ಇಂಡೋನೇಷ್ಯಾದಲ್ಲಿ 7.7 ತೀವ್ರತೆಯ ಭೂಕಂಪ: ಇಬ್ಬರು ಸಾವು- ಸುನಾಮಿ ಎಚ್ಚರಿಕೆ

ಇಂಡೋನೇಷ್ಯಾದ ಫ್ಲೋರೆಸ್ ದ್ವೀಪದ ಸಮೀಪ ಶನಿವಾರ ಮುಂಜಾನೆ ಸಂಭವಿಸಿದ ಪ್ರಬಲ ಭೂಕಂಪದಿಂದ ಕನಿಷ್ಠ ಇಬ್ಬರು ಮೃತಪಟ್ಟಿದ್ದು, ಹಲವು ಕಟ್ಟಡಗಳು ಹಾಗೂ ಮನೆಗಳಿಗೆ ಹಾನಿಯಾಗಿದೆ. ರಿಕ್ಟರ್ ಮಾಪಕದಲ್ಲಿ 7.7 ತೀವ್ರತೆಯ ಭೂಕಂಪ ಸಂಭವಿಸಿದ್ದು, ಕೆಲಕಾಲ ಸುನಾಮಿ ಎಚ್ಚರಿಕೆಯನ್ನೂ ನೀಡಲಾಗಿತ್ತು. ಬಳಿಕ ಎಚ್ಚರಿಕೆಯನ್ನು ಹಿಂಪಡೆಯಲಾಗಿದೆ.

ಅಮೆರಿಕದ ಭೂವೈಜ್ಞಾನಿಕ ಸಮೀಕ್ಷೆ (USGS) ಪ್ರಕಾರ, ಇಂಡೋನೇಷ್ಯಾ ಕಾಲಮಾನ ಶನಿವಾರ ಬೆಳಗ್ಗೆ 5.58ಕ್ಕೆ ಭೂಕಂಪ ಸಂಭವಿಸಿದೆ. ಭೂಮಿಯ ಮೇಲ್ಮೈಯಿಂದ ಸುಮಾರು 10 ಕಿಲೋಮೀಟರ್ ಆಳದಲ್ಲಿ ಕಂಪನದ ಕೇಂದ್ರ ಪತ್ತೆಯಾಗಿದೆ. ಪೂರ್ವ ನುಸಾ ತೆಂಗಾರಾ ಪ್ರಾಂತ್ಯದ ಎಂಡೆ ನಗರದ ಉತ್ತರ-ವಾಯವ್ಯ ಭಾಗದಲ್ಲಿ ಸುಮಾರು 68 ಕಿಲೋಮೀಟರ್ ದೂರದಲ್ಲಿ ಭೂಕಂಪದ ಕೇಂದ್ರಬಿಂದು ಇತ್ತು.

ಭೂಕಂಪದ ತೀವ್ರತೆಗೆ ಹಲವು ಕಟ್ಟಡಗಳು ಕುಸಿದಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಜನರು ಭಯಭೀತರಾಗಿ ಮನೆಗಳು ಹಾಗೂ ಕಟ್ಟಡಗಳಿಂದ ಹೊರಗೆ ಓಡುತ್ತಿರುವ ದೃಶ್ಯಗಳೂ ವೈರಲ್ ಆಗಿವೆ.

ಭೂಕಂಪದ ವೇಳೆ ಮಾರುಕಟ್ಟೆಯಲ್ಲಿದ್ದ ಜನ

ನಗೆಕೆಯೊ ಪ್ರದೇಶದ ನಿವಾಸಿಯೊಬ್ಬರು ಭೂಕಂಪ ಸಂಭವಿಸಿದಾಗ ತಾವು ಮಾರುಕಟ್ಟೆಯಲ್ಲಿದ್ದುದಾಗಿ ತಿಳಿಸಿದ್ದಾರೆ. “ಭೂಮಿ ಬಲವಾಗಿ ಕಂಪಿಸಲು ಆರಂಭಿಸಿತು. ಅದೃಷ್ಟವಶಾತ್ ನಾವು ಆಗಲೇ ಮನೆಯ ಹೊರಗಿದ್ದೆವು. ಜನರು ಭಯಭೀತರಾಗಿ ಎಲ್ಲೆಂದರಲ್ಲಿ ಓಡುತ್ತಿದ್ದರು. ಸದ್ಯ ನಾವು ಸ್ಥಳಾಂತರಗೊಳ್ಳುತ್ತಿದ್ದೇವೆ ಮತ್ತು ಗುಡ್ಡ ಪ್ರದೇಶಗಳತ್ತ ತೆರಳಲು ಪ್ರಯತ್ನಿಸುತ್ತಿದ್ದೇವೆ. ನನ್ನ ಕುಟುಂಬ ಸುರಕ್ಷಿತವಾಗಿದೆ. ಯಾರಿಗೂ ಗಾಯವಾಗಿಲ್ಲ,” ಎಂದು ಅವರು ತಿಳಿಸಿದ್ದಾರೆ.

31 ವರ್ಷದ ಆಸ್ಪತ್ರೆಯ ಗ್ರಾಹಕ ಸೇವಾ ಅಧಿಕಾರಿ ಮಾತನಾಡಿ, “ಹಠಾತ್ತನೆ ಭೂಮಿ ಕಂಪಿಸಲು ಆರಂಭಿಸಿದಾಗ ನಾನು ಭಯಭೀತನಾದೆ. ರೋಗಿಗಳೂ ಆಸ್ಪತ್ರೆಯಿಂದ ಹೊರಗೆ ಓಡಿದರು. ಕಂಪನ ಬಹಳ ಪ್ರಬಲವಾಗಿತ್ತು. ಕೆಲವು ಗೋಡೆಗಳಲ್ಲಿ ಬಿರುಕು ಬಿದ್ದಿರುವುದನ್ನು ನೋಡಿದೆ,” ಎಂದಿದ್ದಾರೆ.

ಹಲವು ಕಟ್ಟಡಗಳಿಗೆ ಹಾನಿ

ಪೂರ್ವ ನುಸಾ ತೆಂಗಾರಾ ಪ್ರಾಂತ್ಯದ ಸಿಕ್ಕಾ ಪ್ರದೇಶದಲ್ಲೂ ಹಲವು ಕಟ್ಟಡಗಳು ಹಾನಿಗೊಳಗಾಗಿವೆ ಎಂದು ಸ್ಥಳೀಯರು ತಿಳಿಸಿದ್ದಾರೆ. “ಇಲ್ಲಿ ಹಲವು ಕಟ್ಟಡಗಳು ಹಾನಿಗೊಳಗಾಗಿವೆ. ಮಾಮೆರೆ ಬಂದರು ಟರ್ಮಿನಲ್‌ನಲ್ಲಿದ್ದ ಪ್ರಯಾಣಿಕರ ನಿರೀಕ್ಷಣಾ ಕೊಠಡಿ ಕುಸಿದಿರುವುದನ್ನು ನೋಡಿದ್ದೇನೆ,” ಎಂದು ಸ್ಥಳೀಯ ನಿವಾಸಿಯೊಬ್ಬರು ತಿಳಿಸಿದ್ದಾರೆ.

ಸುನಾಮಿ ಎಚ್ಚರಿಕೆ

ಭೂಕಂಪದ ಬಳಿಕ ಇಂಡೋನೇಷ್ಯಾದ ಹವಾಮಾನ, ಹವಾಮಾನಶಾಸ್ತ್ರ ಮತ್ತು ಭೂಭೌತಶಾಸ್ತ್ರ ಸಂಸ್ಥೆ (BMKG) ಸುನಾಮಿ ಅಲೆಗಳ ಸಾಧ್ಯತೆಯ ಬಗ್ಗೆ ಎಚ್ಚರಿಕೆ ನೀಡಿತ್ತು. ಫ್ಲೋರೆಸ್‌ನ ಉತ್ತರ ಕರಾವಳಿ, ದಕ್ಷಿಣ ಭಾಗಗಳು ಹಾಗೂ ದಕ್ಷಿಣದ ದ್ವೀಪಗಳಲ್ಲಿರುವ ಜನರು ತಕ್ಷಣ ಸುರಕ್ಷಿತ ಸ್ಥಳಗಳಿಗೆ ತೆರಳುವಂತೆ ಅಧಿಕಾರಿಗಳು ಸೂಚಿಸಿದ್ದರು.

ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಸಂಸ್ಥೆ (BNPB) ಅಧಿಕಾರಿಯೊಬ್ಬರು, “ಕರಾವಳಿಯಿಂದ ದೂರ ಸರಿಯಿರಿ. ಕನಿಷ್ಠ ಎರಡು ಕಿಲೋಮೀಟರ್ ಒಳನಾಡಿಗೆ ತೆರಳಿ ಅಥವಾ ಸಮುದ್ರಮಟ್ಟದಿಂದ ಕನಿಷ್ಠ 10 ಮೀಟರ್ ಎತ್ತರದಲ್ಲಿರುವ ಗುಡ್ಡ ಪ್ರದೇಶಗಳಿಗೆ ತೆರಳಿ,” ಎಂದು ಜನರಿಗೆ ಸೂಚಿಸಿದ್ದರು. ಆದರೆ ಕೆಲ ಸಮಯದ ಬಳಿಕ ಸುನಾಮಿ ಎಚ್ಚರಿಕೆಯನ್ನು ಹಿಂಪಡೆಯಲಾಯಿತು.

1992ರ ಫ್ಲೋರೆಸ್ ಸುನಾಮಿ ನೆನಪು

ಫ್ಲೋರೆಸ್ ದ್ವೀಪದಲ್ಲಿ ಭೂಕಂಪದಿಂದ ಸುನಾಮಿ ಸಂಭವಿಸುತ್ತಿರುವುದು ಇದೇ ಮೊದಲಲ್ಲ. 1992ರಲ್ಲಿ 7.0 ತೀವ್ರತೆಯ ಭೂಕಂಪದ ಬಳಿಕ ಉಂಟಾದ ಸುನಾಮಿಯಿಂದ ಫ್ಲೋರೆಸ್‌ನ ಆಗ್ನೇಯ ಭಾಗದಲ್ಲಿ ಸುಮಾರು 2,500 ಜನರು ಮೃತಪಟ್ಟಿದ್ದರು.

ಇಂಡೋನೇಷ್ಯಾದಲ್ಲಿ ಪದೇಪದೇ ಭೂಕಂಪ ಏಕೆ?

17,000ಕ್ಕೂ ಹೆಚ್ಚು ದ್ವೀಪಗಳನ್ನು ಹೊಂದಿರುವ ಇಂಡೋನೇಷ್ಯಾ ಭೂಕಂಪ ಪೀಡಿತ ಪ್ರದೇಶದಲ್ಲಿದೆ. ಪೆಸಿಫಿಕ್ ‘ರಿಂಗ್ ಆಫ್ ಫೈರ್’ ವ್ಯಾಪ್ತಿಯಲ್ಲಿರುವುದರಿಂದ ಇಂಡೋನೇಷ್ಯಾ ಹಾಗೂ ಸುತ್ತಮುತ್ತಲಿನ ರಾಷ್ಟ್ರಗಳಲ್ಲಿ ಆಗಾಗ್ಗೆ ಪ್ರಬಲ ಭೂಕಂಪಗಳು ಸಂಭವಿಸುತ್ತವೆ. ಜಪಾನ್‌ನಿಂದ ಆಗ್ನೇಯ ಏಷ್ಯಾ ಮೂಲಕ ಪೆಸಿಫಿಕ್ ಸಾಗರದ ಸುತ್ತಲೂ ವಿಸ್ತರಿಸಿರುವ ‘ರಿಂಗ್ ಆಫ್ ಫೈರ್’ ಪ್ರದೇಶವು ವಿಶ್ವದ ಅತ್ಯಂತ ಸಕ್ರಿಯ ಭೂಕಂಪ ಮತ್ತು ಜ್ವಾಲಾಮುಖಿ ವಲಯಗಳಲ್ಲಿ ಒಂದಾಗಿದೆ.

2004ರಲ್ಲಿ ಸುಮಾತ್ರಾ ಕರಾವಳಿಯ ಸಮೀಪ ಸಂಭವಿಸಿದ 9.1 ತೀವ್ರತೆಯ ಭೂಕಂಪದಿಂದ ಭೀಕರ ಸುನಾಮಿ ಉಂಟಾಗಿತ್ತು. ಈ ದುರಂತದಲ್ಲಿ ಇಂಡೋನೇಷ್ಯಾ ಸೇರಿದಂತೆ ಇಡೀ ಪ್ರದೇಶದಲ್ಲಿ ಸುಮಾರು 2.2 ಲಕ್ಷ ಜನರು ಮೃತಪಟ್ಟಿದ್ದರು. ಇವರಲ್ಲಿ ಸುಮಾರು 1.7 ಲಕ್ಷ ಮಂದಿ ಇಂಡೋನೇಷ್ಯಾದವರಾಗಿದ್ದರು. 2018ರಲ್ಲಿ ಲೊಂಬೋಕ್ ದ್ವೀಪದಲ್ಲೂ ಪ್ರಬಲ ಭೂಕಂಪ ಸಂಭವಿಸಿತ್ತು. ನಂತರದ ಹಲವು ದಿನಗಳಲ್ಲಿ ಸರಣಿ ಕಂಪನಗಳು ಸಂಭವಿಸಿದ್ದು, ಲೊಂಬೋಕ್ ಹಾಗೂ ನೆರೆಯ ಸುಂಬಾವಾ ದ್ವೀಪಗಳಲ್ಲಿ 550ಕ್ಕೂ ಹೆಚ್ಚು ಮಂದಿ ಮೃತಪಟ್ಟಿದ್ದರು.