದ್ಯೋಗಿಗಳನ್ನು ಹೊಂದಿದೆ. ಹೀಗಾಗಿ ಕಂಪನಿಯ ಜಾಗತಿಕ ಕಾರ್ಯಾಚರಣೆಯಲ್ಲಿ ಭಾರತ ಪ್ರಮುಖ ಕೇಂದ್ರವಾಗಿರುವುದರಿಂದ, ವೆಚ್ಚ ಕಡಿತದ ಯಾವುದೇ ದೊಡ್ಡ ಕ್ರಮ ಇಲ್ಲಿನ ಉದ್ಯೋಗಿಗಳ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯಿದೆ.

ಆಂತರಿಕವಾಗಿ ಹರಿದಾಡುತ್ತಿರುವ ಅಂದಾಜುಗಳ ಪ್ರಕಾರ, ಜಾಗತಿಕವಾಗಿ 7,000ರಿಂದ 10,000 ಹುದ್ದೆಗಳು ಕಡಿತಗೊಳ್ಳುವ ಸಾಧ್ಯತೆಯಿದೆ. ಆದರೆ ಈ ಸಂಖ್ಯೆಗಳನ್ನು ಒರಾಕಲ್‌ ಅಧಿಕೃತವಾಗಿ ದೃಢಪಡಿಸಿಲ್ಲ.

ಈಗಾಗಲೇ 21 ಸಾವಿರ ಉದ್ಯೋಗಿಗಳ ಸಂಖ್ಯೆ ಇಳಿಕೆ

ಒರಾಕಲ್‌ ಕಳೆದ ಒಂದು ವರ್ಷದಲ್ಲೇ ತನ್ನ ಉದ್ಯೋಗಿಗಳ ಸಂಖ್ಯೆಯನ್ನು ದೊಡ್ಡ ಪ್ರಮಾಣದಲ್ಲಿ ಕಡಿಮೆ ಮಾಡಿದೆ. 2026ರ ಮೇ ಅಂತ್ಯದ ವೇಳೆಗೆ ಕಂಪನಿಯಲ್ಲಿ ಸುಮಾರು 1.41 ಲಕ್ಷ ಪೂರ್ಣಾವಧಿ ಉದ್ಯೋಗಿಗಳು ಇದ್ದರು. ಒಂದು ವರ್ಷದ ಹಿಂದೆ ಈ ಸಂಖ್ಯೆ ಸುಮಾರು 1.62 ಲಕ್ಷ ಇತ್ತು. ಅಂದರೆ ಕೇವಲ 12 ತಿಂಗಳಲ್ಲಿ ಕಂಪನಿಯ ಒಟ್ಟು ಉದ್ಯೋಗಿಗಳ ಸಂಖ್ಯೆ ಸುಮಾರು 21,000ರಷ್ಟು ಕಡಿಮೆಯಾಗಿದೆ.

ಕಂಪನಿಯ ವಾರ್ಷಿಕ ವರದಿಯಲ್ಲೂ AI ಬಳಕೆಯ ಹೆಚ್ಚಳದಿಂದ ಉದ್ಯೋಗಿಗಳ ಸಂಖ್ಯೆಯಲ್ಲಿ ಮತ್ತಷ್ಟು ಇಳಿಕೆಯಾಗುವ ಸಾಧ್ಯತೆಯನ್ನು ಒರಾಕಲ್‌ ಉಲ್ಲೇಖಿಸಿದೆ.

AI ತಂತ್ರಜ್ಞಾನಗಳನ್ನು ಕಂಪನಿಯ ಕಾರ್ಯಾಚರಣೆಗಳಲ್ಲಿ ಅಳವಡಿಸುವುದರಿಂದ ಈಗಾಗಲೇ ಉದ್ಯೋಗಿಗಳ ಸಂಖ್ಯೆಯಲ್ಲಿ ಕಡಿತವಾಗಿದೆ ಮತ್ತು ಮುಂದೆಯೂ ಇಂತಹ ಕಡಿತಗಳು ಸಂಭವಿಸಬಹುದು ಎಂದು ಕಂಪನಿ ತನ್ನ ವರದಿಯಲ್ಲಿ ತಿಳಿಸಿದೆ.

ಉದ್ಯೋಗ ಕಡಿತದ ನಡುವೆಯೇ AIಗೆ ಭಾರಿ ಹೂಡಿಕೆ

ಒರಾಕಲ್‌ನಲ್ಲಿ ಉದ್ಯೋಗ ಕಡಿತದ ಚರ್ಚೆ ನಡೆಯುತ್ತಿರುವ ಸಂದರ್ಭದಲ್ಲೇ, ಕಂಪನಿ AI ಕ್ಷೇತ್ರಕ್ಕೆ ಅಗತ್ಯವಿರುವ ಮೂಲಸೌಕರ್ಯದಲ್ಲಿ ಭಾರಿ ಪ್ರಮಾಣದ ಹೂಡಿಕೆ ಮಾಡುತ್ತಿದೆ.

AI ಕಂಪನಿಗಳಿಂದ ಕ್ಲೌಡ್‌ ಸೇವೆಗಳಿಗೆ ಬೇಡಿಕೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಒರಾಕಲ್‌ ತನ್ನ ಡೇಟಾ ಸೆಂಟರ್‌ ಸಾಮರ್ಥ್ಯ ಮತ್ತು ಕ್ಲೌಡ್‌ ವ್ಯವಹಾರವನ್ನು ವಿಸ್ತರಿಸುತ್ತಿದೆ.

ಇದು ಕಂಪನಿಗೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ. AI ಮಾರುಕಟ್ಟೆಯಲ್ಲಿ ಸ್ಪರ್ಧಿಸಲು ಹೆಚ್ಚಿನ ಕಂಪ್ಯೂಟಿಂಗ್‌ ಮೂಲಸೌಕರ್ಯ ಅಗತ್ಯವಿದೆ. ಮತ್ತೊಂದೆಡೆ, ವ್ಯವಹಾರದ ಇತರ ಭಾಗಗಳಲ್ಲಿ ವೆಚ್ಚವನ್ನು ನಿಯಂತ್ರಿಸುವ ಅನಿವಾರ್ಯತೆಯೂ ಇದೆ.

ಒರಾಕಲ್‌ ತನ್ನ ವಾರ್ಷಿಕ ವರದಿಯ ಪ್ರಕಾರ, ಕಳೆದ ವರ್ಷ ಉದ್ಯೋಗ ಕಡಿತ, ಪರಿಹಾರಧನ ಮತ್ತು ಇತರ ಪುನರ್‌ರಚನಾ ವೆಚ್ಚಗಳಿಗಾಗಿ ಸುಮಾರು 1.8 ಬಿಲಿಯನ್ ಡಾಲರ್ ಖರ್ಚು ಮಾಡಿದೆ. ಸಂಸ್ಥೆಯ ಪುನರ್‌ರಚನೆಯಿಂದ ಕಂಪನಿಯ ಕಾರ್ಯಾಚರಣೆಗಳಿಗೆ ಅಡ್ಡಿಯಾಗುವ ಸಾಧ್ಯತೆ ಇದೆ. ಕೆಲವು ಪ್ರಮುಖ ಕೌಶಲ್ಯ ಹೊಂದಿರುವ ಹುದ್ದೆಗಳಲ್ಲಿ ಸಿಬ್ಬಂದಿ ಕೊರತೆ ಉಂಟಾಗುವ ಅಪಾಯವೂ ಇದೆ ಎಂದು ಒರಾಕಲ್‌ ಹೂಡಿಕೆದಾರರಿಗೆ ಎಚ್ಚರಿಕೆ ನೀಡಿದೆ.

ಹೊಸ ಉದ್ಯೋಗ ಕಡಿತವನ್ನು ಒರಾಕಲ್‌ ದೃಢಪಡಿಸಿಲ್ಲ

ಸದ್ಯ ವರದಿಯಾಗಿರುವ ಹೊಸ ಉದ್ಯೋಗ ಕಡಿತದ ಬಗ್ಗೆ ಒರಾಕಲ್‌ ಯಾವುದೇ ಅಧಿಕೃತ ದೃಢೀಕರಣ ನೀಡಿಲ್ಲ. ಈ ಬೆಳವಣಿಗೆಗಳ ಕುರಿತು ಕಂಪನಿ ತಕ್ಷಣ ಪ್ರತಿಕ್ರಿಯಿಸಿಲ್ಲ. ಈ ಬೆಳವಣಿಗೆಗಳು ಒರಾಕಲ್‌ನ ಮುಂದಿನ ತ್ರೈಮಾಸಿಕ ಹಣಕಾಸು ಫಲಿತಾಂಶ ಪ್ರಕಟಣೆಗೆ ಕೆಲವೇ ದಿನಗಳ ಮುನ್ನ ನಡೆಯುತ್ತಿವೆ. ಕಂಪನಿಯ ಮುಂದಿನ ತ್ರೈಮಾಸಿಕ ಫಲಿತಾಂಶಗಳು ಸೆಪ್ಟೆಂಬರ್‌ 11ರಂದು ಬಿಡುಗಡೆಯಾಗುವ ನಿರೀಕ್ಷೆಯಿದೆ.

ಒಂದು ವೇಳೆ ವರದಿಯಾಗಿರುವ ಉದ್ಯೋಗ ಕಡಿತ ಜಾರಿಯಾದರೆ, ಕ್ಲೌಡ್‌ ಮತ್ತು AI ಕ್ಷೇತ್ರಗಳತ್ತ ತನ್ನ ವ್ಯವಹಾರವನ್ನು ಮರುರೂಪಿಸುತ್ತಿರುವ ಒರಾಕಲ್‌ನ ಉದ್ಯೋಗ ಕಡಿತಗಳ ಸರಣಿಗೆ ಇದು ಮತ್ತೊಂದು ಸೇರ್ಪಡೆಯಾಗಲಿದೆ.