ಕಂಟ್ರಿ ಮ್ಯೂಸಿಕ್ ದಂತಕಥೆ, ಖ್ಯಾತ ಗಾಯಕಿ ಡಾಲಿ ಪಾರ್ಟನ್ ನಿಧನ

ಅಮೆರಿಕನ್ ಹಾಡುಗಾರ್ತಿ, ಗೀತರಚನೆಗಾರ್ತಿ ಡಾಲಿ ಪಾರ್ಟನ್ (80) ಅವರು ನಿಧನರಾಗಿದ್ದಾರೆ. ನ್ಯಾಶ್ವಿಲ್ಲೆನ ವ್ಯಾಂಡರ್‌ಬಿಲ್ಟ್-ಇಂಗ್ರಾಮ್ ಕ್ಯಾನ್ಸರ್ ಸೆಂಟರ್‌ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಅವರು, ಅನಾರೋಗ್ಯದ ನಂತರ ಕೊನೆಯುಸಿರೆಳೆದಿದ್ದಾರೆ.

ಡಾಲಿ ಪಾರ್ಟನ್ ಅವರ ನಿಧನವು ಕೇವಲ ಸಂಗೀತ ಲೋಕಕ್ಕಲ್ಲ, ಜಾಗತಿಕ ಸಾಂಸ್ಕೃತಿಕ ಲೋಕಕ್ಕೆ ತುಂಬಲಾರದ ನಷ್ಟವಾಗಿದೆ. 'ಟೆನ್ನೆಸ್ಸೀ ಮೌಂಟೇನ್ಸ್'ನ ಒಂದು ಪುಟ್ಟ ಲಾಗ್ ಕ್ಯಾಬಿನ್‌ನಲ್ಲಿ ಹುಟ್ಟಿ, ವಿಶ್ವದ ಅತ್ಯಂತ ಪ್ರಭಾವಶಾಲಿ ತಾರೆಯಾಗಿ ಬೆಳೆದ ಅವರ ಬದುಕು ಒಂದು ಅದ್ಭುತ ಕಥನ.

12 ಮಕ್ಕಳಿದ್ದ ಬಡ ಕುಟುಂಬದಲ್ಲಿ ಜನಿಸಿದ ಪಾರ್ಟನ್, ತಮ್ಮ ಬದುಕನ್ನು ಅತೀ ಬಡತನದ ದಿನಗಳು ಎಂದು ಬಣ್ಣಿಸುತ್ತಿದ್ದರು. ಅವರ ತಂದೆ ರೈತ ಕೆಲಸಕ್ಕಾಗಿ ಶಾಲೆಯನ್ನು ತೊರೆದಿದ್ದರಿಂದ ಅಕ್ಷರ ಜ್ಞಾನಕ್ಕಾಗಿ ಕಷ್ಟಪಡುತ್ತಿದ್ದರು. ಇದೇ ನೋವು ಮುಂದೆ ಅವರನ್ನು ಇಮ್ಯಾಜಿನೇಷನ್ ಲೈಬ್ರರಿ ಎಂಬ ಶಿಕ್ಷಣ ಸಂಸ್ಥೆಯನ್ನು ಆರಂಭಿಸಲು ಪ್ರೇರೇಪಿಸಿತು. ಇದು ಲಕ್ಷಾಂತರ ಬಡ ಮಕ್ಕಳಿಗೆ ಉಚಿತ ಪುಸ್ತಕಗಳನ್ನು ತಲುಪಿಸುವ ಮೂಲಕ ಜಗತ್ತಿನಾದ್ಯಂತ ಶೈಕ್ಷಣಿಕ ಕ್ರಾಂತಿಯನ್ನೇ ಮಾಡಿತು. ಅವರ ಸಂಗೀತ ಪ್ರಯಾಣ ಚರ್ಚ್‌ಗಳಿಂದ ಆರಂಭವಾಯಿತು. 13ನೇ ವಯಸ್ಸಿನಲ್ಲೇ ನ್ಯಾಶ್ವಿಲ್ಲೆಯ ಗ್ರಾಂಡ್ ಓಲ್ ಒಪ್ರಿ ವೇದಿಕೆಯಲ್ಲಿ ಜಾನಿ ಕ್ಯಾಶ್ ಅವರ ಪರಿಚಯದೊಂದಿಗೆ ಕಾಣಿಸಿಕೊಂಡ ಅವರು, ಅಸಾಧಾರಣ ಪ್ರತಿಭೆಯನ್ನು ಹೊಂದಿದ್ದರು.

ಸಂಗೀತ ಲೋಕದ ಮೈಲಿಗಲ್ಲುಗಳು

ಅವರ ವೃತ್ತಿಜೀವನವು ಪೋರ್ಟರ್ ವ್ಯಾಗನರ್ ಶೋನಿಂದ ಗರಿಗೆದರಿತು. 1967ರಲ್ಲಿ ತಮ್ಮದೇ ಆದ ಪ್ರಕಾಶನ ಸಂಸ್ಥೆಯನ್ನು ಆರಂಭಿಸಿದ ಅವರು, ಕಂಟ್ರಿ ಸಂಗೀತವನ್ನು ಪಾಪ್ ಶೈಲಿಗೆ ಬೆರೆಸಿ ಹೊಸ ಧಾಟಿಯನ್ನು ಸೃಷ್ಟಿಸಿದರು. ಇದು ಪಾರ್ಟನ್ ಅವರ ಬದುಕಿನ ಅತ್ಯಂತ ಜನಪ್ರಿಯ ಹಾಡು. ಈ ಹಾಡು ವಿಶ್ವದಾದ್ಯಂತ 100 ಮಿಲಿಯನ್ ಪ್ರತಿಗಳಿಗಿಂತ ಹೆಚ್ಚು ಮಾರಾಟವಾಗಿದೆ. ಮುಂದೆ ವಿಟ್ನಿ ಹ್ಯೂಸ್ಟನ್ ಅವರ ಧ್ವನಿಯಲ್ಲಿ ಈ ಹಾಡು ಜಾಗತಿಕ ದಾಖಲೆ ಸೃಷ್ಟಿಸಿತು.

ಬಹುಮುಖ ಪ್ರತಿಭೆ ಮತ್ತು ವ್ಯಕ್ತಿತ್ವ

ಡಾಲಿ ಪಾರ್ಟನ್ ಅವರು ಕೇವಲ ಹಾಡುಗಾರ್ತಿಯಾಗಿರಲಿಲ್ಲ, ಅವರು ಸ್ವಾವಲಂಬನೆಯ ಪ್ರತಿಮೆಯಾಗಿದ್ದರು. ಪುರುಷಾಧಿಪತ್ಯದ ಸಂಗೀತ ಉದ್ಯಮದಲ್ಲಿ ಸ್ವತಃ ಹಾಡುಗಳನ್ನು ಬರೆದು, ಸ್ವಂತ ಆರ್ಥಿಕತೆಯನ್ನು ನಿಯಂತ್ರಿಸುತ್ತಿದ್ದ ಅವರು ಮಹಿಳೆಯರಿಗೆ ದೊಡ್ಡ ಮಾದರಿಯಾಗಿದ್ದರು. ಅವರ ವಿಶಿಷ್ಟ ಶೈಲಿ—ಅಂದರೆ ದೊಡ್ಡದಾದ ಬ್ಲಾಂಡ್ ವಿಗ್‌ಗಳು, ದೇಹದ ಮೈಕಟ್ಟು ಮತ್ತು ಸ್ವಯಂ-ಹಾಸ್ಯದ ಮಾತುಗಳು ಅವರನ್ನು ಎಲ್ಲರ ಅಚ್ಚುಮೆಚ್ಚಿನ ವ್ಯಕ್ತಿಯನ್ನಾಗಿಸಿತ್ತು. ನಾನು ದಡ್ಡ ಬ್ಲಾಂಡ್ ಎಂದು ಗೇಲಿ ಮಾಡಿಕೊಳ್ಳುತ್ತಿದ್ದರೂ, ಆ ಆಟದ ಸೂತ್ರಧಾರ ನಾನೇ ಆಗಿರುತ್ತಿದ್ದೆ ಎಂದು ಹೇಳುತ್ತಿದ್ದರು.

ಹಾಲಿವುಡ್ ಮತ್ತು ಬ್ರಾಡ್‌ವೇ

1980ರಲ್ಲಿ ತೆರೆಕಂಡ '9 ಟು 5' ಚಿತ್ರದ ಮೂಲಕ ನಟಿಯಾಗಿ ಮಿಂಚಿದ ಅವರು, ನಂತರ 'ಸ್ಟೀಲ್ ಮ್ಯಾಗ್ನೋಲಿಯಾಸ್' ಚಿತ್ರಗಳ ಮೂಲಕ ಅಪ್ರತಿಮ ನಟಿಯಾಗಿ ಗುರುತಿಸಿಕೊಂಡರು. ಅವರ ಬದುಕು ಮತ್ತು ಸಂಗೀತವನ್ನು ಆಧರಿಸಿದ 'ಡಾಲಿ: ಎ ಟ್ರೂ ಒರಿಜಿನಲ್ ಮ್ಯೂಸಿಕಲ್' ಎಂಬ ಬ್ರಾಡ್‌ವೇ ನಾಟಕವು ಸಿದ್ಧವಾಗಿದೆ.

ಪಾರ್ಟನ್ ಅವರ ವಿಶೇಷತೆಯೆಂದರೆ ಅವರ ತಟಸ್ಥ ನಿಲುವು. ರಾಜಕೀಯದ ಬಗ್ಗೆ ಎಂದಿಗೂ ಬಹಿರಂಗವಾಗಿ ಮಾತನಾಡದ ಅವರು, "ನನಗೆ ಎರಡೂ ಕಡೆಯವರು ಅಭಿಮಾನಿಗಳಿದ್ದಾರೆ, ಹಾಗಾಗಿ ನಾನು ರಾಜಕೀಯವನ್ನು ಅಂತರ ಕಾಯ್ದುಕೊಳ್ಳುತ್ತೇನೆ" ಎಂದು ಹೇಳುತ್ತಿದ್ದರು. ಆದರೂ, ರಾಕ್ ಅಂಡ್ ರೋಲ್ ಹಾಲ್ ಆಫ್ ಫೇಮ್‌ನಲ್ಲಿ ತಮಗೆ ಸ್ಥಾನ ಸಿಕ್ಕಾಗ, ವಿನಮ್ರವಾಗಿ ಅದನ್ನು ಸ್ವೀಕರಿಸಿ ರಾಕ್ ಆಲ್ಬಂ ಅನ್ನು ಬಿಡುಗಡೆ ಮಾಡುವಷ್ಟು ಶಕ್ತಿಯುತವಾಗಿದ್ದರು.