ಭಾರತ-ಭೂತಾನ್ ನಡುವೆ ಇಂಧನ ವಿವಾದ: E20 ಪೆಟ್ರೋಲ್ ಪೂರೈಕೆ ಬಗ್ಗೆ ಭಿನ್ನ ಹೇಳಿಕೆ; ಏನಿದು ವಿವಾದ?

ಭಾರತ ಮತ್ತು ಭೂತಾನ್ ನಡುವೆ ಎಥೆನಾಲ್ ಮಿಶ್ರಿತ E20 ಪೆಟ್ರೋಲ್ ಪೂರೈಕೆ ವಿಚಾರವಾಗಿ ರಾಜತಾಂತ್ರಿಕ ಮಟ್ಟದಲ್ಲಿ ಭಿನ್ನಾಭಿಪ್ರಾಯ ವ್ಯಕ್ತವಾಗಿದೆ. ಭೂತಾನ್‌ನ ದಿ ಭೂತಾನೀಸ್ ಪತ್ರಿಕೆಯ ಸಂಪಾದಕ ಟೆನ್ಜಿಂಗ್ ಲಾಮ್ಸಾಂಗ್ ಮಾಡಿರುವ ವರದಿ ಹಾಗೂ ಭಾರತದ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದ (MoPNG) ಸ್ಪಷ್ಟನೆ ಪರಸ್ಪರ ವಿರುದ್ಧವಾಗಿದ್ದು, ಈ ವಿಚಾರ ಚರ್ಚೆಗೆ ಗ್ರಾಸವಾಗಿದೆ.

ಲಾಮ್ಸಾಂಗ್ ತಮ್ಮ ವರದಿಯಲ್ಲಿ, ಭಾರತದಿಂದ E20 ಪೆಟ್ರೋಲ್ ಪೂರೈಕೆಯ ಕುರಿತು ತಾಂತ್ರಿಕ ಸಭೆಗಳಲ್ಲಿ ಚರ್ಚೆಯಾಗಿತ್ತು. ಭೂತಾನ್ ಅಧಿಕಾರಿಗಳು ತಮ್ಮ ದೇಶಕ್ಕೆ ಸಾಂಪ್ರದಾಯಿಕ ಪೆಟ್ರೋಲ್ ಪೂರೈಕೆಯನ್ನು ಮುಂದುವರಿಸುವಂತೆ ಭಾರತವನ್ನು ಕೋರಿದ್ದರು ಎಂದು ಅವರು ಹೇಳಿದ್ದಾರೆ.

ಭೂತಾನ್‌ನಲ್ಲಿರುವ ಭೂಗತ ಇಂಧನ ಸಂಗ್ರಹ ಟ್ಯಾಂಕ್‌ಗಳು ಎಥೆನಾಲ್ ಮಿಶ್ರಿತ ಇಂಧನಕ್ಕೆ ಸೂಕ್ತವಾಗಿಲ್ಲ. ಎಥೆನಾಲ್ ನೀರನ್ನು ಸುಲಭವಾಗಿ ಹೀರಿಕೊಳ್ಳುವ ಗುಣ ಹೊಂದಿರುವುದರಿಂದ ಇಂಧನದ ಗುಣಮಟ್ಟ ಕುಸಿಯುವ ಆತಂಕವಿದೆ ಎಂದು ಅವರು ವರದಿ ಮಾಡಿದ್ದರು.

ಭಾರತದ ಸಚಿವಾಲಯದಿಂದ ಸ್ಪಷ್ಟ ನಿರಾಕರಣೆ

ಈ ವರದಿಯನ್ನು ಭಾರತದ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯ ಸಂಪೂರ್ಣವಾಗಿ ತಳ್ಳಿಹಾಕಿದೆ. "ಭಾರತದ ಯಾವುದೇ ತೈಲ ಮಾರುಕಟ್ಟೆ ಕಂಪನಿ (OMC) ಭೂತಾನ್‌ಗೆ E20 ಪೆಟ್ರೋಲ್ ಪೂರೈಕೆಯ ಪ್ರಸ್ತಾವನೆ ನೀಡಿಲ್ಲ. ಯಾವುದೇ ಅಧಿಕೃತ ರಫ್ತು ಪ್ರಸ್ತಾಪವೂ ಇರಲಿಲ್ಲ. ಈ ವರದಿ ತಪ್ಪಾಗಿದೆ," ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ.

ಭಾರತದಲ್ಲಿ E20 ಇಂಧನ ಬಳಕೆಯ ಬಗ್ಗೆ ವಾಹನಗಳ ಹೊಂದಾಣಿಕೆ ಹಾಗೂ ಮೈಲೇಜ್ ಕುಸಿತ ಕುರಿತ ಚರ್ಚೆಗಳು ನಡೆಯುತ್ತಿರುವ ಸಂದರ್ಭದಲ್ಲಿ, ಈ ವಿಷಯ ರಾಜಕೀಯ ವಿವಾದಕ್ಕೆ ಕಾರಣವಾಗದಂತೆ ಸಚಿವಾಲಯ ತಕ್ಷಣ ಸ್ಪಷ್ಟನೆ ನೀಡಿದೆ.

ಭೂತಾನ್ ದಾಖಲೆ ಬಿಡುಗಡೆ ಮಾಡಿದ ಸಂಪಾದಕ

ಭಾರತದ ಅಧಿಕೃತ ನಿರಾಕರಣೆಯ ಬಳಿಕ ದಿ ಭೂತಾನೀಸ್ ಸಂಪಾದಕ ಟೆನ್ಜಿಂಗ್ ಲಾಮ್ಸಾಂಗ್, ಭೂತಾನ್ ಸರ್ಕಾರದ ವ್ಯಾಪಾರ ಇಲಾಖೆಯಿಂದ ತಮಗೆ ಬಂದಿರುವ ಲಿಖಿತ ಉತ್ತರವನ್ನು ಸಾಮಾಜಿಕ ಜಾಲತಾಣ X ನಲ್ಲಿ ಹಂಚಿಕೊಂಡಿದ್ದಾರೆ. ಆ ದಾಖಲೆಯಲ್ಲಿ, "ಪ್ರಸ್ತುತ ಭೂತಾನ್ ಭಾರತದಿಂದ E20 ಪೆಟ್ರೋಲ್ ಆಮದು ಮಾಡಿಕೊಳ್ಳುತ್ತಿಲ್ಲ" ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ.

ಸಾಂಪ್ರದಾಯಿಕ ಪೆಟ್ರೋಲ್‌ಗೆ ಭೂತಾನ್ ಒಲವು ಯಾಕೆ?

ದಾಖಲೆಯ ಪ್ರಕಾರ, ಎಥೆನಾಲ್ ಮಿಶ್ರಿತ ಪೆಟ್ರೋಲ್ ನೀರನ್ನು ಸುಲಭವಾಗಿ ಹೀರಿಕೊಳ್ಳುವ ಗುಣ ಹೊಂದಿದೆ. ಭೂತಾನ್‌ನ ಪರ್ವತ ಪ್ರದೇಶಗಳಲ್ಲಿ ತೇವಾಂಶ ಹೆಚ್ಚಿರುವುದರಿಂದ ಇಂಧನದಲ್ಲಿ ನೀರಿನ ಅಂಶ ಸೇರುವ ಸಾಧ್ಯತೆ ಹೆಚ್ಚು. ಇದರಿಂದ ಇಂಧನದ ಗುಣಮಟ್ಟ ಕುಸಿದು ವಾಹನಗಳ ಕಾರ್ಯಕ್ಷಮತೆ ಮೇಲೆ ಪರಿಣಾಮ ಬೀರುವ ಆತಂಕವಿದೆ.

ಇದಲ್ಲದೆ, ಭೂತಾನ್‌ನಲ್ಲಿರುವ ಭೂಗತ ಇಂಧನ ಸಂಗ್ರಹ ಟ್ಯಾಂಕ್‌ಗಳು ಹಾಗೂ ಇಂಧನ ವಿತರಣಾ ವ್ಯವಸ್ಥೆ E20 ಇಂಧನ ನಿರ್ವಹಣೆಗೆ ಸೂಕ್ತವಾಗಿಲ್ಲ. ಅವುಗಳನ್ನು ಬಳಸಬೇಕಾದರೆ ಸಂಪೂರ್ಣ ಮೂಲಸೌಕರ್ಯವನ್ನು ನವೀಕರಿಸಬೇಕಾಗುತ್ತದೆ ಎಂದು ದಾಖಲೆ ತಿಳಿಸಿದೆ.