ಮೆಟಾದ ಮಾಜಿ ಎಂಜಿನಿಯರಿಂಗ್ ನಿರ್ದೇಶಕ ಆರ್ಟುರೊ ಬೆಜಾರ್ ಗಂಭೀರ ಆರೋಪ ಮಾಡಿದ್ದಾರೆ.
ಮಕ್ಕಳ ಸುರಕ್ಷತೆಗಿಂತ ಲಾಭಕ್ಕೇ ಆದ್ಯತೆ: ಇನ್ಸ್ಟಾಗ್ರಾಂ ಬಗ್ಗೆ ಮೆಟಾದ ಮಾಜಿ ಅಧಿಕಾರಿಯಿಂದ ಸ್ಫೋಟಕ ಸತ್ಯ ಬಹಿರಂಗ
ಇನ್ಸ್ಟಾಗ್ರಾಂನಲ್ಲಿ ಮಕ್ಕಳ ಸುರಕ್ಷತೆಗಿಂತ ಎಂಗೇಜ್ಮೆಂಟ್ ಮತ್ತು ಲಾಭಕ್ಕೆ ಮೆಟಾ ಆದ್ಯತೆ ನೀಡಿತ್ತು ಎಂದು ಮಾಜಿ ಅಧಿಕಾರಿ ಆರ್ಟುರೊ ಬೆಜಾರ್ ನ್ಯಾಯಾಲಯದಲ್ಲಿ ಆರೋಪಿಸಿದ್ದಾರೆ. ಮೆಟಾ ಈ ಆರೋಪಗಳನ್ನು ನಿರಾಕರಿಸಿದೆ.
ಇನ್ಸ್ಟಾಗ್ರಾಂನಲ್ಲಿ ಮಕ್ಕಳ ಸುರಕ್ಷತೆಗಿಂತ ಯೂಸರ್ಸ್ ಎಂಗೇಜ್ಮೆಂಟ್ ಮತ್ತು ಕಂಪನಿಯ ಲಾಭಕ್ಕೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತಿತ್ತು ಎಂದು ಮೆಟಾದ ಮಾಜಿ ಎಂಜಿನಿಯರಿಂಗ್ ನಿರ್ದೇಶಕ ಆರ್ಟುರೊ ಬೆಜಾರ್ ಗಂಭೀರ ಆರೋಪ ಮಾಡಿದ್ದಾರೆ. 13 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳು ಇನ್ಸ್ಟಾಗ್ರಾಂ ಬಳಸುತ್ತಿರುವುದು ಕಂಪನಿಗೆ ತಿಳಿದಿದ್ದರೂ, ಅವರ ವಯಸ್ಸು ಪತ್ತೆಹಚ್ಚುವ ಹಾಗೂ ಸುರಕ್ಷತೆ ಖಚಿತಪಡಿಸುವ ಕ್ರಮಗಳಿಗೆ ಸಾಕಷ್ಟು ಒತ್ತು ನೀಡಲಾಗಿರಲಿಲ್ಲ ಎಂದು ಅವರು ಹೇಳಿದ್ದಾರೆ.
ಕ್ಯಾಲಿಫೋರ್ನಿಯಾದ ಓಕ್ಲ್ಯಾಂಡ್ನ ಫೆಡರಲ್ ನ್ಯಾಯಾಲಯದಲ್ಲಿ ಮೆಟಾ ವಿರುದ್ಧ ನಡೆಯುತ್ತಿರುವ ಮಹತ್ವದ ವಿಚಾರಣೆಯಲ್ಲಿ ಬೆಜಾರ್ ಎರಡನೇ ದಿನ ಸಾಕ್ಷ್ಯ ನೀಡಿದ್ದಾರೆ. ಇನ್ಸ್ಟಾಗ್ರಾಂನಲ್ಲಿ 13 ವರ್ಷದೊಳಗಿನ ಮಕ್ಕಳ ವಿಚಾರದಲ್ಲಿ ಕಂಪನಿಯ ಧೋರಣೆ ‘ಕೇಳಬೇಡಿ, ಹೇಳಬೇಡಿ’ ಎಂಬಂತಿತ್ತು ಎಂದು ಅವರು ಆರೋಪಿಸಿದ್ದಾರೆ.
ಎಂಗೇಜ್ಮೆಂಟ್ ಹೆಚ್ಚಿಸುವುದೇ ಪ್ರಮುಖ ಗುರಿ
ಮೆಟಾದಲ್ಲಿ ಬಳಕೆದಾರರು ಉತ್ಪನ್ನಗಳೊಂದಿಗೆ ಎಷ್ಟು ಬಾರಿ ಮತ್ತು ಎಷ್ಟು ಸಮಯ ತೊಡಗಿಸಿಕೊಳ್ಳುತ್ತಾರೆ ಎಂಬುದನ್ನು ಪ್ರಮುಖ ಕಾರ್ಯಕ್ಷಮತಾ ಮಾನದಂಡವಾಗಿ ಪರಿಗಣಿಸಲಾಗುತ್ತಿತ್ತು ಎಂದು ಬೆಜಾರ್ ಹೇಳಿದ್ದಾರೆ. ಬಳಕೆದಾರರು ಹೆಚ್ಚು ಸಮಯ ವೇದಿಕೆಯಲ್ಲಿ ಉಳಿದಷ್ಟೂ ಕಂಪನಿಗೆ ಹೆಚ್ಚಿನ ಆದಾಯ ದೊರೆಯುತ್ತಿತ್ತು. ಹೀಗಾಗಿ ಬಳಕೆದಾರರ ಮಾನಸಿಕ ಆರೋಗ್ಯಕ್ಕೆ ಹಾನಿಯಾಗುವ ಸಾಧ್ಯತೆಯಿದ್ದರೂ ಎಂಗೇಜ್ಮೆಂಟ್ಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುತ್ತಿತ್ತು ಎಂದು ಅವರು ಆರೋಪಿಸಿದ್ದಾರೆ.
ಉತ್ಪನ್ನ ವಿಭಾಗಗಳಲ್ಲಿ ಕೆಲಸ ಮಾಡುವ ಉದ್ಯೋಗಿಗಳ ಕಾರ್ಯಕ್ಷಮತೆ ಮತ್ತು ವೇತನ ಮೌಲ್ಯಮಾಪನದಲ್ಲೂ ಬಳಕೆದಾರರ ಸಂಖ್ಯೆ ಹಾಗೂ ಅವರು ವೇದಿಕೆಯಲ್ಲಿ ಕಳೆಯುವ ಸಮಯದಂತಹ ಅಂಶಗಳು ಪ್ರಮುಖವಾಗಿದ್ದವು ಎಂದು ಬೆಜಾರ್ ತಿಳಿಸಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಸುರಕ್ಷತೆಗೆ ನಂತರದ ಆದ್ಯತೆಯಾಗಿತ್ತು ಎಂದು ಅವರು ನ್ಯಾಯಾಲಯದಲ್ಲಿ ಹೇಳಿದ್ದಾರೆ.
13 ವರ್ಷದೊಳಗಿನ ಮಕ್ಕಳ ಖಾತೆಗಳ ಬಗ್ಗೆ ಆರೋಪ
ತಮ್ಮ ಸಂಶೋಧನೆಯ ವೇಳೆ ಇನ್ಸ್ಟಾಗ್ರಾಂನಲ್ಲಿ 13 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಹತ್ತಾರು ಸಾವಿರ ಮಕ್ಕಳನ್ನು ಪತ್ತೆಹಚ್ಚಿದ್ದಾಗಿ ಬೆಜಾರ್ ಹೇಳಿದ್ದಾರೆ. ಇಷ್ಟು ಚಿಕ್ಕ ವಯಸ್ಸಿನ ಮಕ್ಕಳು ಇನ್ಸ್ಟಾಗ್ರಾಂ ಬಳಸುತ್ತಿರುವುದು ಮೆಟಾದೊಳಗೆ ಸಾಮಾನ್ಯವಾಗಿ ತಿಳಿದಿದ್ದ ವಿಚಾರವಾಗಿತ್ತು ಎಂದೂ ಅವರು ತಿಳಿಸಿದ್ದಾರೆ.
ನಕಲಿ ಖಾತೆಗಳನ್ನು ಪತ್ತೆಹಚ್ಚಲು ಮೆಟಾ ಅತ್ಯಾಧುನಿಕ ತಂತ್ರಜ್ಞಾನ ಹೊಂದಿದ್ದರೂ, 13 ವರ್ಷದೊಳಗಿನ ಮಕ್ಕಳನ್ನು ಗುರುತಿಸಿ ಅವರ ವಯಸ್ಸನ್ನು ಪರಿಶೀಲಿಸಲು ಸ್ಪಷ್ಟ ಗುರಿಗಳು ಅಥವಾ ಮಾನದಂಡಗಳಿರಲಿಲ್ಲ ಎಂದು ಬೆಜಾರ್ ಆರೋಪಿಸಿದ್ದಾರೆ.
‘ಟೇಕ್ ಎ ಬ್ರೇಕ್’ ಫೀಚರ್ಗೂ ಟೀಕೆ
2021ರಲ್ಲಿ ಪರಿಚಯಿಸಲಾದ ‘ಟೇಕ್ ಎ ಬ್ರೇಕ್’ ಫೀಚರ್ ಪರಿಣಾಮಕಾರಿಯಾಗಿರಲಿಲ್ಲ ಎಂದು ಬೆಜಾರ್ ಟೀಕಿಸಿದ್ದಾರೆ. ಬಳಕೆದಾರರೇ ಈ ಆಯ್ಕೆಯನ್ನು ಸಕ್ರಿಯಗೊಳಿಸಬೇಕಾಗಿದ್ದು, ಅದನ್ನು ಸುಲಭವಾಗಿ ನಿರ್ಲಕ್ಷಿಸಬಹುದಾಗಿತ್ತು. ಸುರಕ್ಷತಾ ಫೀಚರ್ಗಳು ಬಳಕೆದಾರರು ಸ್ವತಃ ಸಕ್ರಿಯಗೊಳಿಸುವಂತಿರದೆ, ಡೀಫಾಲ್ಟ್ ಆಗಿಯೇ ಚಾಲನೆಯಲ್ಲಿರಬೇಕು ಎಂದು ಅವರು ಹೇಳಿದ್ದಾರೆ.
29 ರಾಜ್ಯಗಳಿಂದ ಮೆಟಾ ವಿರುದ್ಧ ದಾವೆ
ಯುವಕರ ಮಾನಸಿಕ ಆರೋಗ್ಯ ಬಿಕ್ಕಟ್ಟಿಗೆ ಮೆಟಾದ ಸಾಮಾಜಿಕ ಮಾಧ್ಯಮ ವೇದಿಕೆಗಳು ಕೊಡುಗೆ ನೀಡಿವೆ ಎಂದು ಆರೋಪಿಸಿ ಅಮೆರಿಕದ 29 ರಾಜ್ಯಗಳು 2023ರಲ್ಲಿ ಮೆಟಾ ವಿರುದ್ಧ ಮೊಕದ್ದಮೆ ಹೂಡಿದ್ದವು. ಮಕ್ಕಳನ್ನು ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂಗೆ ಹೆಚ್ಚು ಅವಲಂಬಿತರನ್ನಾಗಿ ಮಾಡುವ ರೀತಿಯಲ್ಲಿ ಕೆಲವು ಫೀಚರ್ಗಳನ್ನು ಉದ್ದೇಶಪೂರ್ವಕವಾಗಿ ವಿನ್ಯಾಸಗೊಳಿಸಲಾಗಿದೆ ಎಂಬುದು ಪ್ರಮುಖ ಆರೋಪವಾಗಿದೆ. 13 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಿಂದ ಪೋಷಕರ ಅನುಮತಿಯಿಲ್ಲದೆ ಮಾಹಿತಿ ಸಂಗ್ರಹಿಸಲಾಗಿದೆ ಎಂಬ ಆರೋಪವೂ ಮೆಟಾ ವಿರುದ್ಧ ಇದೆ.
ಆರೋಪಗಳನ್ನು ತಳ್ಳಿಹಾಕಿದ ಮೆಟಾ
ಮೆಟಾ ಈ ಆರೋಪಗಳನ್ನು ನಿರಾಕರಿಸಿದೆ. ಮಕ್ಕಳ ಸುರಕ್ಷತೆಗೆ ಕಂಪನಿ ಬದ್ಧವಾಗಿದೆ ಮತ್ತು ವಿಚಾರಣೆಯ ಸಂದರ್ಭದಲ್ಲಿ ತನ್ನ ಸುರಕ್ಷತಾ ಕ್ರಮಗಳ ಬಗ್ಗೆ ಸಾಕ್ಷ್ಯಗಳನ್ನು ಮಂಡಿಸಲಾಗುವುದು ಎಂದು ಮೆಟಾದ ವಕೀಲ ಪಾಲ್ ಶ್ಮಿಟ್ ಹೇಳಿದ್ದಾರೆ.
ಕ್ಯಾಲಿಫೋರ್ನಿಯಾ, ಕೊಲೊರಾಡೋ, ಕೆಂಟಕಿ ಮತ್ತು ನ್ಯೂಜೆರ್ಸಿ ಸೇರಿದಂತೆ ಹಲವು ರಾಜ್ಯಗಳು ಈ ಪ್ರಕರಣದಲ್ಲಿ ಮೆಟಾ ವಿರುದ್ಧ ಹೋರಾಟ ನಡೆಸುತ್ತಿವೆ. ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂನ ಬಳಕೆದಾರ ಅನುಭವದಲ್ಲಿ ಬದಲಾವಣೆ ಹಾಗೂ ಭಾರಿ ಆರ್ಥಿಕ ದಂಡವನ್ನು ರಾಜ್ಯಗಳು ಕೋರಿವೆ. ವಿಚಾರಣೆ ಸುಮಾರು ಆರು ವಾರಗಳ ಕಾಲ ನಡೆಯುವ ನಿರೀಕ್ಷೆಯಿದೆ.
